‏ Ezekiel 16

1ဒီးယွၤအကလုၢ်ဘၣ်ယၤ,ဒီးစံးဝဲဒၣ်, 2ပှၤကညီဖိခွါဧၢ,ဘိးဘၣ်သ့ၣ်ညါယရူၤၡလ့ၣ်လၢအတၢ်သးဘၣ်အၢတဖၣ်, 3ဒီးစံး,ကစၢ်ယွၤစံးလၢယရူၤၡလ့ၣ်ဒ်အံၤ,နအိၣ်အလီၢ်လၢအခီၣ်ထံး,ဒီးနအိၣ်ဖျဲၣ်အလီၢ်န့ၣ်မ့ၢ်ကီၢ်ကနၤဧၣ်လီၤ.နပၢ်မ့ၢ်ပှၤအမိၢ်ဖိ,ဒီးနမိၢ်မ့ၢ်ပှၤဃ့ၤသးဖိလီၤ.

4ဒီးလၢနအိၣ်ဖျဲၣ်န့ၣ်တၢ်သကူးတဲာ်ဘၣ်နဒ့လၢမုၢ်တနံၤလၢနအိၣ်ဖျဲၣ်န့ၣ်,ဒီးတၢ်တသ့စီဘၣ်နၤလၢထံလၢနတကဆှီထီၣ်ဘၣ်,တၢ်တဖှံဘၣ်နၤလၢအံသၣ်ဘၣ်,ဒီးတဘိၣ်ထီၣ်ဘၣ်နၤလၢတၢ်သွံတၢ်စီၤဘၣ်. 5တၢ်အမဲာ်တသးအိၣ်ဘၣ်နၤတုၤအကသးကညီၤနၤ,ဒ်သိးအကမၤတၢ်န့ၣ်တဖၣ်တမံၤမံၤလၢနဂီၢ်ဘၣ်.မ့မ့ၢ်လၢမုၢ်တနံၤလၢနအိၣ်ဖျဲၣ်န့ၣ်တၢ်ကွံာ်တ့ၢ်ကွံာ်နၤဆူတၢ်ပျီပူၤလၢတၢ်သးဘၣ်အၢနၤအဃိလီၤ.

6ဒီးတုၤယလဲၤတြူာ်နၤ,ဒီးထံၣ်နၤလၢနကဘၣ်တၢ်ယီၢ်လီၤနၤလၢနသွံၣ်ဒၣ်နဲအပူၤဒီး,လၢနအိၣ်လၢနသွံၣ်ပူၤန့ၣ်,ယစံးနၤ,မူထီၣ်တက့ၢ်.မ့ၢ်မးယစံးဘၣ်နၤလၢနအိၣ်လၢနသွံၣ်ပူၤန့ၣ်မူထီၣ်တက့ၢ်.

7ယဒုးဒိၣ်ထီၣ်နၤဒ်တၢ်အမဲထီၣ်လၢပှၢ်လၢ်ကျါအသိးန့ၣ်,ဒီးနဒိၣ်ထီၣ်,ဒီးနနီၢ်ထီထီၣ်,ဒီးနကဲထီၣ်ပှၤအိၣ်ဒီးအဃံအလၤလီၤဆီဒၣ်တၢ်လီၤ.နနုၢ်ဒိးထီၣ်,ဒီးနခိၣ်သူထီထီၣ်လီၤ.မ့မ့ၢ်နအိၣ်ဘ့ၣ်ဆ့,ဒီးနကူနသိးတအိၣ်ဘၣ်လီၤ.

8ဒီးတုၤယလဲၤတြူာ်နၤ,ဒီးယထံၣ်နၤဒီး,ကွၢ်ကွၢ်,မ့ၢ်နကတီၢ်,တၢ်အဲၣ်အကတီၢ်လီၤ.ဒီးယဒါလီၤယယၣ်အသရ့ၤလၢနလိၤ,ဒီးလုးဘၢနတၢ်အိၣ်ဘ့ၣ်ဆ့,ဒီးယဆိၣ်တၢ်ဒီးနၤ,ဒီးယအၢၣ်လီၤအီလီၤတၢ်ဒီးနၤ,ဒီးနကဲထီၣ်ယတၢ်လီၤ,ယွၤစံးဝဲဒၣ်.

