Genesis 48
1ဒီးတၢ်တဖၣ်အလီၢ်ခံန့ၣ်တၢ်မၤအသးလၢပှၤစံးဘၣ်စီၤယိၤသး,ကွၢ်ကွၢ်,နပၢ်ဘၣ်ဆူးဘၣ်ဆါလီၤ.ဒီးဟံးန့ၢ်အဖိခွါခံဂၤ,စီၤမနၤရှ့ၤဒီးစီၤအ့ဖရဲၣ်လီၤ. 2ဒီးပှၤစံးဘၣ်တဲဘၣ်စီၤယၤကိာ်,ဒီးစံးဝဲဒၣ်,ကွၢ်ကွၢ်,နဖိခွါစီၤယိၤသးဟဲဆူနအိၣ်လီၤ.ဒီးစီၤအံၣ်စရ့လးပာ်ဆူၣ်ထီၣ်အသး,ဒီးဆ့ၣ်နီၤဝဲလၢအလီၢ်မံဖီခိၣ်လီၤ. 3ဒီးစီၤယၤကိာ်စံးဘၣ်စီၤယိၤသး,ယွၤလၢအသ့တၢ်လၢာ်လီၣ်ဖျါထီၣ်အသးလၢယၤဖဲလူးစး,အိၣ်လၢကီၢ်ကနၤဧၣ်အပူၤ.ဒီးဆိၣ်ဂ့ၤယၤ, 4ဒီးစံးဘၣ်ယၤ,ကွၢ်ကွၢ်,ယကဒုးသၣ်ထီၣ်နၤ,ဒီးမၤအါထီၣ်နၤ,ဒီးယကဒုးကဲထီၣ်နၤလၢပှၤကလုာ်တဖၣ်အဖုအဖု,ဒီးယကဟ့ၣ်လီၤကီၢ်တဘ့ၣ်အံၤလၢနချံနသၣ်လၢနလီၢ်ခံ,လၢတၢ်ဟံးဃာ်အထူအယိာ်လီၤ. 5ဒီးခဲကနံၣ်အံၤနဖိခွါခံဂၤ,စီၤအ့ဖရဲၣ်ဒီးစီၤမနၤရှ့ၤ,လၢအအိၣ်ဖျဲၣ်န့ၢ်နၤလၢကီၢ်အဲၤကူပတူးအပူၤ,လၢယတချုးဟဲဒံးဘၣ်ဆူနအိၣ်လၢကီၢ်အဲၤကူပတူးန့ၣ်,မ့ၢ်ယတၢ်လီၤ.ဒ်စီၤရူၤဘ့ၣ်,ဒီးစီၤစူၤမ့းအိၣ်အသိးန့ၣ်ကကဲထီၣ်ယတၢ်လီၤ. 6ဒီးနဖိနလံၤလၢနထီၣ်ဖိလၢအလီၢ်ခံန့ၣ်,ကကဲထီၣ်နတၢ်,ဒီးလၢအန့ၢ်သါတၢ်န့ၣ်တၢ်ကကိးအီၤလၢအဒီပုၢ်ဝဲၢ်အမံၤလီၤ. 7ဒီးတၢ်လၢယၤအံၤဖဲယဟဲက့ၤလၢပၤဒၣ်န့ၣ်နီၢ်ရၤဃ့လးသံဝဲလၢယဃၢၤလၢကီၢ်ကနၤဧၣ်ဖဲကျဲဘူးထီၣ်ဒီးအ့ဖရးသး,ဒီးယခူၣ်လီၤကွံာ်အီၤဖဲန့ၣ်,လၢအ့ဖရးသးအကျဲန့ၣ်လီၤ.အဝဲန့ၣ်မ့ၢ်ဘ့ၤသလ့ဃ့ၣ်လီၤ. 8ဒီးစီၤအံၣ်စရ့လးထံၣ်ဘၣ်စီၤယိၤသးအဖိခွါ,ဒီးစံးဝဲဒၣ်,ပှၤတဖၣ်အံၤမ့ၢ်မတၤတဖၣ်လဲၣ်. 9ဒီးစီၤယိၤသးစံးဘၣ်အပၢ်,မ့ၢ်ယဖိခွါလၢယွၤဟ့ၣ်လီၤယၤဖဲအံၤလီၤ.ဒီးစံးဝဲဒၣ်,ဟဲစိာ်လၢ်အီၤဆူယအိၣ်တက့ၢ်.ဒီးယကဆိၣ်ဂ့ၤအီၤလီၤ. 10ဒီးစီၤအံၣ်စရ့လးအမဲာ်ခံးလၢအသးပှၢ်တ့ၢ်အဃိလီၤ.ထံၣ်တၢ်တသ့ဘၣ်,ဒီးဒုးသုးဘူးအီၤဆူအအိၣ်,ဒီးနၢမူအီၤ,ဒီးဖိးအီၤလီၤ. 11ဒီးစီၤအံၣ်စရ့လးစံးဘၣ်စီၤယိၤသး,ယတဆိကမိၣ်ဘၣ်လၢယကထံၣ်ဘၣ်နမဲာ်ဘၣ်,ဒီးကွၢ်ကွၢ်,ယွၤဒုးထံၣ်ဘၣ်ယၤလၢနချံနသၣ်စ့ၢ်ကီးလီၤ. 12ဒီးစီၤယိၤသးဟံးထီၣ်ကွံာ်အီၤ,လၢအကံၣ်ဆူးအပူၤဒီးတီၤလီၤကဒွံကျိာ်ဝဲလီၤ. 