Haggai 2
1လါနွံလါတလါ,ထီၣ်အနံၤခံဆံတနံၤန့ၣ်ယွၤအကလုၢ်ဟဲဝဲလၢဝံဃးကဲအစုပူၤဒီးစံးဝဲဒၣ်, 2စံးလၢယူဒၤအခိၣ်,စီၤၡၤလတံၤအ့လးအဖိခွါစီၤစရူဘၤဘ့လး,ဒီးပှၤလုၢ်တၢ်အခိၣ်စီၤယိၤစါဒးအဖိခွါ,စီၤယိၤရှူ,ဒီးပှၤဂီၢ်မုၢ်လၢအအိၣ်လီၤတဲာ်,ဒီးစံး, 3ပှၤလၢအထံၣ်ဘၣ်ဟံၣ်အံၤလၢအလၤကပီၤအခီၣ်ထံးန့ၣ်မ့ၢ်မတၤအိၣ်လီၤတဲာ်လၢသုကျါတဂၤလဲၣ်.ဒီးသုထံၣ်ဘၣ်အီၤခဲကနံၣ်အံၤဒ်လဲၣ်.ထိၣ်သတြီၤတၢ်,ဒီးအအံၤတဟံၣ်န့ၣ်အိၣ်လၢသုမဲာ်ညါဒ်တၢ်နီတမံၤဘၣ်အသိးန့ၣ်တမ့ၢ်ဘၣ်ဧါ. 4ဘၣ်ဆၣ်ဒီးခဲကနံၣ်အံၤပာ်ဆူၣ်နသး,စီၤစရူဘၤဘ့လးဧၢ,ယွၤစံးဝဲဒၣ်,ပာ်ဆူၣ်နသး,ပှၤလုၢ်တၢ်အခိၣ်စီၤယိၤစါဒးအဖိခွါစီၤယိၤရှူဧၢ,ဒီးပာ်ဆူၣ်သုသး,ပှၤဂီၢ်မုၢ်လၢကီၢ်ပူၤခဲလၢာ်သ့ၣ်ဧၢ,ဒီးမၤတၢ်တက့ၢ်.တၢ်သုးမုၢ်ဂီၢ်မုၢ်အယွၤစံးဝဲဒၣ်,ယအိၣ်ဒီးသုလီၤ.တၢ်သုးမုၢ်ဂီၢ်မုၢ်အယွၤစံးဝဲဒၣ်, 5ဒ်တၢ်ကတိၤလၢယအၢၣ်လီၤအီလီၤဒီးသုဖဲသုဟးထီၣ်လၢအဲၤကူပတူးအပူၤအသိးန့ၣ်ယသးအိၣ်ဂၢၢ်ဆိးကျၢၤလၢသုကျါလီၤ,ပျံၤတၢ်တဂ့ၤ. 6အဂ့ၢ်ဒ်အံၤ,တၢ်သုးမုၢ်ဂီၢ်မုၢ်အယွၤစံးဝဲဒ်အံၤ,အိၣ်ဒံးတစိၢ်ဖိ,ဒီးယကမၤဟူးဝးမူခိၣ်,ဒီးဟီၣ်ခိၣ်,ဒီးပီၣ်လဲၣ်,ဒီးခိလီၤ. 7ဒီးယကဒုးကနိးပှၤကိးကလုာ်ဒဲး,ဒီးတၢ်လၢပှၤကလုာ်ခဲလၢာ်သးကွံဝဲန့ၣ်ကဟဲဝဲလီၤ.ဒီးယကမၤပှဲၤဟံၣ်အံၤဒီးတၢ်လၤကပီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်, 8ကျိၣ်ဧိၤစ့ဧိၤန့ၣ်မ့ၢ်ယတၢ်,ဒီးထူဧိၤလွဲဧိၤန့ၣ်မ့ၢ်ယတၢ်,တၢ်သုးမုၢ်ဂီၢ်မုၢ်အယွၤစံးဝဲဒၣ်. 