‏ Genesis 27

1ဒီးတုၤစီၤအံၤစဲးအသးပှၢ်တ့ၢ်,ဒီးအမဲာ်ခံးတုၤအတထံၣ်ဘၣ်တၢ်ဘၣ်ဒီး,တၢ်မၤအသးလၢအကိးန့ၢ်အဖိခွါဝဲၢ်ကိ,စီၤဧ့ၡီၤ,ဒီးစံးဘၣ်အီၤ,ယဖိခွါဧၢ,ဒီးစံးဘၣ်အီၤ,ကွၢ်ကွၢ်,ယၤလီၤ.

2ဒီးစံးဝဲဒၣ်,ကွၢ်ကွၢ်,ခဲကနံၣ်အံၤယသးပှၢ်တ့ၢ်လံ.ဒီးမုၢ်တနံၤလၢယကသံန့ၣ်ယတသ့ၣ်ညါဘၣ်. 3ဒီးခဲကနံၣ်အံၤဟံးန့ၢ်လၢ်နစုကဝဲၤ,နလၢပီၤ,ဒီးနချံၣ်,ဒီးလဲၤဆူပှၢ်လၢ်ကျါ,ဒီးခးန့ၢ်ယၤလၢဆၣ်ဖိကီၢ်ဖိအမံၤ, 4ဒီးမၤန့ၢ်ယတၢ်အီၣ်လၢအဝံၣ်,တၢ်လၢယအဲၣ်ဒိး,ဒီးဟဲစိာ်ဆူယအိၣ်တက့ၢ်.ဒီးယကအီၣ်တၢ်ဒ်သိးယသးကဆိၣ်ဂ့ၤနၤလၢယတချုးသံဒံးဘၣ်လီၤ.

5ဒီးတုၤစီၤအံၤစဲးကတိၤတၢ်ဒီးအဖိခွါစီၤဧ့ၡီၤဒီး,နီၢ်ရံးဘကၤနၢ်ဟူဝဲလီၤ.ဒီးစီၤဧ့ၡီၤလဲၤဝဲဆူပှၢ်လၢ်ကျါဒ်သိး,အကခးန့ၢ်ဆၣ်ဖိကီၢ်ဖိအမံၤဒီးဟဲက့ၤစိာ်ဝဲလီၤ. 6ဒီးနီၢ်ရံးဘကၤကတိၤတၢ်ဒီးအဖိခွါစီၤယၤကိာ်,ဒီးစံးဝဲဒၣ်,ကွၢ်ကွၢ်,ယနၢ်ဟူနပၢ်ကတိၤတၢ်ဒီးနဝဲၢ်စီၤဧ့ၡီၤဒီးစံးဝဲဒၣ်,ဟဲက့ၤစိာ်န့ၢ်ယၤလၢဆၣ်ဖိကီၢ်ဖိအမံၤ, 7ဒီးမၤန့ၢ်ယၤလၢတၢ်အီၣ်အဝံၣ်တက့ၢ်.ဒီးယကအီၣ်တၢ်ဒီးဆိၣ်ဂ့ၤနၤလၢယွၤအမဲာ်ညါလၢယတချုးသံဒံးဘၣ်လီၤ. 8ဒီးခဲကနံၣ်အံၤ,ယဖိခွါဧၢ,ကနၣ်ယကလုၢ်ဒ်ယမၤလိာ်နၤအသိးန့ၣ်တက့ၢ်. 9လဲၤလၢ်ဆူမဲာ်တဲးလဲးတဖုအအိၣ်,ဒီးဟဲက့ၤစိာ်န့ၢ်ယၤလၢမဲာ်တဲးလဲးဖိအဂ့ၤခံဒုတက့ၢ်.ဒီးယကမၤအီၤလၢတၢ်အီၣ်အဝံၣ်,လၢနပၢ်အဂီၢ်ဒ်အအဲၣ်ဒိးဝဲအသိးန့ၣ်လီၤ. 10ဒီးနဘၣ်ဟဲစိာ်ဆူနပၢ်အအိၣ်,ဒီးကအီၣ်တၢ်ဒ်သိးအကဆိၣ်ဂ့ၤနၤလၢအတချုးသံဒံးဘၣ်လီၤ.

