Isaiah 17
1တၢ်အကလုၢ်လီၤလၢဒၤမ့ၤစ့းအဂ့ၢ်. ကွၢ်ကွၢ်,ဒၤမ့ၤစ့းတမ့ၢ်လၢၤဘၣ်ဝ့ၢ်တဖျၢၣ်ဘၣ်,ဒီးကကဲထီၣ်ဝဲလၢတၢ်လီၤပှီၢ်အပူလီၤ. 2တၢ်လဲၤသဒၣ်ဧရိဧ့ၢ်အဝ့ၢ်တဖၣ်လီၤ.ကကဲထီၣ်တၢ်လၢသိဒီးမဲာ်တဲးလဲးအဖုတဖၣ်အဂီၢ်,ဒီးကကိာ်လီၤဝဲ,ဒီးတၢ်မၤပျံၤအီၤတအိၣ်ဘၣ်. 3ဒီးတိာ်ဧိၤတာ်ဧိၤန့ၣ်တအိၣ်လၢၤဘၣ်ဒီးအ့ဖရဲၣ်ဘၣ်,ဒီးဘီဧိၤမုၢ်ဧိၤတအိၣ်လၢၤဘၣ်ဒီးဒၤမ့ၤစ့း,ဒီးတၢ်အိၣ်လီၤတဲာ်လၢစူၤရံန့ၣ်ဘၣ်.ကမၤသးဒ်အံၣ်စရ့လးအလၤကပီၤအသိးန့ၣ်,တၢ်သုးမုၢ်ဂီၢ်မုၢ်အယွၤစံးဝဲဒၣ်လီၤ. 4ဒီးမုၢ်တနံၤန့ၣ်တၢ်ကမၤအသးလၢယၤကိာ်အလၤကပီၤကလီၤစၢ်,ဒီးအညၣ်အတၢ်ဘီၣ်န့ၣ်ကဃဲၤလီၤဝဲလီၤ. 5ဒီးကမၤအသးဒ်ပှၤပာ်ဖှိၣ်တၢ်ကူးဘု,ဘုဆၢထၢၣ်အသး,ဒီးအစုဒုၣ်ကူးဘုအစဲၤအသိးန့ၣ်,ဒီးကမၤသးဒ်ပှၤကူးဘုလၢကစၢၢ်ကဆူးရၤဖၤအသိးန့ၣ်လီၤ. 6ဒီးတၢ်ကအိၣ်လီၤတဲာ်လၢအပူၤဒ်တၢ်တီၢ်သ့ၣ်စၤယံးအသိး,အသၣ်ခံဖျၢၣ်သၢဖျၢၣ်လၢဒ့အထီကတၢၢ်အခံ,လွံၢ်ဖျၢၣ်ယဲၢ်ဖျၢၣ်လၢသ့ၣ်လၢအသၣ်ထီၣ်အလိၤန့ၣ်လီၤ,ယွၤ,အံၣ်စရ့လးအကစၢ်,စံးဝဲဒၣ်. 7တၢ်လၢမုၢ်တနံၤန့ၣ်ပှၤကကွၢ်ဆူပှၤတ့အီၤအအိၣ်,ဒီးအမဲာ်ကကွၢ်ဆူအံၣ်စရ့လးအတၢ်စီဆှံတဂၤလီၤ. 8တကွၢ်ဘၣ်ဆူတၢ်လုၢ်အလီၢ်တဖၣ်,တၢ်လၢအမၤလၢအစု,ဒီးတကွၢ်မဲာ်ဘၣ်တၢ်လၢအစုမုၢ်စုနၢမၤအီၤ,ဒီးဆူအရှ့ရၤ,ဒီးဆူမုၢ်အတၢ်ဂီၤဘၣ်. 9တၢ်လၢမုၢ်တနံၤန့ၣ်အဝ့ၢ်အိၣ်ဒီးအခိၣ်ဒူတဖၣ်န့ၣ်ကမၤသးဒ်တၢ်အိၣ်လီၤတဲာ်လၢသဃာ်ကျါ,ဒီးလၢကစၢၢ်အဒီခိၣ်လၢပှၤလဲၤသဒၣ်လၢပှၤအံၣ်စရ့လးဖိအမဲာ်ညါအသိးန့ၣ်,ဒီးတၢ်ကအိၣ်သယုၢ်လီၤ. 10မ့ၢ်လၢနသးပ့ၤနီၣ်တၢ်အုၣ်က့ၤခီၣ်က့ၤနၤအကစၢ်,ဒီးနဂံၢ်နဘါအလၢၢ်န့ၣ်နတသ့ၣ်နီၣ်ထီၣ်က့ၤဘၣ်အီၤဘၣ်ဒီး,နကသူၣ်သ့ၣ်ဖိအဂ့ၤ,ဒီးနကသူၣ်တခီဘီမုၢ်အဒ့အဖီလီၤ. 11တၢ်လၢမုၢ်တနံၤလၢနသူၣ်တၢ်န့ၣ်နကကရၢအီၤ,ဒီးလၢမုၢ်ဂီၤန့ၣ်နကဒုးဆှိးထီၣ်နချံလီၤ.တၢ်ကူးတၢ်န့ၣ်ကယူၤထီၣ်ကွံာ်လၢတၢ်ကိၢ်တၢ်ဂီၤဒီးတၢ်သးအုးနးမးအမုၢ်တနံၤလီၤ. 12အၣ်လါပှၤအါကလုာ်အသီၣ်လီၤ.ဒ်ပီၣ်လဲၣ်အသီၣ်အသိးန့ၣ်သီၣ်ထီၣ်ဝဲလီၤ.ဒီးပှၤဂီၢ်မုၢ်အဃ့ၢ်အသီၣ်လီၤ.ဒ်ထံအါသဖှိထီၣ်အသီၣ်အသိးန့ၣ်သီၣ်ထီၣ်ဝဲလီၤ. 13ဒ်ထံအါသဖှိထီၣ်အသီၣ်အသိးန့ၣ်ပှၤကလုာ်တဖၣ်သီၣ်ထီၣ်ဝဲလီၤ.ဒီးယွၤကသိၣ်ဃီၣ်ဝဲ,ဒီးအဝဲသ့ၣ်ကဃ့ၢ်လၢအယံၤဒီးတၢ်ကလူၤဟီထီၣ်ကွံာ်အီၤ,ဒ်ကစၢၢ်ကလိအဖ့ဧိၤဃာ်ဧိၤဘၣ်တၢ်လူၤဟီထီၣ်ကွံာ်အီၤလၢကလံၤအမဲာ်ညါအသိး,ဒီးဒ်တၢ်လၢအတလ့ၣ်အသးလၢကလံၤသဝံးအမဲာ်ညါအသိးန့ၣ်လီၤ. 14လၢမုၢ်ဟါအကတီၢ်န့ၣ်ကွၢ်ကွၢ်,တၢ်မၤပျံၤမၤဖုးန့ၣ်လီၤ.မုၢ်တချုးဆ့ၣ်ထီၣ်ဒံးဘၣ်ဒီး,တအိၣ်လၢၤဘၣ်.ပှၤလၢအဂုာ်န့ၢ်ပတၢ်တဖၣ်အဂီၢ်မ့ၢ်အန့ၣ်,ဒီးပှၤလၢအဂုာ်ဆူၣ်ပျီဆူၣ်ပတၢ်တဖၣ်အဂီၢ်မ့ၢ်အန့ၣ်လီၤ.
Copyright information for
KswSKMB