‏ Genesis 24

1ဒီးစီၤအၤဘြၤဟၣ်အသးပှၢ်တ့ၢ်,ဒီးလဲၤနုာ်တ့ၢ်ဝဲလၢအနံၤအသီကျါ,ဒီးယွၤဆိၣ်ဂ့ၤတ့ၢ်စီၤအၤဘြၤဟၣ်လၢတၢ်ခဲလၢာ်အပူၤလီၤ.

2ဒီးစီၤအၤဘြၤဟၣ်စံးဘၣ်အကုၢ်သးပှၢ်လၢအဟံၣ်ပူၤ,လၢအပၢကယဲၢ်အတၢ်အိၣ်ဒီးအီၤခဲလၢာ်တဂၤန့ၣ်,ပာ်လၢ်နစုလၢယကံၣ်ဒုၣ်အဖီလာ်တက့ၢ်. 3ဒီးယကဒုးဆိၣ်နၤလၢယွၤ,မူခိၣ်ကစၢ်ဒီးဟီၣ်ခိၣ်ကစၢ်အမဲာ်ညါ,လၢနတဟံးန့ၢ်ဘၣ်ယဖိခွါအမါလၢပှၤကနၤဧၣ်ဖိလၢယအိၣ်ယဆိးလၢအကျါတဖၣ်အဖိမုၣ်ဘၣ်လီၤ. 4မ့မ့ၢ်နဘၣ်လဲၤဆူယကီၢ်ဒၣ်ယဲ,ဒီးဆူယဘူးယတံၢ်အအိၣ်,ဒီးဟံးန့ၢ်ယဖိခွါစီၤအံၤစဲးအမါလီၤ.

5ဒီးအကုၢ်စံးဘၣ်အီၤ,ဘၣ်တဘၣ်,တဘၣ်ဘၣ်ပိာ်မုၣ်အသးလၢအကပိာ်ယခံဆူကီၢ်တဘ့ၣ်အံၤဘၣ်.မ့ၢ်ယဘၣ်မၢနဖိခွါက့ၤက့ၤဆူကီၢ်လၢနဟဲထီၣ်လၢအပူၤန့ၣ်ဧါ.

6ဒီးစီၤအၤဘြၤဟၣ်စံးဘၣ်အီၤ,ပလီၢ်နသးဒ်သိးနသုတဒုးက့ၤက့ၤယဖိခွါဖဲန့ၣ်တဂ့ၤ. 7ယွၤ,မူခိၣ်ကစၢ်လၢအဟံးန့ၢ်ယၤလၢယပၢ်အဟံၣ်ပူၤ,ဒီးလၢယဘူးယတံၢ်အကီၢ်,ဒီးကတိၤတၢ်ဒီးယၤ,ဒီးဆိၣ်တၢ်ဒီးယၤ,ဒီးစံးဝဲဒၣ်,တၢ်လၢကီၢ်တဘ့ၣ်အံၤယကဟ့ၣ်လီၤနချံနသၣ်တဂၤန့ၣ်ကမၢလီၤအကလူးတဂၤလဲၤလၢနမဲာ်ညါ,ဒီးနကဟံးန့ၢ်ယဖိခွါအမါဖဲန့ၣ်လီၤ. 8ဒီးမ့ၢ်တဘၣ်ဘၣ်ပိာ်မုၣ်အသးလၢအကပိာ်နခံဒီး,နကပူၤဖျဲးလၢယတၢ်ဆိၣ်အံၤလီၤ.မ့မ့ၢ်ဒုးက့ၤက့ၤယဖိခွါဖဲန့ၣ်လ့ၤတက့ၤတဂ့ၤ.

9ဒီးအကုၢ်အပှၤပာ်အစုလၢအကစၢ်စီၤအၤဘြၤဟၣ်အကံၣ်ဒုၣ်အဖီလာ်,ဒီးဆိၣ်တၢ်ဒီးအီၤလၢတၢ်တမံၤန့ၣ်အဂ့ၢ်အကျိၤလီၤ.

