Ezra 4
1ဒီးတုၤယူဒၤဒီးဘံၣ်ယၤမံၣ်အဒုၣ်အဒါတဖၣ်နၢ်ဟူဝဲလၢပှၤတၢ်မၢကဲကုၢ်ဖိသူၣ်ထီၣ်န့ၢ်ယွၤအံၣ်စရ့လးအကစၢ်အနူၢ်အစီၤဒီး, 2ဟဲဝဲဆူစီၤစရူဘၤဘ့လး,ဒီးပၢ်တဖၣ်အခိၣ်အအိၣ်ဒီးစံးဘၣ်အီၤ,ဒုးမၤထီၣ်ပှၤဒီးသုတက့ၢ်.အဂ့ၢ်ဒ်အံၤ,ပဃုသုကစၢ်ဒ်သုအသိး,ဒီးပလုၢ်တၢ်လၢအီၤလၢအၤရှူၢ်အစီၤပၤအ့ၤစၢ်ဃးဒိၣ်လၢအဟဲစိာ်ပှၤဖဲအံၤတဂၤအမုၢ်နံၤတဖၣ်လံၤလံၤန့ၣ်လီၤ. 3ဒီးစီၤစရူဘၤဘ့လး,ဒီးစီၤယ့ၤရှူ,ဒီးအံၣ်စရ့လးအပၢ်တဖၣ်အခိၣ်အဂၤတဖၣ်န့ၣ်စံးဘၣ်အီၤ,တၢ်ဘၣ်ဃးဒီးသုဒီးပှၤလၢတၢ်သူၣ်ထီၣ်ဟံၣ်လၢပကစၢ်အဂီၢ်န့ၣ်တအိၣ်ဘၣ်,မ့မ့ၢ်ပကစၢ်ဒၣ်ပဝဲတပူၤဃီပကသူၣ်ထီၣ်ဟံၣ်လၢယွၤအံၣ်စရ့လးအကစၢ်အဂီၢ်,ဒ်ပၤရၣ်အစီၤပၤကိရ့ၣ်မၤလိာ်ပှၤအသိးန့ၣ်လီၤ. 4ဒီးကီၢ်အပှၤဂီၢ်မုၢ်မၤစၢ်လီၤယူဒၤအပှၤဂီၢ်မုၢ်အစုအဂံၢ်အဘါ,ဒီးမၤတံာ်တာ်အီၤလၢအသူၣ်ထီၣ်တၢ်န့ၣ်လီၤ. 5ဒီးငါပှၤကူၣ်ထီၣ်တၢ်ထီဒါအီၤဒ်သိးအကမၤဟးဂီၤအတိာ်တၢ်န့ၣ်လၢပၤရၣ်အစီၤပၤကိရ့ၣ်အမုၢ်နံၤတဖၣ်ခဲလၢာ်တုၤလီၤလၢပၤရၣ်အစီၤပၤဒၤရယါဝ့ၣ်ကဲစီၤပၤန့ၣ်လီၤ. 6ဒီးလၢစီၤအဃၤၡဝ့ရိၣ်ကဲစီၤပၤ,လၢအကဲသီစီၤပၤန့ၣ်ပှၤကွဲးလံာ်ပာ်တၢ်ကမၣ်လၢပှၤအိၣ်ဝဲဆိးဝဲလၢယူဒၤ,ဒီးလၢယရူၤၡလ့ၣ်အပူၤတဖၣ်အလိၤလီၤ. 7ဒီးလၢစီၤအၢ်တၤၡါၡတၤအမုၢ်နံၤတဖၣ်န့ၣ်စီၤဘံးၡလၣ်,စီၤမံးသြၤဒး,စီၤတၤဘ့လး,ဒီးအသကိးလၢအအိၣ်လီၤတဲာ်တဖၣ်န့ၣ်ကွဲးန့ၢ်ပၤရၣ်အစီၤပၤစီၤအၢ်တၤၡါၡတၤအလံာ်လီၤ.ဒီးလံာ်အဖျၢၣ်န့ၣ်ကွဲးအသးလၢပှၤအရၣ်ဖိအလံာ်ဖျၢၣ်,ဒီးစံးဘၣ်က့ၤဝဲလၢပှၤအရၣ်ဖိအကျိာ်လီၤ. 