Ezekiel 28
1ယွၤအကလုၢ်ဘၣ်ယၤဒီးစံးဝဲဒၣ်, 2ပှၤကညီဖိခွါဧၢ,စံးဘၣ်စိၢ်အပဒိၣ်ဖးဒိၣ်,ကစၢ်ယွၤစံးဒ်အံၤ,မ့ၢ်နသးအိၣ်ထီၣ်ထီ,ဒီးနစံး,ယမ့ၢ်ကစၢ်တဂၤ,ယဆ့ၣ်နီၤလၢကစၢ်အလီၢ်ဆ့ၣ်နီၤ,လၢပီၣ်လဲၣ်အသးကံၢ်ပူၤလီၤ,ဒီးနပာ်နသးဒ်ကစၢ်တဂၤအသးနာ်သက့ဒီး,နမ့ၢ်ပှၤကညီဒီးတမ့ၢ်ဘၣ်ကစၢ်တဂၤဘၣ်. 3ကွၢ်ကွၢ်,နပာ်နသးကူၣ်သ့န့ၢ်စီၤဒၤနံးယ့လးတက့ၢ်.ဒီးတၢ်ခူသူၣ်တအိၣ်တဒၢဒီးနၤနီတမံၤဘၣ်. 4လၢနထူးထီၣ်တီၤထီၣ်လၢနကူၣ်တၢ်သ့ဒီးနတၢ်ကူၣ်တၢ်ဆးအဃိဒီး,နအိၣ်ဒီးထူဒီးစ့လၢနပာ်ဖှိၣ်အလီၢ်ပူၤလီၤ. 5နမၤအါထီၣ်နတၢ်ထူးတၢ်တီၤလၢတၢ်ကူၣ်သ့ဖးဒိၣ်,လၢနကၤတၢ်လီၤ.ဒီးနသးပာ်ထီၣ်ထီအသးလၢနတၢ်ထူးတၢ်တီၤအဃိလီၤ. 6မၤသးဒ်န့ၣ်ဒီးကစၢ်ယွၤစံးဒ်အံၤ,မ့ၢ်နပာ်နသးဒ်ကစၢ်တဂၤအသးအသိးဒီး, 7ကွၢ်ကွၢ်,ယကဒုးဟဲဘၣ်နၤလၢပှၤတခီဘီမုၢ်ဖိ,ပှၤမၤပျံၤတၢ်လၢပှၤကလုာ်တဖၣ်အကျါ,ဒီးကဘီၣ်ထီၣ်အနးထီဒါနတၢ်ကူၣ်သ့အဃံအလၤ,ဒီးကမၤဘၣ်အၢနတၢ်ကယဲၢ်ကယူာ်လီၤ. 8ဒီးအဝဲသ့ၣ်ကဆီၣ်လီၤနၤဆူတၢ်ပူၤ,ဒီးနကသံဒ်ပှၤလၢအဘၣ်တၢ်မၤသံအီၤလၢပီၣ်လဲၣ်အသးကံၢ်ပူၤအသိးန့ၣ်လီၤ. 9လၢပှၤလၢအမၤသံနၤအမဲာ်ညါန့ၣ်နကစံးဒံးယမ့ၢ်ကစၢ်တဂၤန့ၣ်ဧါ.မ့မ့ၢ်နမ့ၢ်ပှၤကညီဒီးတမ့ၢ်ဘၣ်ကစၢ်တဂၤ,လၢပှၤလၢအမၤသံနၤအစုပူၤလီၤ. 10နကသံဒ်ပှၤလၢအတဒိးဘၣ်တၢ်ကူးတရံးသံဝဲအသိး,လၢပှၤတခီဘီမုၢ်ဖိအစုပူၤလီၤ.အဂ့ၢ်ဒ်အံၤ,ယဲဒၣ်အံၤယကတိၤလံတၢ်လံ.ကစၢ်ယွၤစံးဝဲဒၣ်. 