Isa 18 | KswSKMB | STEP | အၣ်လါ,ကီၢ်အိၣ်ဒီးအဒံးဆ့လၢအသီၣ်ထီၣ်ဧၢ,ကီၢ်လၢအအိၣ်လၢကူၤၡးအထံမိၢ်ပှၢ်တဖၣ်ဝၢ်ဘးခီ,

‏ Isaiah 18

1 အၣ်လါ,ကီၢ်အိၣ်ဒီးအဒံးဆ့လၢအသီၣ်ထီၣ်ဧၢ,ကီၢ်လၢအအိၣ်လၢကူၤၡးအထံမိၢ်ပှၢ်တဖၣ်ဝၢ်ဘးခီ, 2 လၢအမၢလီၤအကလူးတဖၣ်လၢပီၣ်လဲၣ်,ဒီးလၢထံဖံးခိၣ်လၢချံဆှဲကိမ့ၤအပူၤလီၤ.ကလူးလဲၤတၢ်ချ့သ့ၣ်ဧၢ,လဲၤဆူပှၤတကလုာ်ထီဒီးဘျ့အအိၣ်,ဆူပှၤဂီၢ်မုၢ်လၢအမၤပျံၤတၢ်လၢအခီၣ်ထံးတုၤခဲကနံၣ်အံၤ,ပှၤတကလုာ်လၢအဂံၢ်ဆူၣ်အဘါဆူၣ်,ဒီးယီၢ်လီၤတၢ်,ဒီးထံကျိတဖၣ်နီၤဖးအကီၢ်ဆၢန့ၣ်တက့ၢ်.

3 ပှၤဟီၣ်ခိၣ်ဖိခဲလၢာ်သုဝဲသ့ၣ်ဧၢ,ပှၤအိၣ်လၢဟီၣ်ခိၣ်ချၢခဲလၢာ်သ့ၣ်ဧၢ,ဖဲပှၤယူာ်ထီၣ်သုးဖိအလၣ်လၢကစၢၢ်လိၤဒီး,ကွၢ်တက့ၢ်.ဖဲပှၤအူကွဲၤဒီး,ကနၣ်တက့ၢ်.

4 အဂ့ၢ်ဒ်အံၤ,ယွၤစံးဘၣ်ယၤဒ်အံၤ,ယကအိၣ်ဃိကလာ်,ဒီးယကကွၢ်တၢ်လၢယအိၣ်ယဆိးအလီၢ်ပူၤ,ဒ်တၢ်ကိၢ်ဆှံလၢနီၣ်ဧိၤမံၤဧိၤအလိၤအသိး,ဒ်ပစီၤထံအတၢ်အၢၣ်လၢကူးဘုအကတီၢ်အတၢ်ကိၢ်ခါအသိးန့ၣ်လီၤ.

5 အဂ့ၢ်ဒ်အံၤ,ကူးဘုအကတီၢ်တချုးဘၣ်ဒံးဘၣ်ဒီး,ဖဲအဆှိးဖျိထီၣ်,ဒီးအဖီကဲထီၣ်စပံးသၣ်အမံဒီး,ကပဲာ်တဲာ်ဝဲအဒ့လၢဒီပဲာ်ဃိတၢ်,ဒီးအဒ့သလၣ်ထီၣ်အသးကညိကွံာ်ဝဲ,ဒီးပဲာ်တဲာ်ဝဲလီၤ.

6 ဒီးကအိၣ်လီၤတဲာ်တပူၤဃီလၢထိၣ်ဧိၤလံၣ်ဧိၤလၢကစၢၢ်လိၤအဂီၢ်,ဒီးဆၣ်ဖိကီၢ်ဖိလၢဟီၣ်ခိၣ်အဂီၢ်လီၤ.ဒီးထိၣ်ဧိၤလံၣ်ဧိၤကအိၣ်လၢတၢ်ကိၢ်အကတီၢ်လၢအလိၤ,ဒီးဟီၣ်ခိၣ်အဆၣ်ဖိကီၢ်ဖိခဲလၢာ်ကအိၣ်လၢတၢ်ဂိၢ်အကတီၢ်လၢအလိၤလီၤ.

7 တၢ်လၢမုၢ်တနံၤန့ၣ်,ပှၤကဟဲစိာ်ခိၣ်ဖးဆူတၢ်သုးမုၢ်ဂီၢ်မုၢ်အယွၤ,လၢပှၤတကလုာ်ထီဒီးဘျ့,ဒီးပှၤတကလုာ်လၢအမၤပျံၤတၢ်လၢအခီၣ်ထံးတုၤခဲကနံၣ်အံၤ,ပှၤတကလုာ်လၢအဃီၣ်တၢ်ဒီးယီၢ်လီၤတၢ်,ဒီးထံကျိတဖၣ်နီၤဖးအကီၢ်အဆၢဆူတၢ်သုးမုၢ်ဂီၢ်မုၢ်အယွၤအမံၤအလီၢ်,ကစၢၢ်စံယိၣ်လီၤ.