9တုၤနုၤတဘျီယသ့စီနၤလၢထံ,မ့ၢ်မးယသ့စီကွံာ်နသွံၣ်လၢနလိၤစီဖ့ကလ့ၤ,ဒီးယဖှူနၤလၢသိလီၤ. 10ဒီးယဒုးကူဒုးသိးနၤဒီးတၢ်ကူတၢ်သိးဆးကံၣ်ဃ့အသး,ဒီးယဖျီၣ်နခီၣ်ဒီးခီၣ်ဖံးတၢ်ဖံး,ဒီးကံၢ်တူာ်နယီၢ်ဒ့ဒီးဖှီဝါကဆှၣ်,ဒီးကျၢၢ်ဘၢနၤလၢသတိၢ်လီၤ.

11ဒီးယကယၢကယဲနၤလၢတၢ်ကယၢကယဲ,ဒီးယဒုးသိးနစုလၢထံဖှံၣ်,ဒီးယဒုးလံာ်နကိာ်လၢသွဲ, 12ဒီးယဒုးတုၢ်ထီၣ်နၤလၢနးဒ့ကွီၤ,ဒီးယဒုးဒံးထီၣ်နၤလၢနၢ်ဒံးပသံး,ဒီးယဒုးကုာ်နၤလၢတၢ်ခိၣ်သလုးအဃံအလၤလီၤ.

13ဒီးနအိၣ်ကယၢကယဲဒီးထူဧိၤလွဲဧိၤ,ကျိၣ်ဧိၤစ့ဧိၤ,ဒီးနကူနသိးမ့ၢ်ဖှီဝါကဆှၣ်,ဒီးသတိၢ်,ဒီးတၢ်ဆးကံၣ်ဃ့အသးလီၤ.နအီၣ်ကိၣ်အကမူၣ်,ဒီးကနဲစီ,ဒီးသိ,ဒီးနဃံနလၤဂ့ၤမးလီၤ.ဒီးနဘီၣ်ထီၣ်ညီထီၣ်တုၤနကဲထီၣ်နီၢ်ပၤမုၣ်လီၤ.

14ဒီးနမံၤဟူထီသါလီၤလၢနဃံနလၤအဃိလၢပှၤကလုာ်တဖၣ်အကျါလီၤ.အဂ့ၢ်ဒ်အံၤ,မ့ၢ်အလၢအပှဲၤလၢတၢ်အဂ့ၤအဘၣ်လၢယပာ်လၢနလိၤအဃိန့ၣ်လီၤ,ယွၤစံးဝဲဒၣ်.

15ဘၣ်ဆၣ်ဒီးနသန့ၤနသးလၢနဃံနလၤ,ဒီးနမၤကမၣ်မုၣ်ကမၣ်ခွါလၢနမံၤနသၣ်အဃိ,ဒီးနမၤကမၣ်မုၣ်ကမၣ်ခွါအါမးဒီးကယဲၢ်ပှၤလၢအလဲၤတြူာ်လၢနအိၣ်လီၤ.အန့ၣ်မ့ၢ်အဝဲဒၣ်အတၢ်လီၤ.

