Isa 24 | KswSKMB | STEP | ကွၢ်ကွၢ်,ယွၤဂၢ်လီၤတၢ်အိၣ်လၢဟီၣ်ခိၣ်န့ၣ်,ဒီးဒုးအိၣ်ကလီဝဲ,ဒီးကပာ်အီထီလာ်ဝဲ,ဒီးကမၤလီၤပြံလီၤပြါပှၤကီၢ်ဖိန့ၣ်လီၤ.

‏ Isaiah 24

1 ကွၢ်ကွၢ်,ယွၤဂၢ်လီၤတၢ်အိၣ်လၢဟီၣ်ခိၣ်န့ၣ်,ဒီးဒုးအိၣ်ကလီဝဲ,ဒီးကပာ်အီထီလာ်ဝဲ,ဒီးကမၤလီၤပြံလီၤပြါပှၤကီၢ်ဖိန့ၣ်လီၤ.

2 ဒီးတၢ်ကမၤအသးလၢဒ်ပှၤဂီၢ်မုၢ်အသိး,ပှၤလုၢ်တၢ်အဒိၣ်ဒ်န့ၣ်သိး,ဒ်ပှၤအခ့အပှၤအသိး,အကစၢ်ဒ်န့ၣ်သိး,ဒ်ပှၤအခ့အပှၤပိာ်မုၣ်အသိး,အကစၢ်မုၣ်ဒ်န့ၣ်သိး,ဒ်ပှၤပှ့ၤတၢ်အသိး,ပှၤဆါတၢ်ဒ်န့ၣ်သိး,ဒ်ပှၤလိၢ်တၢ်အသိးပှၤဒုးလိၢ်တၢ်ဒ်န့ၣ်အသိး,ဒ်ပှၤလၢအကမၢ်အိၣ်အသိး,အကမၢ်အကစၢ်ဒ်န့ၣ်သိးလီၤ.

3 ထံဧိၤကီၢ်ဧိၤန့ၣ်ကအိၣ်ကလီသိကဘဲး,ဒီးတၢ်ကဂုာ်န့ၢ်အတၢ်စီကညူးလီၤ.အဂ့ၢ်ဒ်အံၤ,ယွၤကတိၤတၢ်ကတိၤတထံၣ်န့ၣ်လီၤ.

4 ဟီၣ်ခိၣ်သူၣ်အုးသးအုး,လီၤဘိၣ်လီၤဘဲ,လၢာ်ခိၣ်လီၤဘှါလီၤဘှဲ,လီၤဘိၣ်လီၤဘဲ,ပှၤဟီၣ်ခိၣ်ဖိအထီကတၢၢ်လီၤဘှါလီၤဘှဲဝဲလီၤ.

5 ဒီးထံဧိၤကီၢ်ဧိၤန့ၣ်ဘၣ်အၢလၢပှၤအိၣ်ဝဲဆိးဝဲလၢအပူၤတဖၣ်အဖီလာ်လီၤ.အဂ့ၢ်ဒ်အံၤ,ပှၤလုၣ်သ့ၣ်ခါပတာ်တၢ်သိၣ်တၢ်သီ,လဲလိာ်တၢ်မၤလိာ်,မၤဟးဂီၤတၢ်အၢၣ်လီၤအီလီၤအထူအယိာ်လီၤ.

6 မၤသးဒ်န့ၣ်ဒီးတၢ်ဆိၣ်အၢအီၣ်ကွံာ်ဟီၣ်ခိၣ်,ဒီးပှၤလၢအအိၣ်လၢအပူၤတဖၣ်န့ၣ်တူၢ်တၢ်ဒဲးဘးလီၤ.မၤသးဒ်န့ၣ်ဒီးပှၤဟီၣ်ခိၣ်ဖိလၢာ်ကွံာ်ဝဲ,ဒီးပှၤကညီလၢအအိၣ်လီၤတဲာ်တဖၣ်န့ၣ်မ့ၢ်စှၤဂၤလီၤ.

7 စပံးထံအသီန့ၣ်သူၣ်အုးသးအုး,စပံးမုၢ်လီၤဘှါလီၤဘှဲလီၤ.ကယဲၢ်ပှၤလၢအသးခုလၢအသးန့ၣ်ကအုကစွါခဲလၢာ်လီၤ.

8 ဒၢအတၢ်သးခုန့ၣ်အိၣ်ဃိကလာ်,ပှၤလၢအသူၣ်ဖှံသးညီအသီၣ်အိၣ်ဘှီၣ်ဝဲ,တနၢ်အတၢ်သးခုအိၣ်ဃိကလာ်လီၤ. 9 တအီၤလၢၤဘၣ်စပံးထံအိၣ်ဒီးတၢ်သးဝံၣ်ဘၣ်.သံးကခၣ်ဝဲလၢပှၤလၢအအီအီၤအဂီၢ်လီၤ. 10 တၢ်အိၣ်ကလီအဝ့ၢ်န့ၣ်လီၤပှီၢ်ဝဲလီၤ.ကယဲၢ်ဟံၣ်ကးတံာ်ဃာ်အသးဒ်သိးပှၤသုတနုာ်တဂ့ၤန့ၣ်လီၤ.

11 တၢ်ကိးပသူလၢစပံးထံအဃိန့ၣ်အိၣ်ဝဲလၢကျဲပူၤ,ကယဲၢ်တၢ်သးခုန့ၣ်လဲၤပူၤကွံာ်ဝဲ,ဟီၣ်ခိၣ်အတၢ်သူၣ်ဖှံသးညီန့ၣ်ဟးထီၣ်ကွံာ်လီၤ. 12 တၢ်အိၣ်လီၤတဲာ်လၢဝ့ၢ်ပူၤန့ၣ်မ့ၢ်တၢ်အိၣ်သယုၢ်,ဒီးပဲတရီန့ၣ်တၢ်တီၢ်လီၤပှီၢ်အီၤလီၤ.

