Eze 43 | KswSKMB | STEP | ဒီးလၢခံက့ၤစိာ်ယၤဆူပဲတရီလၢအဖျိဝဲဆူမုၢ်ထီၣ်တခီ,

‏ Ezekiel 43

1 ဒီးလၢခံက့ၤစိာ်ယၤဆူပဲတရီလၢအဖျိဝဲဆူမုၢ်ထီၣ်တခီ, 2 ဒီးကွၢ်ကွၢ်,အံၣ်စရ့လးအကစၢ်အလၤကပီၤဟဲဝဲလၢမုၢ်ထီၣ်အကျဲ,ဒီးအသီၣ်န့ၣ်မၤအသးဒ်ထံအါအသီၣ်သိးန့ၣ်,ဒီးဟီၣ်ခိၣ်ကပီၤထီၣ်ဝဲလၢအလၤကပီၤလီၤ.

3 ဒီးတၢ်ဖျါဝဲမၤအသးဒ်တၢ်ထံၣ်လၢညါခီလၢယထံၣ်ဒ်တၢ်ထံၣ်လၢညါခီလၢယထံၣ်ဖဲယဟဲမၤဟးဂီၤဝ့ၢ်အသိးန့ၣ်,ဒီးတၢ်ထံၣ်လၢညါခီန့ၣ်မၤသးဒ်တၢ်လၢယထံၣ်ဘၣ်လၢကဘၢ်အထံနံၤအသိးန့ၣ်လီၤ.ဒီးယထိၣ်လီၤဃံၤအီထီလာ်ယသးလီၤ.

4 ဒီးယွၤအလၤကပီၤဟဲနုာ်လၢဟံၣ်ပူၤလၢကျဲအပဲတရီအပူၤလၢအဖျိထီၣ်ဆူမုၢ်ထီၣ်တခီလီၤ.

5 ဒီးသးန့ၣ်ဟံးန့ၢ်ယၤ,ဒီးစိာ်ယၤဆူတၢ်ဂၢၤလၢညါခီတပူၤ,ဒီးကွၢ်ကွၢ်,ယွၤအလၤကပီၤမၤပှဲၤဟံၣ်လီၤ.

6 ဒီးယနၢ်ဟူတၢ်တဂၤကတိၤတၢ်ဒီးယၤလၢဟံၣ်ပူၤ,ဒီးပှၤကညီတဂၤဆၢထၢၣ်လၢအဃၢၤလီၤ. 7 ဒီးစံးဘၣ်ယၤ,ပှၤကညီဖိခွါဧၢ,ယလီၢ်ပစိာ်အလီၢ်ဒီးယခီၣ်ညါသးအလီၢ်ဖဲယကအိၣ်လၢပှၤအံၣ်စရ့လးဖိအကျါလီၤထူလီၤယိာ်မ့ၢ်ဖဲအံၤလီၤ.ဒီးပှၤအံၣ်စရ့လးဖိတမၤဘၣ်အၢလၢၤဘၣ်ယမံၤစီဆှံဘၣ်,အဝဲသ့ၣ်မ့ၢ်ဂ့ၤ,အစီၤပၤတဖၣ်မ့ၢ်ဂ့ၤ,တမၤဘၣ်အၢဝဲလၢအမၤကမၣ်မုၣ်ကမၣ်ခွါအဃိ,ဒီးလၢအစီၤပၤအစိၣ်လၢအလီၢ်ထီၣ်ထီတဖၣ်အဃိဘၣ်. 8 မ့ၢ်အသူၣ်အကျဲစၢၤကျိၤထံးလၢယကျဲစၢၤကျိၤထံးအဃၢၤ,ဒီးအထူၣ်လၢယထူၣ်အဃၢၤ,ဒီးအိၣ်ထဲအဒူၣ်တဒူၣ်လၢယၤဒီးအဝဲသ့ၣ်အဘၢၣ်စၢၤန့ၣ်ဒီး,မၤဘၣ်အၢယမံၤစီဆှံလၢအတၢ်သးဘၣ်အၢလၢအမၤဝဲလီၤ.ဒီးယမၤလၢာ်ကွံာ်အီၤလၢယသးထီၣ်န့ၣ်လီၤ.

9 ခဲကနံၣ်အံၤမ်အပာ်အတၢ်မၤကမၣ်မုၣ်ကမၣ်ခွါယံၤဒီးယၤ,ဒီးအစီၤပၤအစိၣ်တဖၣ်ယံၤဒီးယၤတက့ၢ်,ဒီးယကအိၣ်လၢအကျါလီၤထူလီၤယိာ်လီၤ.

10 နဲဒၣ်အံၤပှၤကညီဖိခွါဧၢ,ဒုးနဲၣ်ပှၤအံၣ်စရ့လးအပှၤဟံၣ်ဖိလၢဟံၣ်တဖျၢၣ်အံၤ,ဒ်သိးအမဲာ်ကဆှးလၢအတၢ်ဒဲးဘးအဃိ,ဒီးမ်အထိၣ်တၢ်အဒိအတဲာ်န့ၣ်တက့ၢ်.