9ဟံၣ်အံၤအလၤကပီၤလၢခံကဒိၣ်န့ၢ်အလၤကပီၤလၢညါတက့ၢ်လီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်.ယကဟ့ၣ်လီၤတၢ်ဃူတၢ်ဖိးလၢတၢ်အလီၢ်ဖဲအံၤလီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်. 10လၢစီၤဒၤရယါဝ့ၣ်အနံၣ်ခံနံၣ်တနံၣ်လါခွံလါတလါ,ထီၣ်ခံဆံလွံၢ်နံၤတနံၤန့ၣ်ယွၤအကလုၢ်ဟဲဝဲလၢဝံဃးကဲအစုပူၤ,ဒီးစံးဝဲဒၣ်, 11တၢ်သုးမုၢ်ဂီၢ်မုၢ်အယွၤစံးဒ်အံၤ,သံကွၢ်တၢ်သိၣ်တၢ်သီအဂ့ၢ်လၢပှၤလုၢ်တၢ်အဒိၣ်တဖၣ်,ဒီးစံး, 12ပှၤမ့ၢ်စိာ်တၢ်ညၣ်စီဆှံလၢအယၣ်အသရ့ၤ,ဒီးကိၣ်ဂ့ၤ,ကသူဂ့ၤ,စပံးထံဂ့ၤ,သိဧိၤချါဧိၤဂ့ၤ,တၢ်အီၣ်တမံၤမံၤဂ့ၤ,အယၣ်အသရ့ၤမ့ၢ်ထိးအီၤဒီး,ကကဆှီစ့ၢ်ကီးဧါ.ဒီးပှၤလုၢ်တၢ်အဒိၣ်တဖၣ်စံးဆၢတၢ်ဒီးစံးဝဲဒၣ်,တမ့ၢ်ဘၣ်. 13ဒီးစီၤဃးကဲစံးဝဲဒၣ်,ပှၤလၢအတကဆှီဘၣ်လၢတၢ်သံအဃိန့ၣ်မ့ၢ်ထိးဘၣ်တၢ်န့ၣ်တမံၤမံၤဒီး,တၢ်တမံၤန့ၣ်ကကဲလၢတၢ်တကဆှီဘၣ်ဧါ.ဒီးပှၤလုၢ်တၢ်အဒိၣ်တဖၣ်စံးဆၢတၢ်ဒီးစံးဝဲဒၣ်,ကကဲလၢတၢ်တကဆှီဘၣ်လီၤ. 14ဒီးစီၤဃးကဲစံးဆၢတၢ်ဒီးစံးဝဲဒၣ်,ပှၤဂီၢ်မုၢ်အံၤမ့ၢ်ဒ်န့ၣ်အသိး,ဒီးပှၤတကလုာ်အံၤမ့ၢ်ဒ်န့ၣ်အသိးလၢယမဲာ်ညါ,ယွၤစံးဝဲဒၣ်.ဒီးအမၤတၢ်လၢအစုမ့ၢ်ဒ်န့ၣ်အသိးခဲလၢာ်,ဒီးတၢ်လၢအမၤဘူၣ်ဖဲန့ၣ်မ့ၢ်တကဆှီဘၣ်လီၤ. 15ဒီးတၢ်မၤအသးလၢမုၢ်တနံၤအံၤ,ဒီးလၢထံးလၢမကိာ်လၢလၢၢ်တချုးဒိးလိာ်ဘၣ်အသးလၢလၢၢ်အဖီခိၣ်လၢယွၤအနူၢ်ပူၤန့ၣ်ကွၢ်ဆိကမိၣ်လၢ်ခဲကနံၣ်အံၤတက့ၢ်. 