Heb 4 | KswSKMB | STEP | မၤသးဒ်န့ၣ်ဒီး,ပျံၤသကိးတၢ်တက့ၢ်,တၢ်ကလီၤဂာ်ဘၣ်ဖုးလၢတၢ်စံးပာ်အိၣ်လီၤတဲာ်လၢပကနုာ်ဘၣ်လၢအတၢ်အိၣ်ဘှံးအပူၤဘၣ်ဆၣ်ဒီး,သုတတုၤဘၣ်တဂၤဂၤလီၤ.

‏ Hebrews 4

1 မၤသးဒ်န့ၣ်ဒီး,ပျံၤသကိးတၢ်တက့ၢ်,တၢ်ကလီၤဂာ်ဘၣ်ဖုးလၢတၢ်စံးပာ်အိၣ်လီၤတဲာ်လၢပကနုာ်ဘၣ်လၢအတၢ်အိၣ်ဘှံးအပူၤဘၣ်ဆၣ်ဒီး,သုတတုၤဘၣ်တဂၤဂၤလီၤ. 2 အဂ့ၢ်ဒ်အံၤ,တၢ်စံၣ်တဲၤတဲလီၤပဝဲဒၣ်အံၤစ့ၢ်ကီးလၢတၢ်သးခုအကစီၣ်,ဒ်အဝဲသ့ၣ်အသိးလီၤ.မ့မ့ၢ်တၢ်ကတိၤလၢအနၢ်ဟူန့ၣ်,တမၤဘျုးဘၣ်အီၤဘၣ်.အဂ့ၢ်ဒ်အံၤ,တဃါဃုာ်ဘၣ်ဒီးတၢ်နာ်လၢပှၤလၢအနၢ်ဟူန့ၣ်ဘၣ်. 3 အဂ့ၢ်ဒ်အံၤ,ပှၤလၢအနာ်တၢ်ပဝဲဒၣ်အံၤ,ပနုာ်ဘၣ်လၢတၢ်အိၣ်ဘှံးအပူၤ,ဒ်အစံးဝဲအသိး,ဒ်ယဆိၣ်လီၤယသးလၢယသးဒိၣ်ထီၣ်န့ၣ်,လၢအဝဲသ့ၣ်တနုာ်လၢယတၢ်အိၣ်ဘှံးအပူၤဘၣ်. ^{▼▼4:3 စံး.၉၅း၁၁}မ့ၢ်နာ်သက့ဒ်န့ၣ်ဒီး,တၢ်မၤတဖၣ်ဝံၤထီၣ်ဝဲလၢဟီၣ်ခိၣ်အခီၣ်ထံးန့ၣ်လီၤ. 4 အဂ့ၢ်ဒ်အံၤ,စံးဝဲဒၣ်လၢတၢ်တပူၤလၢနွံနံၤတနံၤအဂ့ၢ်အကျိၤဒ်အံၤ,ဒီးယွၤအိၣ်ဘှံးလၢအတၢ်မၤခဲလၢာ်လၢနွံနံၤတနံၤန့ၣ်လီၤ. ^{▼▼4:4 ၁မိၤ.၂း၃} 5 ဒီးအအံၤတပူၤကဒီး,အဝဲသ့ၣ်တနုာ်ဘၣ်လၢယတၢ်အိၣ်ဘှံးအပူၤဘၣ်.

6 မၤသးဒ်န့ၣ်ဒီးတၢ်အိၣ်လီၤတဲာ်ဝဲလၢပှၤကလဲၤနုာ်ဝဲတနီၤနီၤ,ဒီးပှၤလၢတၢ်စံၣ်တဲၤတဲလီၤအီၤလၢတၢ်သးခုအကစီၣ်အဆိတဖၣ်န့ၣ်,တနုာ်ဘၣ်လၢအတစူၢ်တနာ်ဘၣ်တၢ်အဃိသတးဒီး, 7 သ့ၣ်နံၤဖးသီကဒီး,ဒီးစံးလၢစီၤဒၤဝံးအပူၤ,မုၢ်မဆါတနံၤအံၤ,လၢအကတီၢ်ယံာ်ထဲန့ၣ်အလီၢ်ခံ,ဒ်တၢ်စံးဝဲအသိးန့ၣ်,

မုၢ်မဆါတနံၤအံၤ,သုမ့ၢ်နၢ်ဟူအကလုၢ်ဒီး,
မၤကိၤသုသးတဂ့ၤ. ^{▼▼4:7 စံး.၉၅း၇,၈}

8 အဂ့ၢ်ဒ်အံၤ,စီၤယိၤရှူမ့ၢ်ဒုးအိၣ်ဘှံးတ့ၢ်အီၤဒီး,အဝဲန့ၣ်အလီၢ်ခံတကတိၤလၢၤဘၣ်လၢနံၤအဂၤအဂ့ၢ်အကျိၤဘၣ်.

