Gen 33 | KswSKMB | STEP | ဒီးစီၤယၤကိာ်ကျ့ထီၣ်အမဲာ်ဒီးကွၢ်တၢ်,ဒီးကွၢ်ကွၢ်,စီၤဧ့ၡီၤဟဲ,ဒီးပှၤကညီလွံၢ်ကယၤအိၣ်ဒီးအီၤလီၤ,ဒီးနီၤဖးဟ့ၣ်ဖိသၣ်တဖၣ်လၢနီၢ်လ့ၤအၤ,ဒီးနီၢ်ရၤဃ့လး,ဒီးအကုၢ်ပိာ်မုၣ်ခံဂၤလီၤ.

‏ Genesis 33

1 ဒီးစီၤယၤကိာ်ကျ့ထီၣ်အမဲာ်ဒီးကွၢ်တၢ်,ဒီးကွၢ်ကွၢ်,စီၤဧ့ၡီၤဟဲ,ဒီးပှၤကညီလွံၢ်ကယၤအိၣ်ဒီးအီၤလီၤ,ဒီးနီၤဖးဟ့ၣ်ဖိသၣ်တဖၣ်လၢနီၢ်လ့ၤအၤ,ဒီးနီၢ်ရၤဃ့လး,ဒီးအကုၢ်ပိာ်မုၣ်ခံဂၤလီၤ.

2 ဒီးပာ်အကုၢ်ပိာ်မုၣ်ဒီးအဖိတဖၣ်လၢညါ,ဒီးနီၢ်လ့ၤအၤ,ဒီးအဖိတဖၣ်လၢခံ,ဒီးနီၢ်ရၤဃ့လးဒီးစီၤယိၤသးလၢအခံကတၢၢ်လီၤ. 3 ဒီးအဝဲဒၣ်လဲၤခီလၢအမဲာ်ညါ,ဒီးတီၤလီၤကဒွံကျိာ်နွံစုတုၤအဘူးထီၣ်ဒီးအဝဲၢ်လီၤ.

4 ဒီးစီၤဧ့ၡီၤဃ့ၢ်သဂၢၢ်အီၤ,ဒီးဖိးအီၤ,ဒီးထိၣ်လီၤတီၢ်အသးလၢအကိာ်လိၤ,ဒီးနၢမူအီၤ,ဒီးအမဲာ်ထံလီၤတကူၢ်သ့ၣ်လီၤ. 5 ဒီးကျ့ထီၣ်အမဲာ်,ဒီးထံၣ်ပိာ်မုၣ်ဒီးအဖိတဖၣ်,ဒီးစံးဝဲဒၣ်,ပှၤအိၣ်ဒီးနၤန့ၣ်မ့ၢ်မတၤတဖၣ်လဲၣ်.ဒီးစံးဝဲဒၣ်,ဖိသၣ်တဖၣ်လၢယွၤဟ့ၣ်သးကညီၤနကုၢ်နပှၤလီၤ.

6 ဒီးအကုၢ်အပှၤပိာ်မုၣ်,အဝဲသ့ၣ်ဒီးအဖိတဖၣ်,ဟဲဘူး,ဒီးသကူးလီၤအသးလီၤ. 7 ဒီးနီၢ်လ့ၤအၤဒီးအဖိတဖၣ်ဟဲဘူးစ့ၢ်ကီး,ဒီးသကူးလီၤအသးလီၤ.ဒီးလၢအလီၢ်ခံန့ၣ်စီၤယိၤသးဟဲဘူးဒီးနီၢ်ရၤဃ့လး,ဒီးသကူးလီၤအသးလီၤ.

8 ဒီးစံးဝဲဒၣ်,တၢ်တဖုဒီဖုညါလၢယဘၣ်သဃိာ်အံၤမ့ၢ်အဂ့ၢ်ဒ်လဲၣ်.ဒီးစံးဝဲဒၣ်,မ့ၢ်ဒ်သိးယကဘၣ်ဘျုးဘၣ်ဖှိၣ်လၢယကစၢ်အမဲာ်ညါလီၤ.

9 ဒီးစီၤဧ့ၡီၤစံးဝဲဒၣ်,ယတၢ်အါလံ,ယပုၢ်ဧၢ,တၢ်လၢအအိၣ်ဒီးနၤအံၤမ်အအိၣ်ဒီးနၤတက့ၢ်.

