Isaiah 19
1တၢ်အကလုၢ်လီၤလၢအဲၤကူပတူးအဂ့ၢ်. ကွၢ်ကွၢ်,ယွၤဒိးတၢ်အၢၣ်ယူၤချ့,ဒီးလဲၤဝဲဆူအဲၤကူပတူးအပူၤ,ဒီးအဲၤကူပတူးအတၢ်ဂီၤတၢ်ဖီၣ်ဟူးဝးလၢအမဲာ်ညါ,ဒီးအဲၤကူပတူးအသးန့ၣ်ပှံၢ်ဝဲလၢအပူၤလီၤ. 2ဒီးယကထိၣ်ဂဲၤပှၤအဲၤကူပတူးဖိထီဒါပှၤအဲၤကူပတူးဖိ,ဒီးကဒုးလိာ်အသး,ပှၤတဂၤဒီးအဒီပုၢ်ဝဲၢ်,ပှၤတဂၤဒီးအတံၤအသကိး,ဝ့ၢ်တဖျၢၣ်ဒီးဝ့ၢ်တဖျၢၣ်,ဘီမုၢ်ဒီးဘီမုၢ်လီၤ. 3ဒီးအဲၤကူပတူးအသးကလီၤဘှါလၢအပူၤဒီးအတၢ်ကူၣ်ထီၣ်ဖးလီၤန့ၣ်ယကယူၢ်လီၤကွံာ်,ဒီးကဃုဝဲလၢတၢ်ဂီၤတၢ်ဖီၣ်အအိၣ်,ဒီးလၢပှၤသ့တၢ်အူတၢ်သမူအအိၣ်,ဒီးလၢပှၤအိၣ်ဒီးပှၤသံအကလၤအအိၣ်ဒီးလၢပှၤမဲာ်ထံၣ်ဝံသ့အအိၣ်လီၤ. 4ဒီးယကဟ့ၣ်လီၤအဲၤကူပတူးဆူအကစၢ်ကီတဂၤ,ဒီးစီၤပၤဆူၣ်တဂၤကပၢအီၤလီၤ,တၢ်သုးမုၢ်ဂီၢ်မုၢ်အယွၤစံးဝဲဒၣ်. 5ဒီးထံကလီၤသံးကွံာ်လၢပီၣ်လဲၣ်ပူၤ,ဒီးထံမိၢ်ပှၢ်အထံကလၢာ်ကွံာ်ဝဲ,ဒီးလီၤသံးကွံာ်လီၤ. 6ထံမိၢ်ပှၢ်ကနၢအုၣ်သံ,အဲၤကူပတူးအထံကျိၤကအိၣ်ကလီဒီးလီၤသံးကွံာ်,ဒီးတပိၢ်ဒီးဆှဲကဃ့ထီၣ်ကွံာ်ဝဲလီၤ. 7ဒီးစံာ်ဧိၤပှဲၤဧိၤလၢထံမိၢ်ပှၢ်အနံၤ,လၢထံထၣ်,ဒီးဟီၣ်ခိၣ်လၢတၢ်ချံဖှံအသးလၢအပူၤ,လၢထံနံၤခဲလၢာ်န့ၣ်ကဃ့ထီၣ်ကွံာ်,ဘၣ်တၢ်ဟီထီၣ်ကွံာ်,ဒီးတအိၣ်လၢၤဘၣ်. 8ဒီးပှၤမၤညၣ်ဖိကသးအုး,ဒီးကယဲၢ်ပှၤလၢအတခွဲတၢ်လၢထံမိၢ်ပှၢ်အပူၤကဟီၣ်ဝဲ,ဒီးပှၤလၢအဟုးပှာ်လၢထံဖံးခိၣ်န့ၣ်အဂံၢ်အဘါကလီၤစၢ်ဝဲလီၤ. 9ဒီးပှၤလၢအမၤတၢ်လၢလုၣ်ခီမၤ,ဒီးပှၤလၢအထါထၣ်ဖှီဝါန့ၣ်ကပာ်ဆှးအမဲာ်လီၤ. 