Isa 23 | KswSKMB | STEP | တၢ်အကလုၢ်လီၤလၢစိၢ်အဂ့ၢ်. တၢ်ၡံၣ်အကဘီသ့ၣ်ဧၢ,ဟီၣ်ပသူထီၣ်တက့ၢ်.အဂ့ၢ်ဒ်အံၤ,တၢ်မၤအိၣ်သယုၢ်အီၤလီၤ.ဟံၣ်တအိၣ်,တၢ်လဲၤနုာ်တအိၣ်ဘၣ်.လၢကီၢ်ကံးတံၣ်န့ၣ်တၢ်လီၣ်ဖျါထီၣ်လၢအီၤလီၤ.

‏ Isaiah 23

1 တၢ်အကလုၢ်လီၤလၢစိၢ်အဂ့ၢ်.

တၢ်ၡံၣ်အကဘီသ့ၣ်ဧၢ,ဟီၣ်ပသူထီၣ်တက့ၢ်.အဂ့ၢ်ဒ်အံၤ,တၢ်မၤအိၣ်သယုၢ်အီၤလီၤ.ဟံၣ်တအိၣ်,တၢ်လဲၤနုာ်တအိၣ်ဘၣ်.လၢကီၢ်ကံးတံၣ်န့ၣ်တၢ်လီၣ်ဖျါထီၣ်လၢအီၤလီၤ.

2 ပှၤကီးဖိသ့ၣ်ဧၢ,အိၣ်ဘှီၣ်ကလာ်တက့ၢ်.စံဒိၣ်အပှၤကၤတၢ်ဖိခီဂာ်ပီၣ်လဲၣ်,ဒီးမၤပှဲၤနၤ, 3 ဒီးလၢထံဖးဒိၣ်အပူၤန့ၣ်ၡံဃိၢ်အတၢ်ချံအိၣ်,ဒီးထံမိၢ်ပှၢ်အကူးတၢ်န့ၣ်ဟဲဆူအအိၣ်,ဒီးမ့ၢ်ဝဲလၢပှၤကလုာ်တဖၣ်အဖၠါဧိၤဖီဧိၤလီၤ.

4 မဲာ်ဆှးတက့ၢ်,စံဒိၣ်ဧၢ,အဂ့ၢ်ဒ်အံၤပီၣ်လဲၣ်ကတိၤတၢ်,ပီၣ်လဲၣ်အတိာ်အတာ်,ဒီးစံးဝဲ,ယတဘၣ်တၢ်ဟုးဆါဘၣ်,ဒီးယတဆံးစၢ်ဘၣ်တၢ်ဘၣ်,ဒီးယတဒုးဒိၣ်ထီၣ်ဘၣ်ဖိၣ်သၣ်ခွါဘၣ်,ယတလုၢ်ဘၣ်ပှၤမုၣ်လိၣ်ဘိဘၣ်.

5 တုၤတၢ်အကစီၣ်တုၤလၢအဲၤကူပတူးဒီး,ဘၣ်ဝဲလၢတၢ်ဆိးကဲးလၢစိၢ်အကစီၣ်အဃိလီၤ.

6 ခီဂာ်တၢ်ဆူတၢ်ၡံၣ်,ဟီၣ်ပသူထီၣ်,ပှၤကီးဖိသ့ၣ်ဧၢ.

7 ဝ့ၢ်လၢအသးခုတၢ်လၢအခီၣ်ထံးန့ၣ်အိၣ်ဝဲလၢမုၢ်နံၤလၢပျၢၤလံၤလံၤ,လၢအခီၣ်စိာ်ကွံာ်အီၤဆူအယံၤဒ်သိးအကအိၣ်ကဆိး,မ့ၢ်အဝဲအံၤဧါ.

8 မ့ၢ်မတၤကူၣ်ထီၣ်တၢ်န့ၣ်ထီဒါစိၢ်,တၢ်ခိၣ်သလုး,လၢအပှၤကၤတၢ်ဖိမ့ၢ်ပဒိၣ်ဖးဒိၣ်တဖၣ်,ဒီးအပှၤဆါတၢ်ပှ့ၤတၢ်မ့ၢ်ပှၤလၢအလၤကပီၤအိၣ်န့ၣ်တဂၤလဲၣ်.

9 တၢ်သုးမုၢ်ဂီၢ်မုၢ်အယွၤကူၣ်ထီၣ်ဝဲဒ်သိးအကမၤဘၣ်အၢတၢ်အဃံအလၤခဲလၢာ်အသးထီၣ်ထီ,ဒ်သိးအကမၤတရီတပါကယဲၢ်ပှၤလၢအလၤကပီၤအိၣ်လၢဟီၣ်ခိၣ်ချၢခဲလၢာ်လီၤ.

