Genesis 16
1ဒီးစီၤအၤဘြၣ်အမါနီၢ်စၤရဲတဆံးစၢ်ဘၣ်အဖိလၢအဂီၢ်ဘၣ်.ဒီးအဝဲဒၣ်အိၣ်ဒီးအကုၢ်ပိာ်မုၣ်တဂၤပှၤအဲၤကူပတူးဖိ,ဒီးအမံၤမ့ၢ်နီၢ်ဟၤကၢ်လီၤ. 2ဒီးနီၢ်စၤရဲစံးဘၣ်စီၤအၤဘြၤ,ကွၢ်ကွၢ်,ယွၤတြီယၤဒ်သိးယသုတဆံးစၢ်တၢ်တဂ့ၤလီၤ.လဲၤနုာ်စာ်ဆူယကုၢ်ပိာ်မုၣ်အအိၣ်တက့ၢ်.ဘၣ်တဘၣ်ယကသူၣ်ထီၣ်ယသးလၢအီၤလီၤ.ဒီးစီၤအၤဘြၣ်ကနၣ်အမါအကလုၢ်လီၤ. 3ဒီးလၢစီၤအၤဘြၣ်အိၣ်ဝဲလၢကီၢ်ကနၤဧၣ်အနံၣ်တဆံအလီၢ်ခံန့ၣ်,စီၤအၤဘြၣ်အမါနီၢ်စၤရဲဟံးန့ၢ်အကုၢ်ပိာ်မုၣ်,ပှၤအဲၤကူပတူးဖိနီၢ်ဟၤကၢ်,ဒီးဟ့ၣ်အီၤလၢအဝၤစီၤအၤဘြၣ်ဒ်သိးအကကဲထီၣ်အမါလီၤ. 4ဒီးလဲၤနုာ်ဝဲဆူနီၢ်ဟၤကၢ်အအိၣ်ဒီးအဝဲဒၣ်ဒၢထီၣ်လီၤ.ဒီးတုၤအထံၣ်ဘၣ်ဝဲလၢအဒၢထီၣ်ဒီး,အကစၢ်မုၣ်တမ့ၢ်လၢၤဘၣ်တၢ်လၢအမဲာ်ညါဘၣ်. 5ဒီးနီၢ်စၤရဲစံးဘၣ်စီၤအၤဘြၣ်,တၢ်မၤကမၣ်ယၤအံၤ,မ်အအိၣ်လၢနလိၤတက့ၢ်.ယဟ့ၣ်ယကုၢ်ပိာ်မုၣ်လၢနသးနါပှၢ်,ဒီးတုၤအထံၣ်ဘၣ်ဝဲလၢအဒၢထီၣ်ဒီး,ယတမ့ၢ်လၢၤဘၣ်တၢ်လၢအမဲာ်ညါဘၣ်.မ်ယွၤစံၣ်ညီၣ်တၢ်ဘၣ်ဃးဒီးယၤဒီးနၤတက့ၢ်. 6ဒီးစီၤအၤဘြၣ်စံးဘၣ်နီၢ်စၤရဲ,ကွၢ်ကွၢ်,နကုၢ်ပိာ်မုၣ်အိၣ်လၢနစုပူၤလီၤ.မၤအီၤဖဲဒၣ်အဂ့ၤလၢနမဲာ်တက့ၢ်.ဒီးနီၢ်စၤရဲမၤနးမၤဖှီၣ်အီၤ,ဒီးအဝဲဒၣ်ဃ့ၢ်ထီၣ်ကွံာ်လၢအမဲာ်ညါလီၤ. 7ဒီးယွၤအကလူးတဂၤထံၣ်န့ၢ်အီၤလၢထံထီၣ်ပၢၢ်တပူၤအဃၢၤလၢပှၢ်လၢ်ကျါ,လၢထံထီၣ်ပၢၢ်အဃၢၤအိၣ်ဝဲလၢဝ့ၢ်ရှူၢ်အကျဲလီၤ. 