10ဒီးအကုၢ်အပှၤဟံးန့ၢ်ကီၤလၤအူးဆံဆဲၣ်ဒုလၢအကစၢ်အကီၤလၤအူးကျါ,ဒီးလဲၤတၢ်လီၤ.(ဒီးအကစၢ်အတၢ်ဖိတၢ်လံၤအိၣ်ဝဲလၢအစုပူၤခဲလၢာ်လီၤ.)ဒီးဂဲၤဆၢထၢၣ်,ဒီးလဲၤဆူကီၢ်မ့းစပတၤမံ,ဝ့ၢ်နၤဃိၢ်လီၤ.

11ဒီးမုၢ်ဟါအကတီၢ်,အဆၢအကတီၢ်လၢပိာ်မုၣ်လဲၤဒၢၣ်ထံန့ၣ်,အဝဲဒၣ်ဒုးချံးလီၤအကီၤလၤအူးအခီၣ်လၢထံပူၤအဃၢၤလၢဝ့ၢ်တဖျၢၣ်န့ၣ်လၢခိတခီလီၤ. 12ဒီးစံးဝဲဒၣ်,ယွၤ,ယကစၢ်စီၤအၤဘြၤဟၣ်အကစၢ်ဧၢ,မၢတၢ်ဂ့ၤဘၣ်ယၤလၢမုၢ်မဆါတနံၤအံၤတက့ၢ်,ဒီးဒုးဘၣ်ယကစၢ်စီၤအၤဘြၤဟၣ်လၢနဘျုးနဖှိၣ်တက့ၢ်. 13ကွၢ်ကွၢ်,ယဆၢထၢၣ်လၢထံထီၣ်ပၢၢ်အဃၢၤအံၤ,ဒီးပှၤဝ့ၢ်ဖိအဖိမုၣ်တဖၣ်ဟးထီၣ်ဒၢၣ်ထံလီၤ. 14ဒီးမ်တၢ်မၤအသးလၢဖိသၣ်ပိာ်မုၣ်လၢယစံးဘၣ်အီၤ,ပာ်လီၤစာ်နထံစဲၤဒ်သိးယကအီထံတက့ၢ်န့ၣ်,ဒီးကစံး,အီတက့ၢ်,ဒီးယကဒုးအီစ့ၢ်ကီးနကီၤလၤအူးန့ၣ်,မ်အဝဲဒၣ်ကမ့ၢ်ပှၤလၢနပာ်အီၤလၢနခ့နပှၤစီၤအံၤစဲးအဂီၢ်န့ၣ်တက့ၢ်.အန့ၣ်ဒီးယကသ့ၣ်ညါလၢယကစၢ်ဘၣ်ဘျုးဘၣ်ဖှိၣ်လၢနၤလီၤ.

15ဒီးတၢ်မၤအသးလၢအကတိၤတၢ်တချုးဝံၤဒံးဘၣ်ဒီး,ကွၢ်ကွၢ်,နီၢ်ရံးဘကၤလၢအအိၣ်ဖျဲၣ်ဝဲလၢစီၤအၤဘြၤဟၣ်အဒီပုၢ်ဝဲၢ်စီၤနၤဃိၢ်အမါနီၢ်မံးလကၤအဖိခွါစီၤဘသူၤအ့လးအဂီၢ်တဂၤ,ဟးထီၣ်စိာ်ဒီးအထံစဲၤအိၣ်လၢအဖံဘၣ်ခိၣ်လီၤ. 16ဒီးဖိသၣ်ပိာ်မုၣ်န့ၣ်အက့ၢ်အဂီၤဂ့ၤမးလီၤ,မ့ၢ်ပိာ်မုၣ်လိၣ်ဘိလီၤ.ဒီးပှၤပိာ်ခွါတသ့ၣ်ညါဘၣ်အီၤနီတဂၤဘၣ်.ဒီးလဲၤလီၤဆူထံထီၣ်ပၢၢ်,ဒီးမၤပှဲၤအထံစဲၤ,ဒီးဟဲက့ၤထီၣ်လီၤ.

