‏ Genesis 31

1ဒီးနၢ်ဟူဝဲလၢစီၤလၤဘၣ်အဖိခွါတဖၣ်အတၢ်ကတိၤလၢအစံးဝဲ,စီၤယၤကိာ်ဟံးန့ၢ်ကွံာ်ကယဲၢ်တၢ်လၢအအိၣ်ဒီးပပၢ်,ဒီးမ့ၢ်တၢ်လၢအအိၣ်တ့ၢ်ဒီးပပၢ်သတးဒီး,န့ၢ်ဘၣ်တၢ်လၤကပီၤအံၤခဲလၢာ်လီၤ. 2ဒီးစီၤယၤကိာ်ကွၢ်စီၤလၤဘၣ်အမဲာ်,ဒီးထံၣ်ဝဲလၢအတဘၣ်အမဲာ်ဒ်လၢမဟါမဟိအသိးန့ၣ်ဘၣ်လီၤ.

3ဒီးယွၤစံးဘၣ်စီၤယၤကိာ်,က့ၤကဒါက့ၤဆူနပၢ်တတဖၣ်အကီၢ်,ဒီးဆူနဘူးနတံၢ်အအိၣ်န့ၣ်တက့ၢ်.ဒီးယကအိၣ်ဒီးနၤလီၤ.

4ဒီးစီၤယၤကိာ်မၢပှၤလဲၤကိးန့ၢ်နီၢ်ရၤဃ့လး,ဒီးနီၢ်လ့ၤအၤဆူပျီပူၤ,ဆူအသိဒီးမဲာ်တဲးလဲးအအိၣ်, 5ဒီးစံးဘၣ်အီၤ,ယကွၢ်သုပၢ်အမဲာ်လၢအတဘၣ်ယၤဒ်လၢမဟါမဟိအသိးန့ၣ်ဘၣ်.ဘၣ်ဆၣ်ဒီးယပၢ်အကစၢ်န့ၣ်အိၣ်တ့ၢ်ဒီးယၤလီၤ. 6ဒီးသုသ့ၣ်ညါလၢယမၤသုပၢ်အတၢ်လၢယဂံၢ်ယဘါခဲလၢာ်လီၤ. 7ဒီးသုပၢ်န့ၢ်လီန့ၢ်ယၤ,ဒီးလဲက့ၤလံယဘူးယလဲဆံဆဲၣ်ဘျီလံ.ဘၣ်ဆၣ်ဒီးယွၤတဟ့ၣ်အမၤအၢဘၣ်ယၤနီတမံၤဘၣ်. 8အဝဲဒၣ်မ့ၢ်စံးဒ်အံၤ,တၢ်ကံၣ်စံၣ်ဘှဲကကဲထီၣ်နဘူးနလဲန့ၣ်ဒီး,သိဒီးမဲာ်တဲးလဲးတဖၣ်ဆံးစၢ်တၢ်ကံၣ်စံၣ်ဘှဲဒီဖုညါလီၤ.မ့ၢ်စံးဒ်အံၤ,တၢ်ကံၣ်တပလူာ်တပလူာ်ကကဲထီၣ်နဘူးနလဲန့ၣ်ဒီး,သိဒီးမဲာ်တဲးလဲးတဖၣ်ဆံးစၢ်တၢ်ကံၣ်တပလူာ်တပလူာ်ဒီဖုညါလီၤ.

9ဒီးယွၤထုးထီၣ်ကွံာ်သုပၢ်အဆၣ်ဖိကီၢ်ဖိအဒၢ,ဒီးဟ့ၣ်လၢယၤလီၤ. 10ဒီးတၢ်ဆၢကတီၢ်လၢသိဒီးမဲာ်တဲးလဲးတဖၣ်ဒၢထီၣ်ဒီး,တၢ်မၤအသးလၢယကျ့ထီၣ်ယမဲာ်,ဒီးယထံၣ်တၢ်လၢယတၢ်မံမီၢ်အပူၤ,ဒီးကွၢ်ကွၢ်,မဲာ်တဲးလဲးဖါတဖၣ်လၢအစံၣ်ထီၣ်လၢမဲာ်တဲးလဲးတဖၣ်အလိၤန့ၣ်,မ့ၢ်အကံၣ်တပလူာ်တပလူာ်,ကံၣ်စံၣ်ဘှဲ,ဒီးကံၣ်စံၣ်ပိၣ်လီၤ.