13ဒီးစီၤယိၤသးဟံးန့ၢ်အီၤခံဂၤလိာ်,စီၤအ့ဖရဲၣ်လၢအစုထွဲသဃီၤဒီးစီၤအံၣ်စရ့လးအစုစ့ၣ်,ဒီးစီၤမနၤရှ့ၤလၢအစုစ့ၣ်သဃီၤဒီးစီၤအံၣ်စရ့လးအစုထွဲ,ဒီးဒုးသုးဘူးအီၤဆူအအိၣ်လီၤ. 14ဒီးစီၤအံၣ်စရ့လးယူာ်ထီၣ်အစုထွဲ,ဒီးပာ်ဝဲလၢစီၤအ့ဖရဲၣ်အခိၣ်လၢအမ့ၢ်ပှၤအဆံး,ဒီးအစုစ့ၣ်လၢစီၤမနၤရှ့ၤအခိၣ်လီၤ.မ့ၢ်အဆှၢအစုလၢတၢ်သ့ၣ်ညါလီၤ.အဂ့ၢ်ဒ်အံၤ,စီၤမနၤရှ့ၤမ့ၢ်အဝဲၢ်ကိလီၤ. 15ဒီးဆိၣ်ဂ့ၤစီၤယိၤသး,ဒီးစံးဝဲဒၣ်,ယွၤ,လၢယပၢ်တဖၣ်စီၤအၤဘြၤဟၣ်ဒီးစီၤအံၤစဲးလဲၤတၢ်လၢအမဲာ်ညါ,ယွၤလၢအအံးထီၣ်ကွၢ်လီၤယၤလၢယကဲထီၣ်လံၤလံၤတုၤမုၢ်မဆါတနံၤအံၤ, 16ကလူးလၢအပှ့ၤက့ၤယၤလၢကယဲၢ်တၢ်အၢတၢ်နးအပူၤန့ၣ်,မ်အဆိၣ်ဂ့ၤဖိသၣ်တဖၣ်အံၤတက့ၢ်,ဒီးမ်တၢ်ကိးက့ၤယမံၤလၢအီၤ,ဒီးယပၢ်တဖၣ်စီၤအၤဘြၤဟၣ်ဒီးစီၤအံၤစဲးအမံၤန့ၣ်တက့ၢ်.ဒီးမ်အကဲထီၣ်ပှၤဂီၢ်မုၢ်ဂီၢ်ပၤလၢဟီၣ်ခိၣ်ချၢအသးကံၢ်ပူၤန့ၣ်တက့ၢ်. 17ဒီးစီၤယိၤသးထံၣ်ဘၣ်ဝဲလၢအပၢ်ပာ်အစုထွဲလၢစီၤအ့ဖရဲၣ်အခိၣ်,ဒီးတဘၣ်အမဲာ်ဘၣ်.ဒီးဟံးထီၣ်အပၢ်အစုဒ်သိးအကသုးကွံာ်အီၤလၢစီၤအ့ဖရဲၣ်အခိၣ်ဆူစီၤမနၤရှ့ၤအခိၣ်လီၤ. 18ဒီးစီၤယိၤသးစံးဘၣ်အပၢ်,ဒ်န့ၣ်တမ့ၢ်ဘၣ်,ယပၢ်ဧၢ,အဂ့ၢ်ဒ်အံၤ,အဝဲတဂၤအံၤမ့ၢ်အဝဲၢ်ကိလီၤ.ပာ်လီၤနစုထွဲလၢအခိၣ်တက့ၢ်. 19ဒီးအပၢ်ဂ့ၢ်လိာ်ဝဲ,ဒီးစံးဝဲဒၣ်,ယသ့ၣ်ညါ,ယဖိခွါဧၢ,ယသ့ၣ်ညါလီၤ.အဝဲဒၣ်ကကဲထီၣ်စ့ၢ်ကီးပှၤတကလုာ်,ဒီးအဝဲဒၣ်ကဒိၣ်ထီၣ်စ့ၢ်ကီးလီၤ.ဘၣ်ဆၣ်ဒီးအပုၢ်ကဒိၣ်ထီၣ်ဒိၣ်န့ၢ်အီၤတက့ၢ်,ဒီးအချံအသၣ်ကကဲထီၣ်ပှၤကလုာ်တဖၣ်အလၢအပှဲၤလီၤ. 20ဒီးတၢ်လၢမုၢ်တနံၤန့ၣ်ဆိၣ်ဂ့ၤအီၤ,ဒီးစံးဝဲဒၣ်,ပှၤအံၣ်စရ့လးဖိကဆိၣ်ဂ့ၤတၢ်လၢနၤ,ဒီးကစံး,မ်ယွၤပာ်နၤဒ်စီၤအ့ဖရဲၣ်,ဒီးစီၤမနၤရှ့ၤအသိးတက့ၢ်.ဒီးပာ်စီၤအ့ဖရဲၣ်လၢစီၤမနၤရှ့ၤအမဲာ်ညါလီၤ. 21ဒီးစီၤအံၣ်စရ့လးစံးဘၣ်စီၤယိၤသး,ကွၢ်ကွၢ်,ယသံယဲလီၤ.ဘၣ်ဆၣ်ဒီးယွၤကအိၣ်ဒီးသု,ဒီးဒုးက့ၤက့ၤသုဆူသုပၢ်တဖၣ်အကီၢ်ပူၤလီၤ. 22ဒီးယဲဒၣ်အံၤယဟ့ၣ်တ့ၢ်နၤလၢတၢ်အဂီၢ်တမံၤလၢနဒီပုၢ်ဝဲၢ်အဖီခိၣ်,လၢယဟံးန့ၢ်လၢပှၤအမိၢ်ဖိအစုပူၤလၢယနးဒီးယချံၣ်န့ၣ်လီၤ.
Copyright information for
KswSKMB