17ဒီးတၢ်အကုၢ်အပှၤဃ့ၢ်သဂၢၢ်အီၤ,ဒီးစံးဝဲဒၣ်,ဟ့ၣ်အီစာ်ယၤလၢနထံတစဲးအိၣ်လၢနထံစဲၤပူၤန့ၣ်တက့ၢ်.

18ဒီးစံးဝဲဒၣ်,ကစၢ်ဧၢ,အီတက့ၢ်,ဒီးပာ်လီၤအထံစဲၤလၢအစုလိၤချ့ချ့,ဒီးဒုးအီဝဲလီၤ. 19ဒီးဒုးအီဝဲဝံၤဒီး,စံးဝဲဒၣ်,ယကဒၢၣ်ထံလၢနကီၤလၤအူးအဂီၢ်တုၤအအီဘျဲးအီစ့ၢ်ကီးလီၤ. 20ဒီးမၤဝဲချ့ချ့,ဒီးလူလီၤထံလၢအထံစဲၤပူၤဆူကျိးပူၤ,ဒီးဃ့ၢ်ဒၢၣ်ထံကဒီးလၢထံထီၣ်ပၢၢ်အပူၤ,ဒီးဒၢၣ်ထံလၢအကီၤလၤအူးခဲလၢာ်အဂီၢ်လီၤ.

21ဒီးပှၤတဂၤန့ၣ်ကမၢကမၣ်လၢအဃိ,ဒီးယွၤမၤဘီၣ်ထီၣ်ညီထီၣ်အကျဲဧါန့ၣ်,ဒ်သိးအကသ့ၣ်ညါဒီး,အိၣ်ဘှီၣ်ကလာ်လီၤ. 22ဒီးတုၤကီၤလၤအူးအီတၢ်ဝံၤဒီး,တၢ်မၤအသးလၢပှၤတဂၤန့ၣ်ဟံးန့ၢ်ကွီၤထူလီၤတယၢၢ်တခီၡက့လး,ဒီးထံဖှံၣ်ခံဘိလီၤတယၢၢ်တဆံလၢအစုအဂီၢ်လီၤ.

23ဒီးစံးဝဲဒၣ်,နမ့ၢ်မတၤတဂၤအဖိမုၣ်လဲၣ်,ဒုးနဲၣ်လၢ်ယၤတက့ၢ်.ဒ်သိးပကအိၣ်လၢနပၢ်အဟံၣ်ခဲမုၢ်နၤအံၤအလီၢ်အိၣ်စ့ၢ်ကီးဧါ.

24ဒီးစံးဘၣ်အီၤ,ယမ့ၢ်နီၢ်မံးလကၤအဖိခွါလၢအဆံးစၢ်န့ၢ်လၢစီၤနၤဃိၢ်အဂီၢ်စီၤဘသူၤအ့လးအဖိမုၣ်လီၤ. 25ဒီးစံးဘၣ်စ့ၢ်ကီးအီၤ,လီၢ်ဧိၤဒံးဧိၤ,ဒီးနီၣ်ဧိၤမံၤဧိၤအိၣ်ဝဲဒီးပှၤအါလံ.ဒီးတၢ်အိၣ်အလီၢ်လၢမုၢ်နၤအဂီၢ်န့ၣ်အိၣ်ဝဲလီၤ.

26ဒီးပှၤတဂၤန့ၣ်ဆုးလီၤအခိၣ်,ဒီးဘါယွၤ, 27ဒီးစံးဝဲဒၣ်,ယွၤ,ယကစၢ်စီၤအၤဘြၤဟၣ်အကစၢ်လၢအတဒုးလဲၤသဒၣ်ဘၣ်အဘျုးအဖှိၣ်,ဒီးအတၢ်မ့ၢ်တၢ်တီလၢယကစၢ်ဘၣ်တဂၤန့ၣ်,မ်အဘၣ်တၢ်ဆိၣ်ဂ့ၤတက့ၢ်.ယဲဒၣ်အံၤယအိၣ်လၢကျဲန့ၣ်ယွၤဆှၢယၤဆူယကစၢ်အဒီပုၢ်ဝဲၢ်အဟံၣ်လီၤ.

