Ezekiel 25
1ယွၤအကလုၢ်ဘၣ်ယၤဒီးစံးဝဲဒၣ်, 2ပှၤကညီဖိခွါဧၢ,ကွၢ်လၢနမဲာ်ဆူပှၤဧၣ်မိၣ်ဖိအအိၣ်,ဒီးကတိၤတၢ်လၢဝံအကျိာ်ထီဒါအီၤ, 3ဒီးစံးဘၣ်ပှၤဧၣ်မိၣ်ဖိ,ကနၣ်ယွၤအကလုၢ်တက့ၢ်.ကစၢ်ယွၤစံးဒ်အံၤ,တုၤယလီၢ်စီဆှံဘၣ်တၢ်မၤဘၣ်အၢအီၤ,ဒီးတုၤအံၣ်စရ့လးအတၢ်အိၣ်သယုၢ်,ဒီးတုၤယူဒၤအပှၤဟံၣ်ဖိလဲၤကဲကုၢ်ဒီး,မ့ၢ်နစံးထီဒါအီၤ, 4မၤသးဒ်န့ၣ်ဒီး,ကွၢ်ကွၢ်,ယကဟ့ၣ်လီၤကွံာ်နၤလၢပှၤမုၢ်ထီၣ်ဖိလၢအန့ၢ်သါတၢ်အလီၢ်,ဒီးကမၤသိအဂၢၤတဖၣ်လၢနပူၤ,ဒီးကမၤအအိၣ်အဆိးအလီၢ်လၢနပူၤ,ကအီၣ်ဘၣ်နတၤသၣ်,ဒီးကအီနတၢ်နုၢ်ထံလီၤ. 5ဒီးယကပာ်ရးဘးလၢကီၤလၤအူးအအိၣ်အလီၢ်,ဒီးပှၤဧၣ်မိၣ်ဖိအကီၢ်လၢသိဒီးမဲာ်တဲးလဲးတဖၣ်အကိာ်လီၤအလီၢ်,ဒီးသုကသ့ၣ်ညါလၢယမ့ၢ်ယွၤလီၤ. 6အဂ့ၢ်ဒ်အံၤ,ကစၢ်ယွၤစံးဒ်အံၤ,မ့ၢ်နဒဲနစု,ဒီးနဆှ့ၣ်နခီၣ်,ဒီးနသးခုလၢနတၢ်သးဟ့ခဲလၢာ်ထီဒါကီၢ်အံၣ်စရ့လးဒီး, 7ကွၢ်ကွၢ်,ယကယူာ်ထီၣ်ယစုဆူနလိၤ,ဒီးပာ်နၤလၢတၢ်ဂုာ်ဆူၣ်ပျီဆူၣ်လၢပှၤကလုာ်တဖၣ်အဂီၢ်,ဒီးယကဒီၣ်တဲာ်ကွံာ်နၤလၢပှၤကလုာ်တဖၣ်အကျါ,ဒီးယကမၤဟါမၢ်နၤလၢကီၢ်တဖၣ်အပူၤ,ဒီးယကမၤဟးဂီၤနၤ,ဒီးနကသ့ၣ်ညါလၢယမ့ၢ်ယွၤလီၤ. 8ကစၢ်ယွၤစံးဒ်အံၤ,မ့ၢ်မိၤအးဒီးစ့ဧၢ်န့ၣ်စံး,ကွၢ်ကွၢ်.ယူဒၤအပှၤဟံၣ်ဖိမၤသးဒ်ပှၤကလုာ်ခဲလၢာ်အသိးန့ၣ်ဒီး, 9ကွၢ်ကွၢ်,မၤသးဒ်န့ၣ်ဒီးယကအိးထီၣ်မိၤအးအကပၤ,လၢအဝ့ၢ်တဖၣ်အိၣ်ဝဲလၢအဃၢၤ,ထံဧိၤကီၢ်ဧိၤအလၤကပီၤ,ဘ့ၤသယၡံမိး,ဘဧၤလးမဧိၣ်,ဒီးကံးရယးသံၣ်လီၤ. 