Heb 9 | KswSKMB | STEP | မၤကဒီးတစု,အခီၣ်ထံးတမံၤန့ၣ်အိၣ်ဝဲဒီးတၢ်မၤအလုၢ်အလၢ်ဘၣ်ဃးဒီးတၢ်မၤ,ဒီးအိၣ်ဒီးအလီၢ်စီဆှံလၢဟီၣ်ခိၣ်လီၤ.

‏ Hebrews 9

1 မၤကဒီးတစု,အခီၣ်ထံးတမံၤန့ၣ်အိၣ်ဝဲဒီးတၢ်မၤအလုၢ်အလၢ်ဘၣ်ဃးဒီးတၢ်မၤ,ဒီးအိၣ်ဒီးအလီၢ်စီဆှံလၢဟီၣ်ခိၣ်လီၤ. 2 အဂ့ၢ်ဒ်အံၤ,တၢ်ကတဲာ်ကတီၤဒဲတဖျၢၣ်အဆၢခီၣ်ထံးန့ၣ်အိၣ်ဒီးမ့ၣ်အူဒၢအမိၢ်ပှၢ်ဒီးစီၢ်နီၤခိၣ်,ဒီးတၢ်မဲာ်ညါအကိၣ်,ဒီးတၢ်ကိးဝဲလၢလီၢ်စီဆှံလီၤ. 3 ဒီးလၢယၣ်ဘျးလီၤအသးခံဘ့ၣ်တဘ့ၣ်အမဲာ်ညါန့ၣ်,ဒဲကိးဝဲလၢတၢ်စီဆှံကတၢၢ်အိၣ်ဝဲလီၤ. 4 ဒီးအိၣ်ဒီးတၢ်လုၢ်လီၢ်ထူ,ဒီးတၢ်အၢၣ်လီၤအီလီၤအတလါပီၤအသးလၢထူဒီဖျၢၣ်ညါအိၣ်ဒီးလီခီထူလၢမၤနၤအိၣ်လၢအပူၤဒီးစီၤအၤဟရိၣ်အနီၣ်ထိးဘိလၢအဒိးထီၣ်,ဒီးတၢ်အၢၣ်လီၤအီလီၤအလၢၢ်ဘ့ၣ်ဘၣ်တဖၣ်န့ၣ်လၢအပူၤလီၤ. 5 ဒီးလၢအဖီခိၣ်န့ၣ်တၢ်လၤကပီၤအခ့ရူာ်လၢအကဒုဘၣ်တၢ်မၤပူၤဖျဲးတၢ်အလီၢ်န့ၣ်အိၣ်ဝဲလီၤ.လၢအဝဲန့ၣ်အဂ့ၢ်အကျိၤပကတိၤတၢ်ခဲကနံၣ်အံၤလီၤတံၢ်လီၤဆဲးအလီၢ်တအိၣ်ဘၣ်.