11ဒီးယွၤအကလူးစံးဘၣ်ယၤလၢတၢ်မံမီၢ်အပူၤ,ဒီးစံးဝဲဒၣ်,စီၤယၤကိာ်ဧၢ,ဒီးယစံး,ကွၢ်ကွၢ်,ယၤလီၤ. 12ဒီးအဝဲဒၣ်စံး,ကျ့ထီၣ်နမဲာ်,ဒီးကွၢ်,ကယဲၢ်မဲာ်တဲးလဲးဖါလၢအစံၣ်ထီၣ်လၢမဲာ်တဲးလဲးတဖၣ်အလိၤန့ၣ်မ့ၢ်အကံၣ်တပလူာ်တပလူာ်,ကံၣ်စံၣ်ဘှဲ,ကံၣ်စံၣ်ပိၣ်ခဲလၢာ်လီၤ.အဂ့ၢ်ဒ်အံၤ,တၢ်လၢစီၤလၤဘၣ်မၤနၤန့ၣ်ယထံၣ်ခဲလၢာ်လံ. 13ယမ့ၢ်ဘ့ၤသ့လးအကစၢ်,ဖဲနဖှူတၢ်အထူၣ်တထူၣ်,ဖဲနဆိၣ်တၢ်ဆိၣ်ဒီးယၤလီၤ.ခဲကနံၣ်အံၤ,ဂဲၤဆၢထၢၣ်,ဟးထီၣ်ကွံာ်လၢကီၢ်ပူၤအံၤ,ဒီးက့ၤကဒါက့ၤဆူနဘူးနတံၢ်အကီၢ်တက့ၢ်.

14ဒီးနီၢ်ရၤဃ့လး,ဒီးနီၢ်လ့ၤအၤစံးဆၢတၢ်,ဒီးစံးက့ၤအီၤ,တၢ်လၢပဂီၢ်,ဒီးတၢ်လၢပကန့ၢ်သါန့ၣ်အိၣ်ဒံးလၢပပၢ်အဟံၣ်ပူၤစ့ၢ်ကီးဧါ. 15အဝဲဒၣ်ပာ်ပှၤဒ်ပှၤတခီဘီမုၢ်ဖိအသိးန့ၣ်တမ့ၢ်ဘၣ်ဧါ.အဂ့ၢ်ဒ်အံၤ,ဆါကွံာ်ပှၤ,ဒီးအီၣ်ကွံာ်စ့ၢ်ကီးပစ့လၢာ်စီဖ့ကလ့ၤလီၤ. 16အဂ့ၢ်ဒ်အံၤ,ကယဲၢ်တၢ်အစုလီၢ်အခီၣ်ခိၣ်လၢယွၤထုးထီၣ်ကွံာ်လၢပပၢ်န့ၣ်မ့ၢ်ပတၢ်,ဒီးပဖိပလံၤအတၢ်လီၤ.ဒီးခဲကနံၣ်အံၤ,ကယဲၢ်တၢ်လၢယွၤစံးဘၣ်နၤခဲလၢာ်န့ၣ်မၤတက့ၢ်.

17ဒီးစီၤယၤကိာ်ဂဲၤဆၢထၢၣ်,ဒီးပာ်အဖိခွါ,ဒီးအမါသ့ၣ်တဖၣ်လၢကီၤလၤအူးအခိၣ်, 18ဒီးဆှၢထီၣ်ကွံာ်အဆၣ်ဖိကီၢ်ဖိအဒၢခဲလၢာ်,ဒီးကယဲၢ်အတၢ်ဖိတၢ်လံၤလၢအန့ၢ်ဘၣ်,ဆၣ်ဖိကီၢ်ဖိအဒၢလၢအန့ၢ်တ့ၢ်,လၢအန့ၢ်ဘၣ်ဝဲလၢပၤဒနါရၣ်အပူၤ,ဒ်သိးအကလဲၤဆူအပၢ်စီၤအံၤစဲးအအိၣ်လၢကီၢ်ကနၤဧၣ်အပူၤလီၤ.

19ဒီးစီၤလၤဘၣ်လဲၤတံာ်သိအဆူၣ်,ဒီးနီၢ်ရၤဃ့လးဟုၣ်န့ၢ်တ့ၢ်အပၢ်အတၢ်ဂီၤတရၤဖးလီၤ.

