Genesis 35
1ဒီးယွၤစံးဘၣ်စီၤယၤကိာ်,ဂဲၤဆၢထၢၣ်လဲၤထီၣ်ဆူဘ့ၤသ့လး,ဒီးအိၣ်ဖဲန့ၣ်ဒီးမၤထီၣ်တၢ်လုၢ်လီၢ်လၢယွၤလၢအလီၣ်ဖျါထီၣ်အသးလၢနၤဖဲနဃ့ၢ်ထီၣ်လၢနဝဲၢ်စီၤဧ့ၡီၤအမဲာ်ညါ,အဂီၢ်န့ၣ်တက့ၢ်. 2ဒီးစီၤယၤကိာ်စံးဘၣ်အပှၤဟံၣ်ဖိ,ဒီးပှၤလၢအအိၣ်ဒီးအီၤခဲလၢာ်,ပှၤတခီဘီမုၢ်ဖိအကစၢ်တဖၣ်လၢအအိၣ်လၢသုကျါန့ၣ်,ကွံာ်တ့ၢ်ကွံာ်အီၤတက့ၢ်.ဒီးမၤကဆှီသုသး,ဒီးကလံၤသုသး, 3ဒီးဂဲၤဆၢထၢၣ်,ဒီးလဲၤထီၣ်သကိးဆူဘ့ၤသ့လးတက့ၢ်.ဒီးယကမၤထီၣ်တၢ်လုၢ်လီၢ်ဖဲန့ၣ်လၢယွၤအဂီၢ်လၢအစံးဆၢယၤဖဲမုၢ်တနံၤလၢယဘၣ်တၢ်ကိၢ်တၢ်ဂီၤ,ဒီးအိၣ်ဒီးယၤလၢကျဲလၢယပိာ်အီၤန့ၣ်လီၤ. 4ဒီးအဝဲသ့ၣ်ဟ့ၣ်စီၤယၤကိာ်လၢကယဲၢ်တခီဘီမုၢ်ဖိအကစၢ်လၢအအိၣ်လၢအစုပူၤခဲလၢာ်,ဒီးအကွီၤလၢအအိၣ်လၢအနၢ်ပူၤလီၤ.ဒီးစီၤယၤကိာ်ပာ်ခူသူၣ်အီၤလၢသ့ထိးဖၣ်လၢအအိၣ်လၢၡက့ၣ်အဃၢၤတထံးအဖီလာ်လီၤ. 5ဒီးဟးထီၣ်ဝဲ,ဒီးတၢ်ပျံၤယွၤအိၣ်ဝဲလၢပှၤဝ့ၢ်ဖိလၢအအိၣ်ဝးတရံးအီၤသတးဒီးတလူၤပိာ်ဘၣ်စီၤယၤကိာ်အဖိခွါတဖၣ်အခံဘၣ်. 6ဒီးစီၤယၤကိာ်ဟဲဝဲဆူဝ့ၢ်လူၤစး,လၢကီၢ်ကနၤဧၣ်အပူၤ(အဝဲန့ၣ်မ့ၢ်ဘ့ၤသ့လး),အဝဲဒၣ်ဒီးပှၤအိၣ်ဒီးအီၤခဲလၢာ်လီၤ. 7ဒီးမၤထီၣ်တၢ်လုၢ်အလီၢ်ဖဲန့ၣ်,ဒီးကိးတၢ်အလီၢ်န့ၣ်လၢအ့လးဘ့ၤသ့လးလီၤ.အဂ့ၢ်ဒ်အံၤ,လၢအဃ့ၢ်ထီၣ်ကွံာ်လၢအဝဲၢ်အမဲာ်ညါန့ၣ်ယွၤဒုးနဲၣ်အသးလၢအီၤဖဲန့ၣ်လီၤ. 8ဒီးနီၢ်ဒဘိရၣ်,ပှၤလၢအဒုးအီၣ်နုၢ်နီၢ်ရံးဘကၤန့ၣ်သံဝဲ,ဒီးဘၣ်တၢ်ခူၣ်လီၤအီၤလၢဘ့ၤသ့လးအလာ်ခီလၢသ့ထိးဖၣ်တထံးအဖီလာ်,ဒီးပှၤယုၢ်အမံၤလၢအးလိၣ်ဘၤကူာ်လီၤ. 9ဒီးတုၤစီၤယၤကိာ်ဟဲက့ၤလၢပၤဒနါရၣ်န့ၣ်ယွၤလီၣ်ဖျါထီၣ်အသးကဒီးတစုလၢအီၤ,ဒီးဆိၣ်ဂ့ၤအီၤလီၤ. 10ဒီးယွၤစံးဘၣ်အီၤ,နမံၤမ့ၢ်ယၤကိာ်လီၤ.တၢ်တကိးလၢၤဘၣ်နမံၤလၢယၤကိာ်ဘၣ်,မ့မ့ၢ်အံၣ်စရ့လးကမ့ၢ်နမံၤလီၤ.ဒီးယုၢ်ဝဲအမံၤလၢစီၤအံၣ်စရ့လးလီၤ. 11ဒီးယွၤစံးဘၣ်အီၤ,တၢ်လၢယၤအံၤယမ့ၢ်ယွၤလၢအသ့တၢ်လၢာ်လီၤ.သၣ်ထီၣ်,ဒီးအါထီၣ်တက့ၢ်.ပှၤတကလုာ်,ဒီးပှၤအကလုာ်တဖၣ်အတၢ်အိၣ်ဖှိၣ်တဖုကကဲထီၣ်လၢနၤ,ဒီးစီၤပၤတဖၣ်ကဟဲထီၣ်လၢနယီၢ်ဒ့ပူၤလီၤ. 12ဒီးကီၢ်လၢယဟ့ၣ်လီၤစီၤအၤဘြၤဟၣ်,ဒီးစီၤအံၤစဲးတဘ့ၣ်န့ၣ်ယကဟ့ၣ်လီၤလၢနၤ,ဒီးယကဟ့ၣ်လီၤကီၢ်န့ၣ်လၢနချံနသၣ်လၢနလီၢ်ခံလီၤ. 13ဒီးယွၤဟးထီၣ်ဆူထးလၢတၢ်အလီၢ်ဖဲအကတိၤတၢ်ဒီးအီၤလီၤ. 14ဒီးစီၤယၤကိာ်သူၣ်လီၤထူၣ်တထူၣ်ဖဲအလီၢ်လၢအကတိၤတၢ်ဒီးအီၤ,လၢၢ်အထူၣ်တထူၣ်လီၤ.ဒီးလူလီၤတၢ်လုၢ်အီလၢအဖီခိၣ်,ဒီးဂၢ်လီၤသိလၢအဖီခိၣ်လီၤ. 15ဒီးတၢ်အလီၢ်လၢယွၤကတိၤတၢ်ဒီးအီၤန့ၣ်,စီၤယၤကိာ်ယုၢ်ဝဲအမံၤလၢဘ့ၤသ့လးလီၤ. 16ဒီးဟးထီၣ်ဝဲလၢဘ့ၤသ့လး,ဒီးယံၤဒီးဝ့ၢ်အ့ဖရးသးဖးဖီတီၤလဲၤန့ၣ်,နီၢ်ရၤဃ့လးအဟုးဆါထီၣ်,ဒီးအဟုးဆါအဖၢမုၢ်န့ၣ်ဘၣ်တၢ်ကီတၢ်ခဲလီၤ. 17ဒီးတၢ်မၤအသးလၢအဟုးဆါ,ဒီးဘၣ်တၢ်ကီတၢ်ခဲအဖၢမုၢ်န့ၣ်,ပှၤကွၢ်ဟုးတဂၤစံးဘၣ်အီၤ,ဘၣ်ယိၣ်တဂ့ၤ.အဂ့ၢ်ဒ်အံၤ,နကအိၣ်ဒီးနဖိခွါတဂၤအံၤစ့ၢ်ကီးလီၤ. 18ဒီးတၢ်မၤအသးလၢအသးဟးထီၣ်အဖၢမုၢ်န့ၣ်(အဂ့ၢ်ဒ်အံၤ,သံဝဲ)ယုၢ်ဝဲအမံၤလၢဘံၣ်အိနံလီၤ.မ့မ့ၢ်အပၢ်တဂၤန့ၣ်ယုၢ်ဝဲအမံၤလၢဘံၣ်ယၤမံၣ်လီၤ. 19ဒီးနီၢ်ရၤဃ့လးသံဝဲ,ဒီးဘၣ်တၢ်ခူၣ်လီၤကွံာ်အီၤလၢအ့ဖရးသးအကျဲန့ၣ်လီၤ.