8ဒီးတၢ်စံၣ်ညီၣ်ကွီၢ်အကစၢ်,စီၤရဃူၣ်,ဒီးပှၤကွဲးလံာ်စီၤၡံးမၡဲကွဲးန့ၢ်စီၤပၤအၢ်တၤၡါၡတၤအလံာ်ထီဒါယရူၤၡလ့ၣ်,ဟဲဝဲဒ်အံၤသိး, 9ပှၤစံၣ်ညီၣ်ကွီၢ်အကစၢ်စီၤရဃူၣ်,ဒီးပှၤကွဲးလံာ်စီၤၡံးမၡဲ,ဒီးအသကိးလၢအအိၣ်လီၤတဲာ်,ပှၤဒံနၤဖိ,ပှၤအပၢ်စသၤကၤဖိ,ပှၤတၢ်ပလးဖိ,ပှၤအၢ်ပၢ်စၤဖိ,ပှၤအၢ်ကဝၤဖိ,ပှၤဘၤဘူၤလိၣ်ဖိ,ပှၤရှူရနၤဖိ,ပှၤဒ့ဟၤဝးဖိ,ပှၤဧ့ၤလၣ်ဖိ, 10ဒီးပှၤကလုာ်အဂၤတဖၣ်လၢတၢ်ဒိၣ်တၢ်ထီစီၤအၤစနးပၢ်ဟဲစိာ်ဝဲ,ဒီးပာ်ဝဲလၢၡၤမရံအဝ့ၢ်တဖၣ်အပူၤ,ဒီးလၢအဂၤတဖၣ်အပူၤလၢထံမိၢ်ပှၢ်လၢအအံၤတခီ,ဒီးတၢ်ဒ်န့ၣ်သိး. 11ဒီးအအံၤမ့ၢ်လံာ်ကွဲးဆဲတဘ့ၣ်လၢအဟ့ၣ်ယုၢ်စီၤပၤအၢ်တၤၡါၡတၤ,နခ့နပှၤ,ပှၤကညီလၢထံမိၢ်ပှၢ်လၢအအံၤတခီ,ဒီးတၢ်ဒ်န့ၣ်, 12မ်စီၤပၤသ့ၣ်ညါလၢပှၤယူဒၤဖိလၢအဟဲဝဲလၢနအိၣ်တဖၣ်န့ၣ်ဟဲဝဲဆူပအိၣ်ဖဲယရူၤၡလ့ၣ်အပူၤ,ဒီးမၤက့ၤဝ့ၢ်လၢအပူထီၣ်ဒၣ်တၢ်,ဒီးလၢအအၢ,ဒီးမၤထီၣ်လံအခိၣ်ဒူ,ဒီးပာ်လီၤလံအခီၣ်ထံးန့ၣ်တက့ၢ်. 13မ်စီၤပၤသ့ၣ်ညါလၢဝ့ၢ်အံၤမ့ၢ်ဘၣ်တၢ်တ့က့ၤကဒီး,ဒီးအခိၣ်ဒူမၤထီၣ်က့ၤအသးဒီး,ပှၤတဟ့ၣ်ဘၣ်သွဲ,အတၢ်ဖိတၢ်လံၤအသွဲ,ဒီးကျဲအသွဲဘၣ်,ဒီးလၢအကတၢၢ်န့ၣ်စီၤပၤတဖၣ်ကဘၣ်တၢ်မၤစှၤလီၤအတၢ်လီၤ. 14ခဲကနံၣ်အံၤမ့ၢ်ပအီၣ်နူၢ်ဧိၤစီၤဧိၤအအံသၣ်ဒီး,ပထံၣ်ဘၣ်တၢ်မၤအၢစီၤပၤန့ၣ်တဂ့ၤဘၣ်.မၤသးဒ်န့ၣ်ဒီးပမၢလီၤတၢ်,ဒီးဘိးဘၣ်သ့ၣ်ညါစီၤပၤ, 15ဒ်သိးပှၤကဃုတၢ်လၢနပၢ်တဖၣ်အလံာ်ကွဲးနီၣ်တၢ်အပူၤလီၤ.ဒီးနကထံၣ်န့ၢ်လၢလံာ်ကွဲးနီၣ်တၢ်န့ၣ်အပူၤ,ဒီးသ့ၣ်ညါလၢဝ့ၢ်တဖျၢၣ်အံၤမ့ၢ်ဝ့ၢ်လၢအပူထီၣ်ဒၣ်တၢ်,ဒီးမၤအၢစီၤပၤတဖၣ်,ဒီးကီၢ်တဖၣ်န့ၣ်ဒီးလၢအဒုးပူထီၣ်တၢ်လၢအပူၤလၢပျၢၤလီၤ.ဝ့ၢ်အံၤဘၣ်တၢ်မၤဟးဂီၤအီၤလၢအဝဲတမံၤန့ၣ်အဃိလီၤ. 