20ဒီးစီၤယၤကိာ်ဟုၣ်န့ၢ်ပှၤစူၤရံဖိစီၤလၤဘၣ်အသးလီၤ.အဂ့ၢ်ဒ်အံၤ,တစံးဘၣ်အီၤလၢအဃ့ၢ်န့ၣ်ဘၣ်. 21ဒီးဃ့ၢ်အဝဲဒၣ်ဒီးကယဲၢ်တၢ်လၢအအိၣ်ဒီးအီၤ,ဒီးဂဲၤဆၢထၢၣ်,ဒီးခီဂာ်ထံမိၢ်ပှၢ်,ဒီးဒိးအမဲာ်ဆူကစၢၢ်ကံးလဧးလီၤ.

22ဒီးသၢနံၤတနံၤန့ၣ်,ပှၤစံးဘၣ်စီၤလၤဘၣ်လၢစီၤယၤကိာ်ဃ့ၢ်လံန့ၣ်လီၤ. 23ဒီးဟံးန့ၢ်အဒီပုၢ်ဝဲၢ်တဖၣ်ဒီးအီၤ,ဒီးလူၤပိာ်အခံနွံသီကျဲ,ဒီးချုးန့ၢ်အီၤလၢကစၢၢ်ကံးလဧးအလိၤလီၤ.

24ဒီးယွၤဟဲဆူပှၤစူၤရံဖိစီၤလၤဘၣ်အအိၣ်လၢတၢ်မံမီၢ်အပူၤလၢမုၢ်နၤ,ဒီးစံးဘၣ်အီၤ,ပလီၢ်နသးဒ်သိးနသုတစံးတၢ်လၢစီၤယၤကိာ်လၢတၢ်ဂ့ၤပၢၢ်လၢတၢ်အၢန့ၣ်နီတမံၤတဂ့ၤ.

25ဒီးစီၤလၤဘၣ်ချုးန့ၢ်စီၤယၤကိာ်လီၤ.ဒီးစီၤယၤကိာ်သူၣ်လီၤလံအဒဲလၢကစၢၢ်အလိၤန့ၣ်,ဒီးစီၤလၤဘၣ်ဒီးအဒီပုၢ်ဝဲၢ်သူၣ်လီၤဝဲလၢကစၢၢ်ကံးလဧးအလိၤလီၤ.

26ဒီးစီၤလၤဘၣ်စံးဘၣ်စီၤယၤကိာ်,နမၤဒ်လဲၣ်.နဟုၣ်န့ၢ်ယသး,ဒီးမိၤထီၣ်ကွံာ်ယဖိမုၣ်တဖၣ်ဒ်ပှၤလၢပှၤဖီၣ်န့ၢ်အီၤလၢနးအသိးမးလဲၣ်. 27နဃ့ၢ်ခူသူၣ်,ဒီးနဟးထီၣ်ကစုဒု,ဒီးနတစံးဘၣ်ယၤဒ်သိးယကပျၢ်နၤဒီးတၢ်သးခု,ဒီးတၢ်သးဝံၣ်,ဒီးဒၢဧိၤတြၤဧိၤ,ဒီးတနၢ်တဖီန့ၣ်မ့ၢ်အဘၣ်မနုၤလဲၣ်. 28ဒီးနတဒုးနၢမူဘၣ်ယၤလၢယဖိခွါ,ဒီးယဖိမုၣ်သ့ၣ်တဖၣ်န့ၣ်မးလဲၣ်.ခဲကနံၣ်အံၤနမၤပှၤဟးဂီၤဖိအတၢ်မၤလီၤ. 29တၢ်အစိအကမီၤအိၣ်လၢယစုပူၤလၢယမၤအၢမၤနးသုသ့လီၤ.ဘၣ်ဆၣ်ဒီးသုပၢ်အကစၢ်ကတိၤတၢ်ဒီးယၤလၢမုၢ်နၤတနၤန့ၣ်ဒီးစံးဝဲဒၣ်,ပလီၢ်နသးဒ်သိးနသုတကတိၤတၢ်ဒီးစံးဘၣ်စီၤယၤကိာ်လၢတၢ်ဂ့ၤပၢၢ်လၢတၢ်အၢန့ၣ်တဂ့ၤ.

30ဒီးခဲကနံၣ်အံၤမ့ၢ်နသးသယုၢ်ဘၣ်နပၢ်အဟံၣ်ဒိၣ်မးဒီး,က့ၤဒီးနကက့ၤက့ၤလီၤ.နဟုၣ်န့ၢ်ယကစၢ်တဖၣ်န့ၣ်မ့ၢ်အဘၣ်မနုၤလဲၣ်.