10ဒီးအတၢ်ခီၣ်ထံးတဖၣ်ဟးဂီၤကွံာ်,ကယဲၢ်ပှၤဒိးလဲဖိအသူၣ်ကိၢ်အသးဂီၤခဲလၢာ်လီၤ. 11စိၤဧၣ်အပဒိၣ်ဖးဒိၣ်မ့ၢ်ထဲပှၤဟးဂီၤဖိလီၤ.ဖၤရိၤအပှၤကူၣ်လိာ်အသးဖိအတၢ်ကူၣ်လိာ်န့ၣ်မ့ၢ်ဆၣ်ဖိကီၢ်ဖိအတၢ်လီၤ.သုစံးဘၣ်ဖၤရိၤ,ယမ့ၢ်ပှၤကူၣ်တၢ်သ့အဖိ,စီၤပၤလၢပျၢၤအဖိခွါန့ၣ်ကသ့ဒ်လဲၣ်. 12အဝဲသ့ၣ်တဖၣ်န့ၣ်အိၣ်ဖဲလဲၣ်.နပှၤကူၣ်တၢ်သ့န့ၣ်အိၣ်ဖဲလဲၣ်.မ်အစံးဘၣ်နၤ,ဒီးမ်အသ့ၣ်ညါတၢ်လၢတၢ်သုးမုၢ်ဂီၢ်မုၢ်အယွၤကူၣ်ထီၣ်ဖးလီၤလၢအဲၤကူပတူးအဂ့ၢ်အကျိၤန့ၣ်တက့ၢ်. 13စိၤဧၣ်အပဒိၣ်ဖးဒိၣ်န့ၣ်ကဲထီၣ်လံပှၤဟးဂီၤဖိ,တၢ်လီန့ၢ်နိဖးအခိၣ်တဖၣ်လီၤ.ဒုးလီၤကမၣ်အဲၤကူပတူး,လၢအမ့ၢ်အဒူၣ်တဖၣ်အလၢၢ်သနၢၣ်လီၤ. 14ယွၤလူလီၤသးကဒံကပျီၤတမံၤလၢအကျါ,ဒီးပှၤဒုးလီၤကမၣ်အဲၤကူပတူးလၢအမၤတၢ်ခဲလၢာ်အပူၤ,ဒ်ပှၤအီၤမူၤအသးလဲၤကနူၤကပၤတၢ်လၢအဘှိးတၢ်အပူၤအသိးန့ၣ်လီၤ. 15ဒီးတၢ်မၤတအိၣ်ဘၣ်ဒီးအဲၤကူပတူးလၢခိၣ်ဂ့ၤ,မဲၢ်ဂ့ၤ,တၢ်အဒ့ဂ့ၤ,ဆှဲဂ့ၤ,ကမၤဘၣ်ဝဲလီၤ. 16တၢ်လၢမုၢ်တနံၤန့ၣ်အဲၤကူပတူးကမၤအသးဒ်ပိာ်မုၣ်အသိးန့ၣ်လီၤ.ဒီးကကနိးဒီးပျံၤတၢ်ဖုးတၢ်လၢတၢ်သုးမုၢ်ဂီၢ်မုၢ်အယွၤဝၢ်အစုအမဲာ်ညါလၢအဝၢ်ဝဲလၢအဖီခိၣ်လီၤ. 17ဒီးယူဒၤအကီၢ်ကကဲထီၣ်တၢ်ပျံၤအလီၢ်လၢအဲၤကူပတူးအဂီၢ်လီၤ.ကယဲၢ်ပှၤလၢအသ့ၣ်နီၣ်ထီၣ်က့ၤအီၤန့ၣ်ကကနိးဝဲလၢတၢ်သုးမုၢ်ဂီၢ်မုၢ်အယွၤအကူၣ်တၢ်လၢအကူၣ်ထီၣ်ထီဒါအီၤအဃိန့ၣ်လီၤ. 18တၢ်လၢမုၢ်တနံၤန့ၣ်ဝ့ၢ်ယဲၢ်ဖျၢၣ်လၢအကတိၤကနၤဧၣ်အကျိာ်ကအိၣ်လၢကီၢ်အဲၤကူပတူးအပူၤ,ဒီးကဆိၣ်တၢ်လၢတၢ်သုးမုၢ်ဂီၢ်မုၢ်အယွၤအမဲာ်ညါလီၤ.