10 ဒီးစီၤယၤကိာ်စံးဝဲဒၣ်,တမ့ၢ်ဘၣ်,ယမ့ၢ်ဘၣ်ဘျုးဘၣ်ဖှိၣ်လၢနမဲာ်ညါဒီး,ဒိးန့ၢ်လၢ်ယခိၣ်ဖးလၢယစုပူၤအံၤတက့ၢ်.အဂ့ၢ်ဒ်အံၤ,မ့ၢ်ယထံၣ်ဘၣ်လံနမဲာ်,မၤသးဒ်ယထံၣ်ယွၤအမဲာ်အသိး,ဒီးဘၣ်နသးလၢယၤလီၤ. 11 ဒိးန့ၢ်လၢ်ယတၢ်ဆိၣ်ဂ့ၤလၢပှၤဟဲစိာ်ဆူနအိၣ်တက့ၢ်.မ့ၢ်လၢယွၤဟ့ၣ်သးကညီၤယၤအဂ့ၢ်,ဒီးမ့ၢ်လၢတၢ်ခဲလၢာ်အိၣ်ဒီးယၤအဂ့ၢ်လီၤ.ဒီးကညးဝဲဒီး,ဒိးန့ၢ်ဝဲလီၤ.

12 ဒီးစံးဝဲဒၣ်,ဟးထီၣ်သကိးဒီးလဲၤထီၣ်သကိးတက့ၢ်,ဒီးယကလဲၤတၢ်လၢနမဲာ်ညါလီၤ.

13 ဒီးစံးဘၣ်အီၤ,ယကစၢ်သ့ၣ်ညါဝဲလၢဖိသၣ်တဖၣ်အဂံၢ်စၢ်ဘါစၢ်,ဒီးသိဒီးမဲာ်တဲးလဲးအဖုတဖၣ်,ဒီးဂီၤဖံးအဖုတဖၣ်လၢအဒၢထီၣ်အိၣ်ဒီးယၤ,ဒီးပှၤမ့ၢ်ဟီလဲၤအီၤဆူၣ်တနံၤဒီး,ကသံဒီဖုညါလီၤ. 14 မ်ယကစၢ်လဲၤဆိလၢနကုၢ်နပှၤအမဲာ်ညါတက့ၢ်.ဒီးယကဆှၢတၢ်ကဘဲးကဘဲးဒ်ဆၣ်ဖိကီၢ်ဖိလၢယမဲာ်ညါထွဲတၢ်အသိး,ဒီးဒ်ဖိသၣ်ထွဲတၢ်အသိး,တုၤယဟဲဆူယကစၢ်အအိၣ်,ဆူစံဧ့ၢ်လီၤ.

15 ဒီးစီၤဧ့ၡီၤစံးဝဲဒၣ်,ဒုးပာ်လီၤတဲာ်ယၤလၢပှၤတနီၤ,ဒီးနၤတက့ၢ်.ဒီးစံးဝဲဒၣ်,အလီၢ်အိၣ်ဒ်လဲၣ်,မ်ယဘၣ်ဘျုးဘၣ်ဖှိၣ်လၢယကစၢ်အမဲာ်ညါတက့ၢ်. 16 ဒီးတၢ်လၢမုၢ်တနံၤန့ၣ်စီၤဧ့ၡီၤက့ၤကဒါက့ၤဝဲလၢအကျဲဆူစံဧ့ၢ်လီၤ.

17 ဒီးစီၤယၤကိာ်လဲၤတၢ်ဆူစူးကိၤသး,ဒီးသူၣ်ဟံၣ်တဖျၢၣ်လၢအဂီၢ်,ဒီးမၤတကူးတဖၣ်လၢအဆၣ်ဖိကီၢ်ဖိအဒၢအဂီၢ်လီၤ.မၤသးဒ်န့ၣ်ဒီးတၢ်အလီၢ်န့ၣ်ပှၤကိးအမံၤလၢစူးကိၤသးလီၤ. 18 ဒီးစီၤယၤကိာ်ဟဲဝဲမုာ်မုာ်ဆူဝ့ၢ်ၡက့ၣ်အိၣ်လၢကီၢ်ကနၤဧၣ်အပူၤ,ဖဲအဟဲလၢပၤဒနါရၣ်လီၤ.ဒီးသူၣ်အဒဲလၢဝ့ၢ်အမဲာ်ညါန့ၣ်လီၤ.

19 ဒီးဖဲအသလၣ်ထီၣ်အဒဲန့ၣ်ပှ့ၤဟီၣ်ခိၣ်အကဝီၤတပူၤလၢပှၤဃမိၢ်ဖိစီၤရှက့ၣ်အပၢ်အစုပူၤလၢစ့ကစံတၤတကယၤလီၤ. 20 ဒီးမၤထီၣ်တၢ်လုၢ်အလီၢ်ဖဲန့ၣ်,ဒီးယုၢ်အမံၤလၢယွမ့ၢ်အံၣ်စရ့လးအကစၢ်န့ၣ်လီၤ.