11ဒီးစီၤယၤကိာ်စံးဘၣ်အမိၢ်နီၢ်ရံးဘကၤ,ကွၢ်ကွၢ်,ယဝဲၢ်စီၤဧ့ၡီၤမ့ၢ်ပှၤတဂၤအိၣ်ဒီးအဆူၣ်လီၤ.မ့မ့ၢ်ယၤတဂၤအံၤယမ့ၢ်ပှၤအဘျ့လီၤ. 12ဘၣ်တဘၣ်ယပၢ်ကကလၢၢ်ယၤ,ဒီးယကကဲထီၣ်လၢအမဲာ်ညါဒ်ပှၤလီတၢ်အသိးန့ၣ်,ဒီးယကဒုးဟဲဘၣ်ယလိၤလၢတၢ်ဆိၣ်အၢ,ဒီးတမ့ၢ်ဘၣ်တၢ်ဆိၣ်ဂ့ၤဘၣ်.

13ဒီးအမိၢ်စံးဘၣ်အီၤ,ယဖိခွါဧၢ,မ်တၢ်ဆိၣ်အၢနၤန့ၣ်ဘၣ်ယၤတက့ၢ်.ထဲကနၣ်ယကလုၢ်,ဒီးလဲၤဟဲက့ၤစိာ်န့ၢ်ယၤလၢတၢ်န့ၣ်တက့ၢ်.

14ဒီးလဲၤဝဲ,ဒီးမၤန့ၢ်,ဒီးဟဲက့ၤစိာ်ဆူအမိၢ်အအိၣ်,ဒီးအမိၢ်မၤတၢ်အီၣ်လၢအပၢ်အဲၣ်ဒိးလီၤ. 15ဒီးနီၢ်ရံးဘကၤဟံးန့ၢ်အဖိခွါဝဲၢ်ကိစီၤဧ့ၡီၤအကူအသိးအဂ့ၤလၢအအိၣ်ဒီးအီၤလၢဟံၣ်ပူၤ,ဒီးဒုးသိးအဖိခွါသဒါစီၤယၤကိာ်လၢအီၤလီၤ. 16ဒီးဒုးသိးအစု,ဒီးအကိာ်ဘျ့,ဒီးမဲာ်တဲးလဲးဖိအဖံး, 17ဒီးဟ့ၣ်တၢ်အီၣ်အဝံၣ်,ဒီးကိၣ်လၢအမၤဝဲတဖၣ်န့ၣ်,လၢအဖိခွါစီၤယၤကိာ်အစုပူၤလီၤ.

18ဒီးအဝဲဒၣ်ဟဲဆူအပၢ်အအိၣ်,ဒီးစံးဝဲဒၣ်,ယပၢ်ဧၢ,ဒီးစံးဝဲဒၣ်,ကွၢ်ကွၢ်,ယၤလီၤ.ယဖိခွါဧၢ,နမ့ၢ်မတၤတဂၤလဲၣ်. 19ဒီးစီၤယၤကိာ်စံးဘၣ်အပၢ်,ယမ့ၢ်နဖိဝဲၢ်ကိ,စီၤဧ့ၡီၤလီၤ.ယမၤလံတၢ်ဒ်နမၤလိာ်ယၤအသိးန့ၣ်လံ.ဂဲၤဆၢထၢၣ်ဆ့ၣ်နီၤအီၣ်လၢ်လၢယဆၣ်ဖိကီၢ်ဖိအမံၤ,ဒ်သိးနသးကဆိၣ်ဂ့ၤယၤတက့ၢ်.

20ဒီးစီၤအံၤစဲးစံးဘၣ်အဖိခွါ,ယဖိခွါဧၢ,နမၤန့ၢ်ချ့ချ့ထဲအံၤဒ်လဲၣ်.ဒီးစံးဝဲဒၣ်,အဂ့ၢ်ဒ်အံၤ,ယွၤနကစၢ်ဒုးဟဲအီၤဆူယအိၣ်လီၤ.

21ဒီးစီၤအံၤစဲးစံးဘၣ်စီၤယၤကိာ်,သုးဘူးနသးတက့ၢ်.နမ့ၢ်ယဖိခွါစီၤဧ့ၡီၤသပှၢ်တၢၢ်ဧါနတမ့ၢ်ဘၣ်လဲၣ်န့ၣ်,ယကကလၢၢ်နၤလီၤ.