16ဒီးနဟံးန့ၢ်တၢ်လၢနကူနသိးအကျါ,ဒီးနမၤတၢ်အလီၢ်ထီၣ်ထီ,ကယၢကယဲဒီးတၢ်ကံၣ်ဃ့,ဒီးနမၤကမၣ်မုၣ်ကမၣ်ခွါလၢအဖီခိၣ်လီၤ.တၢ်ဒ်န့ၣ်သိးတဟဲလၢၤဘၣ်ဒီးတမၤလၢၤဘၣ်အသးဘၣ်. 17ဒီးနဟံးန့ၢ်နကယၢကယဲအဃံအလၤလၢယထူဧိၤလွဲဧိၤ,ဒီးယကျိၣ်ဧိၤစ့ဧိၤအကျါလၢယဟ့ၣ်တ့ၢ်နၤ,ဒီးတ့ပှၤပိာ်ခွါအဂီၤလၢအီၤလၢနဂီၢ်,ဒီးနမၤကမၣ်မုၣ်ကမၣ်ခွါဒီးအီၤ, 18ဒီးနဟံးန့ၢ်နကူနသိးဆးကံၣ်ဃ့အသး,ဒီးကျၢၢ်ဘၢအီၤ,ဒီးပာ်ယသိဧိၤချါဧိၤ,ဒီးယတၢ်ဆိၣ်ကဲၤနၢမူလၢအမဲာ်ညါလီၤ.

19ဒီးယတၢ်အီၣ်လၢယဟ့ၣ်လီၤနၤ,ကိၣ်ကမူၣ်,ဒီးသိ,ဒီးကနဲစီလၢယလုၢ်အီၣ်နၤလၢအီၤန့ၣ်နပာ်လီၤလၢအမဲာ်ညါလၢတၢ်နၢမူအိၣ်ဘှံးအဂီၢ်လီၤ.ဒီးတၢ်မၤအသးဒ်န့ၣ်,ကစၢ်ယွၤစံးဝဲဒၣ်.

20ဒီးနဟံးန့ၢ်နဖိမုၣ်,ဒီးနဖိခွါလၢနဆံးစၢ်န့ၢ်ယၤ,ဒီးလုၢ်ထီၣ်အီၤ,လၢတၢ်ကအီၣ်ကွံာ်အီၤအဂ့ၢ်လီၤ.နမၤကမၣ်မုၣ်ကမၣ်ခွါန့ၣ်မ့ၢ်အတအါဘၣ်ဒီး, 21နမၤသံယဖိ,ဒီးဟ့ၣ်လီၤကွံာ်အီၤဒ်သိးအကခီဂာ်မ့ၣ်အူလၢအဂီၢ်န့ၣ်စ့ၢ်ကီးဧါ.

22ဒီးလၢနတၢ်သးဘၣ်အၢခဲလၢာ်အပူၤ,ဒီးနမၤကမၣ်မုၣ်ကမၣ်ခွါခဲလၢာ်အပူၤန့ၣ်နတသ့ၣ်နီၣ်ထီၣ်က့ၤနဖိသၣ်ဒံးအမုၢ်နံၤတဖၣ်ဖဲနအိၣ်ဘ့ၣ်ဆ့,ဒီးနကူနသိးတအိၣ်ဘၣ်,ဒီးဘူးဒီးတၢ်ကယီၢ်လီၤနၤလၢနသွံၣ်ပူၤလီၤ.

23နဘၣ်အဖှီၣ်,နဘၣ်အဖှီၣ်လီၤ.ကစၢ်ယွၤစံးဝဲဒၣ်,ဒီးလၢနတၢ်အၢခဲလၢာ်အလီၢ်ခံန့ၣ်, 24တၢ်မၤအသးလၢနမၤတၢ်ခိၣ်ဒုးထီၣ်အသးလၢနဂီၢ်,ဒီးမၤတၢ်အလီၢ်ထီၣ်ထီလၢကျဲမုၢ်ကိးဘိဒဲးအပူၤလၢနဂီၢ်လီၤ. 25နမၤနလီၢ်ထီၣ်ထီလၢကယဲၢ်ကျဲအခီၣ်ထံး,ဒီးဒုးသးဘၣ်အၢနဃံနလၤ,ဒီးနသကါနခီၣ်လၢကယဲၢ်ပှၤလၢအလဲၤတြူာ်လၢနၤတဂၤလၢ်လၢ်အဂီၢ်,ဒီးမၤအါထီၣ်နမၤကမၣ်မုၣ်ကမၣ်ခွါလီၤ.