16လၢမုၢ်နံၤတဖၣ်အိၣ်တ့ၢ်ဝဲန့ၣ်ပှၤဟဲဝဲဆူဘုပူအိၣ်ဒီးဘုကဒိၣ်ခံဆံအအိၣ်,ဒီးအိၣ်ထဲဆံဆဲၣ်ကဒိၣ်ဧိၤလီၤ.ပှၤဟဲဝဲဆူနီၣ်စံၢ်စပံးထံ,ဒ်သိးအကဃီၣ်ထီၣ်ပူၤရၤယဲၢ်ဆံဒီးအိၣ်ထဲခံဆံဧိၤလီၤ. 17ယတီၢ်သုလၢကလံၤဒုးဃ့ထီၣ်တၢ်,ဒီးလၢဘုဘၣ်တၢ်ဆါ,ဒီးလၢသူၣ်လၢသုစုမၤတၢ်ခဲလၢာ်အဖီခိၣ်ဘၣ်ဆၣ်ဒီး,သုတဃၣ်ဃီၤသုသးဆူယအိၣ်ဘၣ်,ယွၤစံးဝဲဒၣ်. 18တၢ်မၤအသးလၢမုၢ်တနံၤအံၤဒီးလၢထံးလၢမကိာ်န့ၣ်ကွၢ်ဆိကမိၣ်လၢ်တက့ၢ်.တၢ်မၤအသးလၢလါခွံလါတလါ,ထီၣ်ခံဆံလွံၢ်နံၤတနံၤန့ၣ်,လၢမုၢ်တနံၤလၢယွၤအဟံၣ်အခီၣ်ထံးဘၣ်တၢ်သူၣ်အသးလံၤလံၤန့ၣ်ကွၢ်ဆိကမိၣ်တက့ၢ်. 19တၢ်အချံအိၣ်ဒံးလၢဖီပူၤစ့ၢ်ကီးဧါ.မ့ၢ်မးစပံးမုၢ်ဒီးသ့ၣ်ချၢၣ်ဒၢဒီးသ့ၣ်သလဲ,ဒီးသ့ၣ်စၤယံးန့ၣ်တသၣ်ထီၣ်ဘၣ်ဝဲဘၣ်.တုၤအံၤဆူညါယကဆိၣ်ဂ့ၤတၢ်လီၤ. 20ဒီးလါထီၣ်ခံဆံလွံၢ်နံၤတနံၤယွၤအကလုၢ်ဘၣ်စီၤဃးကဲခံဘျီတဘျီဒီးစံးဝဲဒၣ်, 21စံးဘၣ်ယူဒၤအခိၣ်စီၤစရူဘၤဘ့လးဒီးစံး,ယကမၤဟူးဝးမူခိၣ်ဒီးဟီၣ်ခိၣ်လီၤ. 22ဒီးယကမၤလီၤပှီၢ်စီၤပၤအလီၢ်ပစိာ်,ဒီးယကမၤဟးဂီၤကွံာ်ပှၤကလုာ်တဖၣ်အဘီအမုၢ်အစိအကမီၤ,ဒီးယကမၤကဒါလ့ၣ်ကဟၣ်တဖၣ်,ဒီးကသ့ၣ်ဒီးပှၤလၢအဒိးအီၤကလီၤဃံၤဝဲတဂၤလၢအဒီပုၢ်ဝဲၢ်အနးစုာ်စုာ်လီၤ. 23တၢ်သုးမုၢ်ဂီၢ်မုၢ်အယွၤစံးဝဲဒၣ်,တၢ်လၢမုၢ်တနံၤန့ၣ်ယကဟံးန့ၢ်နၤ,ယခ့ယပှၤ,စီၤၡၤလတံၤအ့လးအဖိခွါစီၤစရူဘၤဘ့လးတဂၤဧၢ,ဒီးယကပာ်နၤဒ်တၢ်စဲဃာ်ပနီၣ်အသိးန့ၣ်လီၤ.အဂ့ၢ်ဒ်အံၤ,ယဃုထၢနၤလံ,တၢ်သုးမုၢ်ဂီၢ်မုၢ်အယွၤစံးဝဲဒၣ်.
Copyright information for
KswSKMB