Isa 27 | KswSKMB | STEP | တၢ်လၢမုၢ်တနံၤန့ၣ်ယွၤအိၣ်ဒီးအနးအကိၤအဒိၣ်အဆူၣ်တဘ့ၣ်ကအိၣ်သကိးသမၣ်ဂုၢ်လဲၤချ့တၢ်တဘိန့ၣ်သမၣ်ဂုၢ်ဝံကျီၤတဘိ,ဒီးကမၤသံပယိၤတဘိလၢအအိၣ်လၢပီၣ်လဲၣ်ပူၤန့ၣ်လီၤ.

‏ Isaiah 27

1 တၢ်လၢမုၢ်တနံၤန့ၣ်ယွၤအိၣ်ဒီးအနးအကိၤအဒိၣ်အဆူၣ်တဘ့ၣ်ကအိၣ်သကိးသမၣ်ဂုၢ်လဲၤချ့တၢ်တဘိန့ၣ်သမၣ်ဂုၢ်ဝံကျီၤတဘိ,ဒီးကမၤသံပယိၤတဘိလၢအအိၣ်လၢပီၣ်လဲၣ်ပူၤန့ၣ်လီၤ.

2 တၢ်လၢမုၢ်တနံၤန့ၣ်သးဝံၣ်ထီၣ်စပံးထံအစပံးလီၢ်န့ၣ်တက့ၢ်.

3 တၢ်လၢယၤယွၤအံၤယကွၢ်အီၤ,ယကမၤဘၣ်စီၣ်အီၤကိးပနာ်ဒဲးလီၤ.ဒ်သိးပှၤသုတမၤအၢအီၤဒီး,ယကကွၢ်လီၤအီၤလၢမုၢ်ဆါဆဲးလၢမုၢ်နၤလီၤ.

4 ယသးတထီၣ်လၢၤအီၤဘၣ်.မ်တၤဆှုၣ်တၤမဲန့ၣ်ပာ်အသးလၢအကဒုးတၢ်တက့ၢ်.ယကဃ့ၢ်ခီတူာ်အီၤ,ဒီးဒုးအီၣ်အီၤလၢမ့ၣ်အူတပူၤဃီလီၤ.

5 မ့တမ့ၢ်ဘၣ်ဒ်န့ၣ်ဒီး,မ်အဟံးန့ၢ်ယဂံၢ်ယဘါဒီးမၤတၢ်ဃူတၢ်ဖိးဒီးယၤတက့ၢ်.တၢ်ဃူတၢ်ဖိးမ်အမၤဒီးယၤတက့ၢ်.

6 မုၢ်နံၤလၢအကဟဲန့ၣ်ယၤကိာ်အဂံၢ်ကစဲၤလီၤ.အံၣ်စရ့လးကဘိၣ်ထီၣ်,ဒီးဆှိးထီၣ်,ဒီးကမၤပှဲၤဟီၣ်ခိၣ်ဒီးတၤသၣ်လီၤ.

7 ဒ်ပှၤကျီအီၤအသိးန့ၣ်ကျီဝဲစ့ၢ်ကီးဧါ.ဒ်အပှၤဘၣ်တၢ်မၤသံအီၤအတၢ်မၤသံအသိးန့ၣ်ဘၣ်တၢ်မၤသံဝဲစ့ၢ်ကီးဧါ.

8 နဂ့ၢ်လိာ်အီၤလၢနပျၢ်ကွံာ်အီၤအဃိန့ၣ်နမၤတၢ်လၢအဘၣ်လီၤ.လၢကလံၤမုၢ်ထီၣ်အနံၤန့ၣ်ဒုးဟးထီၣ်ကွံာ်ဝဲလၢအကလံၤဆူၣ်န့ၣ်လီၤ.

9 မၤသးဒ်န့ၣ်ဒီးတုၤအပာ်တၢ်လုၢ်လီၢ်အလီၢ်ခဲလၢာ်ဒ်လၢၢ်ထူၣ်တဖၣ်လၢအလီၤကလဲအသိးဒီး,ယၤကိာ်အတၢ်ဒဲးဘးကပူၤဖျဲးလၢတၢ်န့ၣ်အဃိ,ဒီးတၢ်န့ၣ်မ့ၢ်တၤသၣ်ခဲလၢာ်လၢအကပျၢ်အတၢ်ကမၣ်လီၤ.ဒီးအရှ့ရၤ,ဒီးတၢ်ဂီၤဃမၣ်န့ၣ်တဂဲၤဆၢထၢၣ်လၢၤဘၣ်.

10 အဂ့ၢ်ဒ်အံၤ,ဝ့ၢ်အိၣ်ဒီးအခိၣ်ဒူတဖျၢၣ်ကအိၣ်သယုၢ်,တၢ်အိၣ်အလီၢ်လီၤပှီၢ်,ဒီးဘၣ်တၢ်လဲၤသဒၣ်အီၤဒ်ပှၢ်မုၢ်ကနၢအသိးန့ၣ်လီၤ.ဖဲန့ၣ်ဂီၤဖံးဖိကအီၣ်တၢ်,ဒီးကကိာ်လီၤဖဲန့ၣ်,ဒီးအီၣ်ကွံာ်အဒ့အဖီလီၤ.

11 တုၤအဒ့အဖီဃ့ထီကွံာ်ဒီး,တၢ်ကမၤကၢ်ကွံာ်အီၤ,ပိာ်မုၣ်တဖၣ်ကဟဲဒီးဆိၣ်ကဲၤအီၤလၢမ့ၣ်အူလီၤ.မ့ၢ်ပှၤတကလုာ်လၢအနၢ်တပၢၢ်ဘၣ်တၢ်ဘၣ်,မၤသးဒ်န့ၣ်ဒီးပှၤတ့အီၤတဂၤတသးအိၣ်ဘၣ်အီၤ,ဒီးပှၤလၢအမၤအီၤတဂၤန့ၣ်တသးကညီၤဘၣ်အီၤဘၣ်.

12 ဒီးလၢမုၢ်တနံၤန့ၣ်တၢ်ကမၤအသးလၢယွၤကတီၢ်လီၤကွံာ်တၢ်လၢထံမိၢ်ပှၢ်အထံကျိပၢၢ်လၢအဲၤကူပတူးအထံမိၢ်ပှၢ်,ဒီးသုကဘၣ်တၢ်ထၢဖှိၣ်သုတဂၤဒီးတဂၤလီၤ.ပှၤအံၣ်စရ့လးဖိသ့ၣ်ဧၢ.

13 ဒီးလၢမုၢ်တနံၤန့ၣ်တၢ်ကမၤအသးလၢတၢ်ကအူကွဲၤဖးဒိၣ်တဖျၢၣ်,ဒီးပှၤလၢအဟါမၢ်လၢကီၢ်အၤရှူၢ်န့ၣ်ကဟဲ,ဒီးပှၤလၢအဟးဝ့ၤဝီၤတၢ်လၢကီၢ်အဲၤကူပတူးအပူၤန့ၣ်,ဒီးကဘူၣ်ထီၣ်ဘါထီၣ်ယွၤလၢကစၢၢ်စီဆှံအလိၤလၢယရူၤၡလ့ၣ်အပူၤန့ၣ်လီၤ.