Heb 6 | KswSKMB | STEP | မၤသးဒ်န့ၣ်ဒီး,မ်ပလဲၤပူၤကွံာ်ခရံာ်အကလုၢ်ကထါအခီၣ်ထံးအဂ့ၢ်,ဒီးလဲၤလၢညါတုၤလၢတၢ်လၢတၢ်ပှဲၤတက့ၢ်.တပာ်ကဒီးဘၣ်တၢ်အခီၣ်ထံးဘၣ်ဃးဒီးတၢ်ပီၢ်ယၢ်လီၤက့ၤပသးလၢတၢ်မၤလၢအသံန့ၣ်အဃိ,ဒီးတၢ်နာ်ယွၤ,

‏ Hebrews 6

1 မၤသးဒ်န့ၣ်ဒီး,မ်ပလဲၤပူၤကွံာ်ခရံာ်အကလုၢ်ကထါအခီၣ်ထံးအဂ့ၢ်,ဒီးလဲၤလၢညါတုၤလၢတၢ်လၢတၢ်ပှဲၤတက့ၢ်.တပာ်ကဒီးဘၣ်တၢ်အခီၣ်ထံးဘၣ်ဃးဒီးတၢ်ပီၢ်ယၢ်လီၤက့ၤပသးလၢတၢ်မၤလၢအသံန့ၣ်အဃိ,ဒီးတၢ်နာ်ယွၤ, 2 တၢ်သိၣ်တၢ်သီဘၣ်ဃးဒီးတၢ်ဘျၢတဖၣ်,ဒီးတၢ်ပာ်စုတဖၣ်,ဒီးပှၤသံအတၢ်ဂဲၤဆၢထၢၣ်,ဒီးတၢ်စံၣ်ညီၣ်အထူအယိာ်ဘၣ်. 3 ဒီးယွၤမ့ၢ်ဒုးမၤပှၤဒီး,ပကမၤတၢ်န့ၣ်လီၤ. 4 အဂ့ၢ်ဒ်အံၤ,ပှၤလၢအသးကပီၤထီၣ်တဘျီ,ဒီးလ့ၣ်ကွၢ်မူခိၣ်အတၢ်ဟ့ၣ်,ဒီးကဲထီၣ်ပှၤန့ၢ်ဘၣ်ဃုာ်သးစီဆှံ, 5 ဒီးလ့ၣ်ကွၢ်ယွၤအကလုၢ်ဂ့ၤ,ဒီးခဲကိာ်တဃၣ်အစိအကမီၤတဖၣ်န့ၣ်, 6 မ့ၢ်လီၤတဲာ်ကွံာ်ဝဲဒီး,မ့ၢ်အပျၤထီကဒီးယွၤအဖိခွါလၢထူၣ်စုညါအလိၤလၢအစုဒၣ်ဝဲ,ဒီးမၤမဲာ်ဆှးအီၤလၢတၢ်အိၣ်ဖျါသတးဒီး,တၢ်ဘိးဃၣ်ကဒါက့ၤအီၤဆူတၢ်ပီၢ်ယၢ်လီၤက့ၤအသးန့ၣ်,တသ့ဘၣ်လီၤ. 7 အဂ့ၢ်ဒ်အံၤ,ဟီၣ်ခိၣ်လၢအစူၢ်ထီၣ်တၢ်ဟဲစူၤလၢအလီၤလၢအဖီခိၣ်တလီၢ်လီၢ်တလီၢ်လီၢ်,ဒီးဒုးမဲထီၣ်ဘုဧိၤဟုဧိၤကြၢးဒီးပှၤလၢတၢ်မၤအီၤလၢအဂီၢ်တဖၣ်န့ၣ်,ဘၣ်တၢ်ဆိၣ်ဂ့ၤလၢယွၤလီၤ. 8 မ့မ့ၢ်တၢ်လၢအဒုးမဲထီၣ်တၤဆှုၣ်တၤမဲ,ဒီးတၤဆှုၣ်တြံးဘလူးန့ၣ်,ဘၣ်တၢ်ညိကွံာ်အီၤ,ဒီးအိၣ်ဘူးဒီးတၢ်ဆိၣ်အၢဒီးအကတၢၢ်မ့ၢ်တၢ်ဆူးထီၣ်ကွံာ်အီၤလီၤ. 9 ဘၣ်ဆၣ်ဒီးပှၤလၢတၢ်အဲၣ်အီၤသ့ၣ်ဧၢ,ပကတိၤတၢ်ဒ်န့ၣ်နာ်သက့ဒီး,ပနာ်မးတၢ်ဂ့ၤန့ၢ်အန့ၣ်တက့ၢ်လၢသုဂ့ၢ်,ဒီးတၢ်လၢအဘၣ်ဃးဒီးတၢ်အုၣ်က့ၤခီၣ်က့ၤလီၤ. 10 အဂ့ၢ်ဒ်အံၤ,ယွၤတမ့ၢ်ဘၣ်ပှၤတတီတလိၤဘၣ်လၢအကသးပ့ၤနီၣ်သုတၢ်မၤ,ဒီးသုတၢ်အဲၣ်တၢ်ကွံလၢသုအဲၣ်အမံၤ,ဒီးသုတၢ်မၤစၢၤတ့ၢ်,ဒီးသုမၤစၢၤဒံးပှၤစီဆှံန့ၣ်,အဂ့ၢ်ဘၣ်.