26ဒီးနမၤကမၣ်မုၣ်ကမၣ်ခွါဒီးပှၤအဲၤကူပတူးဖိ,ပှၤအိၣ်ဝဲလၢနဃၢၤ,လၢအဖံးအညၣ်ဖးဒိၣ်,ဒီးမၤအိၣ်ထီၣ်နမၤကမၣ်မုၣ်ကမၣ်ခွါတဖၣ်လၢနကထိၣ်ဂဲၤယသးထီၣ်အဂ့ၢ်လီၤ. 27မၤသးဒ်န့ၣ်ဒီး,ကွၢ်ကွၢ်,ယယူာ်ထီၣ်ယစုထီဒါနၤ,ဒီးမၤစှၤလီၤနတၢ်အီၣ်တၢ်အီ,ဒီးဟ့ၣ်လီၤကွံာ်နၤဖဲပှၤအသးလၢအသးဟ့နၤ,ပှၤဖလ့ၡသးဖိအဖိမုၣ်လၢအမဲာ်ဆှးလၢနကျဲကလုာ်ကလိၤအဃိလီၤ.

28ဒီးနမၤကမၣ်မုၣ်ကမၣ်ခွါဒီးပှၤအၤရှူၢ်ဖိလၢနမၤဘျဲးမၤတသ့ဘၣ်အဃိလီၤ.မ့ၢ်မးနမၤကမၣ်မုၣ်ကမၣ်ခွါဒီးအီၤ,ဘၣ်ဆၣ်ဒီးနမၤဘျဲးမၤတသ့ဘၣ်. 29ဒီးနမၤအါထီၣ်နမၤကမၣ်မုၣ်ကမၣ်ခွါလၢကီၢ်ကနၤဧၣ်ပၢၢ်လၢကီၢ်က့ၤစ့း,ဒီးနမၤဘျဲးမၤတသ့ဘၣ်.

30မ့ၢ်နမၤတၢ်ခဲလၢာ်န့ၣ်လၢပိာ်မုၣ်လၢအပာ်ဒူအသး,ဒီးမၤကမၣ်မုၣ်ကမၣ်ခွါတဂၤမၤဝဲဒီး,နသးအဂံၢ်စၢ်ဘါစၢ်ဒ်လဲၣ်,ကစၢ်ယွၤစံးဝဲဒၣ်. 31ဒီးနမၤနတၢ်ခိၣ်ဒုးထီၣ်အသးလၢကျဲကိးဘိဒဲးအခီၣ်ထံး,ဒီးမၤနတၢ်အလီၢ်ထီၣ်ထီလၢကျဲမုၢ်ကိးဘိဒဲးအပူၤ,ဒီးနတဒ်ဘၣ်ပှၤဃဲသဲမုၣ်အသိးဘၣ်.အဂ့ၢ်ဒ်အံၤ,နတပးကဲဘၣ်တၢ်အဘူးအလဲဘၣ်. 32မ့ၢ်ဒ်မါလၢအအဲၣ်ဘၢအဝၤအသိးန့ၣ်လၢအဟံးန့ၢ်ပှၤဂၤလၢအဝၤအလီၢ်လီၤ. 33ပှၤပိာ်ခွါဟ့ၣ်တၢ်အဘူးအလဲလၢပှၤဃဲသဲမုၣ်ခဲလၢာ်လီၤ.မ့မ့ၢ်နဲဒၣ်အံၤနဟ့ၣ်ကယဲၢ်ပှၤလၢအအဲၣ်နၤအဘူးအလဲ,ဒီးနမၢလဲၤအီၤလၢစ့ဒ်သိးအကဟဲလၢကိးခီဒဲးဆူနအိၣ်,လၢအကမၤကမၣ်မုၣ်ကမၣ်ခွါဒီးနၤအဂီၢ်လီၤ. 34ဒီးလၢနမၤကမၣ်မုၣ်ကမၣ်ခွါအပူၤန့ၣ်နလီၤဆီန့ၢ်ပိာ်မုၣ်အဂၤတက့ၢ်လီၤ.အဂ့ၢ်ဒ်အံၤ,ပှၤတလူၤဘၣ်နၤဒ်သိးအကမၤကမၣ်မုၣ်ကမၣ်ခွါဒီးနၤနီတဂၤဘၣ်.မ့မ့ၢ်နဟ့ၣ်တၢ်အဘူးအလဲ,ဒီးတၢ်တဟ့ၣ်ဘၣ်နၤလၢနဘူးနလဲဘၣ်.မၤသးဒ်န့ၣ်ဒီးနလီၤဆီဒၣ်တၢ်လီၤ.