31ဒီးစီၤယၤကိာ်စံးဆၢတၢ်,ဒီးစံးဘၣ်စီၤလၤဘၣ်,မ့ၢ်ယပျံၤတၢ်အဂ့ၢ်လီၤ.အဂ့ၢ်ဒ်အံၤ,ယစံး,နကဂုာ်ဆူၣ်န့ၢ်ဘၣ်ဖုးနဖိမုၣ်တဖၣ်လၢယၤလီၤ. 32ပှၤလၢနထံၣ်န့ၢ်နကစၢ်တဖၣ်အိၣ်ဒီးအီၤတဂၤန့ၣ်,မ်အသုတမူတဂ့ၤ.လၢပဒီပုၢ်ဝဲၢ်အမဲာ်ညါအံၤကွၢ်နီၣ်တၢ်လၢအမ့ၢ်နတၢ်အိၣ်ဒီးယၤ,ဒီးဟံးန့ၢ်လၢနဂီၢ်တက့ၢ်.ဒီးစီၤယၤကိာ်တသ့ၣ်ညါဘၣ်ဝဲလၢနီၢ်ရၤဃ့လးဟုၣ်န့ၢ်အီၤဘၣ်.

33ဒီးစီၤလၤဘၣ်လဲၤနုာ်ဝဲလၢစီၤယၤကိာ်အဒဲပူၤ,ဒီးလၢနီၢ်လ့ၤအၤအဒဲပူၤ,ဒီးလၢအကုၢ်ပိာ်မုၣ်ခံဂၤအဒဲပူၤ,ဒီးတထံၣ်န့ၢ်ဘၣ်ဝဲဘၣ်.ဒီးဟးထီၣ်လၢနီၢ်လ့ၤအၤအဒဲပူၤ,ဒီးလဲၤနုာ်ဝဲလၢနီၢ်ရၤဃ့လးအဒဲပူၤလီၤ.

34ဒီးနီၢ်ရၤဃ့လးဟံးန့ၢ်တ့ၢ်တၢ်ဂီၤတရၤဖးတဖၣ်န့ၣ်,ဒီးပာ်ဝဲလၢကီၤလၤအူးအဂီၤကၢ်အဖီလာ်,ဒီးဆ့ၣ်နီၤဝဲလၢအဖီခိၣ်လီၤ.ဒီးစီၤလၤဘၣ်ကလၢၢ်တၢ်လၢဒဲပူၤဒီဖျၢၣ်ညါ,ဒီးတထံၣ်န့ၢ်ဘၣ်ဝဲဘၣ်.

35ဒီးစံးဘၣ်အပၢ်,လၢယဂဲၤဆၢထၢၣ်လၢနမဲာ်ညါတကဲဘၣ်အံၤမ်ယကစၢ်အသုတသးထီၣ်တဂ့ၤ.အဂ့ၢ်ဒ်အံၤ,ပိာ်မုၣ်အလုၢ်အလၢ်အိၣ်လၢယလိၤလီၤ.ဒီးဃုဝဲ,ဒီးတထံၣ်န့ၢ်ဘၣ်တၢ်ဂီၤတရၤဖးန့ၣ်ဘၣ်.