28ဒီးဖိသၣ်ပိာ်မုၣ်န့ၣ်ဃ့ၢ်ဒုးနဲၣ်အမိၢ်အပှၤဟံၣ်ဖိလၢတၢ်တဖၣ်န့ၣ်လီၤ. 29ဒီးနီၢ်ရံးဘကၤအိၣ်ဒီးအဒီပုၢ်ဝဲၢ်ခွါ,ဒီးအမံၤမ့ၢ်စီၤလၤဘၣ်လီၤ.ဒီးစီၤလၤဘၣ်ဃ့ၢ်ထီၣ်ဆူပှၤတဂၤန့ၣ်အအိၣ်,ဆူထံထီၣ်ပၢၢ်အဃၢၤလီၤ. 30ဒီးတုၤအထံၣ်ဘၣ်ကွီၤ,ဒီးထံဖှံၣ်လၢအဒီပုၢ်ဝဲၢ်မုၣ်အစုလိၤ,ဒီးတုၤအနၢ်ဟူအဒီပုၢ်ဝဲၢ်မုၣ်နီၢ်ရံးဘကၤအတၢ်ကတိၤလၢအစံးပှၤတဂၤန့ၣ်စံးဘၣ်ယၤဒ်န့ၣ်ဒီး,တၢ်မၤအသးလၢအလဲၤဝဲဆူပှၤတဂၤန့ၣ်အအိၣ်,ဒီးကွၢ်ကွၢ်,အိၣ်ဆၢထၢၣ်လၢကီၤလၤအူးအဃၢၤ,ဖဲထံထီၣ်ပၢၢ်န့ၣ်လီၤ. 31ဒီးစံးဝဲဒၣ်,ပှၤလၢအဘၣ်တၢ်ဆိၣ်ဂ့ၤလၢယွၤတဂၤဧၢ,ဟဲနုာ်တက့ၢ်,နအိၣ်ဆၢထၢၣ်လၢခိအံၤမ့ၢ်အဘၣ်မနုၤလဲၣ်.အဂ့ၢ်ဒ်အံၤ,ယကတဲာ်ကတီၤလံဟံၣ်,ဒီးအလီၢ်တပူၤလၢကီၤလၤအူးအဂီၢ်လံ.

32ဒီးပှၤတဂၤန့ၣ်လဲၤနုာ်လၢဟံၣ်ပူၤလီၤ.ဒီးအဝဲဒၣ်ဃ့ၣ်လီၤကွံာ်ကီၤလၤအူးဒီးဟ့ၣ်လီၢ်ဧိၤဒံးဧိၤ,ဒီးနီၣ်ဧိၤမံၤဧိၤလၢကီၤလၤအူးအဂီၢ်,ဒီးထံလၢအသ့စီကွံာ်အခီၣ်အဂီၢ်,ဒီးလၢအပှၤအိၣ်ဒီးအီၤတဖၣ်အခီၣ်အဂီၢ်လီၤ.

33ဒီးပှၤပာ်တၢ်အီၣ်လၢအမဲာ်ညါဒ်သိးအကအီၣ်တၢ်လီၤ.ဘၣ်ဆၣ်ဒီးစံးဝဲဒၣ်,ယတချုးကတိၤဒံးဘၣ်ယတၢ်ကတိၤဘၣ်ဒီး,ယတအီၣ်ဘၣ်ဘၣ်.