13 အဂ့ၢ်ဒ်အံၤ,တၢ်ကမၤအသးလၢဟီၣ်ခိၣ်အသးကံၢ်ပူၤ,လၢပှၤကလုာ်တဖၣ်အကျါ,ဒ်တၢ်တီၢ်သ့ၣ်စၤယံးအသိးဒ်လၢတၢ်ထၢဖှိၣ်တၢ်ဝံၤဒီး,တၢ်ထၢဖှိၣ်တၢ်အိၣ်လီၤတဲာ်ဒံးအသိးန့ၣ်လီၤ.

14 အဝဲသ့ၣ်ကထုထီၣ်အကလုၢ်,ကအုၣ်ထီၣ်တၢ်လၢယွၤအကဟုကညီၢ်အဃိ,ကကိးပသူထီၣ်လၢပီၣ်လဲၣ်ပူၤလီၤ.

15 မၤသးဒ်န့ၣ်ဒီးမၤလၤကပီၤယွၤလၢမုၢ်ထီၣ်တခီ,ယွၤ,အံၣ်စရ့လးအကစၢ်အမံၤ,လၢပီၣ်လဲၣ်အကီးတဖၣ်န့ၣ်တက့ၢ်.

16 လၢဟီၣ်ခိၣ်အဃၢၤန့ၣ်ပနၢ်ဟူတၢ်သးဝံၣ်,စံးထီၣ်ပတြၢၤပှၤတီပှၤလိၤတက့ၢ်.ဒီးယစံး,ယဃဲၤလီၤ.ယဃဲၤလီၤ,ယဘၣ်အဖှီၣ်လီၤ.ပှၤလီန့ၢ်တၢ်တဖၣ်န့ၣ်လီန့ၢ်တၢ်,ပှၤလီန့ၢ်တၢ်တဖၣ်န့ၣ်လီန့ၢ်တၢ်လၢတၢ်လီန့ၢ်လီၤ.

17 မ်တၢ်ဃါဃ့ၢ်ကွံာ်,ဒီးမၢဧိၤပျၢ်ဧိၤ,ဒီးတၢ်ပျံၤသကွီၤန့ၣ်ဘၣ်နၤတက့ၢ်,ပှၤကီၢ်ဖိဧၢ.

18 ဒီးတၢ်ကမၤအသးလၢပှၤလၢအဃ့ၢ်ဝဲလၢတၢ်ဃါဃ့ၢ်ကွံာ်အမဲာ်ညါန့ၣ်ကလီၤတဲာ်လၢမၢဧိၤပျၢ်ဧိၤအပူၤ,ဒီးပှၤလၢအဟဲထီၣ်လၢမၢဧိၤပျၢ်ဧိၤအပူၤန့ၣ်ကဘၣ်ပျံၤသကွီၤလီၤ.အဂ့ၢ်ဒ်အံၤ,တၢ်ထူၣ်ဖျိအိးထီၣ်အသးလၢထးခီ,ဒီးဟီၣ်ခိၣ်အခီၣ်ထံးတဖၣ်ကဆှဲးကဆှိးဝဲလီၤ.

19 ကၢ်လီၤလံ,ဟီၣ်ခိၣ်ကၢ်လီၤလၢာ်လံ.ပှံၢ်လီၤလံ,ဟီၣ်ခိၣ်ပှံၢ်လီၤစီဖ့ကလ့ၤလံ.ဟူးဝးလံ,ဟီၣ်ခိၣ်ဟူးဝးလီၤနးမးလံ.

20 ဟီၣ်ခိၣ်ကလဲၤတၢ်ကနူၤကပၤဒ်ပှၤအီမူၤအသးအသိး,ဒီးကဝးဝဲဒ်စုာ်အသိးန့ၣ်လီၤ.ဒီးအတၢ်ဒဲးဘးန့ၣ်ကဃၢဝဲလၢအဖီခိၣ်,ဒီးကလီၤဃံၤဝဲ,ဒီးတဂဲၤဆၢထၢၣ်လၢၤဘၣ်.

21 ဒီးလၢမုၢ်တနံၤန့ၣ်တၢ်ကမၤအသးလၢယွၤကအိၣ်သကိးတၢ်သုးမုၢ်ထီၣ်ထီအိၣ်လၢတၢ်ထီၣ်ထီ,ဒီးဟီၣ်ခိၣ်အစီၤပၤတဖၣ်လၢဟီၣ်ခိၣ်ချၢလီၤ. 22 ဒီးတၢ်ကဒုးအိၣ်ဖှိၣ်အီၤလၢတၢ်အိၣ်ဖှိၣ်တပူၤဒ်ပှၤဃိာ်ဖိလၢဃိာ်ပူၤအသိး,ဒီးကဘၣ်တၢ်ကးတံာ်ဃာ်အီၤလၢဃိာ်ပူၤ,ဒီးအါနံၤအါသီအလီၢ်ခံန့ၣ်တၢ်ကအိၣ်သကိးအီၤလီၤ.

23 ဒီးလါကပာ်ဆှးအမဲာ်,ဒီးမုၢ်ကမဲာ်ဆှးလီၤ.အဂ့ၢ်ဒ်အံၤ,တၢ်သုးမုၢ်ဂီၢ်မုၢ်အယွၤန့ၣ်ကမ့ၢ်စီၤပၤလၢကစၢၢ်စံယိၣ်အလိၤ,ဒီးလၢယရူၤၡလ့ၣ်အပူၤ,ဒီးတၢ်လၤကပီၤကအိၣ်ဝဲလၢအသူၣ်က့သးပှၢ်အမဲာ်ညါလီၤ.