ဒီးဝ့ၢ်တဝ့ၢ်န့ၣ်တၢ်ကိးအီၤလၢတၢ်ဟးဂီၤအဝ့ၢ်လီၤ. 19တၢ်လၢမုၢ်တနံၤန့ၣ်တၢ်လုၢ်လီၢ်လၢယွၤအဂီၢ်ကအိၣ်လၢကီၢ်အဲၤကူပတူးအသးကံၢ်ပူၤတဖျၢၣ်,ဒီးအထူၣ်လၢယွၤအဂီၢ်လၢအဃၢၤတထူၣ်လီၤ. 20ဒီးကကဲထီၣ်တၢ်အပနီၣ်,ဒီးတၢ်အုၣ်အသးလၢတၢ်သုးမုၢ်ဂီၢ်မုၢ်အယွၤအဂီၢ်,လၢအဲၤကူပတူးအကီၢ်ပူၤ,ဒီးပှၤကကိးဆူယွၤလၢပှၤမၤအၢတၢ်အဃိ,ဒီးကမၢလီၤပှၤမၤပူၤဖျဲးတၢ်ပှၤအဒိၣ်တဂၤ,ဒီးအဝဲဒၣ်ကအုၣ်က့ၤခီၣ်က့ၤအီၤလီၤ. 21ဒီးပှၤကသ့ၣ်ညါယွၤလၢအဲၤကူပတူးအပူၤ,ဒီးလၢမုၢ်တနံၤန့ၣ်ပှၤအဲၤကူပတူးဖိကသ့ၣ်ညါယွၤ,ဒီးကမၤအတၢ်ဒီးတၢ်လုၢ်,ဒီးတၢ်မၤဘူၣ်,ဒီးကဆိၣ်တၢ်လၢယွၤအဂီၢ်ဒီးမၤတီအကလုၢ်လီၤ. 22ဒီးယွၤကတီၢ်ပှၤအဲၤကူပတူးဖိ,ကတီၢ်ဝဲဒီးကမၤဘျါက့ၤဝဲ,ဒီးအတၢ်ကဟဲက့ၤဆူယွၤအအိၣ်,ဒီးကဒိးတၢ်ဃ့ကညးတၢ်လၢအဂီၢ်,ဒီးကမၤဘျါက့ၤဝဲလီၤ. 23တၢ်လၢမုၢ်တနံၤန့ၣ်ကျဲမုၢ်ကအိၣ်လၢအဲၤကူပတူးပၢၢ်လၢအၤရှူၢ်,ဒီးပှၤအၤရှူဖိကလဲၤနုာ်လၢအဲၤကူပတူး,ဒီးပှၤအဲၤကူပတူးဖိကလဲၤနုာ်လၢအၤရှူၢ်,ဒီးပှၤအဲၤကူပတူးဖိကမၤဃုာ်တၢ်ဒီးပှၤအၤရှူၢ်ဖိလီၤ. 24တၢ်လၢမုၢ်တနံၤန့ၣ်အံၣ်စရ့လးကကဲလၢတၢ်သၢမံၤတမံၤဒီးအဲၤကူပတူးဒီးအၤရှူၢ်,တၢ်ဆိၣ်ဂ့ၤလၢဟီၣ်ခိၣ်ချၢအသးကံၢ်ပူၤ, 25လၢတၢ်သုးမုၢ်ဂီၢ်မုၢ်အယွၤဆိၣ်ဂ့ၤဝဲဒီးစံးဝဲဒၣ်,ယပှၤဂီၢ်မုၢ်အဲၤကူပတူးဒီးအၤရှူၢ်တၢ်မၤလၢယစု,ဒီးအံၣ်စရ့လးယတၢ်န့ၢ်သါန့ၣ်မ်အဘၣ်တၢ်ဆိၣ်ဂ့ၤအီၤတက့ၢ်.
Copyright information for
KswSKMB