35မၤသးဒ်န့ၣ်ဒီးပှၤဃဲသဲမုၣ်ဧၢ,ကနၣ်ယွၤအကလုၢ်တက့ၢ်. 36ကစၢ်ယွၤစံးဒ်အံၤ,မ့ၢ်နတၢ်ဘၣ်အၢလူလီၤအသးဒီးနအိၣ်ဘ့ၣ်ဆ့အလီၢ်အိၣ်ဖျါလၢနမၤကမၣ်မုၣ်ကမၣ်ခွါလၢပှၤလၢနအဲၣ်အီၤအဃိ,ဒီးလၢနတၢ်သးဘၣ်အၢအတၢ်ဂီၤအဃိ,ဒီးလၢနဖိတဖၣ်အသွံၣ်လၢနဟ့ၣ်အီၤအဃိဒီး, 37ကွၢ်ကွၢ်,မၤသးဒ်န့ၣ်ဒီးယကဒုးအိၣ်ဖှိၣ်ရိဖှိၣ်ပှၤလၢနအဲၣ်အီၤခဲလၢာ်,ပှၤလၢနမုာ်လၤဒီးအီၤ,ကယဲၢ်ပှၤလၢနအဲၣ်အီၤဒီးကယဲၢ်ပှၤလၢနသးဟ့အီၤ,ဒီးယကဒုးအိၣ်ဖှိၣ်ရိဖှိၣ်အီၤဝးတရံးထီဒါနၤ,ဒီးယကလီၣ်ဖျါထီၣ်နတၢ်အိၣ်ဘ့ၣ်ဆ့လၢအမဲာ်ညါ,ဒ်သိးအကထံၣ်ဘၣ်နအိၣ်ဘ့ၣ်ဆ့အလီၢ်ခဲလၢာ်လီၤ.

38ယကစံၣ်ညီၣ်နၤဒ်ပိာ်မုၣ်လၢအအဲၣ်ဘၢအဝၤ,ဒီးလူတၢ်သွံၣ်တဖၣ်ဘၣ်တၢ်စံၣ်ညီၣ်အီၤအသိး,ဒီးယကဟ့ၣ်လီၤနၤလၢတၢ်သွံၣ်လၢယသးကဲၤထီၣ်ဒီးယသးက့ၣ်လီၤ. 39ဒီးယကဟ့ၣ်လီၤကွံာ်နၤလၢအစုပူၤ,ဒီးကမၤလီၤပှီၢ်ကွံာ်နတၢ်ခိၣ်ဒုးထီၣ်အသး,ဒီးကမၤဟးဂီၤကွံာ်နလီၢ်ထီၣ်ထီတဖၣ်,ဒီးကဘ့ၣ်ကွံာ်နကူနသိး,ဒီးကဟံးထီၣ်ကွံာ်နကယၢကယဲလၢအဃံအလၤ,ဒီးကပာ်လီၤတဲာ်နၤအိၣ်ဘ့ၣ်ဆ့,ဒီးနကူနသိးတအိၣ်ဘၣ်လီၤ.