10ယကဟ့ၣ်အီၤလၢတၢ်န့ၢ်သါလၢပှၤမုၢ်ထီၣ်ဖိအိၣ်ဒီးပှၤဧၣ်မိၣ်ဖိ,ဒ်သိးတၢ်သုတသ့ၣ်နီၣ်ထီၣ်လၢၤဘၣ်ပှၤဧၣ်မိၣ်ဖိလၢပှၤကလုာ်တဖၣ်အကျါတဂ့ၤလီၤ. 11ဒီးယကမၤတၢ်စံၣ်ညီၣ်လၢမိၤအးအလိၤ,ဒီးကသ့ၣ်ညါဝဲလၢယမ့ၢ်ယွၤလီၤ. 12ကစၢ်ယွၤစံးဒ်အံၤ,မ့ၢ်အဒိၣ်မၤထီဒါယူဒၤအပှၤဟံၣ်ဖိ,ဒီးမၤတၢ်ဒဲးဘးအဒိၣ်အယိာ်,ဒီးမၤဆၢတၢ်အၢလၢအလိၤဒီး, 13ကစၢ်ယွၤစံးဒ်အံၤ,ယကယူာ်ထီၣ်ယစုလၢအဒိၣ်အဖီခိၣ်,ဒီးယကမၤစှီၢ်ကွံာ်ပှၤကညီဒီးဆၣ်ဖိကီၢ်ဖိလၢအပူၤ,ဒီးယကမၤသယုၢ်အီၤလၢတ့မၣ်,ဒီးပှၤကလီၤဃံၤလၢနးဧိၤဘီဧိၤပၢၢ်လၢဒဒၣ်ဖိလီၤ. 14ဒီးယကမၤဆၢတၢ်အၢလၢအဒိၣ်အလိၤလၢယပှၤဂီၢ်မုၢ်အံၣ်စရ့လးအစု,ဒီးကမၤဘၣ်အဒိၣ်ဒ်ယသးထီၣ်ဒီးဒ်ယသးကဲၤထီၣ်အသိး,ဒီးကသ့ၣ်ညါဝဲလၢယမၤဆၢတၢ်အၢန့ၣ်လီၤ,ကစၢ်ယွၤစံးဝဲဒၣ်. 15ကစၢ်ယွၤစံးဒ်အံၤ,မ့ၢ်ပှၤဖလ့ၡသးဖိမၤတၢ်လၢတၢ်မၤဆၢတၢ်အၢ,ဒီးမၤဆၢတၢ်အၢလၢတၢ်မၤတရီတပါဒ်သိးအကမၤဟးဂီၤတၢ်လၢတၢ်သးဟ့လၢပျၢၤအဃိ, 16မၤသးဒ်န့ၣ်ဒီးကစၢ်ယွၤစံးဒ်အံၤ,ကွၢ်ကွၢ်,ယကယူာ်ထီၣ်ယစုလၢပှၤဖလ့ၡသးဖိအဖီခိၣ်,ဒီးယကဒီၣ်တဲာ်ကွံာ်ပှၤကရံသးဖိ,ဒီးမၤဟးဂီၤတၢ်အိၣ်လီၤတဲာ်လၢပီၣ်လဲၣ်နံၤလီၤ. 17ဒီးယကမၤဆၢတၢ်အၢနးနးကလဲာ်လၢအလိၤအိၣ်ဒီးတၢ်သိၣ်ဃီၣ်လၢတၢ်သးကဲၤထီၣ်,ဒီးတုၤယမၤဆၢတၢ်အၢလၢအလိၤဒီး,ကသ့ၣ်ညါဝဲလၢယမ့ၢ်ယွၤလီၤ.
Copyright information for
KswSKMB