Gal 3 | KswSKMB | STEP | ပှၤဟးဂီၤ,ပှၤကလၤတံဖိ,လၢတၢ်ပာ်ဖျါထီၣ်ယ့ၣ်ရှူးခရံာ်ဒိးသံအသးလၢထူၣ်စုညါအလိၤလၢသုမဲာ်ညါသ့ၣ်ဧၢ,မ့ၢ်မတၤမၤကဒါသုမဲာ်တဂၤလဲၣ်.တၢ်မိၣ်သ့ၣ်ညါယသးလၢသုထဲအံၤတမံၤ,

‏ Galatians 3

1 ပှၤဟးဂီၤ,ပှၤကလၤတံဖိ,လၢတၢ်ပာ်ဖျါထီၣ်ယ့ၣ်ရှူးခရံာ်ဒိးသံအသးလၢထူၣ်စုညါအလိၤလၢသုမဲာ်ညါသ့ၣ်ဧၢ,မ့ၢ်မတၤမၤကဒါသုမဲာ်တဂၤလဲၣ်.တၢ်မိၣ်သ့ၣ်ညါယသးလၢသုထဲအံၤတမံၤ, 2 မ့ၢ်သုဒိးန့ၢ်သးလၢတၢ်မၤဘၣ်ဃးဒီးတၢ်သိၣ်တၢ်သီ,မ့ၢ်လၢတၢ်နာ်ဘၣ်ဃးဒီးတၢ်နၢ်ဟူလဲၣ်. 3 မ့ၢ်သုဟးဂီၤထဲထဲအံၤဧါ.သုမၤထီၣ်သီလၢသး,ဒီးခဲကနံၣ်အံၤ,မ့ၢ်သုကမၤဝံၤက့ၤအီၤလၢတၢ်ဖံးတၢ်ညၣ်န့ၣ်ဧါ. 4 မ့မ့ၢ်ကလီကလီဒီး,မ့ၢ်သုဘၣ်တၢ်နးတၢ်ဖှီၣ်ပှဲၤအံၤကလီကလီဧါ. 5 မၤသးဒ်န့ၣ်ဒီးပှၤလၢအဒုးဒိးန့ၢ်သုလၢသးန့ၣ်,ဒီးမၤတၢ်လီၤလးလၢသုကျါတဂၤန့ၣ်,မ့ၢ်အမၤဝဲလၢတၢ်မၤဘၣ်ဃးဒီးတၢ်သိၣ်တၢ်သီ,မ့ၢ်လၢတၢ်နာ်ဘၣ်ဃးဒီးတၢ်နၢ်ဟူလဲၣ်. 6 ဒ်န့ၣ်အသိးစီၤအၤဘြၤဟၣ်စူၢ်က့ၤနာ်က့ၤယွၤ,ဒီးတၢ်ပးကဲလၢတၢ်တီတၢ်လိၤလၢအဂီၢ်လီၤ. ^{▼▼3:6 ၁မိၤ.၁၅း၆} 7 မၤသးဒ်န့ၣ်ဒီးသ့ၣ်ညါသုဝဲလၢပှၤလၢအဘၣ်ဃးဒီးတၢ်နာ်တဖၣ်န့ၣ်,မ့ၢ်စီၤအၤဘြၤဟၣ်အဖိခွါန့ၣ်တက့ၢ်. 8 ဒီးတၢ်ကွဲးအသးန့ၣ်,ထံၣ်ပာ်လၢယွၤကပာ်တီပာ်လိၤပှၤကလုာ်တဖၣ်လၢတၢ်နာ်ဒီး,စံၣ်တဲၤတဲလီၤပာ်တၢ်သးခုအကစီၣ်လၢစီၤအၤဘြၤဟၣ်,ဒီးစံးဝဲဒၣ်,ပှၤကိးကလုာ်ဒဲးကဘၣ်ဆိၣ်ဂ့ၤလၢနပူၤလီၤ. ^{▼▼3:8 ၁မိၤ.၁၂း၃} 9 မၤသးဒ်န့ၣ်ဒီးပှၤလၢအဘၣ်ဃးဒီးတၢ်နာ်တဖၣ်န့ၣ်ဘၣ်ဆိၣ်ဂ့ၤဃုာ်ဒီးပှၤလၢအနာ်တၢ်,စီၤအၤဘြၤဟၣ်လီၤ.

