Isa 25 | KswSKMB | STEP | ယွၤဧၢ,နမ့ၢ်ယကစၢ်လီၤ.ယကပာ်ထီၣ်ထီနၤ,ယကစံးထီၣ်ပတြၢၤနမံၤလီၤ.အဂ့ၢ်ဒ်အံၤ,နမၤတၢ်လီၤလး,တၢ်ကူၣ်ထီၣ်ဖးလီၤလၢအယံာ်,တၢ်မ့ၢ်တၢ်တီ,တၢ်မ့ၢ်တၢ်ဘၣ်လီၤ.

‏ Isaiah 25

1 ယွၤဧၢ,နမ့ၢ်ယကစၢ်လီၤ.ယကပာ်ထီၣ်ထီနၤ,ယကစံးထီၣ်ပတြၢၤနမံၤလီၤ.အဂ့ၢ်ဒ်အံၤ,နမၤတၢ်လီၤလး,တၢ်ကူၣ်ထီၣ်ဖးလီၤလၢအယံာ်,တၢ်မ့ၢ်တၢ်တီ,တၢ်မ့ၢ်တၢ်ဘၣ်လီၤ.

2 အဂ့ၢ်ဒ်အံၤ,နပာ်ဝ့ၢ်တဖျၢၣ်လၢတၢ်ပူ,ဝ့ၢ်အိၣ်ဒီးအခိၣ်ဒူတဝ့ၢ်လၢတၢ်လီၤပှီၢ်,ပှၤတခီဘီမုၢ်ဖိအနူၢ်လၢတၢ်တမ့ၢ်လၢၤဘၣ်ဝ့ၢ်တဖျၢၣ်ဘၣ်.တၢ်တမၤထီၣ်က့ၤအီၤလီၤထူလီၤယိာ်ဘၣ်.

3 မၤသးဒ်န့ၣ်ဒီးပှၤအဆူၣ်တကလုာ်ကစံးထီၣ်ပတြၢၤနၤ,ပှၤအကလုာ်လၢအမ့ၢ်တၢ်ပျံၤအလီၢ်အဝ့ၢ်ဖိန့ၣ်ကပျံၤနၤလီၤ.

4 အဂ့ၢ်ဒ်အံၤ,နမ့ၢ်တ့ၢ်တိာ်ဧိၤတာ်ဧိၤလၢပှၤဖှီၣ်ဖိယာ်ဖိအဂီၢ်,တိာ်ဧိၤတာ်ဧိၤလၢပှၤဘၣ်နးဘၣ်ဖှီၣ်အဂီၢ်လၢအဘၣ်တၢ်ကီအဖၢမုၢ်,တၢ်အိၣ်တဒၢအလီၢ်လၢကလံၤမုၢ်အမဲာ်ညါ,တၢ်ကဒုလၢတၢ်ကိၢ်အမဲာ်ညါလၢပှၤမၤပျံၤတၢ်ဖုးတၢ်အအူသဖှိမၤသးဒ်ကလံၤမုၢ်ဘၣ်တၢ်အဒူၣ်အသိးန့ၣ်အဖၢမုၢ်လီၤ.

5 ဒ်တၢ်ကိၢ်လၢအလီၢ်ဃ့အသိး,ပှၤတခီဘီမုၢ်ဖိအသီၣ်န့ၣ်နကမၤစၢ်လီၤလီၤ.ဒ်တၢ်ကိၢ်လၢတၢ်အၢၣ်အကဒုအသိး,ပှၤမၤပျံၤတၢ်အတၢ်သးဝံၣ်န့ၣ်ဘှီၣ်လီၤဝဲဒ်န့ၣ်သိးလီၤ.

6 ဒီးတၢ်သုးမုၢ်ဂီၢ်မုၢ်အယွၤကမၤတၢ်အီၣ်ဘီၣ်သိ,တၢ်အီလၢစပံးထံအိၣ်ဒီးအသံးအဃါလၢအပူၤ,တၢ်ဘီၣ်သိလၢအဝံၣ်,စပံးထံအိၣ်ဒီးအသံးအဃါလၢအပူၤလၢအဆှံဝဲလၢပှၤကိးကလုာ်ဒဲးအဂီၢ်လၢကစၢၢ်အံၤအလိၤလီၤ.

7 ဒီးလၢကစၢၢ်အလိၤအံၤကမၤဟးဂီၤတၢ်မၤဘၢမဲာ်,တၢ်မၤဘၢမဲာ်လၢအအိၣ်လၢပှၤကိးကလုာ်ဒဲးအဖီခိၣ်,ဒီးထၣ်တဘ့ၣ်လၢအထါထၣ်အသးလၢပှၤကိးကလုာ်ဒဲးအဖီခိၣ်လီၤ.

8 တၢ်သံလီၤဘျၢလံလီၤထူလီၤယိာ်လံ,ဒီးကစၢ်ယွၤထွါကွံာ်မဲာ်ထံလၢကယဲၢ်ပှၤအမဲာ်,ဒီးကဟံးထီၣ်ကွံာ်အပှၤဂီၢ်မုၢ်အတၢ်ဒုၣ်ဒွဲၣ်လၢဟီၣ်ခိၣ်ဒီဘ့ၣ်ညါလီၤ.အဂ့ၢ်ဒ်အံၤ,ယွၤကတိၤတၢ်လီၤ.

9 ဒီးပှၤကစံး,လၢမုၢ်တနံၤန့ၣ်ကွၢ်ကွၢ်,အဝဲဒၣ်အံၤမ့ၢ်ပကစၢ်လီၤ.ပကွၢ်လၢ်တ့ၢ်အကျဲ,ဒီးကအုၣ်က့ၤခီၣ်က့ၤပှၤလီၤ.အဝဲဒၣ်အံၤမ့ၢ်ယွၤလီၤ.ပကွၢ်လၢ်တ့ၢ်အကျဲလီၤ.ပကသူၣ်ဖှံသးညီ,ဒီးပကသးခုလၢအတၢ်အုၣ်က့ၤခီၣ်က့ၤအပူၤလီၤ.

10 အဂ့ၢ်ဒ်အံၤ,ယွၤအစုကအိၣ်ဘှံးလၢကစၢၢ်အံၤအလိၤ,ဒီးမိၤအးကဘၣ်တၢ်ယီၢ်တံၢ်အီၤလၢအလီၢ်ပူၤ,ဒ်လီၢ်ဧိၤဒံးဧိၤဘၣ်တၢ်ယီၢ်တံၢ်အီၤလၢတၢ်အအ့ၣ်ပူအထံကျါအသိးန့ၣ်လီၤ.

11 ဒီးကယူာ်ထီၣ်အစုလၢအကျါ,ဒ်ပှၤပီၢ်ထံယူာ်ထီၣ်အစုဒ်သိးအကပီၢ်ထံအသိးန့ၣ်လီၤ.ဒီးတၢ်ကဆီၣ်လီၤဃာ်အတၢ်ထီၣ်ထီအိၣ်ဒီးအစုအမၤတၢ်န့ၣ်လီၤ.

12 ဒီးနဝ့ၢ်ခိၣ်ဒူအတိာ်ထီၣ်ထီ,အတိာ်တဖျၢၣ်န့ၣ်အဝဲဒၣ်ရူၢ်လီၤကွံာ်,ဆီၣ်လီၤဝဲ,မၤလီၤပှီၢ်လၢဟီၣ်ခိၣ်လိၤ,မၤလီၤဒါလၢဟီၣ်ခိၣ်အကမူၣ်ကျါလီၤ.