6 ဒီးတၢ်တဖၣ်န့ၣ်အိၣ်ကတဲာ်ကတီၤအသးဒ်န့ၣ်ဒီး,ပှၤလုၢ်တၢ်အဒိၣ်တဖၣ်လဲၤနုာ်ဆူဒဲအခီၣ်ထံးတဖျၢၣ်န့ၣ်အပူၤ,တဘိယူၢ်ဃီဒီးမၤတၢ်မၤလီၤ. 7 မ့မ့ၢ်ခံဖျၢၣ်တဖျၢၣ်န့ၣ်,ပှၤလုၢ်တၢ်အခိၣ်လဲၤနုာ်တဂၤဃီတနံၣ်တဘျီတနံၣ်တဘျီအိၣ်ဒီးတၢ်သွံၣ်,လၢအပာ်ထီၣ်လၢအဂီၢ်ဒၣ်ဝဲ,ဒီးလၢပှၤဂီၢ်မုၢ်အတၢ်ကမၣ်အဂီၢ်လီၤ. 8 ဖဲဒဲခီၣ်ထံးအိၣ်ဒံးအဖၢမုၢ်န့ၣ်,သးစီဆှံဒုးနဲၣ်ဝဲလၢတၢ်စီဆှံတဖၣ်ကျဲတအိၣ်ဖျါထီၣ်ဒံးဘၣ်. 9 အအံၤမ့ၢ်အဒိအတဲာ်လၢအကတီၢ်ဖဲန့ၣ်အဂီၢ်,ဖဲတၢ်ဟ့ၣ်ဒီးတၢ်လုၢ်လၢပှၤပာ်ထီၣ်န့ၣ်မၤလၢထီၣ်ပှဲၤထီၣ်ပှၤလၢအပာ်ထီၣ်အီၤ,အသးလၢအသ့ၣ်ညါဒၣ်တၢ်,တသ့ဘၣ်. 10 မ့ၢ်ထဲတၢ်အီၣ်,ဒီးတၢ်အီ,ဒီးတၢ်ဘျၢအကလုာ်ကလုာ်,တၢ်အလုၢ်အလၢ်ဘၣ်ဃးဒီးတၢ်ဖံးတၢ်ညၣ်,လၢပှၤဘၣ်မၤတုၤလီၤလၢတၢ်ဘှီက့ၤအကတီၢ်ဘၣ်လီၤ. 11 မ့မ့ၢ်ခရံာ်ကဲထီၣ်လၢတၢ်အဂ့ၤလၢအကဟဲဝဲတဖၣ်အပှၤလုၢ်တၢ်အခိၣ်ဘၣ်ဃးဒီးဒဲလၢအဒိၣ်န့ၢ်,ဒီးလၢန့ၢ်ပှဲၤန့ၢ်အန့ၣ်တက့ၢ်,လၢတၢ်တမၤဘၣ်လၢစုဘၣ်,ဒ်ပစံးတၢ်အသိး,တမ့ၢ်ဘၣ်လၢတၢ်တ့အံၤဘၣ်, 12 ဒီးအိၣ်ဒီးမဲာ်တဲးလဲးဒီးဂီၤဖံးဖိအသွံၣ်တမ့ၢ်ဘၣ်,မ့ၢ်အအိၣ်ဒီးအသွံၣ်ဒၣ်ဝဲ,ဒီးလဲၤနုာ်ဝဲလၢလီၢ်စီဆှံကတၢၢ်အပူၤတဘျီ,ဒီးန့ၢ်ဘၣ်တၢ်ပူၤဖျဲးလီၤထူလီၤယိာ်လီၤ. 13 အဂ့ၢ်ဒ်အံၤ,ဂီၤဖံးဖါ,ဒီးမဲာ်တဲးလဲးအသွံၣ်,ဒီးဂီၤဖံးမိၢ်အဖၣ်ဆါဘၣ်ဖှံဝဲလၢတၢ်တကဆှီဘၣ်အလိၤန့ၣ်,မ့ၢ်မၤကဆှီထီၣ်လၢတၢ်မၤကဆှီပဖံးပညၣ်အဂီၢ်ဒီး, 14 ခရံာ်လၢအပာ်ထီၣ်အသးတသံၣ်သူတမီၢ်ကျာ်လၢသးအထူအယိာ်အပူၤ,လၢယွၤအမဲာ်ညါ,အသွံၣ်န့ၣ်ကမၤစီဆှံပသးလၢအသ့ၣ်ညါဒၣ်တၢ်လၢတၢ်မၤအသံ,ဒ်သိးပကမၤယွၤလၢအမူဝဲအတၢ်မၤဂ့ၤန့ၢ်ဒိၣ်န့ၢ်အန့ၣ်တက့ၢ်ဆံးဒိၣ်လဲၣ်. 15 ဒီးလၢတၢ်အံၤအဃိ,အဝဲဒၣ်ကဲတၢ်အၢၣ်လီၤအီလီၤအသီအပှၤခံခီအဘၢၣ်စၢၤတဂၤ,ဒ်သိးအသံဒီးပှ့ၤက့ၤတၢ်ကမၣ်လၢအဘၣ်ဃးဒီးတၢ်အၢၣ်လီၤအီလီၤအခီၣ်ထံးသတးဒီး,ပှၤလၢအဘၣ်တၢ်ကိးတဖၣ်န့ၣ်ကန့ၢ်ဘၣ်တၢ်ဟ့ၣ်သါအထူအယိာ်အတၢ်စံးပာ်လီၤ.

16 အဂ့ၢ်ဒ်အံၤ,ဖဲတၢ်န့ၢ်သါအတၢ်အၢၣ်လီၤအီလီၤအိၣ်ဝဲဒီး,ကမ့ၢ်လၢပှၤအၢၣ်လီၤတၢ်န့ၣ်,ဘၣ်သံလီၤ. 17 အဂ့ၢ်ဒ်အံၤ,တၢ်ဟ့ၣ်သါအတၢ်အၢၣ်လီၤအီလီၤအိၣ်ဂၢၢ်ဆိးကျၢၤလၢပှၤသံအလီၢ်ခံလီၤ.မ့မ့ၢ်အမူဒံးအဖၢမုၢ်ဒီး,တဂၢၢ်တကျၢၤဘၣ်လီၤ.