34ဒီးစံးဝဲဒၣ်,ကတိၤတၢ်တက့ၢ်.ဒီးစံးဝဲဒၣ်,ယမ့ၢ်စီၤအၤဘြၤဟၣ်အကုၢ်အပှၤလီၤ. 35ဒီးယွၤဆိၣ်ဂ့ၤလံယကစၢ်ဒိၣ်မးလံ.ဒီးကဲထီၣ်လၢပှၤအဒိၣ်လံ.ဒီးဟ့ၣ်လီၤဝဲလၢသိ,ဒီးမဲာ်တဲးလဲး,ဒီးဂီၤဘုၣ်ဂီၤဖံး,ဒီးကျိၣ်ဧိၤစ့ဧိၤ,ဒီးထူဧိၤလွဲဧိၤဒီးကုၢ်ပိာ်ခွါ,ဒီးကုၢ်ပိာ်မုၣ်,ဒီးကီၤလၤအူး,ဒီးကသ့ၣ်ယီၤသ့ၣ်တဖၣ်လီၤ. 36ဒီးယကစၢ်အမါနီၢ်စၤရါဆံးစၢ်န့ၢ်အဖိခွါလၢယကစၢ်အဂီၢ်,ဖဲအသးပှၢ်တ့ၢ်လီၤ.ဒီးကယဲၢ်အတၢ်တမံၤလၢ်လၢ်န့ၣ်ဟ့ၣ်လံဝဲလၢအီၤလီၤ.

37ဒီးယကစၢ်ဒုးဆိၣ်လီၤယသးဒီးစံးဝဲ,နတဟံးန့ၢ်ဘၣ်ယဖိခွါအမါလၢပှၤကနၤဧၣ်ဖိလၢယအိၣ်ယဆိးလၢအကီၢ်ပူၤတဖၣ်အဖိမုၣ်အကျါဘၣ်. 38မ့မ့ၢ်နဘၣ်လဲၤဆူယပၢ်အဟံၣ်ပူၤ,ဒီးဆူယပှၤတဒူၣ်ဒၣ်ယဲအအိၣ်ဒီးဟံးန့ၢ်ယဖိခွါအမါလီၤ. 39ဒီးယစံးယကစၢ်န့ၣ်,ဘၣ်တဘၣ်ပိာ်မုၣ်တပိာ်ဘၣ်ယခံဘၣ်. 40ဒီးစံးဘၣ်ယၤ,ယွၤလၢယလဲၤတၢ်လၢအမဲာ်ညါကမၢအကလူးတဂၤလဲၤဒီးနၤ,ဒီးကမၤဘီၣ်ထီၣ်ညီထီၣ်နကျဲ,ဒီးနကဟံးန့ၢ်ယဖိခွါအမါလၢယပှၤတဒူၣ်ဒၣ်ယဲအကျါ,ဒီးလၢယပၢ်အဟံၣ်ပူၤလီၤ. 41တုၤနုၤတစုနကပူၤဖျဲးလၢယဆိၣ်တၢ်အံၤဖဲနဟဲဆူယပှၤတဒူၣ်ဒၣ်ယဲအအိၣ်လီၤ.ဒီးအဝဲသ့ၣ်မ့ၢ်တဟ့ၣ်ဘၣ်လၢနၤဘၣ်ဒီး,နကပူၤဖျဲးလၢယတၢ်ဆိၣ်အံၤလီၤ.