40ဒီးကဒုးဟဲထီဒါနၤလၢပှၤတဖု,ဒီးကကွံာ်နၤလၢလၢၢ်ဒီးဆဲးဖျိထီၣ်နၤလၢအနးလီၤ. 41ဒီးကဆူးထီၣ်ကွံာ်နဟံၣ်တဖၣ်လၢမ့ၣ်အူ,ဒီးမၤတၢ်စံၣ်ညီၣ်တဖၣ်လၢနၤလၢပိာ်မုၣ်အါဂၤအမဲာ်ညါ,ဒီးယကဒုးဆိတ့ၢ်နမၤကမၣ်မုၣ်ကမၣ်ခွါ,ဒီးနတဟ့ၣ်လၢၤဘၣ်တၢ်အဘူးအလဲဘၣ်.

42ဒီးယကဒုးဆိတ့ၢ်ယသးကဲၤထီၣ်နၤ,ဒီးယသးက့ၣ်ကဟးထီၣ်ကွံာ်လၢနၤ,ဒီးယကအိၣ်ဃိကလာ်,ဒီးယသးတထီၣ်လၢၤဘၣ်.

43မ့ၢ်နတသ့ၣ်နီၣ်ထီၣ်က့ၤနဖိသၣ်ဒံးအမုၢ်နံၤတဖၣ်,ဒီးထိၣ်ဂဲၤယသးထီၣ်လၢတၢ်ခဲလၢာ်အဃိဒီး,ကွၢ်ကွၢ်,မၤသးဒ်န့ၣ်ဒီးယကဟ့ၣ်ကၣ်နကျဲလၢနခိၣ်အဖီခိၣ်လီၤ,ကစၢ်ယွၤစံးဝဲဒၣ်.ဒီးနတမၤလၢၤဘၣ်တၢ်ကလုာ်ကလိၤအံၤလၢနတၢ်သးဘၣ်အၢခဲလၢာ်အဖီခိၣ်ဘၣ်.

44ကွၢ်ကွၢ်,ကယဲၢ်ပှၤလၢအကတိၤဒိတၢ်န့ၣ်ကကတိၤဒိတၢ်လၢနဂ့ၢ်ဒီးစံး,ဒ်မိၢ်အသိးန့ၣ်ဖိမုၣ်မ့ၢ်ဒ်န့ၣ်အသိးလီၤ.

45နဲဒၣ်အံၤနမ့ၢ်နမိၢ်အဖိမုၣ်လၢအသးဘၣ်အၢအဝၤဒီးအဖိအလံၤ,ဒီးနမ့ၢ်နဒီပုၢ်ဝဲၢ်မုၣ်တဖၣ်အဒီပုၢ်ဝဲၢ်မုၣ်လၢအသးဘၣ်အၢအဝၤဒီးအဖိအလံၤလီၤ.သုမိၢ်မ့ၢ်ပှၤဃ့ၤသးဖိ,ဒီးသုပၢ်မ့ၢ်ပှၤအမိၢ်ဖိလီၤ. 46ဒီးနဝဲၢ်မုၣ်မ့ၢ်ၡၤမရံအိၣ်ဒီးအဖိမုၣ်တဖၣ်,လၢအအိၣ်ဝဲဆိးဝဲလၢနစုစ့ၣ်တခီ,ဒီးနပုၢ်မုၣ်လၢအအိၣ်အဆိးလၢနစုထွဲနခီ,မ့ၢ်စဒိၣ်အိၣ်ဒီးအဖိမုၣ်တဖၣ်လီၤ.

47ဘၣ်ဆၣ်ဒီးနတပိာ်ဘၣ်အကျဲဘၣ်.ဒီးနတမၤဘၣ်ဒ်အတၢ်သးဘၣ်အၢအသိးန့ၣ်ဘၣ်.အန့ၣ်နပာ်လၢတၢ်အဆံးကဲၣ်ဆိး,ဒီးနအၢန့ၢ်အဝဲသ့ၣ်လၢနကျဲပူၤခဲလၢာ်တက့ၢ်လီၤ.