10 အဂ့ၢ်ဒ်အံၤ,ဖဲဒၣ်ပှၤလၢအဘၣ်ဃးဒီးတၢ်သိၣ်တၢ်သီအတၢ်မၤတဖၣ်န့ၣ်,မ့ၢ်အအိၣ်လၢတၢ်ဆိၣ်အၢအဖီလာ်လီၤ.အဂ့ၢ်ဒ်အံၤ,တၢ်ကွဲးအသး,ကယဲၢ်ပှၤလၢအတအိၣ်တဆိးဘၣ်လၢတၢ်ကွဲးအသးလၢလံာ်တၢ်သိၣ်တၢ်သီအပူၤခဲလၢာ်ဒ်သိးအကမၤအီၤဒီး,ဘၣ်တၢ်ဆိၣ်အၢကိးဂၤဒဲးလီၤ. ^{▼▼3:10 ၅မိၤ.၂၇း၂၆} 11 ဒီးတၢ်လၢပှၤတဘၣ်တၢ်ပာ်တီပာ်လိၤလၢတၢ်သိၣ်တၢ်သီအပူၤလၢယွၤအမဲာ်ညါနီတဂၤဘၣ်န့ၣ်,အိၣ်ဖျါဝဲလီၤ.အဂ့ၢ်ဒ်အံၤ,ပှၤတီပှၤလိၤကမူဝဲလၢတၢ်နာ်လီၤ. ^{▼▼3:11 ဃဘး.၂း၄} 12 ဒီးတၢ်သိၣ်တၢ်သီတဘၣ်ဃးဘၣ်ဒီးတၢ်နာ်ဘၣ်,မ့မ့ၢ်ပှၤလၢအမၤတၢ်န့ၣ်,ကမူဝဲလၢအပူၤလီၤ. ^{▼▼3:12 ၃မိၤ.၁၈း၅} 13 ခရံာ်ဘၣ်ဆိၣ်အၢလၢပဂီၢ်သတးဒီး,ပှ့ၤက့ၤပှၤလၢတၢ်ဆိၣ်အၢဘၣ်ဃးဒီးတၢ်သိၣ်တၢ်သီအပူၤလီၤ.အဂ့ၢ်ဒ်အံၤ,တၢ်ကွဲးအသး,ပှၤလၢအဘၣ်စဲထီအသးလၢသ့ၣ်အလိၤ,မ့ၢ်အဘၣ်ဆိၣ်အၢကိးဂၤဒဲးလီၤ. ^{▼▼3:13 ၅မိၤ.၂၁း၂၃} 14 ဒ်သိးစီၤအၤဘြၤဟၣ်အတၢ်ဆိၣ်ဂ့ၤကဘၣ်က့ၤပှၤကလုာ်တဖၣ်အလိၤလၢယ့ၣ်ရှူးခရံာ်အပူၤ,ဒ်သိးပကဒိးန့ၢ်သးလၢတၢ်စံးပာ်ဝဲန့ၣ်လၢတၢ်နာ်အဃိလီၤ.

15 ပုၢ်သ့ၣ်ဝဲၢ်သ့ၣ်ဧၢ,ယကတိၤတၢ်ဒ်ပှၤကညီအသိး,မ့ၢ်ပှၤကညီအတၢ်အၢၣ်လီၤအီလီၤဘၣ်ဆၣ်ဒီး,မ့ၢ်ဘၣ်တၢ်မၤကျၢၤအီၤဒီး,ပှၤတမၤဟးဂီၤဘၣ်မ့ၢ်ဂ့ၤ,တမၤအါထီၣ်မ့ၢ်ဂ့ၤ,နီတဂၤဘၣ်. 16 ဒီးတၢ်စံးပာ်တဖၣ်န့ၣ်မ့ၢ်တၢ်စံးဘၣ်စီၤအၤဘြၤဟၣ်ဒီးအချံအသၣ်လီၤ.တၢ်တစံးဘၣ်အချံအသၣ်တဖၣ်,ဒ်အဘၣ်ဃးဒီးပှၤအါအသိးဘၣ်,မ့ၢ်ဒ်အဘၣ်ဃးဒီးပှၤတဂၤဃီအသိး,ဒီးစံး,နချံနသၣ်,ဒ်ပစံးတၢ်အသိး,ခရံာ်လီၤ. ^{▼▼3:16 ၁မိၤ.၂၂း၁၈} 17 ဒီးယစံးတၢ်အံၤ,တၢ်အၢၣ်လီၤအီလီၤလၢယွၤမၤကျၢၤပာ်အီၤန့ၣ်,တၢ်သိၣ်တၢ်သီအိၣ်ထီၣ်လၢအလီၢ်ခံအနံၣ်လွံၢ်ကယၤသၢဆံန့ၣ်,မၤဟးဂီၤဝဲတုၤတၢ်စံးပာ်ကမ့ၢ်တၢ်ကလီကလီန့ၣ်တသ့ဘၣ်. 18 အဂ့ၢ်ဒ်အံၤ,တၢ်ဟ့ၣ်သါမ့ၢ်ဟဲလၢတၢ်သိၣ်တၢ်သီဒီး,တဟဲလၢၤဘၣ်လၢတၢ်စံးပာ်ဘၣ်.ဘၣ်ဆၣ်ဒီးယွၤဟ့ၣ်ဝဲလၢစီၤအၤဘြၤဟၣ်လၢတၢ်စံးပာ်လီၤ.