42ဒီးလၢမုၢ်မဆါတနံၤအံၤယဟဲတုၤလၢထံထီၣ်ပၢၢ်,ဒီးယစံး,ယွၤ,ယကစၢ်စီၤအၤဘြၤဟၣ်အကစၢ်ဧၢ,နမ့ၢ်မၤဘီၣ်မၤညီယကျဲလၢယပိာ်ဒီး, 43ကွၢ်ကွၢ်,ယဆၢထၢၣ်လၢထံထီၣ်ပၢၢ်အဃၢၤ,ဒီးတၢ်ကမၤအသးဖဲပှၤမုၣ်ကနီၤဟးထီၣ်ဒၢၣ်ထံ,ဒီးယစံးဘၣ်အီၤ,ဒုးအီလၢ်ယထံတစဲးလၢနထံစဲၤပူၤန့ၣ်တက့ၢ်, 44ဒီးအဝဲဒၣ်စံးဘၣ်ယၤ,အီနဲ,ဒီးယကဒၢၣ်ထံလၢနကီၤလၤအူးအဂီၢ်စ့ၢ်ကီးလီၤန့ၣ်ဒီး,မ်အဝဲဒၣ်ကမ့ၢ်ပိာ်မုၣ်လၢယွၤပာ်လၢယကစၢ်အဖိခွါအဂီၢ်န့ၣ်တက့ၢ်. 45ဒီးယကတိၤတၢ်တချုးဝံၤဒံးဘၣ်လၢယသးကံၢ်ပူၤဘၣ်ဒီး,ကွၢ်ကွၢ်,နီၢ်ရံးဘကၤဟးထီၣ်အိၣ်ဒီးအထံစဲၤလၢအဖံဘၣ်ခိၣ်,ဒီးလဲၤလီၤဆူထံထီၣ်ပၢၢ်,ဒီးဒၢၣ်ထီၣ်ထံဝံၤဒီး,ယစံးဘၣ်အီၤ,ဒုးအီလၢ်ယၤတက့ၢ်. 46ဒီးမၤဝဲချ့ချ့,ဒီးပာ်လီၤအထံစဲၤ,ဒီးစံးဝဲဒၣ်အီတက့ၢ်.ဒီးယကဒုးအီနကီၤလၤအူးစ့ၢ်ကီးလီၤ.ဒီးယအီတၢ်,ဒီးအဝဲဒၣ်ဒုးအီကီၤလၤအူးစ့ၢ်ကီးလီၤ. 47ကီလၤအူးစ့ၢ်ကီးလီၤ.ဒီးယသံကွၢ်အီၤဒီးယစံး,နမ့ၢ်မတၤတဂၤအဖိမုၣ်လဲၣ်.ဒီးစံးဝဲဒၣ်,ယမ့ၢ်စီၤနၤဃိၢ်အဖိခွါလၢနီၢ်မံးလကၤဆံးစၢ်န့ၢ်အဂီၢ်စီၤဘသူၤအ့လးအဖိမုၣ်လီၤ.ဒီးယဒုးတုၢ်ထီၣ်အီၤလၢနါဒ့ကွီၤ,ဒီးယဒုးသိးအစုလၢထံဖှံၣ်တဖၣ်လီၤ. 48ဒီးယဆုးလီၤယခိၣ်,ဒီးယဘါယွၤ,ဒီးယဆိၣ်ဂ့ၤယွၤ,ယကစၢ်စီၤအၤဘြၤဟၣ်အကစၢ်လၢအဆှၢယၤလၢကျဲအဘၣ်,ဒ်သိးယကဟံးန့ၢ်ယကစၢ်အဒီပုၢ်ဝဲၢ်တဂၤအဖိမုၣ်လၢအဖိခွါအဂီၢ်လီၤ. 49ဒီးခဲကနံၣ်အံၤသုမ့ၢ်မၤဘျုးမၤဖှိၣ်,မၤမ့ၢ်မၤတီဒီးယကစၢ်ဒီး,ဒုးနဲၣ်ယၤ,ဒီးမ့တမ့ၢ်ဘၣ်ဒီးဒုးနဲၣ်ယၤ,ဒ်သိးဆူစုထွဲမ့ၢ်ဂ့ၤ,ဆူစုစ့ၣ်မ့ၢ်ဂ့ၤ,ယဃၣ်ယသးကသ့န့ၣ်တက့ၢ်.