48ယမူယဲ,ကစၢ်ယွၤစံးဝဲဒၣ်,နပုၢ်မုၣ်စဒိၣ်အဝဲဒၣ်မ့ၢ်ဂ့ၤ,အဖိမုၣ်မ့ၢ်ဂ့ၤ,တမၤဘၣ်တၢ်ဒ်နမၤနဲဒီးနဖိမုၣ်တဖၣ်အသိးန့ၢ်ဘၣ်. 49ကွၢ်ကွၢ်,နပုၢ်မုၣ်စဒိၣ်အတၢ်ဒဲးဘး,မ့ၢ်အအံၤ,ပာ်အသးထီၣ်ထီ,အီၣ်ဘျဲးအီၣ်တၢ်,ဒီးတၢ်အိၣ်ဘှံးအါအါကလဲာ်န့ၣ်,အိၣ်ဝဲဆိးဝဲလၢအပူၤ,ဒီးလၢအဖိမုၣ်တဖၣ်အပူၤ,ဒီးတမၤဆူၣ်ထီၣ်ပှၤဖှီၣ်ဖိယာ်ဖိ,ဒီးပှၤဘၣ်နးဘၣ်ဖှီၣ်အစုဘၣ်. 50ဒီးပာ်ကဖိအသး,ဒီးမၤတၢ်သးဘၣ်အၢလၢယမဲာ်ညါလီၤ.ဒီးတုၤယထံၣ်တၢ်ဒီး,ယညိကွံာ်အီၤလီၤ.

51ဒီးၡၤမရံတမၤဖးဖီဘၣ်နတၢ်ဒဲးဘးဘၣ်.မ့ၢ်နမၤအါထီၣ်နတၢ်သးဘၣ်အၢအါန့ၢ်အဝဲသ့ၣ်,ဒီးနပာ်တီနဒီပုၢ်ဝဲၢ်မုၣ်တဖၣ်,လၢကယဲၢ်နတၢ်သးဘၣ်အၢအပူၤလၢနမၤနဲလီၤ.

52နဲဒၣ်အံၤအိၣ်စ့ၢ်ကီးဒီးနမဲာ်ဆှးဒၣ်နဲလၢနစံၣ်ညီၣ်နဒီပုၢ်ဝဲၢ်မုၣ်အဃိတက့ၢ်.အဂ့ၢ်ဒ်အံၤ,အဝဲသ့ၣ်တဖၣ်န့ၣ်တီန့ၢ်နၤတက့ၢ်လၢနတၢ်ဒဲးဘးလၢနမၤတၢ်သးဘၣ်အၢနးန့ၢ်အဝဲသ့ၣ်တက့ၢ်အဃိလီၤ.မ့ၢ်မးပာ်ဆှးနမဲာ်ဒီးအိၣ်ဒၣ်တၢ်ဒီးနမဲာ်ဆှးတက့ၢ်.

53ဒီးယကဒုးဟဲက့ၤအပှၤလဲၤကဲကုၢ်,စဒိၣ်ဒီးအဖိမုၣ်တဖၣ်လၢအလဲၤကဲကုၢ်,ဒီးၡၤမရံဒီးအဖိမုၣ်တဖၣ်လၢအလဲၤကဲကုၢ်,ဒီးယကဒုးဟဲက့ၤနၤလၢနလဲၤကဲကုၢ်လၢအကျါ, 54ဒ်သိးနကအိၣ်ဒၣ်တၢ်ဒီး,နမဲာ်ဆှးဒၣ်နဲဒိးနကပာ်ဆှးနမဲာ်လၢကယဲၢ်တၢ်လၢနမၤအဃိ,လၢနမၤမုာ်ထီၣ်က့ၤအီၤအဃိလီၤ.

55ဒီးနဒီပုၢ်ဝဲၢ်မုၣ်,စဒိၣ်ဒီးအဖိမုၣ်တဖၣ်ကက့ၤက့ၤဝဲဆူအလီၢ်လၢအခီၣ်ထံး,ဒီးၡၤမရံဒီးအဖိမုၣ်တဖၣ်ကက့ၤက့ၤဆူအလီၢ်လၢအခီၣ်ထံး,ဒီးနဲဒၣ်ဒီးနဖိမုၣ်တဖၣ်န့ၣ်ကက့ၤက့ၤဆူသုလီၢ်လၢအခီၣ်ထံးလီၤ.