11 ဒီးအမဲာ်မ့ၢ်ဆှးလၢကယဲၢ်တၢ်လၢအမၤဝဲအဃိဒီး,ဘိးဘၣ်သ့ၣ်ညါအီၤလၢအဒိအတဲာ်ဒီးအက့ၢ်အဂီၤ,ဒီးကျဲဟဲနုာ်ဒီးလဲၤထီၣ်တဖၣ်,ဒီးအဂီၤတဖၣ်ခဲလၢာ်,ဒီးတၢ်မၤလိာ်ခဲလၢာ်,ဒီးအဒိအတဲာ်ခဲလၢာ်,ဒီးအတၢ်သိၣ်တၢ်သီတဖၣ်ခဲလၢာ်န့ၣ်,ဒီးကွဲးတၢ်န့ၣ်လၢအမဲာ်ညါဒ်သိးအကတိၢ်န့ၢ်တၢ်အဒိအတဲာ်ဒီဖျၢၣ်ညါ,ဒီးအတၢ်မၤလိာ်ခဲလၢာ်,ဒီးမၤအီၤန့ၣ်တက့ၢ်.

12 အအံၤမ့ၢ်ဟံၣ်အတၢ်သိၣ်တၢ်သီ,လၢကစၢၢ်ဒီခိၣ်န့ၣ်တၢ်အိၣ်ဝဲလၢအဃၢၤဝးတရံးဝဲဒီဖျၢၣ်ညါကမ့ၢ်တၢ်စီဆှံကတၢၢ်လီၤ.ကွၢ်ကွၢ်,အဝဲန့ၣ်မ့ၢ်ဟံၣ်အတၢ်သိၣ်တၢ်သီလီၤ.

13 ဒီးတၢ်ထိၣ်တၢ်လုၢ်လီၢ်လၢပျၢ်တဖၣ်ဒ်အံၤ,(တပျၢ်န့ၣ်မ့ၢ်တပျၢ်ဒီးတထါလီၤ.)တၢ်လၢလာ်ခီန့ၣ်အကစီၤထီၣ်ကမ့ၢ်ဝဲတပျၢ်,ဒီးအဒီၣ်ဃီၤတပျၢ်,ဒီးအခိၣ်ဒူလၢအကနူၤအဃၢၤဝးတရံးဝဲန့ၣ်ကမ့ၢ်တထါလီၤ.ဒီးအဝဲန့ၣ်မ့ၢ်တၢ်လုၢ်လီၢ်အလီၢ်လၢခိတခီလီၤ.

14 ဒီးလၢလာ်ခီလၢဟီၣ်ခိၣ်အဖီခိၣ်ပၢၢ်လၢအကနူၤလၢလာ်ခီန့ၣ်မ့ၢ်ခံပျၢ်,ဒီးအဒီၣ်ဃီၤတပျၢ်,ဒီးလၢအကနူၤအအံၣ်ပၢၢ်လၢအကနူၤအလဲၢ်န့ၣ်မ့ၢ်လွံၢ်ပျၢ်,ဒီးအဒီၣ်ဃီၤမ့ၢ်တပျၢ်လီၤ.

15 ဒီးတၢ်လုၢ်လီၢ်မ့ၢ်လွံၢ်ပျၢ်,ဒီးလၢတၢ်လုၢ်လီၢ်ဆူထးခီန့ၣ်အနၢၣ်လွံၢ်နၢၣ်ကအိၣ်ဝဲလီၤ.

16 ဒီးတၢ်လုၢ်လီၢ်အထီမ့ၢ်တဆံခံပျၢ်,အဒီၣ်ဃီၤတဆံခံပျၢ်,တၢ်လွံၢ်နၢၣ်,အကပၤတုၤသိးသိးလီၤ.

17 ဒီးအကနူၤအထီကမ့ၢ်တဆံလွံၢ်ပျၢ်,ဒီးအိၣ်ဝဲလၢအဒီၣ်ဃီၤတဆံလွံၢ်ပျၢ်လၢတၢ်လွံၢ်ကပၤလီၤ.ဒီးအခိၣ်ဒူလၢအဃၢၤမ့ၢ်ဖးဖီပျၢ်,ဒီးအခီၣ်ထံးန့ၣ်မ့ၢ်တပျၢ်ဝးတရံးဝဲ,ဒီးအဃီန့ၣ်ကစဲၤလီၤဝဲဆူမုၢ်ထီၣ်တခီလီၤ.