50ဒီးစီၤလၤဘၣ်ဒီးစီၤဘသူၤအ့လးစံးဆၢတၢ်,ဒီးစံးဝဲဒၣ်,တၢ်အံၤတမံၤဟဲလၢယွၤလီၤ.အၢမ့ၢ်ဂ့ၤ,ဂ့ၤမ့ၢ်ဂ့ၤ,ပစံးဒၣ်ပဝဲတသ့ဘၣ်. 51ကွၢ်ကွၢ်,နီၢ်ရံးဘကၤအိၣ်လၢနမဲာ်ညါလီၤ.ဟံးန့ၢ်အီၤဒီးက့ၤက့ၤတက့ၢ်.ဒီးမ်အကဲထီၣ်နကစၢ်အဖိခွါအမါဒ်ယွၤစံးတၢ်အသိးန့ၣ်တက့ၢ်.

52ဒီးတုၤစီၤအၤဘြၤဟၣ်အကုၢ်အပှၤနၢ်ဟူတၢ်ကတိၤဒီး,တၢ်မၤအသးလၢအတီၤလီၤကဒွံကျိာ်ဒီးဘါယွၤလီၤ. 53ဒီးအကုၢ်အပှၤန့ၣ်ထုးထီၣ်ကယၢစ့,ဒီးကယၢထူ,ဒီးတၢ်အကူအသိးသ့ၣ်တဖၣ်,ဒီးဟ့ၣ်လၢနီၢ်ရံးဘကၤလီၤ.ဒီးဟ့ၣ်တၢ်လုၢ်ဒိၣ်ပှ့ၤဒိၣ်တဖၣ်လၢအဒီပုၢ်ဝဲၢ်ခွါ,ဒီးအမိၢ်စ့ၢ်ကီးလီၤ.

54ဒီးအီၣ်တၢ်ဒီးအီတၢ်,အဝဲဒၣ်ဒီး,ပှၤကညီအိၣ်ဒီးအီၤ,ဒီးအိၣ်ဝဲသီတနၤကျၢၤလီၤ.ဒီးမုၢ်ဆ့ၣ်ထီၣ်န့ၣ်ဂဲၤဆၢထၢၣ်,ဒီးစံးဝဲဒၣ်,မၢယက့ၤက့ၤဆူယကစၢ်အိၣ်တက့ၢ်.

55ဒီးအဒီပုၢ်ဝဲၢ်ခွါဒီးအမိၢ်စံးဝဲဒၣ်,မ်ဖိသၣ်ပိာ်မုၣ်န့ၣ်အိၣ်ဒီးပှၤအနံၤအသီတဖၣ်,ဆံဆဲၣ်သီတက့ၢ်.တၢ်တဖၣ်န့ၣ်အလီၢ်ခံကလဲၤဘၣ်ဝဲလီၤ.

56ဒီးစံးဘၣ်အီၤ,တြီယၤတဂ့ၤ.အဂ့ၢ်ဒ်အံၤ,ယွၤမၤဘီၣ်မၤညီလံယကျဲလံ.မၢယက့ၤက့ၤတၢ်တက့ၢ်.ဒီးယကက့ၤဆူယကစၢ်အအိၣ်လီၤ.

57ဒီးအဝဲသ့ၣ်စံးဝဲဒၣ်,ပကကိးန့ၢ်ဖိသၣ်ပိာ်မုၣ်န့ၣ်,ဒီးသံကွၢ်တၢ်လၢအထးခိၣ်လီၤ. 58ဒီးကိးန့ၢ်နီၢ်ရံးဘကၤ,ဒီးစံးဘၣ်အီၤ,နကလဲၤဒီးပှၤတဂၤအံၤစ့ၢ်ကီးဧါ.ဒီးစံးဝဲဒၣ်,ယကလဲၤလီၤ.

