Isa 16 | KswSKMB | STEP | ဟ့ၣ်ယုၢ်သိဖိလၢပှၤပၢထံဧိၤကီၢ်ဧိၤန့ၣ်လၢစ့လၤဆူပှၢ်မုၢ်ကနၢ,ဆူစံယိၣ်အဖိမုၣ်အကစၢၢ်တဖျၢၣ်န့ၣ်တက့ၢ်.

‏ Isaiah 16

1 ဟ့ၣ်ယုၢ်သိဖိလၢပှၤပၢထံဧိၤကီၢ်ဧိၤန့ၣ်လၢစ့လၤဆူပှၢ်မုၢ်ကနၢ,ဆူစံယိၣ်အဖိမုၣ်အကစၢၢ်တဖျၢၣ်န့ၣ်တက့ၢ်.

2 ဒီးကမၤအသးဒ်ထိၣ်လဲၤဝ့ၤဝီၤတၢ်တဘ့ၣ်,ဒ်ထိၣ်သွံကွံာ်တ့ၢ်ကွံာ်အသးအသိးန့ၣ်,မိၤအးအဖိမုၣ်တဖၣ်,လၢအၤနိၣ်အတၢ်ခီဂာ်အလီၢ်ကဒ်န့ၣ်သိးလီၤ.

3 ကူၣ်ထီၣ်တၢ်,မၤတၢ်တီတၢ်လိၤ,ပာ်နကဒုဒ်မုၢ်နၤအကဒုအသိးလၢမုၢ်ထူၣ်အခါ,ပာ်ခူသူၣ်ပှၤဘၣ်တၢ်ဟီထီၣ်ကွံာ်န့ၣ်တက့ၢ်.ပှၤလၢအလဲၤဝ့ၢ်ဝီၤတၢ်န့ၣ်ဒုးနဲၣ်အီၤတဂ့ၤ.

4 ယပှၤဘၣ်တၢ်ဟီထီၣ်ကွံာ်တဖၣ်န့ၣ်ဒုးအိၣ်ဒုးဆိးအီၤဒီးနၤ,မိၤအးဧၢ,ကဲထီၣ်တၢ်အိၣ်တဒၢအလီၢ်လၢအဂီၢ်လၢပှၤမၤအၢတၢ်အမဲာ်ညါတက့ၢ်.အဂ့ၢ်ဒ်အံၤ,ပှၤအီၣ်ကဘျံးအီၣ်ကဘျၣ်န့ၣ်လၢာ်ကွံာ်လံ.မၤအၢတၢ်န့ၣ်အိၣ်ဆိတ့ၢ်လံ.ပှၤယီၢ်တံၢ်ထံဧိၤကီၢ်ဧိၤန့ၣ်လၢာ်ကွံာ်လံဝဲလံ.

5 ဒီးလီၢ်ပစိာ်တဖျၢၣ်ကအိၣ်ဂၢၢ်ဆိးကျၢၤလၢတၢ်အဘျုးအဖှိၣ်အပူၤ,ဒီးပှၤကဆ့ၣ်အနီၤဝဲလၢအဖီခိၣ်တဂၤလၢတၢ်မ့ၢ်တၢ်တီအပူၤလၢစီၤဒၤဝံးအဒဲပူၤလီၤ.ကစံၣ်ညီၣ်တၢ်,ဒီးဃုတၢ်စံၣ်ညီၣ်,ဒီးမၤတၢ်တီတၢ်လိၤချ့ချ့လီၤ.

6 ပနၢ်ဟူလံလၢမိၤအးအသးထီၣ်ထီအဂ့ၢ်အကျိၤန့ၣ်,လၢအပာ်အသးထီၣ်ထီနးမး,လၢအပာ်ကဖိအသး,ဒီးလၢအပာ်အသးကဖိလိ,ဒီးလၢအသးကဲၤထီၣ်,အပာ်ကဖိအသးန့ၣ်တမ့ၢ်ဘၣ်တၢ်ဘၣ်န့ၣ်လီၤ.

7 မၤသးဒ်န့ၣ်ဒီးမိၤအးကဟီၣ်ပသူထီၣ်လၢမိၤအးအဃိ,ပှၤကဟီၣ်ဝဲလၢအကျါကိးဂၤဒဲးလီၤ.သုကအုကစွါလၢကံၢ်ဃရ့ရှ့းအစပံးသၣ်ဘၣ်ကျီကွံာ်စီဖ့ကလ့ၤအဃိလီၤ.