22ဒီးစီၤယၤကိာ်သုးဘူးအသးဆူအပၢ်စီၤအံၤစဲးအအိၣ်,ဒီးကလၢၢ်အီၤ.ဒီးစံးဝဲဒၣ်,တၢ်အကလုၢ်န့ၣ်မ့ၢ်စီၤယၤကိာ်အကလုၢ်လီၤ.မ့မ့ၢ်အစုန့ၣ်မ့ၢ်စီၤဧ့ၡီၤအစုလီၤ. 23ဒီးမ့ၢ်အစုအိၣ်ဒီးအဆူၣ်ဒ်အဝဲၢ်စီၤဧ့ၡီၤအစုအသိးဒီး,တသ့ၣ်ညါနီၣ်ဘၣ်အီၤဘၣ်.ဒီးဆိၣ်ဂ့ၤအီၤလီၤ.

24ဒီးစံးဝဲဒၣ်,နမ့ၢ်ယဖိခွါစီၤဧ့ၡီၤသပှၢ်တၢၢ်စ့ၢ်ကီးဧါ.ဒီးစံးဝဲဒၣ်,ယၤလီၤ. 25ဒီးစံးဝဲဒၣ်,ဟဲက့ၤစိာ်ဘူးဒီးယၤ,ဒီးယကအီၣ်လၢယဖိခွါအဆၣ်ဖိကီၢ်ဖိအမံၤန့ၣ်ဒ်သိးယသးကဆိၣ်ဂ့ၤနၤလီၤ.ဒီးစိာ်ဘူးဝဲဒီးအီၤ,ဒီးအီၣ်ဝဲလီၤ.ဒီးဟဲစိာ်စပံးထံ,ဒီးအီဝဲလီၤ.

26ဒီးအပၢ်စီၤအံၤစဲးစံးဘၣ်အီၤ,သုးဘူးလၢ်နသးဆူယအိၣ်,ဒီးနၢမူယၤတက့ၢ်,ယဖိခွါဧၢ. 27ဒီးအဝဲဒၣ်သုးဘူးအသးဆူအအိၣ်ဒီးနၢမူအီၤလီၤ.ဒီးနၢဝဲလၢအကူအသိးအစိ,ဒီးဆိၣ်ဂ့ၤဝဲ,ဒီးစံးဝဲဒၣ်,ကွၢ်,ယဖိခွါအစိအံၤမ့ၢ်ဒ်ဟီၣ်ခိၣ်တကဝီၤလၢယွၤဆိၣ်ဂ့ၤအီၤအစိအသိးန့ၣ်လီၤ. 28ဒီးမ်ယွၤဟ့ၣ်လီၤနၤလၢမူခိၣ်အပစီၤထံ,ဒီးဟီၣ်ခိၣ်အသိ,ဒီးဘုဧိၤဟုဧိၤ,ဒီးစပံးထံစပံးနိအါအါကလဲာ်တက့ၢ်. 29မ်ပှၤဂီၢ်မုၢ်တဖၣ်မၤနတၢ်,ဒီးပှၤကလုာ်တဖၣ်သကူးလီၤအသးလၢနမဲာ်ညါတက့ၢ်.မ်နကဲထီၣ်နဒီပုၢ်ဝဲၢ်တဖၣ်အကစၢ်ဒီးနမိၢ်အဖိခွါတဖၣ်သကူးလီၤအသးလၢနမဲာ်သၣ်အပူၤတက့ၢ်.ပှၤလၢအဆိၣ်အၢနၤန့ၣ်,မ်အဘၣ်တၢ်ဆိၣ်အၢအီၤတက့ၢ်.ဒီးပှၤလၢအဆိၣ်ဂ့ၤနၤန့ၣ်,မ်အဘၣ်တၢ်ဆိၣ်ဂ့ၤအီၤတက့ၢ်.

