Heb 1 | KswSKMB | STEP | ယွၤကတိၤတၢ်ဒီးပၢ်သ့ၣ်လၢပျၢၤအါတီၤဒီးအါကျိၤလၢဝံတဖၣ်ဘၣ်ဆၣ်ဒီး,

‏ Hebrews 1

1 ယွၤကတိၤတၢ်ဒီးပၢ်သ့ၣ်လၢပျၢၤအါတီၤဒီးအါကျိၤလၢဝံတဖၣ်ဘၣ်ဆၣ်ဒီး, 2 လၢနံၤကတၢၢ်တဖၣ်အံၤ,ကတိၤတၢ်ဒီးပှၤ,လၢအဖိခွါလၢအပာ်အီၤလၢပှၤန့ၢ်ဘၣ်သါတၢ်ခဲလၢာ်,ဒီးတ့ဟီၣ်ခိၣ်စ့ၢ်ကီးလၢအီၤလီၤ. 3 အဝဲဒၣ်မ့ၢ်အလၤကပီၤအတၢ်ကပြုၢ်ကပြီၤ,ဒီးအကစၢ်မိၢ်ပှၢ်အက့ၢ်အဂီၤလီၤတံၢ်လီၤဆဲး,ဒီးစိာ်ထီၣ်ကယဲၢ်တၢ်ခဲလၢာ်လၢအကလုၢ်အစိအကမီၤ,ဒီးမၤစီကွံာ်ပတၢ်ဒဲးဘးလၢအကစၢ်ဒၣ်ဝဲဝံၤဒီး,ဆ့ၣ်နီၤလၢတၢ်အကဟုကညီၢ်တဂၤအစုထွဲလၢတၢ်ထီၣ်ထီ, 4 ဒီးဂ့ၤန့ၢ်ကလူးတဖၣ်ထဲသိးဒီးအမံၤလၢအန့ၢ်ဘၣ်သါန့ၣ်,ဂ့ၤန့ၢ်အဝဲသ့ၣ်အမံၤတက့ၢ်လီၤ.

5 အဂ့ၢ်ဒ်အံၤ,
နဲဒၣ်အံၤနမ့ၢ်ယဖိခွါလီၤ,
ယမၤလိၣ်ထီၣ်လံနၤလၢမုၢ်မဆါတနံၤအံၤလံ, ^{▼▼1:5 စံး.၂း၇}

န့ၣ်,မ့ၢ်အစံးဘၣ်ကလူးတဘျီဘျီ,ဖဲလဲၣ်တဂၤလဲၣ်,ဒီးမၤကဒီးတစု,ယကကဲလၢအပၢ်ဒီးအဝဲဒၣ်ကကဲလၢယဖိခွါန့ၣ်လီၤ, ^{▼▼1:5 ၂မူၤ.၇း၁၄း.၂း၇}မ့ၢ်အစံးတဘျီဘျီလၢကလူးဖဲလဲၣ်တဂၤလဲၣ်. 6 ဒီးမၤကဒီးတစု,တုၤအဟဲဆှၢအဖိဝဲၢ်ကိဆူဟီၣ်ခိၣ်ဒီး,စံးဝဲဒၣ်,ယွၤအကလူးတဂၤလၢ်လၢ်န့ၣ်,မ်အဘါထီၣ်အီၤတက့ၢ်. ^{▼▼1:6 စံး.၉၇း၇} 7 ဒီးစံးဝဲလၢကလူးတဖၣ်အဂ့ၢ်အကျိၤ,မ့ၢ်အမၤအကလူးတဖၣ်လၢကလံၤ, 8 ဒီးအခ့အပှၤလၢမ့ၣ်အူလၣ်လီၤ. ^{▼▼1:8 စံး.၁၀၄း၄}မ့မ့ၢ်လၢအဖိခွါအဂ့ၢ်န့ၣ်,

ယွၤဧၢ,နလီၢ်ပစိာ်န့ၣ်အိၣ်ဝဲအစိၤစိၤအဃၣ်ဃၣ်,
တၢ်တီတၢ်လိၤအနီၣ်ထိးန့ၣ်,မ့ၢ်နဘီနမုၢ်အနီၣ်ထိးလီၤ.
9 နအဲၣ်တၢ်တီတၢ်လိၤ,ဒီးနသးဟ့တၢ်အၢတၢ်သီလီၤ.
မၤသးဒ်န့ၣ်ဒီးယွၤနကစၢ်ဖှူနလိၤ
လၢတၢ်သးခုအသိ,လၢနတံၤနသကိးတဖီခိၣ်လီၤ. ^{▼▼1:9 စံး.၉၅း၆}
10 ဒီးနဲဒၣ်,ကစၢ်ဧၢ,လၢထံးလၢသီန့ၣ်,နပာ်လီၤဟီၣ်ခိၣ်အခီၣ်ထံး,
ဒီးမူခိၣ်န့ၣ်မ့ၢ်နစုအမၤတၢ်လီၤ.
11 အဝဲသ့ၣ်ကတုၤလၢတၢ်ဟးဂီၤ,မ့မ့ၢ်နဲဒၣ်အံၤနအိၣ်နဆိးလီၤ.
အဝဲသ့ၣ်ကလီၢ်လံၤဒ်တၢ်ကူတၢ်သိးတဘ့ၣ်အသိး,
12 ဒီးဒ်ယၣ်တဘ့ၣ်အသိးန့ၣ်,နကချံးထီၣ်အီၤ,ဒီးကဘၣ်လဲလိာ်အသးလီၤ.
မ့မ့ၢ်နဲဒၣ်အံၤနအိၣ်နကစၢ်ဒၣ်နဲဒ်လီၢ်လီၢ်,
ဒီးနနံၣ်တဖၣ်တလၢာ်ဘၣ်ဝဲဘၣ်. ^{▼▼1:12 စံး.၁၀၂း၂၅}
13 ဆ့ၣ်နီၤလၢယစုထွဲ,
တုၤယပာ်နဒုၣ်နဒါလၢနခီၣ်ယီၢ်အလီၢ်တက့ၢ်, ^{▼▼1:13 စံး.၁၁၀း၁}န့ၣ်,

မ့ၢ်အစံးဘၣ်ကလူးတဘျီဘျီဖဲလဲၣ်တဂၤလဲၣ်. 14 အဝဲသ့ၣ်ခဲလၢာ်မ့ၢ်သးလၢအဒိးမၢအသးဒ်သိးအကမၤတၢ်အခ့အပှၤအတၢ်လၢပှၤလၢအကန့ၢ်ဘၣ်သါတၢ်အုၣ်က့ၤခီၣ်က့ၤတဖၣ်အဂီၢ်တမ့ၢ်ဘၣ်ဧါ.