56အဂ့ၢ်ဒ်အံၤ,လၢနပာ်ထီၣ်ထီနသးအမုၢ်တနံၤလၢနတၢ်ဒဲးဘးတချုးအိၣ်ဖျါဒံးဘၣ်န့ၣ်နတပှ့ၤဘၣ်နဒီပုၢ်ဝဲၢ်မုၣ်စဒိၣ်အမံၤလၢနထးခိၣ်ဘၣ်. 57ဒ်လၢနဘၣ်တၢ်ဒုၣ်ဒွဲၣ်လၢပှၤစူၤရံဖိ,ဒီးလၢကယဲၢ်ပှၤအိၣ်ဝးတရံးအီၤ,ဒီးလၢပှၤဖလ့ၡသးဖိအဖိမုၣ်တဖၣ်လၢအမၤတရီတပါနၤကိးခီဒဲးအခါအသိးန့ၣ်လီၤ. 58နကဘၣ်ဒၣ်နသး,ကလုာ်ကလိၤ,ဒီးနတၢ်သးဘၣ်အၢတဖၣ်န့ၣ်လီၤ.ကစၢ်ယွၤစံးဝဲဒၣ်.

59အဂ့ၢ်ဒ်အံၤ,ကစၢ်ယွၤစံးဒ်အံၤ,ယကမၤနၤ,ဒ်နမၤနဲအသိး,ပှၤလၢအတပးကဲဘၣ်တၢ်ဆိၣ်န့ၣ်ဒီးမၤဟးဂီၤတၢ်အၢၣ်လီၤအီလီၤန့ၣ်လီၤ.

60ဘၣ်ဆၣ်ဒီးယကသ့ၣ်နီၣ်ထီၣ်က့ၤယအၢၣ်လီၤအီလီၤတၢ်ဒီးနၤလၢနဖိသၣ်ဒံးအမုၢ်နံၤတဖၣ်န့ၣ်,ဒီးယကဒုးအိၣ်ဂၢၢ်ဆိးကျၢၤဒီးနၤလၢတၢ်အၢၣ်လီၤအီလီၤအထူအယိာ်လီၤ.

61ဒီးတုၤနတူၢ်လိာ်နဒီပုၢ်ဝဲၢ်မုၣ်တဖၣ်,နဝဲၢ်မုၣ်,ဒီးနပုၢ်မုၣ်ဒီး,နကသ့ၣ်နီၣ်ထီၣ်က့ၤနကျဲတဖၣ်,ဒီးနမဲာ်ကဆှးလီၤ.ဒီးယကဟ့ၣ်လီၤအီၤဒ်သိးအကကဲထီၣ်နဖိမုၣ်တဖၣ်,ဘၣ်ဆၣ်ဒီးတမ့ၢ်ဘၣ်လၢနတၢ်အၢၣ်လီၤအီလီၤအပူၤဘၣ်လီၤ.

62ဒီးယကဒုးအိၣ်ဂၢၢ်ဆိးကျၢၤယတၢ်အၢၣ်လီၤအီလီၤဒီးနၤ,ဒီးနကသ့ၣ်ညါလၢယမ့ၢ်ယွၤလီၤ. 63ဒ်သိးတုၤယပျၢ်ကယဲၢ်တၢ်လၢနမၤဒီး,နကသ့ၣ်နီၣ်ထီၣ်က့ၤဒီးနသးကကတုၤ,ဒီးနသုတအဲးထီၣ်လၢၤဘၣ်နထးခိၣ်တဂ့ၤ,လၢနမဲာ်ဆှးအဃိလီၤ.ကစၢ်ယွၤစံးဝဲဒၣ်.