19 မၤသးဒ်န့ၣ်ဒီးတၢ်သိၣ်တၢ်သီမ့ၢ်မနုၤလဲၣ်.မ့ၢ်တၢ်ပာ်အါထီၣ်အီၤလၢတၢ်ကမၣ်တဖၣ်အဃိတုၤလၢအချံအသၣ်လၢတၢ်စံးပာ်ဘၣ်ဃးဒီးအီၤကဟဲဝဲ,ဒီးဘၣ်တၢ်စံၣ်ညီၣ်ဝဲလၢကလူးတဖၣ်,လၢပှၤအိၣ်လၢခံခီဘၢၣ်စၢၤတဂၤအစုပူၤလီၤ. 20 ဒီးတၢ်လၢပှၤအိၣ်လၢခံခီဘၢၣ်စၢၤန့ၣ်,ဘၣ်ဃးဒီးတၢ်တခီဧိၤတမ့ၢ်ဘၣ်,မ့မ့ၢ်ယွၤန့ၣ်မ့ၢ်တဂၤဃီလီၤ. 21 မၤသးဒ်န့ၣ်ဒီးမ့ၢ်တၢ်သိၣ်တၢ်သီထီဒါယွၤအတၢ်စံးပာ်တဖၣ်ဧါ.မ်အသုတမၤအသးဒ်န့ၣ်တဂ့ၤ.အဂ့ၢ်ဒ်အံၤ,တၢ်မ့ၢ်ဟ့ၣ်တၢ်သိၣ်တၢ်သီလၢအမၤမူတၢ်သ့ဒီး,ကမ့ၢ်မးတၢ်တီတၢ်လိၤကဟဲလၢတၢ်သိၣ်တၢ်သီန့ၣ်လီၤ. 22 ဘၣ်ဆၣ်ဒီးတၢ်ကွဲးအသးန့ၣ်ကးတံာ်ဃာ်ပှၤခဲလၢာ်အခံလၢတၢ်ဒဲးဘးအဖီလာ်,ဒ်သိးတၢ်စံးပာ်ဘၣ်ဃးဒီးတၢ်နာ်ယ့ၣ်ရှူးခရံာ်န့ၣ်,ကဘၣ်တၢ်ဟ့ၣ်လီၤအီၤလၢပှၤစူၢ်က့ၤနာ်က့ၤတၢ်န့ၣ်လီၤ. 23 တၢ်နာ်တချုးဟဲဒံးဘၣ်ဒီး,ပဘၣ်တၢ်ပၢၤပှၤလၢတၢ်သိၣ်တၢ်သီအဖီလာ်ဒီးတၢ်ကးတံာ်ဃာ်ပခံလၢတၢ်နာ်လၢအကအိၣ်ဖျါထီၣ်ဝဲအဂ့ၢ်လီၤ. 24 မၤသးဒ်န့ၣ်ဒီးတၢ်သိၣ်တၢ်သီမ့ၢ်ပှၤသိၣ်လိနဲၣ်လိတၢ်တဂၤလၢအကဆှၢပှၤဆူခရံာ်န့ၣ်,ဒ်သိးပကဘၣ်တၢ်ပာ်တီပာ်လိၤပှၤလၢတၢ်နာ်လီၤ. 25 မ့မ့ၢ်တုၤတၢ်နာ်ဟဲတုၤဒီး,ပတအိၣ်လၢၤဘၣ်လၢပှၤသိၣ်လိတၢ်န့ၣ်အဖီလာ်ဘၣ်. 26 အဂ့ၢ်ဒ်အံၤ,သုဝဲခဲလၢာ်,သုမ့ၢ်ယွၤအဖိလၢတၢ်နာ်ယ့ၣ်ရှူးခရံာ်အဃိလီၤ. 27 အဂ့ၢ်ဒ်အံၤ,ဖဲဒၣ်ပှၤဒိးဘျၢအသးဆူခရံာ်အပူၤတဖၣ်န့ၣ်,မ့ၢ်အကူထီၣ်သိးထီၣ်ခရံာ်လီၤ. 28 ပှၤယူဒၤဖိတအိၣ်,ပှၤဟ့းလ့ၣ်ဖိတအိၣ်,ပှၤကုၢ်ဖိတအိၣ်,ပှၤသဘျ့ဖိတအိၣ်,ပှၤပိာ်မုၣ်တအိၣ်,ပှၤပိာ်ခွါတအိၣ်ဘၣ်.အဂ့ၢ်ဒ်အံၤ,သုမ့ၢ်တၢ်တမံၤဃီခဲလၢာ်,လၢယ့ၣ်ရှူးခရံာ်အပူၤလီၤ. 29 ဒီးသုမ့မ့ၢ်ခရံာ်အတၢ်ဒီး,သုမ့ၢ်စီၤအၤဘြၤဟၣ်အချံအသၣ်,ဒီးပှၤကန့ၢ်ဘၣ်သါတၢ်ဒ်တၢ်စံးပာ်ဟဲဝဲအသိးန့ၣ်လီၤ.