Heb 5 | KswSKMB | STEP | အဂ့ၢ်ဒ်အံၤ,ကယဲၢ်ပှၤလုၢ်တၢ်အခိၣ်ကိးဂၤဒဲး,ဘၣ်တၢ်ဟံးန့ၢ်အီၤလၢပှၤကညီအကျါသတးဒီး,တၢ်ပာ်အီၤလၢတၢ်ဘၣ်ဃးဒီးယွၤလၢပှၤကညီအဂီၢ်,ဒ်သိးအကပာ်ထီၣ်တၢ်မၤဘူၣ်,ဒီးတၢ်လုၢ်လၢတၢ်ဒဲးဘးအဂီၢ်လီၤ.

‏ Hebrews 5

1 အဂ့ၢ်ဒ်အံၤ,ကယဲၢ်ပှၤလုၢ်တၢ်အခိၣ်ကိးဂၤဒဲး,ဘၣ်တၢ်ဟံးန့ၢ်အီၤလၢပှၤကညီအကျါသတးဒီး,တၢ်ပာ်အီၤလၢတၢ်ဘၣ်ဃးဒီးယွၤလၢပှၤကညီအဂီၢ်,ဒ်သိးအကပာ်ထီၣ်တၢ်မၤဘူၣ်,ဒီးတၢ်လုၢ်လၢတၢ်ဒဲးဘးအဂီၢ်လီၤ. 2 ဒီးမ့ၢ်တၢ်ဂံၢ်စၢ်ဘါစၢ်အိၣ်ဝးတရံးအကစၢ်ဒၣ်ဝဲသတးဒီး,သးအိၣ်ပှၤလၢအတသ့ၣ်ညါဘၣ်တၢ်ဘၣ်,ဒီးပှၤလၢအဟးကမၣ်ကျဲတဖၣ်,သ့လီၤ. 3 မၤသးဒ်န့ၣ်ဒီး,ဒ်လၢပှၤဂီၢ်မုၢ်အဂီၢ်အသိးန့ၣ်,ဘၣ်ပာ်ထီၣ်စ့ၢ်ကီးတၢ်လၢအဂီၢ်ဒၣ်ဝဲလၢတၢ်ဒဲးဘးအဃိလီၤ. 4 ဒီးပှၤတဂၤဟံးန့ၢ်ဒၣ်ဝဲတၢ်လၤကပီၤအံၤတမ့ၢ်ဘၣ်,မ့ၢ်ပှၤလၢယွၤကိးန့ၢ်အီၤ,ဒ်စီၤအၤဟရိၣ်အသိးန့ၣ်လီၤ. 5 ဒ်န့ၣ်အသိးခရံာ်တမၤလၤမၤကပီၤဒၣ်အသး,ဒ်သိးအကကဲထီၣ်ပှၤလုၢ်တၢ်အခိၣ်ဘၣ်.

မ့မ့ၢ်ပှၤစံးဘၣ်အီၤ,
နဲဒၣ်အံၤနမ့ၢ်ယဖိခွါလီၤ.
ယမၤလိၣ်ထီၣ်လံနၤလၢမုၢ်မဆါတနံၤအံၤလံ. ^{▼▼5:5 စံး.၂း၇}
6 ဒီးဒ်အစံးဝဲလၢတပူၤဒၣ်အသိးန့ၣ်,
နမ့ၢ်ပှၤလုၢ်တၢ်အဒိၣ်လီၤထူလီၤယိာ်,
ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ. ^{▼▼5:6 စံး.၁၁၀း၄}

7 အဝဲဒၣ်လၢအဖံးအညၣ်အမုၢ်နံၤတဖၣ်န့ၣ်,ဘါထုကဖၣ်ဒီးဃ့ကညးပှၤလၢအအုၣ်က့ၤခီၣ်က့ၤအီၤလၢတၢ်သံသ့တဂၤ,အိၣ်ဒီးတၢ်ကိးပသူထီၣ်,ဒီးမဲာ်ထံမဲာ်နိ,ဒီးမ့ၢ်အယူးယီၣ်ယွၤသတးဒီး,တၢ်ဒိကနၣ်အကလုၢ်လီၤ. 8 မ့ၢ်ဖိခွါနာ်သက့ဒီး,မၤလိစူၢ်တၢ်အကလုၢ်လၢအဒိးတၢ်နးတၢ်ဖှီၣ်အဃိလီၤ. 9 ဒီးလၢထီၣ်ပှဲၤထီၣ်ဝဲဒီး,ကဲထီၣ်ပှၤလၢအစူၢ်အကလုၢ်တဖၣ်ခဲလၢာ်အတၢ်အုၣ်က့ၤခီၣ်က့ၤအီၤအထူအယိာ်အကစၢ်လီၤ. 10 ဒီးယွၤပာ်အီၤလၢပှၤလုၢ်တၢ်အခိၣ်ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ.

11 လၢအဝဲဒၣ်အဂ့ၢ်အကျိၤပအိၣ်ဒီးတၢ်ကတိၤအါထံၣ်လၢပမၤဖျါထီၣ်ကီမးလၢသုကဲလၢပှၤအနၢ်ဃၢအဃိလီၤ. 12 အဂ့ၢ်ဒ်အံၤ,လၢအဆၢအကတီၢ်ဖဲသုဂ့ၤကဲထီၣ်သရၣ်တဖၣ်န့ၣ်ဒီး,ပှၤသိၣ်လိကဒီးသုလၢယွၤအကလုၢ်အကထါမိၢ်ပှၢ်အခီၣ်ထံးန့ၣ်,အလီၢ်အိၣ်,ဒီးသုကဲပှၤလၢအဂ့ၤန့ၢ်တၢ်နုၢ်ထံ,ဒီးတမ့ၢ်ဘၣ်တၢ်အီၣ်အသံးအကာ်ဘၣ်. 13 အဂ့ၢ်ဒ်အံၤ,ကယဲၢ်ပှၤလၢအအီၣ်နုၢ်ထံတဖၣ်န့ၣ်,တညီနုၢ်ဘၣ်တၢ်တီတၢ်လိၤအတၢ်ကတိၤနီတဂၤဘၣ်.အဂ့ၢ်ဒ်အံၤ,မ့ၢ်ဖိသၣ်လီၤ. 14 ဒီးတၢ်အီၣ်အသံးအကာ်န့ၣ်မ့ၢ်လၢပှၤဒိၣ်တုာ်ခိၣ်ပှဲၤအဂီၢ်,ပှၤလၢအအိၣ်ကတဲာ်ကတီၤအသး,ဒီးညီနုၢ်နီၤဖးတၢ်ဂ့ၤဒီးတၢ်အၢအဆၢန့ၣ်လီၤ.