Genesis 28
1ဒီးစီၤအံၤစဲးကိးန့ၢ်စီၤယၤကိာ်ဒီးဆိၣ်ဂ့ၤအီၤ,ဒီးမၤလိာ်အီၤ,ဒီးစံးဘၣ်အီၤ,န့ၢ်မါလၢပှၤကနၤဧၣ်ဖိအဖိမုၣ်တဂ့ၤ. 2ဂဲၤဆၢထၢၣ်လဲၤဆူကီၢ်ပၤဒနါရၣ်,ဆူနမိၢ်အပၢ်စီၤဘသူၤအ့လးအဟံၣ်ပူၤ,ဒီးန့ၢ်နမါလၢနမိၢ်အဒီပုၢ်ဝဲၢ်ခွါစီၤလၤဘၣ်အဖိမုၣ်အကျါဖဲန့ၣ်တက့ၢ်. 3ဒီးယွၤလၢအသ့တၢ်လၢာ်န့ၣ်မ်အဆိၣ်ဂ့ၤနၤ,ဒီးဒုးသၣ်ထီၣ်နၤ,ဒီးမၤအါထီၣ်နၤ,ဒီးဒုးကဲထီၣ်နၤလၢပှၤဂီၢ်မုၢ်တဖၣ်အတၢ်အိၣ်ဖှိၣ်တဖု, 4ဒီးဟ့ၣ်လီၤတၢ်ဆိၣ်ဂ့ၤဘၣ်ဃးဒီးစီၤအၤဘြၤဟၣ်လၢနၤ,ဒီးလၢနချံနသၣ်အိၣ်ဒီးနၤ,ဒ်သိးနကန့ၢ်သါကီၢ်လၢနအိၣ်တမှံၤလၢအပူၤ,လၢယွၤဟ့ၣ်လီၤစီၤအၤဘြၤဟၣ်န့ၣ်တက့ၢ်. 5ဒီးစီၤအံၤစဲးမၢစီၤယၤကိာ်လဲၤတၢ်,ဒီးလဲၤဝဲဆူပၤဒနါရၣ်,ဆူပှၤစူၤရံဖိစီၤယၤကိာ်ဒီးစီၤဧ့ၡီၤအမိၢ်နီၢ်ရံးဘကၤအဒီပုၢ်ဝဲၢ်စီၤဘသူၤအ့လးအဖိခွါစီၤလၤဘၣ်အအအိၣ်လီၤ. 6ဒီးစီၤဧ့ၡီၤထံၣ်ဝဲလၢစီၤအံၤစဲးဆိၣ်ဂ့ၤစီၤယၤကိာ်,ဒီးမၢအလဲၤဝဲဆူပၤဒနါရၣ်လၢအကန့ၢ်မါဖဲန့ၣ်,ဒီးဖဲအဆိၣ်ဂ့ၤအီၤန့ၣ်မၤလိာ်ဝဲ,ဒီးစံးဝဲဒၣ်,န့ၢ်နမါလၢပှၤကနၤဧၣ်ဖိအဖိမုၣ်တဂ့ၤန့ၣ်, 7ဒီးစီၤယၤကိာ်ကနၣ်အမိၢ်အပၢ်အကလုၢ်,ဒီးလဲၤဝဲဆူပၤဒနါရၣ်လီၤ. 8ဒီစီၤဧ့ၡီၤထံၣ်ဝဲလၢပှၤကနၤဧၣ်ဖိအဖိမုၣ်တဘၣ်ဘၣ်အပၢ်စီၤအံၤစဲးအသးဘၣ်, 9ဒီးစီၤဧ့ၡီၤလဲၤဆူစီၤယံးၡမၤဧ့လးအအိၣ်,ဒီးပာ်ဖှိၣ်ဒီးအမါလၢအအိၣ်တ့ၢ်တဖၣ်လၢစီၤအၤဘြၤဟၣ်အဖိခွါစီၤယံးၡမၤဧ့လးအဖိမုၣ်,စီၤနဘါယိးအဒီပုၢ်ဝဲၢ်မုၣ်,နီၢ်မၤဃလးလီၤ. 10ဒီးစီၤယၤကိာ်ဟးထီၣ်လၢဘ့ၢ်ၡဘၤ,ဒီးလဲၤဝဲဆူဟၤရၣ်လီၤ. 11ဒီးဘၣ်လၢတၢ်အလီၢ်တပူၤ,ဒီးအိၣ်ဝဲဖဲန့ၣ်သီတနၤကျၢၤလီၤ.အဂ့ၢ်ဒ်အံၤ,မုၢ်လီၤနုာ်တ့ၢ်လံ.ဒီးဟံးန့ၢ်လၢၢ်တဖျၢၣ်လၢတၢ်အလီၢ်တပူၤန့ၣ်,ဒီးပာ်ဝဲလၢအခိၣ်တခၢၣ်,ဒီးမံနီၤလၢတၢ်အလီၢ်တပူၤန့ၣ်လီၤ. 12ဒီးမံမီၢ်တၢ်ဒီးကွၢ်ကွၢ်,ဃီတဆိအိၣ်ဆၢထၢၣ်လၢဟီၣ်ခိၣ်ချၢ,ဒီးအခိၣ်ထီၣ်ဘးလၢမူခိၣ်လီၤ.