11ဒီးယွၤအကလုၢ်ဘၣ်ယၤ,ဒီးစံးဝဲဒၣ်, 12ပှၤကညီဖိခွါဧၢ,မၤထါဟီၣ်တၢ်လၢစိၢ်အစီၤပၤအဃိ,ဒီးစံးဘၣ်အီၤ,ကစၢ်ယွၤစံးဒ်အံၤ,နစဲဃာ်ပနီၣ်တၢ်ပာ်ဖှိၣ်ပှဲၤဒီးတၢ်ကူၣ်သ့,ဒီးလၢထီၣ်ပှဲၤထီၣ်ဒီးတၢ်အဃံအလၤလီၤ. 13နအိၣ်တ့ၢ်လၢဧ့ၤဒ့ၣ်ကစၢ်အတၤသၣ်အလီၢ်လီၤ.တၢ်မျၢ်ကိးကလုာ်ဒဲးမ့ၢ်တၢ်ကျၢၢ်ဘၢနၤ,တၢ်မျၢ်ဆီသွံၣ်,တၢ်မျၢ်ဘီအူသပၤယၤ,ဒီးတၢ်မျၢ်မဟူယၤတိၤအသး,တၢ်မျၢ်ဘီဟ့,တၢ်မျၢ်မဟူယၤ,ဒီးတၢ်မျၢ်နကၤသွဲး,တၢ်မျၢ်နံၤလါ,တၢ်မျၢ်ဂီၤ,တၢ်မျၢ်ဟ့မၠး,ဒီးထူဧိၤလွဲဧိၤလီၤ.နဒၢဖိဒီးပံဧိၤတြၤဧိၤအတ့အသးအိၣ်လၢနပူၤ,မုၢ်တနံၤလၢနအိၣ်ဖျဲၣ်န့ၣ်ကတဲာ်ကတီၤအသးလီၤ. 14နမ့ၢ်တ့ၢ်ခ့ရူာ်ဖိဖှူအသးတဂၤလၢအကဒုတၢ်,ဒီးယပာ်နၤလၢကစၢ်အကစၢၢ်စီဆှံအလိၤလီၤ.နလဲၤဝ့ၤဝီၤတၢ်လၢလၢၢ်မ့ၣ်အူအကျါလီၤ. 15နလၢထီၣ်ပှဲၤထီၣ်လၢနကျဲလၢနမုၢ်တနံၤလၢနအိၣ်ဖျဲၣ်လံၤလံၤတုၤတၢ်ထံၣ်န့ၢ်တၢ်ဒဲးဘးလၢနပူၤလီၤ. 16နပှဲၤဒီးတၢ်တတီတလိၤလၢနပနံၣ်တၢ်ကၤအါအါကလဲာ်အဃိ,ဒီးနမၤလံတၢ်ဒဲးဘးလံ.မၤသးဒ်န့ၣ်ဒီးယကကွံာ်တ့ၢ်ကွံာ်နၤလၢကစၢ်အကစၢၢ်အလိၤဒ်တၢ်သးဘၣ်အၢအသိးလီၤ.ဒီးခ့ရူာ်လၢအကဒုတၢ်တဂၤဧၢ,ယကမၤဟးဂီၤနၤလၢလၢၢ်မ့ၣ်အူအကျါလီၤ. 17နပာ်နသးအိၣ်ထီၣ်ထီလၢနဃံနလၤအဃိ,နမၤဘၣ်အၢနတၢ်ကူၣ်သ့လၢနတၢ်ကယဲၢ်ကယူာ်အဃိလီၤ.ယကတ့ၢ်လီၤကွံာ်နၤလၢဟီၣ်ခိၣ်အဖီခိၣ်,ယကပာ်နၤလၢစီၤပၤတဖၣ်အမဲာ်ညါဒ်သိးအကကွၢ်ကီနၤလီၤ. 18နမၤဘၣ်အၢနလီၢ်စီဆှံတဖၣ်လၢနတၢ်ဒဲးဘးအါအဃိ,လၢနကၤတၢ်တတီတလိၤအဃိလီၤ.ဒီးယကဒုးဟဲထီၣ်မ့ၣ်အူလၢနသးကံၢ်ပူၤလၢအကအီၣ်ကွံာ်နၤ,ဒီးယကဒုးကဲထီၣ်နၤလၢဖၣ်ဆါလၢဟီၣ်ခိၣ်ချၢ,လၢပှၤလၢအကွၢ်နၤတဖၣ်အမဲာ်ညါခဲလၢာ်လီၤ. 