16ပဘိးဘၣ်သ့ၣ်ညါစီၤပၤလၢဝ့ၢ်အံၤမ့ၢ်ဘၣ်တၢ်တ့က့ၤကဒီး,ဒီးပှၤမၤထီၣ်အခိၣ်ဒူဒီး,မ့ၢ်အဝဲန့ၣ်အဃိသတးဒီးနဂီၢ်တအိၣ်လၢၤဘၣ်လၢထံမိၢ်ပှၢ်လၢအအံၤတခီဘၣ်. 17တုၤနုၤတစုစီၤပၤဟ့ၣ်ယုၢ်တၢ်စံးဆၢလၢတၢ်စံၣ်ညီၣ်ကွီၢ်အကစၢ်စီၤရဃူၣ်,ဒီးပှၤကွဲးလံာ်စီၤၡံးမၡဲ,ဒီးအသကိးလၢအအိၣ်လီၤတဲာ်လၢအအိၣ်ဝဲလၢၡၤမရံ,ဒီးလၢအအိၣ်လီၤတဲာ်တဖၣ်လၢထံမိၢ်ပှၢ်ဝၢ်ဘးခီ,ဒီးစံးဝဲဒၣ်,မ်သုအိၣ်မုာ်တက့ၢ်.ဒီးတၢ်ဒ်န့ၣ်, 18လံာ်လၢသုဟ့ၣ်ယုၢ်ပှၤတဘ့ၣ်န့ၣ်ပှၤဖးဝဲလီၤတံၢ်လီၤဆဲးလၢယမဲာ်ညါလီၤ. 19ဒီးယမၤလိာ်တၢ်,ဒီးပှၤဃုတၢ်,ဒီးထံၣ်န့ၢ်ဝဲလၢဝ့ၢ်တဖျၢၣ်ပူထီၣ်စီၤပၤတဖၣ်မုၢ်နံၤတဖၣ်လၢပျၢၤ,ဒီးတၢ်ပူထီၣ်တၢ်တၢထီၣ်တၢလီၤမၤအသးလၢအပူၤလီၤ. 20ဒီးစီၤပၤဖးဒိၣ်တဖၣ်အိၣ်တ့ၢ်ဝဲလၢယရူၤၡလ့ၣ်အဖီခိၣ်,ဒီးပၢဝဲလၢတၢ်ခဲလၢာ်လၢထံမိၢ်ပှၢ်ဝၢ်ဘးခီ,ဒီးပှၤဟ့ၣ်သွဲ,တၢ်ဖိတၢ်လံၤအသွဲ,ဒီးကျဲအသွဲလၢအီၤလီၤ. 21ခဲကနံၣ်အံၤ,မၤလိာ်လၢပှၤကညီတဖၣ်န့ၣ်အိၣ်ဃိ,ဒီးလၢဝ့ၢ်တဖျၢၣ်န့ၣ်အသုတဘၣ်တၢ်တ့က့ၤအီၤတဂ့ၤ,တုၤလီၤလၢယဟ့ၣ်လီၤတၢ်မၤလိာ်တက့ၢ်. 22ပလီၢ်သုသးဒ်သိးသုကမၤတၢ်အံၤတက့ၢ်.တၢ်မၤဟးဂီၤကဒိၣ်ထီၣ်ဒ်သိးအကမၤစှၤလီၤစီၤပၤတဖၣ်အတၢ်မ့ၢ်အဘၣ်မနုၤလဲၣ်. 23ဒီးတုၤပှၤဖးစီၤပၤအၢ်တၤၡါၡတၤအလံာ်ကွဲးဆဲတၢ်တဘ့ၣ်လၢစီၤရဃူၣ်ဒီးပှၤကွဲးလံာ်စီၤၡံၤမၡဲ,ဒီးအသကိးတဖၣ်အမဲာ်ညါဒီး,အဝဲသ့ၣ်လဲၤထီၣ်ချ့ချ့ဆူယရူၤၡလ့ၣ်အပူၤဆူပှၤယူဒၤဖိအအိၣ်,ဒီးဒုးအိၣ်ဃိအီၤလၢတၢ်မၤဆူၣ်,ဒီးတၢ်စိတၢ်ကမီၤလီၤ. 24တုၤနုၤတစုယွၤအဟံၣ်လၢအအိၣ်ဝဲလၢယရူၤၡလ့ၣ်အပူၤအတၢ်မၤဆိတ့ၢ်ဝဲလီၤ.ဒီးဆိတ့ၢ်ဝဲတုၤလီၤလၢပၤရၣ်အစီၤပၤဒၤရယါဝ့ၣ်ကဲစီၤပၤပှဲၤထီၣ်ခံနံၣ်တနံၣ်လီၤ.
Copyright information for
KswSKMB