30ဒီးတုၤစီၤအံၤစဲးဆိၣ်ဂ့ၤစီၤယၤကိာ်ဝံၤဒီးစီၤယၤကိာ်ဟးထီၣ်လၢအပၢ်စီၤအံၤစဲးအအိၣ်အဖၢမုၢ်န့ၣ်ဒီး,တၢ်မၤအသးလၢအဝဲၢ်စီၤဧ့ၡီၤဟဲက့ၤလၢအလဲၤခးတၢ်လီၤ. 31ဒီးအဝဲတဂၤန့ၣ်မၤစ့ၢ်ကီးလံတၢ်အီၣ်လၢအဝံၣ်,ဒီးဟဲက့ၤစိာ်ဆူအပၢ်အအိၣ်,ဒီးစံးဘၣ်အပၢ်,မ်ယပၢ်ဂဲၤဆၢထၢၣ်,ဒီးအီၣ်တၢ်လၢအဖိခွါအဆၣ်ဖိကီၢ်ဖိအမံၤ,ဒ်သိးနသးကဆိၣ်ဂ့ၤယၤတက့ၢ်.

32ဒီးအပၢ်စီၤအံၤစဲးစံးဘၣ်အီၤ,နမ့ၢ်မတၤတဂၤလဲၣ်.ဒီးစံးဘၣ်အီၤ,ယမ့ၢ်နဖိခွါ,နဖိခွါဝဲၢ်ကိစီၤဧ့ၡီၤလီၤ. 33ဒီးစီၤအံၤစဲးကနိးဝဲနးနးကလဲာ်ဒီးစံးဝဲဒၣ်,မ့ၢ်မတၤတဂၤလဲၣ်.ပှၤလၢအခးန့ၢ်ဆၣ်ဖိကီၢ်ဖိအမံၤ,ဒီးဟဲစိာ်ဆူယအိၣ်လၢနတချုးဟဲဒံးဘၣ်,ဒီးယအီၣ်တၢ်လၢအီၤခဲလၢာ်,ဒီးယဆိၣ်ဂ့ၤလံအီၤတဂၤန့ၣ်မ့ၢ်အအိၣ်ဖဲလဲၣ်.မ့ၢ်မးကဘၣ်တၢ်ဆိၣ်ဂ့ၤလီၤ.

34ဒီးတုၤစီၤဧ့ၡီၤနၢ်ဟူအပၢ်အတၢ်ကတိၤန့ၣ်ဒီး,ကဲးကိးပသူထီၣ်ဖးဒိၣ်နးနးကလဲာ်,ဒီးစံးဘၣ်အပၢ်,ဆိၣ်ဂ့ၤယၤ,ယၤစ့ၢ်ကီးတက့ၢ်,ပၢ်ဧၢ.

35ဒီးစံးဝဲဒၣ်,နပုၢ်ဟဲဝဲဒီးလီတၢ်,ဒီးဟံးန့ၢ်ကွံာ်လံနတၢ်ဆိၣ်ဂ့ၤန့ၣ်လံ. 36ဒီးစံးဝဲဒၣ်,အမံၤယၤကိာ်ကြၢးဒီးအီၤတမ့ၢ်ဘၣ်ဧါ.အဂ့ၢ်ဒ်အံၤ,ခွီၣ်ဘျီယၤခံစုလံ.ဟံးန့ၢ်ကွံာ်ယဝဲၢ်ကိအလီၢ်,ဒီးကွၢ်ကွၢ်,ခဲကနံၣ်အံၤဟံးန့ၢ်ကွံာ်လံယတၢ်ဆိၣ်ဂ့ၤလံ.ဒီးစံးဝဲဒၣ်,နတပာ်လီၤတဲာ်တၢ်ဆိၣ်ဂ့ၤတမံၤလၢယဂီၢ်ဘၣ်ဧါ.

37ဒီးစီၤအံၤစဲးစံးဆၢတၢ်,ဒီးစံးဘၣ်စီၤဧ့ၡီၤ,ကွၢ်ကွၢ်,ယပာ်အီၤလၢနကစၢ်,ဒီးအဒီပုၢ်ဝဲၢ်ခဲလၢာ်န့ၣ်,ယဟ့ၣ်အီၤလၢအကုၢ်အပှၤ,ဒီးယဒုးအိၣ်ကျၢၤအီၤဒီးဘုဧိၤဟုဧိၤ,ဒီးစပံးထံစပံးနိလီၤ.ဒီးခဲကနံၣ်အံၤယကမၤလၢနဂီၢ်မနုၤတမံၤလဲၣ်,ယဖိခွါဧၢ.