36ဒီးစီၤယၤကိာ်အသးထီၣ်,ဒီးအ့ၣ်လိာ်အသးဒီးစီၤလၤဘၣ်,ဒီးစီၤယၤကိာ်စံးဆၢတၢ်ဒီးစံးဘၣ်စီၤလၤဘၣ်,လၢနလူၤသဖှိပိာ်ယခံန့ၣ်ယတၢ်ကမၣ်မ့ၢ်မနုၤလဲၣ်.ယတၢ်ဒဲးဘးမ့ၢ်မနုၤလဲၣ်. 37အဂ့ၢ်ဒ်အံၤ,နကလၢၢ်တ့ၢ်ယတၢ်ဖိတၢ်လံၤခဲလၢာ်,ဒီးနထံၣ်န့ၢ်တၢ်ဘၣ်ဃးဒီးနဟံၣ်အတၢ်ဖိတၢ်လံၤခဲလၢာ်န့ၣ်မနုၤတမံၤလဲၣ်.ပာ်လီၤအီၤဖဲအံၤလၢယဒီပုၢ်ဝဲၢ်,ဒီးနဒီပုၢ်ဝဲၢ်အမဲာ်သၣ်ပူၤဒ်သိးအကလိာ်ပကွီၢ်တက့ၢ်. 38ယအိၣ်ဒီးနၤအနံၣ်ခံဆံအံၤနသိမိၢ်,နမဲာ်တဲးလဲးမိၢ်အဟုးတဟးဂီၤဘၣ်.ဒီးနသိဒီးနမဲာ်တဲးလဲးအဖါယတအီၣ်ဘၣ်. 39တၢ်ဘၣ်ဖှီသံန့ၣ်ယတဟဲစိာ်ဘၣ်ဆူနအိၣ်ဘၣ်,ယလိးက့ၤယဲလီၤ.လၢမုၢ်ဆါခီမ့ၢ်ဂ့ၤ,လၢမုၢ်နၤခီမ့ၢ်ဂ့ၤ,တၢ်လၢအဘၣ်တၢ်ဟုၣ်အီၤန့ၣ်,နဃုလၢယစုပူၤလီၤ. 40ယအိၣ်လၢမုၢ်ဆါခီန့ၣ်တၢ်ကိၢ်အီၣ်ယၤ,ဒီးလၢမုၢ်နၤန့ၣ်တၢ်ဂိၢ်အီၣ်ယၤ,ဒီးယတၢ်မံဟးသဒၣ်ကွံာ်ယမဲာ်လီၤ. 41ဒ်န့ၣ်အသိးယအိၣ်လၢနဟံၣ်ပူၤအနံၣ်ခံဆံလီၤ.ယမၤနတၢ်တဆံလွံၢ်နံၣ်လၢနဖိမုၣ်ခံဂၤအဂီၢ်,ဒီးဃုနံၣ်လၢနသိဒီးမဲာ်တဲးလဲးအဂီၢ်,ဒီးနလဲက့ၤယဘူးယလဲဆံဆဲၣ်ဘျီလီၤ. 42ယပၢ်အကစၢ်,စီၤအၤဘြၤဟၣ်အကစၢ်,ဒီးစီၤအံၤစဲးအတၢ်ပျံၤန့ၣ်မ့ၢ်တအိၣ်ဘၣ်ဒီးယၤဘၣ်ဒီး,မ့ၢ်မးခဲကနံၣ်အံၤနကဒုးက့ၤကလီယၤလီၤ.ယွၤကွၢ်ယတၢ်နးတၢ်ဖှီၣ်,ဒီးယမၤတၢ်လၢယစု,ဒီးသိၣ်ဃီၣ်နၤလၢမကိာ်တနၤအံၤလီၤ.

43ဒီးစီၤလၤဘၣ်စံးဆၢတၢ်,ဒီးစံးဘၣ်စီၤယၤကိာ်,တၢ်လၢဖိမုၣ်တဖၣ်အံၤမ့ၢ်ယဖိမုၣ်,ဒီးတၢ်လၢဖိသၣ်တဖၣ်အံၤမ့ၢ်ယဖိသၣ်,ဒီးတၢ်လၢသိဒီးမဲာ်တဲးလဲးတဖၣ်အံၤမ့ၢ်ယသိဒီးမဲာ်တဲးလဲးတဖၣ်,ဒီးကယဲၢ်တၢ်လၢနထံၣ်ဘၣ်တဖၣ်န့ၣ်မ့ၢ်ယတၢ်ခဲလၢာ်လီၤ.ဒီးတၢ်လၢမုၢ်မဆါတနံၤအံၤယမၤယဖိမုၣ်ဒီးအဖိလၢအဆံးစၢ်တဖၣ်န့ၣ်ကသ့မနုၤတမံၤလဲၣ်.

44ဒီးခဲကနံၣ်အံၤဟဲမီၣ်,မ်ပမၤတၢ်အၢၣ်လီၤအီလီၤ,ယၤဒီးနၤ,ဒီးမ်အကဲထီၣ်တၢ်အုၣ်အသးလၢယၤဒီးနၤအဘၢၣ်စၢၤန့ၣ်တက့ၢ်.

45ဒီးစီၤယၤကိာ်ဟံးန့ၢ်လၢၢ်တဖျၢၣ်,ဒီးပာ်ထီၣ်အီၤလၢထူၣ်တထူၣ်လီၤ. 46ဒီးစီၤယၤကိာ်စံးဘၣ်အဒီပုၢ်ဝဲၢ်တဖၣ်,ထၢထီၣ်န့ၢ်လၢၢ်တဖၣ်န့ၣ်တက့ၢ်.ဒီးအဝဲသ့ၣ်ဟံးန့ၢ်လၢၢ်တဖၣ်,ဒီးပူဖှိၣ်ထီၣ်တပူ,ဒီးအီၣ်တၢ်ဖဲန့ၣ်လၢတၢ်တပူအဖီခိၣ်လီၤ.