8ဒီးစံးဝဲဒၣ်,နီၢ်စၤရဲအကုၢ်ပိာ်မုၣ်နီၢ်ဟၤကၢ်ဧၢ,နဟဲလၢလဲၣ်,ဒီးနကလဲၤဆူလဲၣ်,ဒီးစံးဝဲဒၣ်,ယဃ့ၢ်လၢယကစၢ်မုၣ်နီၢ်စၤရဲအမဲာ်ညါလီၤ. 9ဒီးယွၤအကလူးတဂၤစံးဘၣ်အီၤ,က့ၤကဒါက့ၤဆူနကစၢ်မုၣ်အအိၣ်,ဒီးဆီၣ်လီၤနသးလၢအစုပူၤတက့ၢ်. 10ဒီးယွၤအကလူးစံးဘၣ်အီၤ,ယကမၤအါထီၣ်နချံနသၣ်အါအါကလဲာ်,ဒီးမ့ၢ်အအါအဃိဒီး,ပှၤတဂံၢ်ဘၣ်အီၤဘၣ်. 11ဒီးယွၤအကလူးစံးဘၣ်အီၤ,ကွၢ်ကွၢ်,နဒၢထီၣ်လံ,ဒီးနကဆံးစၢ်န့ၢ်နဖိခွါ,ဒီးနဘၣ်ယုၢ်အမံၤလၢစီၤယံးၡမၤဧ့လးလီၤ.အဂ့ၢ်ဒ်အံၤ,ယွၤနၢ်ဟူလံနတၢ်နးတၢ်ဖှီၣ်လံ. 12ဒီးကကဲထီၣ်ပှၤမံၤတဂၤလီၤ.အစုကထီဒါကယဲၢ်ပှၤကညီတဂၤလၢ်လၢ်,ဒီးကယဲၢ်ပှၤကညီအစုကထီဒါအီၤလီၤ.ဒီးကအိၣ်ဝဲဆိးဝဲလၢအဒီပုၢ်ဝဲၢ်ခဲလၢာ်အမဲာ်ညါလီၤ. 13ဒီးယွၤလၢအကတိၤတၢ်ဒီးအီၤန့ၣ်,ပိာ်မုၣ်ကိးဝဲအမံၤလၢထံၣ်တၢ်ကစၢ်လီၤ.အဂ့ၢ်ဒ်အံၤ,စံးဝဲဒၣ်,ပှၤလၢအထံၣ်ယၤတဂၤန့ၣ်မ့ၢ်ယဃုထံၣ်န့ၢ်အီၤဧါ. 14မၤသးဒ်န့ၣ်ဒီး,ထံပူၤတပူၤန့ၣ်ပှၤကိးဝဲလၢပှၤမူဝဲဒီးထံၣ်ယၤတဂၤအထံပူၤလီၤ.ကွၢ်ကွၢ်,အိၣ်ဝဲလၢကၤဒ့ၣ်ဒီးဘ့ရ့းအဘၢၣ်စၢၤလီၤ. 15ဒီးနီၢ်ဟၤကၢ်ဆံးစၢ်န့ၢ်အဖိခွါလၢစီၤအၤဘြၣ်အဂီၢ်,ဒီးစီၤအၤဘြၣ်ယုၢ်အဖိခွါလၢနီၢ်ဟၤကၢ်ဆံးစၢ်န့ၢ်အီၤအမံၤလၢစီၤယံးၡမၤဧ့လးလီၤ. 16ဒီးလၢနီၢ်ဟၤကၢ်ဆံးစၢ်န့ၢ်စီၤယံးၡမၤဧ့လးလၢစီၤအၤဘြၣ်အဂီၢ်န့ၣ်စီၤအၤဘြၣ်အသးပှၢ်ဃိးဆံဃုနံၣ်လီၤ.
Copyright information for
KswSKMB