59ဒီးမၢအဒီပုၢ်ဝဲၢ်မုၣ်နီၢ်ရံးဘကၤလဲၤတၢ်,ဒီးပှၤလၢအဒုးအီၣ်နုၢ်အီၤတဂၤ,ဒီးစီၤအၤဘြၤဟၣ်အကုၢ်အပှၤ,ဒီးအဝဲဒၣ်အပှၤကညီတဖၣ်လီၤ. 60ဒိးဆိၣ်ဂ့ၤနီၢ်ရံးဘကၤဒီးစံးဘၣ်အီၤ,နဲဒၣ်ပဒီပုၢ်ဝဲၢ်မုၣ်တဂၤဧၢ,မ်နကကဲထီၣ်ပှၤအကလးတဖၣ်အဘျီအကထိကထိတက့ၢ်.ဒီးမ်နချံနသၣ်န့ၢ်ဘၣ်ပှၤလၢအသးဟ့အီၤအပဲတရီန့ၣ်တက့ၢ်.

61ဒီးနီၢ်ရံးဘကၤ,ဒီးအဖိသၣ်ပိာ်မုၣ်တဖၣ်ဂဲၤဆၢထၢၣ်,ဒီးဒိးထီၣ်ကီၤလၤအူးဒီးပိာ်ပှၤတဂၤန့ၣ်အခံလီၤ.ဒီးတၢ်အကုၢ်အပှၤတဂၤန့ၣ်ဟံးန့ၢ်နီၢ်ရံးဘကၤ,ဒီးက့ၤက့ၤဝဲလီၤ.

62ဒီးစီၤအံၤစဲးဟဲက့ၤလၢပှၤမူဝဲဒီးထံၣ်ယၤတဂၤအထံပူၤန့ၣ်အကျဲလီၤ.အဂ့ၢ်ဒ်အံၤ,အိၣ်ဝဲဆိးဝဲလၢကီၢ်ကလံၤထံးတခီလီၤ. 63ဒီးစီၤအံၤစဲးဟးထီၣ်ဝဲဆူဟီၣ်ခိၣ်တကဝီၤပူၤ,ဒ်သိးအကဆိကမိၣ်ဆိကမးတၢ်လၢမုၢ်ဟါန့ၣ်လီၤ.ဒီးကျ့ထီၣ်အမဲာ်,ဒီးကွၢ်တၢ်,ဒီးကွၢ်ကွၢ်,ကီၤလၤအူးတဖၣ်န့ၣ်ဟဲက့ၤဝဲလီၤ.

64ဒီးနီၢ်ရံးဘကၤကျ့ထီၣ်အမဲာ်,ဒီးတုၤအထံၣ်ဘၣ်စီၤအံၤစဲးဒီး,ယုၢ်လီၤဝဲလၢကီၤလၤအူးအလိၤလီၤ. 65အဂ့ၢ်ဒ်အံၤ,စံးတ့ၢ်တၢ်အကုၢ်အပှၤ,ပှၤလၢအဟဲသဂၢၢ်ပှၤလၢဟီၣ်ခိၣ်တကဝီၤပူၤတဂၤန့ၣ်မ့ၢ်မတၤတဂၤလဲၣ်န့ၣ်,ဒီးတၢ်အကုၢ်အပှၤစံးတ့ၢ်ဝဲဒၣ်,မ့ၢ်ယကစၢ်လီၤ.ဒီးဟံးန့ၢ်နီၣ်ကျၢၢ်ဘၢ,ဒီးကျၢၢ်ဘၢအမဲာ်လီၤ.

66ဒီးတၢ်အကုၢ်အပှၤစံၣ်တဲၤတဲလီၤစီၤအံၤစဲးလၢကယဲၢ်တၢ်လၢအမၤဝဲခဲလၢာ်လီၤ. 67ဒီးစီၤအံၤစဲးဆှၢအီၤဆူအမိၢ်,နီၢ်စၤရါအဒဲပူၤ,ဒီးဟံးန့ၢ်နီၢ်ရံးဘကၤ,ဒီးအဝဲဒၣ်ကဲလၢအမါ,ဒီးစီၤအံၤစဲးအဲၣ်အီၤဒီးဘၣ်တၢ်မၤမုာ်မၤခုၣ်အီၤလၢအမိၢ်သံအလီၢ်ခံန့ၣ်လီၤ.