9 မၤသးဒ်န့ၣ်ဒီး,တၢ်အိၣ်ဘှံးအိၣ်လီၤတဲာ်မးလၢယွၤအပှၤဂီၢ်မုၢ်အဂီၢ်လီၤ. 10 အဂ့ၢ်ဒ်အံၤ,ပှၤလၢအနုာ်ဘၣ်တ့ၢ်ဝဲလၢအတၢ်အိၣ်ဘှံးအပူၤတဂၤန့ၣ်,အဝဲဒၣ်အိၣ်ဘှံးစ့ၢ်ကီးလၢအတၢ်မၤ,ဒ်ယွၤလၢအတၢ်မၤဒၣ်ဝဲအသိး,န့ၣ်လီၤ. 11 မၤသးဒ်န့ၣ်ဒီးမ်ပဂုာ်နုာ်ဘၣ်တၢ်အိၣ်ဘှံးတမံၤအံၤ,ဒ်သိးပသုတလီၤဃံၤထွဲတၢ်တစူၢ်တနာ်ဘၣ်အဒိအတဲာ်တမံၤဃီအခံ,နီတဂၤတဂ့ၤန့ၣ်တက့ၢ်.

12 အဂ့ၢ်ဒ်အံၤ,ယွၤအကလုၢ်န့ၣ်မ့ၢ်တၢ်မူ,ဒီးမၤတၢ်သ့,ဒီးအကနၣ်အ့ၣ်တၢ်ဂ့ၤန့ၢ်နးတဘ့ၣ်လၢအကနၣ်ခံခီလိာ်,ဒီးဆဲးဖျိတုၤအနီၤဖးပတၢ်မူဒီးပသး,ဒီးတၢ်အဆၢဒီးတၢ်အကံၢ်,ဒီးမ့ၢ်တၢ်လၢအသ့ၣ်ညါပသးအတၢ်ဆိကမိၣ်ဒီးအတၢ်ကူၣ်တၢ်တဖၣ်န့ၣ်လီၤ. 13 ဒီးတၢ်လၢအဘၣ်တ့အသး,တအိၣ်တဒၢဘၣ်လၢအမဲာ်ညါနီတမံၤဘၣ်.မ့ၢ်ကယဲၢ်တၢ်တမံၤလၢ်လၢ်အိၣ်ဘ့ၣ်ဆ့,ဒီးအိၣ်ဖျါထီၣ်ဝဲလၢပှၤအကလုၢ်ဘၣ်ဃးဒီးပှၤန့ၣ်အမဲာ်လီၤ.

14 မၤသးဒ်န့ၣ်ဒီး,မ့ၢ်ပအိၣ်ဒီးပှၤလုၢ်တၢ်အခိၣ်ဖးဒိၣ်လၢအလဲၤနုာ်ဆူမူခိၣ်,ယွၤအဖိခွါယ့ၣ်ရှူးတဂၤသတးဒီး,မ်ပဟံးဃာ်တၢ်အၢၣ်လီၤအီလီၤသပှၢ်တၢၢ်တက့ၢ်. 15 အဂ့ၢ်ဒ်အံၤ,ပအိၣ်ဒီးပှၤလုၢ်တၢ်အခိၣ်လၢအသးကညီၤပဂံၢ်စၢ်ဘါစၢ်တသ့ဘၣ်န့ၣ်,တမ့ၢ်ဘၣ်,မ့ၢ်အဘၣ်တၢ်လ့ပစီကိးအမံၤဒဲးဒ်ပဝဲအသိးန့ၣ်ဘၣ်ဆၣ်ဒီး,အတၢ်ဒဲးဘးတအိၣ်ဘၣ်. 16 မၤသးဒ်န့ၣ်ဒီး,ဒ်သိးပကဒိးန့ၢ်တၢ်သးကညီၤ,ဒီးထံၣ်န့ၢ်တၢ်ဘျုးတၢ်ဖှိၣ်ဖဲတၢ်မၤစၢၤအဆၢအကတီၢ်အပူၤဒီးမ်ပသုးဘူးပသးအိၣ်ဒီးပသးခူတလ့ၢ်ဆူတၢ်ဘျုးတၢ်ဖှိၣ်အလီၢ်ပစိာ်န့ၣ်တက့ၢ်.