10 ခီဂာ်နကီၢ်ဒ်ထံမိၢ်ပှၢ်န့ၣ်အသိး,တၢ်ၡံၣ်အဖိမုၣ်ဧၢ.တၢ်ယီၢ်တကိးတအိၣ်လၢၤဘၣ်. 11 အစုယူာ်ထီၣ်အသးလၢပီၣ်လဲၣ်အဖီခိၣ်လီၤ.အဝဲဒၣ်မၤဟူးဝးဘီမုၢ်တဖၣ်လီၤ.ယွၤမၤလိာ်တၢ်လၢကနၤဧၣ်အဂ့ၢ်အကျိၤဒ်သိးပှၤကမၤဟးဂီၤအတိာ်အတာ်လီၤ.

12 ဒီးစံးဝဲဒၣ်,နတမၤအါထီၣ်လၢၤဘၣ်တၢ်သူၣ်ဖှံသးညီဘၣ်,စံဒိၣ်အဖိမုၣ်လိၣ်ဘိလၢအဘၣ်တၢ်မၤအၢအီၤ,နၤဧၢ.ဂဲၤဆၢထၢၣ်,ခီဂာ်တၢ်ဆူကံးတံၣ်တက့ၢ်.ဖဲန့ၣ်တၢ်အိၣ်ဘှံးတအိၣ်စ့ၢ်ကီးလၢနဂီၢ်ဘၣ်.

13 ကွၢ်ကွၢ်,က့ၤစ့းဖိအကီၢ်လီၤ.ပှၤတကလုာ်န့ၣ်တအိၣ်တ့ၢ်ဘၣ်.အၤရှူၢ်ပာ်လီၤအီၤလၢအခီၣ်ထံးလၢပှၤအိၣ်ဝဲဆိးဝဲလၢပှၢ်မုၢ်ကနၢအဂီၢ်လီၤ.သူၣ်ထီၣ်ဝဲအတၢးခိးတၢ်,ထိၣ်ဂဲၤဝဲအနူၢ်အစီၤ,ပာ်အီၤလၢတၢ်လီၤပှီၢ်လီၤ.

14 ဟီၣ်ပသူထီၣ်,တၢ်ရှံၣ်အကဘီသုဝဲသ့ၣ်ဧၢ,အဂ့ၢ်ဒ်အံၤ,သုတိာ်သုတာ်ဟးဂီၤလံ.

15 ဒီးတၢ်လၢမုၢ်တနံၤန့ၣ်တၢ်ကမၤအသးလၢတၢ်ကသးပ့ၤနီၣ်စိၢ်အနံၣ်နွံဆံ,ဒ်စီၤပၤတဂၤအမုၢ်နံၤတဖၣ်အသိးန့ၣ်လီၤ.လၢအနံၣ်နွံဆံအကတၢၢ်န့ၣ်တၢ်ကမၤအသးလၢစိၢ်အဂီၢ်ဒ်ပှၤဃဲသဲမုၣ်အတၢ်သးဝံၣ်အသိးန့ၣ်လီၤ.

16 ဟံးန့ၢ်တနၢ်တဆိ,လဲၤဝးတရံးဝ့ၢ်,ပှၤဃဲသဲမုၣ်လၢတၢ်သးပ့ၤနီၣ်အီၤတဂၤဧၢ,ဒ့တၢ်ဧ့ၢ်ဂ့ၤ,အုၣ်တၢ်သးဝံၣ်အါယုၢ်,ဒ်သိးတၢ်ကသ့ၣ်နီၣ်ထီၣ်က့ၤနၤတက့ၢ်.

17 ဒီးလၢအနံၣ်နွံဆံအကတၢၢ်န့ၣ်တၢ်ကမၤအသးလၢယွၤကအိၣ်သကိးစိၢ်,ဒီးကက့ၤက့ၤဆူအဘူးအလဲ,ဒီးကပာ်အသးလၢပှၤဃဲသဲမုၣ်ဒီးဘီဧိၤမုၢ်ဧိၤလၢဟီၣ်ခိၣ်ချၢခဲလၢာ်လီၤ.

18 ဒီးအန့ၢ်ဘၣ်တၢ်ဒီးအဘူးအလဲန့ၣ်ကကဲထီၣ်တၢ်စီဆှံလၢယွၤအဂီၢ်လီၤ.ပှၤတပာ်ဖှိၣ်ဘၣ်အီၤဘၣ်,တဒုးအိၣ်ဖှိၣ်ဘၣ်အီၤဘၣ်.အဂ့ၢ်ဒ်အံၤ,အန့ၢ်ဘၣ်တၢ်န့ၣ်ကအိၣ်လၢပှၤလၢအအိၣ်ဝဲလၢယွၤအမဲာ်ညါအဂီၢ်,ဒ်သိးအကဘျဲးအီၣ်,ဒီးအိၣ်ဒီးတၢ်ကူတၢ်သိးအဂ့ၤန့ၣ်လီၤ.