18 ဒီးစံးဘၣ်ယၤ,ပှၤကညီဖိခွါဧၢ,ကစၢ်ယွၤစံးဒ်အံၤ,အဝဲန့ၣ်မ့ၢ်တၢ်သိၣ်တၢ်သီဘၣ်ဃးဒီးတၢ်လုၢ်လီၢ်လၢမုၢ်တနံၤလၢပှၤကတ့အီၤဒ်သိးအကလုၢ်တၢ်လုၢ်မ့ၣ်အူလၢအဖီခိၣ်,ဒီးဖှံတၢ်သွံၣ်လၢအဖီခိၣ်န့ၣ်လီၤ.

19 ဒီးနဘၣ်ဟ့ၣ်ပှၤလုၢ်တၢ်အဒိၣ်,ပှၤလ့ၤဝံဖိ,စီၤစၤဒိးအချံအသၣ်လၢအသုးဘူးအသးဆူယအိၣ်,ဒ်သိးအကမၤယတၢ်န့ၣ်လၢဂီၤဖံးဖါဖိတဒုလၢတၢ်လုၢ်တၢ်ဒဲးဘးအဂီၢ်လီၤ.

20 ဒီးနဘၣ်ဟံးန့ၢ်အသွံၣ်,ဒီးပာ်လၢတၢ်အနၢၣ်လွံၢ်နၢၣ်အလိၤ,ဒီးလၢအကနူၤလွံၢ်နၢၣ်အလိၤ,ဒီးလၢအခိၣ်ဒူဝးတရံးဝဲအလိၤလီၤ.နဘၣ်မၤကဆှီအီၤ,ဒီးမၤတၢ်ပူၤဖျဲးလၢအဂီၢ်လီၤ.

21 နဘၣ်ဟံးန့ၢ်တၢ်လုၢ်တၢ်ဒဲးဘးအဂီၤဖံးဖါတဒု,ဒီးပှၤဘၣ်ဆူးထီၣ်ကွံာ်အီၤလၢတၢ်မၤလိာ်ပာ်အလီၢ်လၢဟံၣ်ပူၤလၢတၢ်အလီၢ်စီဆှံလၢခိလီၤ.

22 ဒီးမုၢ်ခံနံၤတနံၤန့ၣ်နကဘၣ်လုၢ်မဲာ်တဲးလဲးဖါအလၢအပှဲၤတဒုလၢတၢ်လုၢ်တၢ်ဒဲးဘးအဂီၢ်,ဒီးပှၤကမၤကဆှီတၢ်လုၢ်လီၢ်ဒ်အမၤကဆှီဝဲလၢဂီၤဖံးဖါတဒုအသိးန့ၣ်လီၤ.

23 ဒီးတုၤနမၤကဆှီအီၤဝံၤဒီး,နဘၣ်လုၢ်ဂီၤဖံးဖါဖိအလၢအပှဲၤတဒု,ဒီးတၢ်အဖါလၢသိဒီးမဲာ်တဲးလဲးအကျါအလၢအပှဲၤတဒုလီၤ.

24 ဒီးနဘၣ်လုၢ်အီၤလၢယွၤအမဲာ်ညါ,ဒီးပှၤလုၢ်တၢ်အဒိၣ်တဖၣ်ဘၣ်ဖၢလီၤအံသၣ်လၢအဖီခိၣ်,ဒီးလုၢ်ထီၣ်အီၤလၢတၢ်လုၢ်မ့ၣ်အူလၢယွၤအဂီၢ်လီၤ.

25 နွံနံၤအတီၢ်ပူၤန့ၣ်နဘၣ်လုၢ်မဲာ်တဲးလဲးတဒုလၢတၢ်လုၢ်တၢ်ဒဲးဘးအဂီၢ်ကိးနံၤဒဲးလီၤ.ဒီးပှၤဘၣ်လုၢ်ဂီၤဖံးဖါဖိတဒု,ဒီးတၢ်အဖါအလၢအပှဲၤတဒုလၢသိဒီးမဲာ်တဲးလဲးအကျါလီၤ.

26 နွံနံၤအတီၢ်ပူၤန့ၣ်ပှၤဘၣ်မၤကဆှီထီၣ်,ဒီးမၤတၢ်ပူၤဖျဲးလၢတၢ်လုၢ်လီၢ်အဂီၢ်ဒီးဘၣ်ပာ်စီဆှံအီၤလီၤ.

27 ဒီးတၢ်လၢမုၢ်နံၤတဖၣ်န့ၣ်ပူၤကွံာ်ဒီး,တၢ်ကမၤအသးလၢမုၢ်ဃိးနံၤတနံၤဒီးဆူညါ,ပှၤလုၢ်တၢ်အဒိၣ်တဖၣ်န့ၣ်ဘၣ်လုၢ်သုတၢ်လုၢ်မ့ၣ်အူ,ဒီးသုတၢ်လုၢ်မၤဃူမၤဖိးလၢသုတၢ်လုၢ်လီၢ်အဖီခိၣ်,ဒီးသုကဘၣ်ယသးလီၤ,ကစၢ်ယွၤစံးဝဲဒၣ်.