ဒီးကွၢ်ကွၢ်,ယွၤအကလူးတဖၣ်လဲၤထီၣ်,ဒီးဟဲလီၤလၢအလိၤလီၤ. 13ဒီးကွၢ်ကွၢ်,ယွၤအိၣ်ဆၢထၢၣ်လၢအခိၣ်,ဒီးစံးဝဲဒၣ်,ယဲဒၣ်အံၤယမ့ၢ်ယွၤ,စီၤအၤဘြၤဟၣ်နပၢ်အကစၢ်,ဒီးစီၤအံၤစဲးအကစၢ်လီၤ.ကီၢ်လၢနမံလၢအလၢအဖီခိၣ်တဘ့ၣ်အံၤယကဟ့ၣ်လီၤနၤ,ဒီးနချံနသၣ်လီၤ. 14ဒီးနချံနသၣ်န့ၣ်ကမၤသးဒ်ဟီၣ်ခိၣ်အကမူၣ်အသိးန့ၣ်,ဒီးနကပြံထီၣ်ပြါထီၣ်ဆူမုၢ်နုာ်,ဒီးဆူမုၢ်ထီၣ်,ဒီးဆူကလံၤစိး,ဒီးဆူကလံၤထံး,ဒီးကယဲၢ်ပှၤဟီၣ်ခိၣ်အဒူၣ်တဖၣ်ကဘၣ်တၢ်ဆိၣ်ဂ့ၤလၢနၤ,ဒီးလၢနချံနသၣ်အပူၤခဲလၢာ်လီၤ. 15ဒီးကွၢ်ကွၢ်,ယအိၣ်ဒီးနၤ,ဒီးဖဲဒၣ်နလဲၤတၢ်တပူၤလၢ်လၢ်န့ၣ်ယကအံးက့ၤကွၢ်က့ၤနၤ,ဒီးယကဒုးဟဲက့ၤကဒါက့ၤနၤဆူကီၢ်တဘ့ၣ်အံၤလီၤ.အဂ့ၢ်ဒ်အံၤ,ယတလဲၤသဒၣ်ဘၣ်နၤတုၤယမၤတၢ်လၢယစံးဘၣ်နၤလီၤ. 16ဒီးစီၤယၤကိာ်ဖုသံနီၣ်ထီၣ်ဒီးစံးဝဲဒၣ်,မ့ၢ်မးယွၤအိၣ်ဝဲလၢတၢ်အလီၢ်တပူၤအံၤ,ဒီးယတသ့ၣ်ညါဘၣ်ယဲဘၣ်. 17ဒီးပျံၤဝဲ,ဒီးစံးဝဲဒၣ်,တၢ်အလီၢ်တပူၤအံၤမ့ၢ်တၢ်ပျံၤအလီၢ်ဆံးဒိၣ်လဲၣ်.အဝဲအံၤတမ့ၢ်ဘၣ်တၢ်ဂၤဘၣ်,မ့ၢ်ယွၤအဟံၣ်ဒီးအဝဲအံၤမ့ၢ်မူခိၣ်အပဲတရီလီၤ. 18ဒီးမုၢ်ဆ့ၣ်ထီၣ်န့ၣ်စီၤယၤကိာ်ဂဲၤဆၢထၢၣ်ဂီၤဂီၤ,ဒီးဟံးန့ၢ်လၢၢ်တဖျၢၣ်လၢအပာ်လၢအခိၣ်တခၢၣ်န့ၣ်,ဒီးပာ်ဆၢထၢၣ်အီၤလၢထူၣ်တထူၣ်,ဒီးလူလီၤသိလၢအဖီခိၣ်လီၤ. 19ဒီးယုၢ်အလီၢ်တပူၤန့ၣ်အမံၤလၢဘ့ၤသ့လးလီၤ.ဘၣ်ဆၣ်ဒီးဝ့ၢ်တဖျၢၣ်အမံၤလၢအခီၣ်ထံးန့ၣ်မ့ၢ်လူးစးလီၤ. 20ဒီးစီၤယၤကိာ်ဆိၣ်လီၤအသး,ဒီးစံးဝဲဒၣ်,ယွၤမ့ၢ်အိၣ်ဒီးယၤ,ဒီးမ့ၢ်အံးက့ၤကွၢ်က့ၤယၤလၢကျဲပူၤလၢယပိာ်အံၤ,ဒီးမ့ၢ်ဟ့ၣ်လီၤယၤလၢကိၣ်လၢယအီၣ်,ဒီးတၢ်ကူတၢ်သိးလၢယကကူကသိး, 21ဒီးယဟဲက့ၤကဒါက့ၤမုာ်မုာ်တုၤလၢယပၢ်အဟံၣ်ပူၤဒီး,ယွၤကကဲထီၣ်ယကစၢ်လီၤ. 22ဒီးလၢၢ်တဖျၢၣ်လၢယပာ်ဆၢထၢၣ်လၢထူၣ်တထူၣ်အံၤကကဲထီၣ်ယွၤအဟံၣ်,ဒီးကယဲၢ်တၢ်လၢနဟ့ၣ်လီၤယၤတမံၤလၢ်လၢ်န့ၣ်ယကဟ့ၣ်နၤလၢဆံဆဲၣ်ပူတပူသပှၢ်တၢၢ်လီၤ.
Copyright information for
KswSKMB