Genesis 43
1ဒီးတၢ်သၣ်ဝံလီၤဒိန့ၣ်အိၣ်ဝဲလၢကီၢ်ပူၤနးမးလီၤ. 2ဒီးတုၤအအီၣ်လၢာ်ကွံာ်ဘုဧိၤဟုဧိၤလၢအဟဲက့ၤစိာ်လၢကီၢ်အဲၤကူပတူးအပူၤန့ၣ်ဒီး,တၢ်မၤအသးလၢအပၢ်စံးဘၣ်အီၤ,က့ၤပှ့ၤပတၢ်အီၣ်တၢ်အီတစဲးတက့ၢ်. 3ဒီးစီၤယူဒၤကတိၤတၢ်ဒီးအီၤ,ဒီးစံးဝဲဒၣ်,ပှၤတဂၤန့ၣ်အုၣ်အသးသပှၢ်သပှၢ်,ဒီးစံးဝဲဒၣ်,သုပုၢ်တဂၤန့ၣ်မ့ၢ်တအိၣ်ဘၣ်ဒီးသုဘၣ်ဒီး,သုတထံၣ်ဘၣ်ယမဲာ်ဘၣ်န့ၣ်လီၤ. 4နမ့ၢ်မၢပပုၢ်လဲၤလီၤဒီးပှၤဒီး,ပကလဲၤလီၤပှ့ၤနတၢ်အီၣ်လီၤ. 5ဒီးနမ့ၢ်တမၢလီၤဘၣ်အီၤဒီး,ပတလဲၤလီၤဘၣ်.အဂ့ၢ်ဒ်အံၤ,ပှၤတဂၤန့ၣ်စံးဘၣ်ပှၤ,သုပုၢ်မ့ၢ်တအိၣ်ဘၣ်ဒီးသုဘၣ်ဒီး,သုတထံၣ်ဘၣ်ယမဲာ်ဘၣ်. 6ဒီးစီၤအံၣ်စရ့လးစံးဝဲဒၣ်,သုစံးဘၣ်ပှၤတဂၤလၢသုအိၣ်ဒံးဒီးသုပုၢ်တဂၤန့ၣ်,ဒီးမၤအၤမၤနးယၤန့ၣ်,မ့ၢ်အဘၣ်မနုၤလဲၣ်. 7ဒီးစံးဝဲဒၣ်,ပှၤတဂၤန့ၣ်သံကွၢ်ပှၤလီၤတံၢ်လီၤဆဲးလၢပဂ့ၢ်ပကျိၤ,ဒီးလၢပဘူးပတံၢ်အဂ့ၢ်အကျိၤ,ဒီးစံးဝဲဒၣ်,သုပၢ်အိၣ်ဒံးစ့ၢ်ကီးဧါ,သုဒီပုၢ်ဝဲၢ်အိၣ်တဂၤဧါ.ဒီးဖဲဒၣ်တၢ်ကတိၤအသိးန့ၣ်ပစံးဆၢအီၤလီၤ.ကစံးဝဲ,မၢသုဒီပုၢ်ဝဲၢ်ဟဲက့ၤလီၤတက့ၢ်န့ၣ်,ပသ့ၣ်ညါသပှၢ်တၢၢ်ကသ့ဧါ. 8ဒီးစီၤယူဒၤစံးဘၣ်အပၢ်စီၤအံၣ်စရ့လးန့ၣ်,မၢဖိၣ်သၣ်ခွါတဂၤန့ၣ်လဲၤလီၤဒီးယၤတက့ၢ်.ဒီးပကဂဲၤဆၢထၢၣ်,ဒီးလဲၤတၢ်,ဒီးမူဒံး,ဒီးတသံဘၣ်,ပှၤဒီးနၤဒီးပဖိဒံဖိသၣ်စ့ၢ်ကီးလီၤ. 9ဒီးယကအုၣ်ခီၣ်ယသးလၢအဂီၢ်,နကဘၣ်ဃုက့ၤအီၤလၢယစုပူၤလီၤ.ယမ့ၢ်တဟဲက့ၤစိာ်ဘၣ်ဆူနအိၣ်,ဒီးပာ်အီၤလၢနမဲာ်ညါဘၣ်ဒီး,မ်တၢ်ဒဲးဘးအိၣ်လၢယလိၤလၢနမဲာ်ညါကိးမုၢ်နံၤမုၢ်နၤဒဲးတက့ၢ်. 