11 ဒီးပဆၢဒိၣ်မးလၢသုဝဲကိးဂၤဒဲး,ကမၤဖျါထီၣ်သုသးဂဲၤလိာ်တမံၤဃီဆူတၢ်မုၢ်လၢ်အတၢ်လၢတၢ်ပှဲၤတုၤအကတၢၢ်, 12 ဒ်သိးသုသုတကၢၣ်တကျူတဂ့ၤဒီး,သုကကွၢ်လိပှၤလၢအနာ်တၢ်ဒီးဝံသးစူၤတၢ်သတးဒီးန့ၢ်သါတၢ်စံးပာ်တဖၣ်လီၤ. 13 အဂ့ၢ်ဒ်အံၤ,လၢယွၤစံးပာ်တၢ်လၢစီၤအၤဘြၤဟၣ်န့ၣ်,မ့ၢ်တၢ်ဒိၣ်တက့ၢ်လၢအကဆိၣ်တၢ်လၢအမဲာ်ညါတအိၣ်ဘၣ်အဃိဒီး,ဆိၣ်တၢ်လၢအကစၢ်ဒၣ်ဝဲအမဲာ်ညါ, 14 ဒီးစံးဝဲဒၣ်,ဆိၣ်ဂ့ၤတၢ်ဒီး,ယကဆိၣ်ဂ့ၤနၤ,ဒီးမၤအါထီၣ်တၢ်ဒီး,ယကမၤအါထီၣ်နၤလီၤ. 15 ဒီးဒ်န့ၣ်အသိးဝဲဒၣ်အိၣ်ခိးစူၤသး,ဒီးချုးန့ၢ်တၢ်စံးပာ်န့ၣ်လီၤ. 16 အဂ့ၢ်ဒ်အံၤ,ပှၤကညီဆိၣ်တၢ်လၢတၢ်အဒိၣ်တက့ၢ်အမဲာ်ညါ,ဒီးတၢ်ဆိၣ်လၢတၢ်မၤဂၢၢ်မၤကျၢၤအဂီၢ်န့ၣ်,မ့ၢ်တၢ်တဲးလိာ်ဃိလိာ်ခဲလၢာ်အကတၢၢ်လီၤ. 17 ဒ်န့ၣ်အသိးယွၤအတၢ်ကူၣ်ပာ်ဟးဂီၤတသ့ဘၣ်.အဂ့ၢ်န့ၣ်,သါကဒုးနဲၣ်ဝဲလၢပှၤန့ၢ်သါတၢ်စံးပာ်,သပှၢ်တၢၢ်အဃိဒီး,ကတိၤဝဲလၢတၢ်ဆိၣ်, 18 ဒ်သိး,မ့ၢ်တၢ်ဂၢၢ်တၢ်ကျၢၤခံမံၤ,လၢယွၤကတိၤကဘျံးကဘျၣ်တသ့ဘၣ်သတးဒီး,ပှၤလၢအဃ့ၢ်ပူၤဖျဲးဒ်သိးအကမၤန့ၢ်တၢ်မုၢ်လၢ်အိၣ်လၢအမဲာ်ညါ,ပဝဲဒၣ်အံၤ,ပကန့ၢ်ဘၣ်တၢ်ခုၣ်တၢ်မုာ်ဖးဒိၣ်လီၤ. 19 ပအိၣ်ဒီးတၢ်မုၢ်လၢ်အံၤ,ဒ်သးအနီၣ်သက့ၤအသိး,လၢအစဲဘူးဃာ်ဒီးအိၣ်ဂၢၢ်ဆိးကျၢၤဒီးနုာ်ဘၣ်လၢယၣ်ဘျးလီၤအသးအပူၤ. 20 ဖဲပှၤဃ့ၢ်တၢ်လၢညါ,ယ့ၣ်ရှူးတဂၤ,လဲၤနုာ်ဘၣ်ဝဲလၢပဂီၢ်,ဒီးကဲထီၣ်ပှၤလုၢ်တၢ်အခိၣ်အထူအယိာ်,ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ.