Heb 7 | KswSKMB | STEP | အဂ့ၢ်ဒ်အံၤ,စီၤမၤလကံစဒ့းအံၤ,ၡၤလ့ၣ်အစီၤပၤ,တၢ်ထီကတၢၢ်ကစၢ်အပှၤလုၢ်တၢ်အခိၣ်န့ၣ်,ဟဲသဂၢၢ်စီၤအၤဘြၤဟၣ်လၢအဟဲက့ၤလၢတၢ်ကျီကွံာ်စီၤပၤတဖၣ်,ဒီးဆိၣ်ဂ့ၤအီၤလီၤ.

‏ Hebrews 7

1 အဂ့ၢ်ဒ်အံၤ,စီၤမၤလကံစဒ့းအံၤ,ၡၤလ့ၣ်အစီၤပၤ,တၢ်ထီကတၢၢ်ကစၢ်အပှၤလုၢ်တၢ်အခိၣ်န့ၣ်,ဟဲသဂၢၢ်စီၤအၤဘြၤဟၣ်လၢအဟဲက့ၤလၢတၢ်ကျီကွံာ်စီၤပၤတဖၣ်,ဒီးဆိၣ်ဂ့ၤအီၤလီၤ. 2 ဒီးစီၤအၤဘြၤဟၣ်နီၤဟ့ၣ်အီၤလၢတၢ်ခဲလၢာ်အဆံဆဲၣ်ပူတပူလီၤ.အခီပညီအခီၣ်ထံးန့ၣ်,မ့ၢ်တၢ်တီတၢ်လိၤအစီၤပၤ,လၢခံက့ၤဒီးၡၤလ့ၣ်အစီၤပၤ,ဒ်ပစံးတၢ်အသိး,တၢ်ဃူတၢ်ဖိးအစီၤပၤလီၤ. 3 အမိၢ်တအိၣ်,အပၢ်တအိၣ်,အထူအထံးတအိၣ်,အနံၤအသီအခီၣ်ထံးတအိၣ်,အသးသမူအကတၢၢ်တအိၣ်ဘၣ်,တၢ်ပာ်အီၤလၢတၢ်လီၤဂာ်ယွၤအဖိခွါဒီး,မ့ၢ်ဝဲပှၤလုၢ်တၢ်အဒိၣ်အစိၤစိၤဃၣ်ဃၣ်လီၤ. 4 အဝဲဒၣ်,လၢပပၢ်အခိၣ်စီၤအၤဘြၤဟၣ်ဟ့ၣ်အီၤလၢတၢ်ဂုာ်ဆူၣ်တၢ်အဆံဆဲၣ်ပူတပူ,မ့ၢ်ပှၤဆံးဒိၣ်လဲၣ်န့ၣ်,ဆိကမိၣ်ကွၢ်တက့ၢ်. 5 ဒီးစီၤလ့ၤဝံအဖိခွါလၢအန့ၢ်ပှၤလုၢ်တၢ်အဒိၣ်အလီၢ်,အိၣ်ဒီးတၢ်မၤလိာ်,ဒ်တၢ်သိၣ်တၢ်သီအသိး,ဒ်သိးအကဟံးန့ၢ်ပှၤဂီၢ်မုၢ်အတၢ်ဆံဆဲၣ်ပူတပူ,ဒ်ပစံးတၢ်အသိး,အဒီပုၢ်ဝဲၢ်လၢအဟဲနာ်သက့လၢစီၤအၤဘြၤဟၣ်အယီၢ်ဒ့န့ၣ်လီၤ. 6 မ့မ့ၢ်ပှၤလၢအထူအထံးတဘၣ်ဃးဘၣ်ဒီးအဝဲသ့ၣ်ဘၣ်တဂၤအံၤ,ဒိးန့ၢ်တၢ်ဆံဆဲၣ်ပူတပူလၢစီၤအၤဘြၤဟၣ်,ဒီးဆိၣ်ဂ့ၤပှၤလၢအအိၣ်ဒီးတၢ်စံးပာ်တဖၣ်န့ၣ်လီၤ. 7 ဒီးပှၤအဆံးဘၣ်တၢ်ဆိၣ်ဂ့ၤလၢပှၤဒိၣ်တက့ၢ်န့ၣ်,မ့ၢ်တၢ်လၢပဂ့ၢ်လိာ်ဘှီလိာ်တသ့ဘၣ်. 8 ဒီးဖဲအံၤပှၤကညီလၢအသံတဖၣ်,ဒိးန့ၢ်တၢ်ဆံဆဲၣ်ပူတပူလီၤ.မ့မ့ၢ်ဖဲန့ၣ်ပှၤလၢတၢ်အုၣ်အသးလၢအမူဝဲလီၤ. 9 ဒီးမ့ၢ်ဒ်ပစံးတၢ်အသိး,စီၤလ့ၤဝံလၢအဒိးန့ၢ်တၢ်ဆံဆဲၣ်ပူတပူန့ၣ်,ဟ့ၣ်တၢ်ဆံဆဲၣ်ပူတပူလၢစီၤအၤဘြၤဟၣ်အပူၤလီၤ. 10 အဂ့ၢ်ဒ်အံၤ,လၢစီၤမၤလကံစဒ့းဟဲသဂၢၢ်အီၤအခါန့ၣ်,အဝဲဒၣ်အိၣ်လၢအပၢ်အယီၢ်ဒ့ပူၤလီၤ.

11 မၤသးဒ်န့ၣ်ဒီးတၢ်လၢတၢ်ပှဲၤမ့ၢ်အိၣ်လၢပှၤလုၢ်တၢ်အဒိၣ်အလီၢ်ဘၣ်ဃးဒီးပှၤလ့ၤဝံဖိဒီး,အဂ့ၢ်ဒ်အံၤ,ပှၤဂီၢ်မုၢ်န့ၢ်ဘၣ်တၢ်သိၣ်တၢ်သီလၢအီၤဒီး,ဘၣ်မနုၤလၢပှၤလုၢ်တၢ်အဒိၣ်အဂၤ,ဒ်စီၤမၤလကံစဒ့းအလုၢ်အလၢ်.ဒီးတမ့ၢ်ဘၣ်ဒ်စီၤအၤဟရိၣ်အလုၢ်အလၢ်ဘၣ်,ဂဲၤဆၢထၢၣ်အလီၢ်အိၣ်ဒံးလဲၣ်. 12 အဂ့ၢ်ဒ်အံၤ,ပှၤလုၢ်တၢ်အဒိၣ်အလီၢ်မ့ၢ်လဲက့ၤအသးဒီး,တၢ်သိၣ်တၢ်သီန့ၣ်ဘၣ်လဲက့ၤအသးစ့ၢ်ကီးလီၤ. 13 အဂ့ၢ်ဒ်အံၤ,ပှၤလၢတၢ်စံၣ်တဲၤအဂ့ၢ်အကျိၤတဂၤအံၤ,ဘၣ်ဃးဒီးပှၤအဒူၣ်လၢအဂၤ,လၢအတမၤဘၣ်တၢ်လၢတၢ်လုၢ်အလီၢ်နီတဂၤဘၣ်လီၤ. 14 အဂ့ၢ်ဒ်အံၤ,အိၣ်ဖျါမးလၢပကစၢ်အိၣ်ထီၣ်လၢစီၤယူဒၤလီၤ.ဒီးစီၤမိၤရှ့တကတိၤဘၣ်လၢပှၤလုၢ်တၢ်အဒိၣ်ဘၣ်ဃးဒီးပှၤအံၤတဒူၣ်န့ၣ်,နီတမံၤဘၣ်, 15 ဒီးအဝဲန့ၣ်အိၣ်ဖျါဂ့ၤဒံးတက့ၢ်ဖးဒိၣ်,လၢပှၤလုၢ်တၢ်အဒိၣ်အဂၤအိၣ်ထီၣ်ဒ်စီၤမၤလကံစဒ့းအသိး, 16 လၢအတဘၣ်ဃးဒီးတၢ်သိၣ်တၢ်သီလၢပဖံးပညၣ်အတၢ်မၤလိာ်ဘၣ်.မ့ၢ်အဘၣ်ဃးဒီးတၢ်မူအထူအယိာ်အစိအကမီၤလီၤ. 17 အဂ့ၢ်ဒ်အံၤ,တၢ်အုၣ်အသးလၢ,

နမ့ၢ်ပှၤလုၢ်တၢ်အဒိၣ်လီၤထူလီၤယိာ်,
ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ. ^{▼▼7:17 စံး.၁၀း၄}

18 အဂ့ၢ်ဒ်အံၤ,တၢ်မၤလိာ်လၢညါတထံၣ်န့ၣ်တၢ်ညိကွံာ်လၢအတၢ်ဂံၢ်စၢ်ဘါစၢ်ဒီးအတၢ်တဂိာ်တသီၣ်ဘၣ်အဃိလီၤ. 19 (အဂ့ၢ်ဒ်အံၤ,တၢ်သိၣ်တၢ်သီတမၤလၢထီၣ်ပှဲၤထီၣ်ဘၣ်တၢ်နီတမံၤဘၣ်,)ဒီးတၢ်ဆှၢနုာ်တၢ်မုၢ်လၢ်ဂ့ၤန့ၢ်အန့ၣ်တက့ၢ်,လၢပသုးဘူးပသးဆူယွၤအအိၣ်လၢအဃိန့ၣ်လီၤ.

20 ဒီးအအံၤတဂၤကဲထီၣ်န့ၣ်,မ့ၢ်လၢတၢ်ဆိၣ်န့ၣ်လီၤ. 21 ဘၣ်ဆၣ်ဒီးအဝဲသ့ၣ်ကဲထီၣ်ပှၤလုၢ်တၢ်အဒိၣ်လၢတၢ်ဆိၣ်တအိၣ်ဘၣ်လီၤ.အအံၤတဂၤန့ၣ်ကဲထီၣ်လၢတၢ်ဆိၣ်,ဒ်တၢ်စံးဘၣ်အီၤ,ယွၤဆိၣ်တၢ်ဒီးတပီၢ်ယၢ်လီၤက့ၤဘၣ်အသး,နမ့ၢ်ပှၤလုၢ်တၢ်အဒိၣ်လီၤထူလီၤယိာ်,ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ. 22 ထဲန့ၣ်အသိးယ့ၣ်ရှူးကဲထီၣ်တၢ်အၢၣ်လီၤအီလီၤဂ့ၤဒိၣ်တက့ၢ်အတၢ်ဂၢၢ်တၢ်ကျၢၤန့ၣ်လီၤ. 23 ဒီးမ့ၢ်တၢ်တြီအအိၣ်ဒၣ်တၢ်,လၢတၢ်သံအဃိဒီး,အဝဲသ့ၣ်ဘၣ်ကဲထီၣ်လၢပှၤလုၢ်တၢ်အဒိၣ်အါဂၤလီၤ. 24 မ့မ့ၢ်အအံၤတဂၤအိၣ်ဝဲအစိၤစိၤအဃၣ်ဃၣ်သတးဒီး,အပှၤလုၢ်တၢ်အဒိၣ်အလီၢ်တလဲလိာ်အသးဘၣ်. 25 မၤသးဒ်န့ၣ်ဒီး,မ့ၢ်အမူဝဲတထံၣ်ဃီဒ်သိးအကဃ့ကညးတၢ်လၢအဂီၢ်သတးဒီး,အုၣ်က့ၤခီၣ်က့ၤပှၤလၢအဟဲဆူယွၤအအိၣ်လၢအီၤတဖၣ်န့ၣ်တုၤအလၢာ်သ့လီၤ.

26 အဂ့ၢ်ဒ်အံၤ,ပအိၣ်ဒီးပှၤလုၢ်တၢ်အခိၣ်ဒ်န့ၣ်အသိးတဂၤအလီၢ်အိၣ်,ပှၤလၢအစီအဆှံ,ပှၤလၢအတၢ်အၢတၢ်သီတအိၣ်,ပှၤလၢအတဘၣ်အၢဘၣ်သီဘၣ်,ပှၤလၢအအိၣ်လီၤဖးဒီးပှၤတၢ်ဒဲးဘးဖိ,ဒီးကဲထီၣ်ထီန့ၢ်မူခိၣ်တဖၣ်လီၤ. 27 အဝဲဒၣ်န့ၣ်ဒ်ပှၤလုၢ်တၢ်အခိၣ်တဖၣ်အသိးန့ၣ်,ဘၣ်ပာ်ထီၣ်တၢ်လုၢ်ကိးမုၢ်နံၤဒဲး,အဆိတမံၤလၢအတၢ်ဒဲးဘးဒၣ်ဝဲအဃိ,ဒီးလၢခံက့ၤလၢပှၤဂီၢ်မုၢ်အဃိ,တမ့ၢ်ဘၣ်.အဂ့ၢ်ဒ်အံၤ,ဖဲအပာ်ထီၣ်အသးဒၣ်ဝဲဒီး,မ့ၢ်အမၤတၢ်န့ၣ်တဘျီဧိၤလီၤ.

28 အဂ့ၢ်ဒ်အံၤ,တၢ်သိၣ်တၢ်သီပာ်ပှၤကညီလၢအဂံၢ်စၢ်ဘါစၢ်တဖၣ်လၢပှၤလုၢ်တၢ်အခိၣ်လီၤ.မ့မ့ၢ်တၢ်ဆိၣ်အကလုၢ်လၢအအိၣ်ထီၣ်လၢတၢ်သိၣ်တၢ်သီအလီၢ်ခံန့ၣ်,ပာ်ထီၣ်ဖိခွါန့ၣ်လၢအလၢထီၣ်ပှဲၤထီၣ်အစိၤစိၤအဃၣ်ဃၣ်လီၤ.