10အဂ့ၢ်ဒ်အံၤ,ပမ့ၢ်တမၤယံာ်မၤနီၢ်တ့ၢ်ပသးဘၣ်ဒီး,ခဲကနံၣ်အံၤပကဟဲက့ၤကဒါက့ၤခံဘျီတဘျီလံလီၤ. 11ဒီးအပၢ်စီၤအံၣ်စရ့လးစံးဘၣ်အီၤ,မ့မ့ၢ်ဒ်န့ၣ်ဒီး,မၤတၢ်အံၤ,ဟံးန့ၢ်ကီၢ်အတၤသၣ်ဝံၣ်လၢသုထၢၣ်ပူၤ,ဒီးလဲၤစိာ်န့ၢ်ပှၤတဂၤန့ၣ်လၢခိၣ်ဖး,သ့ၣ်စရံၤအထုးတစဲး,ဒီးကနဲစီတစဲး,နီၣ်တြူးနကိးအဃ့,ဒီးသ့ၣ်လိးအထုး,သ့အီၣ်ဘိတၣ်အသၣ်,ဒီးသ့ၣ်ၡီၤက့းအသၣ်, 12ဒီးဟံးန့ၢ်စ့ခံစးလၢသုစုပူၤတက့ၢ်.ဒီးစ့လၢသုဟဲက့ၤစိာ်လၢသုထၢၣ်ပူၤန့ၣ်,က့ၤစိာ်လၢသုစုပူၤတက့ၢ်.ဘၣ်တဘၣ်ပှၤကွၢ်ကပာ်တၢ်လီၤ. 13ဒီးဟံးန့ၢ်သုပုၢ်,ဒီးဂဲၤဆၢထၢၣ်လဲၤကဒီးဆူပှၤတဂၤန့ၣ်အအိၣ်တက့ၢ်. 14ဒီးယွၤလၢအသ့တၢ်လၢာ်န့ၣ်မ်အဟ့ၣ်သုလၢတၢ်သးကညီၤလၢပှၤတဂၤန့ၣ်အမဲာ်ညါ,ဒ်သိးအကပျၢ်သုဒီပုၢ်ဝဲၢ်အဂၤတဂၤဒီးစီၤဘံၣ်ယၤမံၣ်န့ၣ်တက့ၢ်.ဒီးယဖိမ့ၢ်ဟါမၢ်ကွံာ်လၢယၤဒီး,ကဟါမၢ်ကွံာ်လၢယၤလီၤ. 15ဒီးပှၤတဖၣ်န့ၣ်ဟံးန့ၢ်ခိၣ်ဖးတမံၤန့ၣ်ဒီးစ့ခံစး,ဒီးစီၤဘံၣ်ယၤမံၣ်,ဒီးဂဲၤဆၢထၢၣ်,ဒီးလဲၤလီၤဆူကီၢ်အဲၤကူပတူး,ဒီးဆၢထၢၣ်လၢစီၤယိၤသးအမဲာ်ညါလီၤ. 16ဒီးစီၤယိၤသးထံၣ်ဘၣ်စီၤဘံၣ်ယၤမံၣ်အိၣ်ဒီးအီၤ,ဒီးစံးဘၣ်ပှၤလၢအဟံၣ်ဖိအဖီခိၣ်တဂၤ,မၢပှၤတဖၣ်ဟဲဆူယဟံၣ်,ဒီးမၤသံတၢ်,ဒီးကတဲာ်ကတီၤတၢ်တက့ၢ်.အဂ့ၢ်ဒ်အံၤ,ပှၤတဖၣ်န့ၣ်ကအီၣ်တၢ်ဒီးယၤဖဲမုၢ်ထူၣ်န့ၣ်လီၤ. 17ဒီးပှၤတဂၤန့ၣ်မၤဝဲဒ်စီၤယိၤသးမၤလိာ်ဝဲအသိး,ဒီးဆှၢထီၣ်ပှၤတဖၣ်ဆူစီၤယိၤသးအဟံၣ်ပူၤလီၤ. 18ဒီးမ့ၢ်ပှၤဆှၢထီၣ်အီၤဆူစီၤယိၤသးအဟံၣ်ပူၤဒီး,အဝဲသ့ၣ်တဖၣ်ပျံၤတၢ်,ဒီးစံးဝဲဒၣ်,တၢ်ဆှၢနုာ်ပှၤလၢစ့လၢအအိၣ်က့ၤလၢပထၢၣ်ပူၤလၢအခီၣ်ထံးတဘျီအဃိ,ဒ်သိးအကဃုအလီၢ်လၢပဖီခိၣ်,ဒီးထိၣ်လီၤတီၢ်အသးလၢပလိၤ,ဒီးဟံးန့ၢ်ပှၤလၢကုၢ်လၢပှၤ,ဒီးပကသ့ၣ်ယီၤတဖၣ်လီၤ. 19ဒီးသုးဘူးအသးဆူပှၤလၢစီၤယိၤသးအပှၤဟံၣ်ဖိအဖီခိၣ်,ဒီးကတိၤတၢ်ဒီးအီၤလၢဟံၣ်အကျဲစၢၤ, 20ဒီးစံးဝဲဒၣ်,ကစၢ်ဧၢ,ပဟဲလီၤလၢအခီၣ်ထံးတစု,ဒ်သိးပကပှ့ၤတၢ်အီၣ်တၢ်အီတီတီလီၤ. 21ဒီးတုၤပဟဲလၢပမံအလီၢ်န့ၣ်ဒီး,တၢ်မၤအသးလၢပအိးထီၣ်ပထၢၣ်,ဒီးကွၢ်ကွၢ်,ပှၤအစ့အိၣ်ဝဲလၢအထၢၣ်ခိၣ်,တဂၤအစ့လၢအထၢၣ်ခိၣ်တဂၤအစ့လၢအထၢၣ်ခိၣ်,ပစ့ဒ်အလီၤတယၢၢ်အသိးဒီးပဟဲက့ၤစိာ်လၢပစုပူၤလီၤ. 22ဒီးပဟဲစိာ်လီၤစ့အဂၤလၢပစုပူၤ,ဒ်သိးပကပှ့ၤတၢ်အီၣ်တၢ်အီလီၤ.မ့ၢ်မတၤဒၢနုာ်ပစ့လၢပထၢၣ်ပူၤတဂၤလဲၣ်န့ၣ်ပတသ့ၣ်ညါဘၣ်. 23ဒီးစံးဝဲဒၣ်,မ်သုဘၣ်တၢ်အမုာ်တက့ၢ်.ပျံၤတၢ်တဂ့ၤ.သုကစၢ်,ဒီးသုပၢ်အကစၢ်ဟ့ၣ်သုလၢတၢ်ထူးတၢ်တီၤလၢသုထၢၣ်ပူၤလီၤ.သုစ့အိၣ်တ့ၢ်ဒီးယၤလီၤ.ဒီးဆှၢထီၣ်စီၤစူးမ့းအိၣ်ဆူအအိၣ်လီၤ. 24ဒီးပှၤတဂၤန့ၣ်ဆှၢပှၤတဖၣ်ဆူစီၤယိၤသးအဟံၣ်ပူၤ,ဒီးဟ့ၣ်အီၤလၢထံ,ဒီးအဝဲသ့ၣ်သ့ကွံာ်အခီၣ်,ဒီးပှၤတဂၤန့ၣ်ဟ့ၣ်အကသ့ၣ်ယီၤတဖၣ်လၢအဆၣ်လီၤ. 25ဒီးအဝဲသ့ၣ်ကတဲာ်ကတီၤအခိၣ်ဖးန့ၣ်တုၤစီၤယိၤသးကဟဲလၢမုၢ်ထူၣ်လီၤ.အဂ့ၢ်ဒ်အံၤ,နၢ်ဟူဝဲလၢအကအီၣ်တၢ်ဖဲန့ၣ်လီၤ. 26ဒီးစီၤယိၤသးဟဲဆူအဟံၣ်,ဒီးအဝဲသ့ၣ်တဖၣ်ဟဲက့ၤစိာ်တၢ်ခိၣ်ဖးန့ၣ်လၢအအိၣ်လၢအစုပူၤဆူအအိၣ်လၢအဟံၣ်ပူၤ,ဒီးတီၤလီၤကဒွံကျိာ်လၢအမဲာ်ညါလီၤ. 27ဒီးအဝဲဒၣ်သံကွၢ်အီၤလၢအအိၣ်မုာ်အဂ့ၢ်အကျိၤ,ဒီးစံးဝဲဒၣ်,သုပၢ်ပှၤသးပှၢ်တဂၤလၢသုကတိၤတၢ်လၢအဂ့ၢ်န့ၣ်,အိၣ်မုာ်စ့ၢ်ကီးဧါ,မ့ၢ်အမူဒံးစ့ၢ်ကီးဧါ. 28ဒီးစံးဆၢဝဲဒၣ်,နကုၢ်နပှၤပပၢ်တဂၤအိၣ်မုာ်ဝဲ,ဒီးမူဒံးလီၤ.ဒီးဆုးလီၤအခိၣ်,ဒီးသကူးလီၤအသးလၢအမဲာ်ညါလီၤ. 29ဒီးအဝဲဒၣ်ကျ့ထီၣ်အမဲာ်,ဒီးထံၣ်ဘၣ်အပုၢ်,အမိၢ်အဖိခွါစီၤဘံၣ်ယၤမံၣ်တဂၤ,ဒီးစံးဝဲဒၣ်,အဝဲတဂၤအံၤမ့ၢ်သုပုၢ်လၢသုစံးဘၣ်ယၤလၢအဂ့ၢ်အကျိၤစ့ၢ်ကီးဧါ.ဒီးစံးဝဲဒၣ်,မ်ယွၤသးကညီၤနၤတက့ၢ်,ယဖိခွါဧၢ. 30ဒီးစီၤယိၤသးမၤဝဲချ့ချ့လီၤ.အဂ့ၢ်ဒ်အံၤ,သးအိၣ်အပုၢ်,ဒီးဃုအလီၢ်ဖဲအကပျဲအမဲာ်ထံလီၤ.ဒီးလဲၤနုာ်လၢအဒၢးပူၤ,ဒီးအမဲာ်ထံလီၤဖဲန့ၣ်လီၤ. 31ဒီးပျၢ်အမဲာ်,ဒီးဟးထီၣ်,ဒီးကီၤအသး,ဒီးစံးဝဲဒၣ်,ပာ်လီၤတၢ်အီၣ်တက့ၢ်. 32ဒီးပှၤပာ်လီၤလၢအဂီၢ်တပူၤ,ဒီးလၢအဝဲသ့ၣ်တဖၣ်န့ၣ်အဂီၢ်တပူၤဒၣ်,ဒီးလၢပှၤအဲၤကူပတူးဖိလၢအအီၣ်တၢ်ဒီးအီၤအဂီၢ်တပူၤဒၣ်လီၤ.အဂ့ၢ်ဒ်အံၤ,ပှၤအဲၤကူပတူးဖိတအီၣ်ဘၣ်တၢ်ဒီးပှၤဧ့ၤဘြံၤဖိဘၣ်.အဂ့ၢ်ဒ်အံၤ,အဝဲန့ၣ်မ့ၢ်တၢ်သးဘၣ်အၢလၢပှၤအဲၤကူပတူးဖိန့ၣ်လီၤ. 33ဒီးဒုးဆ့ၣ်နီၤအဝဲၢ်ကိတဂၤ,ဒ်အဝဲၢ်ကိအလီၢ်အသိး,ဒီးအဆံးတဂၤဒ်အဆံးအလီၢ်အသိး,လၢအမဲာ်ညါ,ဒီးပှၤတဖၣ်န့ၣ်ကွၢ်လိာ်အသးဒီးကမၢကမၣ်သကိးသကိးလီၤ. 34ဒီးဟံးန့ၢ်တၢ်ဟ့ၣ်နီၤလၢအမဲာ်ညါလၢအဝဲသ့ၣ်အဂီၢ်ဒီးစီၤဘံၣ်ယၤမံၣ်အတၢ်ဟ့ၣ်နီၤန့ၣ်အါန့ၢ်ပှၤဂၤအတၢ်ယဲၢ်စးလီၤ.ဒီးအီတၢ်,ဒီးအီဘျဲးအီတၢ်ဒီးအီၤလီၤ.
Copyright information for
KswSKMB