18 မၤသးဒ်န့ၣ်ဒီး,တၢ်သွံၣ်တအိၣ်ဘၣ်ဒီးအခီၣ်ထံးတထံၣ်တကဲထီၣ်ဘၣ်. 19 အဂ့ၢ်ဒ်အံၤ,ဖဲစီၤမိၤရှ့စံၣ်တဲၤတဲလီၤကယဲၢ်တၢ်မၤလိာ်လၢပှၤဂီၢ်မုၢ်ခဲလၢာ်,ဒ်တၢ်သိၣ်တၢ်သီအသိးဝံၤဒီး,ဟံးန့ၢ်ဂီၤဖံးဖိဒီးမဲာ်တဲးလဲးအသွံၣ်,ဒီးထံ,ဒီးသိအဆူၣ်ဂီၤ,ဒီးသ့ၣ်ကဖျီၣ်အ့စိး,ဒီးဖှံလံာ်ဒီးပှၤဂီၢ်မုၢ်ခဲလၢာ်, 20 ဒီးစံးဝဲဒၣ်,တၢ်အံၤမ့ၢ်တၢ်သွံၣ်ဘၣ်ဃးဒီးတၢ်အၢၣ်လီၤအီလီၤလၢယွၤမၤလိာ်သုလီၤ. ^{▼▼9:20 ၂မိၤ.၂၄း၈} 21 ဒီးဖှံဒဲဒီးကယဲၢ်တၢ်မၤအဃၢၤအဃိၢ်လၢတၢ်သွံၣ်ဒ်န့ၣ်အသိးလီၤ. 22 ဒီးဒ်တၢ်သိၣ်တၢ်သီအသိး,တၢ်ခဲလၢာ်ဃၣ်ဃၣ်ဘၣ်တၢ်မၤကဆှီအီၤလၢတၢ်သွံၣ်လီၤ.ဒီးတၢ်သွံၣ်လူလီၤအသးတအိၣ်ဘၣ်ဒီး,တၢ်ပျၢ်ကွံာ်တအိၣ်ဘၣ်လီၤ.

23 မၤသးဒ်န့ၣ်ဒီး,မူခိၣ်အဒိအတဲာ်တဖၣ်န့ၣ်ဘၣ်တၢ်မၤကဆှီအီၤလၢတၢ်န့ၣ်တဖၣ်လီၤ.မ့မ့ၢ်မူခိၣ်အတၢ်ဒၣ်ဝဲတဖၣ်န့ၣ်လၢတၢ်လုၢ်ဂ့ၤန့ၢ်အန့ၣ်တက့ၢ်လီၤ. 24 အဂ့ၢ်ဒ်အံၤ,တၢ်အလီၢ်စီဆှံ,တၢ်မၤလၢပစု,လၢအမ့ၢ်တၢ်နီၢ်နီၢ်အဒိအတဲာ်န့ၣ်,ခရံာ်တလဲၤနုာ်ဘၣ်ဝဲဘၣ်,မ့မ့ၢ်လၢမူခိၣ်အကစၢ်ဒၣ်ဝဲဒ်သိးအကအိၣ်ဖျါခဲကနံၣ်အံၤလၢယွၤအမဲာ်ညါလၢပဂီၢ်လီၤ. 25 တမ့ၢ်ဘၣ်လၢအကပာ်ထီၣ်အသးတလီၢ်လီၢ်,ဒ်ပှၤလုၢ်တၢ်အခိၣ်လဲၤနုာ်တၢ်အလီၢ်စီဆှံကိးနံၣ်ဒဲး,အိၣ်ဒီးတၢ်ဂၤအသွံၣ်အသိးန့ၣ်ဘၣ်, 26 တၢ်မ့ၢ်မၤအသးဒ်န့ၣ်ဒီး,လၢဟီၣ်ခိၣ်အခီၣ်ထံးလံၤလံၤန့ၣ်ကဘၣ်ဒိးဖှီၣ်အသးအါဘျီလီၤ.မ့မ့ၢ်ခဲကနံၣ်အံၤ,လၢတၢ်အစိၤကတၢၢ်န့ၣ်,အဝဲဒၣ်လီၣ်ဖျါအသးတဘျီ,ဒ်သိးအကပာ်ကွံာ်တၢ်ဒဲးဘးလၢအတၢ်လုၢ်ထီၣ်အသးဒၣ်ဝဲလီၤ. 27 ဒ်တၢ်ပာ်ပှၤကညီလၢအကသံဝဲတဘျီ,ဒီးလၢခံက့ၤတၢ်စံၣ်ညီၣ်,အသိးန့ၣ်, 28 တၢ်ပာ်ထီၣ်ခရံာ်တဘျီဒ်သိးအကစိာ်ပှၤအါဂၤအတၢ်ဒဲးဘးဒ်န့ၣ်အသိး,ဒီးတၢ်ဒဲးဘးတအိၣ်ဘၣ်ဒီး,ကလီၣ်ဖျါထီၣ်အသးခံစုတစုလၢပှၤကွၢ်လၢ်အကျဲတဖၣ်အဂီၢ်,လၢတၢ်အုၣ်က့ၤခီၣ်က့ၤအီၤလီၤ.