38ဒီးစီၤဧ့ၡီၤစံးဘၣ်အပၢ်,နအိၣ်ဒီးတၢ်ဆိၣ်ဂ့ၤထဲတမံၤဧိၤဧါ,ယပၢ်ဧၢ,ဆိၣ်ဂ့ၤယၤ,ယၤစ့ၢ်ကီးတက့ၢ်,ယပၢ်ဧၢ,ဒီးစီၤဧ့ၡီၤထုထီၣ်အကလုၢ်,ဒီးအမဲာ်ထံလီၤဝဲလီၤ.

39ဒီးအပၢ်စီၤအံၤစဲးစံးဆၢတၢ်,ဒီးစံးဘၣ်အီၤ,ကွၢ်ကွၢ်,နအိၣ်နဆိးအလီၢ်ကမ့ၢ်လၢဟီၣ်ခိၣ်အသိ,ဒီးမူခိၣ်လၢထးခီအပစီၤထံန့ၣ်လီၤ. 40ဒီးနကမူလၢနနးဒီးနကမၤနပုၢ်အတၢ်လီၤ.ဒီးတုၤနဟးထီၣ်ကွံာ်ဒီး,တၢ်ကမၤအသးလၢနကမၤကၢ်ကွံာ်အနီၣ်ယိးဘိလၢနကိာ်ချၢဃံလီၤ.

41ဒီးစီၤဧ့ၡီၤသးဟ့စီၤယၤကိာ်လၢတၢ်ဆိၣ်ဂ့ၤလၢအပၢ်ဆိၣ်ဂ့ၤအီၤအဃိလီၤ.ဒီးစီၤဧ့ၡီၤစံးလၢအသးကံၢ်ပူၤ,မုၢ်နံၤတဖၣ်လၢပဟီၣ်လၢပပၢ်အဃိန့ၣ်အိၣ်ဘူးတ့ၢ်လံ,ဒီးယကမၤသံယပုၢ်စီၤယၤကိာ်လီၤ.

42ဒီးအဖိခွါဝဲၢ်ကိအတၢ်ကတိၤန့ၣ်,ပှၤစံးဘၣ်တဲဘၣ်နီၢ်ရံးဘကၤလီၤ.ဒီးမၢပှၤလဲၤကိးန့ၢ်အဖိခွါသဒါစီၤယၤကိာ်,ဒီးစံးဘၣ်အီၤ,ကွၢ်ကွၢ်,နဝဲၢ်စီၤဧ့ၡီၤမၤမုာ်အသးလၢနဂ့ၢ်လၢအကမၤသံနၤလီၤ. 43ဒီးခဲကနံၣ်အံၤယဖိခွါဧၢ,ကနၣ်ယကလုၢ်တက့ၢ်.ဒီးဂဲၤဆၢထၢၣ်,ဒီးဃ့ၢ်ဆူယဒီပုၢ်ဝဲၢ်ခွါစီၤလၤဘၣ်အအိၣ်လၢဟၤရၣ်အပူၤ, 44ဒီးအိၣ်ဒီးအီၤမုၢ်နံၤတနီၤနီၤတုၤနဝဲၢ်အသးဒိၣ်န့ၣ်ဃၣ်ကွံာ်လၢနအိၣ်, 45ဒီးတုၤအသးပ့ၤနီၣ်တၢ်လၢနမၤတ့ၢ်အီၤန့ၣ်တက့ၢ်.တုၤနုၤတစုယကမၢပှၤလဲၤဟဲက့ၤစိာ်နၤဖဲန့ၣ်လီၤ.သုကဟါမၢ်သဒၣ်ကွံာ်ယၤခံဂၤလိာ်တနံၤဃီန့ၣ်,မ့ၢ်အဘၣ်မနုၤလဲၣ်.

46ဒီးနီၢ်ရံးဘကၤစံးဘၣ်စီၤအံၤစဲး,တၢ်ဘှံးယသးလၢယသးသမူအဃိ,လၢပှၤဃ့ၤသးဖိအဖိမုၣ်အဂ့ၢ်အကျိၤလီၤ.စီၤယၤကိာ်မ့ၢ်န့ၢ်မါလၢပှၤဃ့ၤသးဖိအဖိမုၣ်,ပှၤဒ်အံၤအသိး,ပှၤကီၢ်ဖိအံၤဒီး,ယသးသမူအံၤမ့ၢ်အဂိာ်မနုၤလဲၣ်.