47ဒီးစီၤလၤဘၣ်ယုၢ်အမံၤလၢယကၢ်စၤဒူသၤလီၤ.မ့မ့ၢ်စီၤယၤကိာ်ယုၢ်အမံၤလၢကံးလဧးလီၤ.

48ဒီးစီၤလၤဘၣ်စံးဝဲဒၣ်,တၢ်လၢတၢ်ပူအံၤမ့ၢ်တၢ်အုၣ်အသးလၢယၤဒီးနၤအဘၢၣ်စၢၤလၢမုၢ်မဆါတနံၤအံၤလီၤ.မၤသးဒ်န့ၣ်ဒီးပှၤကိးအမံၤလၢကံးလဧးဒီးမံးစပၤလီၤ. 49အဂ့ၢ်ဒ်အံၤ,စံးဝဲဒၣ်,တုၤပအိၣ်သဒၢလိာ်ပသးဒီးမ်ယွၤကွၢ်တၢ်လၢယၤဒီးနၤအဘၢၣ်စၢၤန့ၣ်တက့ၢ်. 50နမ့ၢ်မၤနးမၤဖှီၣ်ယဖိမုၣ်တဖၣ်,ဒီးနမ့ၢ်ဟံးန့ၢ်နမါလၢယဖိမုၣ်အဖီခိၣ်ဒီး,ပှၤကညီတအိၣ်ဘၣ်ဒီးပှၤနီတဂၤဘၣ်.ကွၢ်,ယွၤမ့ၢ်တၢ်အုၣ်အသးအိၣ်လၢယၤဒီးနၤအဘၢၣ်စၢၤန့ၣ်လီၤ.

51ဒီးစီၤလၤဘၣ်စံးဘၣ်စီၤယၤကိာ်,ကွၢ်ကွၢ်,တၢ်ပူတဖျၢၣ်အံၤ,ဒီးကွၢ်ကွၢ်,တၢ်ထူၣ်တထူၣ်အံၤလၢယပာ်ထီၣ်လၢယၤဒီးနၤအဘၢၣ်စၢၤန့ၣ်, 52မ်တၢ်ပူတဖျၢၣ်အံၤကဲထီၣ်တၢ်အုၣ်အသး,ဒီးမ်တၢ်ထူၣ်တထူၣ်အံၤကဲထီၣ်တၢ်အုၣ်အသးလၢယတခီဂာ်တၢ်ပူတဖျၢၣ်အံၤဆူနအိၣ်,ဒီးနတခီဂာ်တၢ်ပူတဖျၢၣ်အံၤဒီးတၢ်ထူၣ်တထူၣ်အံၤဆူယအိၣ်လၢတၢ်အၢတၢ်နးအဂီၢ်ဘၣ်န့ၣ်တက့ၢ်. 53ဒီးမ်စီၤအၤဘြၤဟၣ်အကစၢ်,ဒီးစီၤနၤဃိၢ်အကစၢ်,အဝဲသ့ၣ်အပၢ်အကစၢ်န့ၣ်စံၣ်ညီၣ်တၢ်လၢပဘၢၣ်စၢၤတက့ၢ်.ဒီးစီၤယၤကိာ်ဆိၣ်လီၤအသးလၢအပၢ်စီၤအံၤစဲးအတၢ်ပျံၤအမဲာ်ညါန့ၣ်လီၤ.

54ဒီးစီၤယၤကိာ်လုၢ်ထီၣ်တၢ်လုၢ်လၢကစၢၢ်လိၤ,ဒီးကိးန့ၢ်အဒီပုၢ်ဝဲၢ်ဒ်သိးအကအီၣ်ကိၣ်လီၤဒီးအီၣ်ကိၣ်,ဒီးအိၣ်ဝဲသ့တနၤကျၢၤလၢကစၢၢ်လိၤလီၤ.

55ဒီးမုၢ်ဆ့ၣ်ထီၣ်န့ၣ်စီၤလၤဘၣ်ဂဲၤဆၢထၢၣ်ဂီၤဂီၤ,ဒီးနၢမူအဖိခွါဒီးအဖိမုၣ်သ့ၣ်တဖၣ်,ဒီးဆိၣ်ဂ့ၤအီၤလီၤ.ဒီးစီၤလၤဘၣ်ဟးထီၣ်,ဒီးက့ၤကဒါက့ၤဆူအလီၢ်လီၤ.