Isaiah 11
1ဒီးသ့ၣ်ပဒၢတဘိကမဲထီၣ်လၢယံးၡဲအခိၣ်ဆၢၣ်,ဒီးဒ့တဒ့ကမဲထီၣ်လၢအဂံၢ်လီၤ. 2ဒီးယွၤအသးကအိၣ်ဘှံးလၢအလိၤ,တၢ်ကူၣ်သ့ဒီးသူၣ်ဆးသးဆးအသး,တၢ်ကူၣ်လိာ်ဒီးတၢ်အစိအကမီၤအသး,တၢ်သ့ၣ်ညါအသး,ဒီးတၢ်ပျံၤယွၤအသးလီၤ. 3ဒီးကမုာ်လၤတၢ်လၢတၢ်ပျံၤယွၤအပူၤ,ဒီးတစံၣ်ညီၣ်ဘၣ်တၢ်ဒ်တၢ်လၢအထံၣ်လၢအမဲာ်အသိးဘၣ်န့ၣ်,ဒီးတစံၣ်ညီၣ်တဲာ်ဘၣ်တၢ်ဒ်တၢ်လၢအနၢ်ဟူလၢအနၢ်အသိးဘၣ်. 4ဒီးကစံၣ်ညီၣ်ပှၤဖှီၣ်ဖိယာ်ဖိလၢတၢ်တီ,ဒီးကစံၣ်ညီၣ်တဲာ်ပှၤဟီၣ်ခိၣ်ဖိလၢအဘၣ်နးဘၣ်ဖှီၣ်လၢတၢ်လိၤလီၤ.ဒီးကတီၢ်ဟီၣ်ခိၣ်လၢအထးခိၣ်အနီၣ်တီၢ်,ဒီးလၢအပျုၤအသါန့ၣ်ကမၤသံပှၤအၢဖိလီၤ. 5ဒီးတၢ်တီတၢ်လိၤကကဲထီၣ်အယီၢ်ဒ့အယီၢ်တကိး,ဒီးတၢ်မ့ၢ်တၢ်တီအယီၢ်တကိးလီၤ. 6ဒီးထွံၣ်မံၤကအိၣ်ကဆိးဒီးသိဖိ,ဒီးခ့စံၣ်ပိၣ်ကကိာ်လီၤဒီးမဲာ်တဲးလဲးဖိ,ဒီးဂီၤဖံးဖိ,ဒီးခ့ယုၢ်ဖိ,ဒီးတၢ်ဘီၣ်ဖိကအိၣ်ဆိးတပူၤဃီ,ဒီးဖိဒံဖိသၣ်ကဆှၢအီၤလီၤ. 7ဒီးဂီၤဖံးမိၢ်ဒီးတၤသူကအီၣ်အဆၣ်တပူၤဃီ,အဖိတဖၣ်ကကိာ်လီၤတပူၤဃီ,ဒီးခ့ယုၢ်ကအီၣ်လီၢ်ဧိၤဒံးဧိၤဒ်ဂီၤဖံးဖါအသိးန့ၣ်လီၤ. 8ဒီးဖိသၣ်အီၣ်နုၢ်ကလိာ်ကွဲလၢဂုၢ်သီအပူၤအဖီခိၣ်,ဒီးဖိသၣ်ဖှါနုၢ်ကပာ်အစုလၢဂုၢ်မိာ်အိးအတၢ်အိပူၤအဖီခိၣ်လီၤ. 9တမၤအၢဘၣ်,ဒီးတမၤဟးဂီၤဘၣ်ဘၣ်လၢယကစၢၢ်စီဆှံဒီဖျၢၣ်ညါအလိၤဘၣ်.အဂ့ၢ်ဒ်အံၤ,ဟီၣ်ခိၣ်ကပှဲၤဝဲဒီးတၢ်သ့ၣ်ညါယွၤဒ်ထံကျၢၢ်ဘၢပီၣ်လဲၣ်အသိးန့ၣ်လီၤ. 10ဒီးတၢ်လၢမုၢ်တနံၤန့ၣ်တၢ်ကမၤအသးလၢယံးၡဲအဂံၢ်ပာ်ဆၢထၢၣ်အသးကကဲထီၣ်သုးဖိအလၣ်လၢပှၤကလုာ်တဖၣ်အဂီၢ်လီၤ.