19ကယဲၢ်ပှၤလၢအသ့ၣ်ညါနၤလၢပှၤဂီၢ်မုၢ်ခဲလၢာ်အကျါ,အသးကတုၤလၢနဃိလီၤ.နကဲထီၣ်လံတၢ်အိၣ်သယုၢ်အလီၢ်လံ,ဒီးနတအိၣ်လၢၤဘၣ်လီၤထူလီၤယိာ်လီၤ. 20ဒီးယွၤအကလုၢ်ဘၣ်ယၤဒီးစံးဝဲဒၣ်, 21ပှၤကညီဖိခွါဧၢ,ကွၢ်တၢ်လၢနမဲာ်ဆူစံဒိၣ်အအိၣ်,ဒီးကတိၤတၢ်လၢဝံအကျိာ်, 22ဒီးစံး,ကစၢ်ယွၤစံးဒ်အံၤ,ကွၢ်ကွၢ်,စံဒိၣ်ဧၢ,ယထီဒါနၤ,ဒီးယကဒိးတၢ်လၤကပီၤလၢနသးကံၢ်ပူၤ,ဒီးတုၤယမၤတၢ်စံၣ်ညီၣ်လၢအပူၤ,ဒီးတၢ်ပာ်စီဆှံယၤလၢအပူၤဒီး,ကသ့ၣ်ညါဝဲလၢယမ့ၢ်ယွၤလီၤ. 23ဒီးယကမၢလီၤတၢ်သံသတြိာ်ဆူအအိၣ်,ဒီးတၢ်သွံၣ်လၢအကျဲပူၤ,ဒီးပှၤဘၣ်ဆဲးအသးကလီၤဃံၤလၢအသးကံၢ်ပူၤလၢနးဧိၤဘီဧိၤလၢအအိၣ်ဝးတရံးထီဒါအီၤ,ဒီးကသ့ၣ်ညါလၢယမ့ၢ်ယွၤလီၤ. 24ဒီးတၤဆှုၣ်လၢအဘၣ်ဆိးတၢ်မ့ၢ်ဂ့ၤ,ဒီးတၤဆှုၣ်လၢအမၤဆါတၢ်မ့ၢ်ဂ့ၤ,တအိၣ်လၢၤဘၣ်ဒီးအံၣ်စရ့လးအပှၤဟံၣ်ဖိလၢပှၤလၢအဝးတရံးအီၤခဲလၢာ်အကျါ,လၢအမၤတရီတပါဒၣ်အီၤဘၣ်,ဒီးကသ့ၣ်ညါဝဲလၢယမ့ၢ်ယွၤလီၤ. 25ဒီးကစၢ်ယွၤစံးဒ်အံၤ,တုၤယထၢဖှိၣ်အံၣ်စရ့လးအပှၤဟံၣ်ဖိလၢပှၤကလုာ်တဖၣ်အကျါဖဲအအိၣ်ပြံပြါလၢအကျါ,ဒီးတၢ်ကပာ်စီဆှံယၤလၢအဃိလၢပှၤကလုာ်တဖၣ်အမဲာ်ညါဒီး,ကအိၣ်ကဆိးဝဲလၢကီၢ်တဘ့ၣ်လၢယဟ့ၣ်လီၤတ့ၢ်ယခ့ယပှၤစီၤယၤကိာ်အပူၤလီၤ. 26ကအိၣ်ကဆိးဖဲန့ၣ်အိၣ်ခၢၣ်တနၢၢ်,ဒီးကမၤဟံၣ်ဧိၤဃီဧိၤ,ဒီးသူၣ်စပံးအလီၢ်,ဒီးတုၤယမၤတၢ်စံၣ်ညီၣ်လၢပှၤလၢအမၤတရီတပါအီၤဝးတရံးဝဲခဲလၢာ်အလိၤဒီးမ့ၢ်မးကအိၣ်ကဆိးဝဲခၢၣ်သနၢၢ်,ဒီးကသ့ၣ်ညါဝဲလၢယမ့ၢ်ယွၤအကစၢ်လီၤ.
Copyright information for
KswSKMB