အဝဲန့ၣ်မ့ၢ်ဘ့ၤသလ့ဃ့ၣ်လီၤ. 20ဒီးစီၤယၤကိာ်သူၣ်လီၤထူၣ်တထူၣ်လၢအသွၣ်ခိၣ်န့ၣ်လီၤ.အဝဲန့ၣ်မ့ၢ်နီၢ်ရၤဃ့လးအသွၣ်ခိၣ်ထူၣ်တုၤမုၢ်မဆါတနံၤအံၤလီၤ. 21ဒီးစီၤအံၣ်စရ့လးဟးထီၣ်,ဒီးသလၣ်ထီၣ်အဒဲလၢတၢးထီဧ့ၤဒ့ၢ်ဝၢ်ဘးခီလီၤ. 22ဒီးတၢ်မၤအသးလၢစီၤအံၣ်စရ့လးအိၣ်ဝဲဆိးဝဲလၢကီၢ်န့ၣ်အဖၢမုၢ်ဒီး,စီၤရူၤဘ့ၣ်လဲၤမံဃုာ်ဒီးအပၢ်သံၣ်မါ,နီၢ်ဘံၤလဟၤ,ဒီးစီၤအံၣ်စရ့လးနၢ်ဟူဝဲလီၤ. 23ဒီးစီၤယၤကိာ်အဖိခွါအိၣ်တဆံခံဂၤလီၤ.နီၢ်လ့ၤအၤအဖိခွါတဖၣ်မ့ၢ်စီၤယၤကိာ်အဖိဝဲၢ်ကိ,စီၤရူၤဘ့ၣ်,ဒီးစီၤစူၤမ့းအိၣ်,ဒီးစီၤလ့ၤဝံ,ဒီးစီၤယူဒၤ,ဒီးစီၤယံးစၣ်ကၢ်,ဒီးစီၤစဘူလိၣ်လီၤ. 24နီၢ်ရၤဃ့လးအဖိခွါတဖၣ်မ့ၢ်စီၤယိၤသး,ဒီးစီၤဘံၣ်ယၤမံၣ်လီၤ. 25ဒီးနီၢ်ရၤဃ့လးအကုၢ်ပိာ်မုၣ်,နီၢ်ဘံၤလဟၤအဖိခွါတဖၣ်မ့ၢ်စီၤဒၣ်,ဒီးစီၤနးသၤလံလီၤ. 26နီၢ်လ့ၤအၤအကုၢ်ပိာ်မုၣ်,နီၢ်စံၤလပၤအဖိခွါတဖၣ်မ့ၢ်စီၤကး,ဒီးစီၤအၤရှ့ၢ်လီၤ.အဝဲသ့ၣ်တဖၣ်န့ၣ်မ့ၢ်စီၤယၤကိာ်အဖိခွါလၢပှၤဆံးစၢ်န့ၢ်အီၤ,လၢပၤဒနါရာ်အပူၤလီၤ. 27ဒီးစီၤယၤကိာ်ဟဲဝဲဆူအပၢ်စီၤအံၤစဲးအအိၣ်,ဆူမးမရ့,ဆူဝ့ၢ်အၤရဘၤ,(အဝဲန့ၣ်မ့ၢ်ဃ့ဘြိၣ်)ဖဲစီၤအၤဘြၤဟၣ်ဒီးစီၤအံၤစဲးအိၣ်တမှံၤန့ၣ်လီၤ. 28ဒီးစီၤအံၤစဲးအမုၢ်နံၤတဖၣ်န့ၣ်မ့ၢ်အနံၣ်တကယၤဃိးဆံလီၤ. 29ဒီးစီၤအံၤစဲးအသးလၢာ်,ဒီးသံဝဲ,ဒီးတၢ်ပာ်ဖှိၣ်အီၤဒီးအပှၤတကလုာ်ဒၣ်ဝဲလီၤ.အသးပှၢ်ဒီးပှဲၤဒီးအနံၤအသီလီၤ.ဒီးအဖိခွါစီၤဧ့ၡီၤ,ဒီးစီၤယၤကိာ်ခူၣ်လီၤကွံာ်အီၤလီၤ.
Copyright information for
KswSKMB