ပှၤကလုာ်တဖၣ်ကဃ့ၢ်ဆူအအအိၣ်,ဒီးအအိၣ်ဘှံးအလီၢ်န့ၣ်ကအိၣ်ဒီးအလၤအကပီၤလီၤ. 11ဒီးလၢမုၢ်တနံၤန့ၣ်တၢ်ကမၤအသးလၢယွၤကယူာ်ထီၣ်အစုပှဲၤထီၣ်ခံဘျီတဘျီ,ဒ်သိးအကမၤန့ၢ်က့ၤအတၢ်အိၣ်လီၤတဲာ်လၢအအိၣ်လီၤတဲာ်လၢအၤရှူၢ်,ဒီးလၢအဲၤကူပတူး,ဒီးလၢပၤသြိၣ်,ဒီးလၢကူၤၡး,ဒီးလၢဧ့ၤလၣ်,ဒီးလၢၡံနၢ်,ဒီးလၢဃမါသး,ဒီးလၢပီၣ်လဲၣ်အကီးတဖၣ်န့ၣ်လီၤ. 12ဒီးကသူၣ်ထီၣ်သုးဖိအလၣ်လၢပှၤကလုာ်တဖၣ်အဂီၢ်,ဒီးကဒုးအိၣ်ဖှိၣ်အံၣ်စရ့လးအပှၤဟးဝ့ၤဝီၤဖိ,ဒီးကပာ်ဖှိၣ်ယူဒၤအပှၤလီၤမုၢ်လီၤဖးလၢဟီၣ်ခိၣ်လွံၢ်နၢၣ်န့ၣ်လီၤ. 13အ့ဖရဲၣ်အသးက့ၣ်န့ၣ်ကဟးထီၣ်ကွံာ်,ဒီးယူဒၤအဒုၣ်အဒါန့ၣ်ကဘၣ်တၢ်ဒီၣ်တဲာ်ကွံာ်အီၤလီၤ.အ့ဖရဲၣ်တသးက့ၣ်ဘၣ်ယူဒၤ,ဒီးယူဒၤတမၤအၢဘၣ်အ့ဖရဲၣ်ဘၣ်. 14ဒီးအဝဲသ့ၣ်တဖၣ်န့ၣ်ကယူၤဘၣ်ပှၤဖလ့ၡသးဖိအဖံဘၣ်ခိၣ်ဆူမုၢ်နုာ်တခီ,ကဂုာ်န့ၢ်ပှၤမုၢ်ထီၣ်ဖိအတၢ်တပူၤဃီ,ကယူာ်ထီၣ်အစုဆူအဒိၣ်ဒီးမိၤအးအဖီခိၣ်,ဒီးပှၤဧၣ်မိၣ်ဖိကစူၢ်အီၤလီၤ. 15ဒီးယွၤကမၤဟးဂီၤအဲၤကူပတူးအပီၣ်လဲၣ်အပျ့ၤ,ဒီးကဝၢ်အစုလၢထံမိၢ်ပှၢ်အဖီခိၣ်လၢကလံၤဆူၣ်,ဒီးကျီဖးဒ့အီၤလၢနွံကျိၤ,ဒီးဒုးလဲၤပှၤလၢခီၣ်ဖံးန့ၣ်လီၤ. 16ဒီးကျဲမုၢ်ကအိၣ်တဘိလၢအပှၤဂီၢ်မုၢ်အအိၣ်လီၤတဲာ်အဂီၢ်လၢအကအိၣ်လီၤတဲာ်လၢအၤရှူၢ်,ဒ်အအိၣ်လၢအံၣ်စရ့လးအဂီၢ်ဖဲမုၢ်နံၤလၢအဟးထီၣ်လၢကီၢ်အဲၤကူပတူးအပူၤအသိးန့ၣ်လီၤ.
Copyright information for
KswSKMB