8 အဂ့ၢ်ဒ်အံၤ,ဃ့ၡဘိၣ်အဟီၣ်ခိၣ်အကဝီၤတဖၣ်ဃ့ထီၣ်ကွံာ်လံ,စပံးမုၢ်စံးဘမၤလီၤ.ပှၤကလုာ်တဖၣ်အကစၢ်န့ၣ်မၤကၢ်လီၤကွံာ်အစပံးမုၢ်စိရ့းလၢအလဲၤပၢၢ်လၢယၤစ့ၢ်,လဲၤဝ့ၤဝီၤတၢ်လၢပှၢ်မုၢ်ကနၢ,အဒ့ထီၣ်ထီဝဲ,တုၤဝဲလၢပီၣ်လဲၣ်ဝၢ်ဘးခီလီၤ.

9 မၤသးဒ်န့ၣ်ဒီးယကဟီၣ်လၢယၤစ့ၢ်အတၢ်ဟီၣ်လၢစပံးမုၢ်စံးဘမၤအဃိ,ယကမၤဘၣ်စီၣ်နၤလၢယမဲာ်ထံ,ဃ့ၡဘိၣ်,ဒီးအ့လဧၤလ့ၤဧၢအဂ့ၢ်ဒ်အံၤ,တၢ်ကိးပသူထီၣ်လီၤဘၣ်နတၤသၣ်အလိၤ,ဒီးလၢနကူးဘုအလိၤန့ၣ်လီၤ.

10 ဒီးတၢ်ဟံးထီၣ်ကွံာ်တၢ်သူၣ်ခုသးခု,ဒီးတၢ်သူၣ်ဖှံသးညီလၢတၤသၣ်အလီၢ်,ဒီးလၢစပံးအလီၢ်န့ၣ်ပှၤတမၤလၢၤဘၣ်ထါဘၣ်,တကိးပသူထီၣ်လၢၤဘၣ်.စပံးထံလၢနီၣ်စံၢ်စပံးသၣ်အပူၤန့ၣ်ပှၤယီၢ်တၢ်ဖိတယီၢ်လၢၤဘၣ်.ယဒုးအိၣ်ဘှီၣ်တၢ်ကိးပသူန့ၣ်လီၤ.

11 မၤသးဒ်န့ၣ်ဒီးယသးသီၣ်ထီၣ်ဒ်တနၢ်အသိးလၢမိၤအးအဃိ,ဒီးတၢ်အိၣ်လၢယသအိပူၤလၢကံၢ်ဃ့ရ့းအဃိလီၤ.

12 ဒီးတုၤမိၤအးလီၣ်ဖျါထီၣ်အသး,တုၤအမၤဘှံးလီၤအသးလၢအလီၢ်ထီအလိၤဒီး,တၢ်ကမၤအသးလၢအကလဲၤနုာ်လၢအလီၢ်စီဆှံအပူၤဒ်သိးအကဘါထုကဖၣ်တၢ်,ဒီးတန့ၢ်ဘၣ်လီၤ.

13 တၢ်န့ၣ်မ့ၢ်တၢ်ကတိၤလၢယွၤကတိၤဝဲလၢမိၤအးအဂ့ၢ်အကျိၤလၢပျၢၤန့ၣ်လီၤ.

14 ဘၣ်ဆၣ်ဒီးခဲကနံၣ်အံၤ,ယွၤကတိၤတၢ်ဒီးစံးဝဲဒၣ်,လၢသၢနံၣ်အတီၢ်ပူၤ,ဒ်ပှၤဒိးလဲဖိအနံၣ်တဖၣ်အသိးန့ၣ်,မိၤအးအလၤကပီၤကဘၣ်တၢ်မၤတရီတပါအီၤ,ဒီးပှၤဂီၢ်မုၢ်အါခဲလၢာ်,ဒီးတၢ်အိၣ်လီၤတဲာ်န့ၣ်ကဆံးဝဲ,ဒီးစှၤဝဲ,ဒီးတအါဘၣ်န့ၣ်လီၤ.