Isaiah 33
1နဲဒၣ်လၢအဂုာ်န့ၢ်တၢ်,ဒီးပှၤတဂုာ်န့ၢ်ဘၣ်နတၢ်ဘၣ်,ဒီးလီန့ၢ်တၢ်,ဒီးပှၤတလီန့ၢ်ဘၣ်နၤဘၣ်န့ၣ်နဘၣ်အဖှီၣ်လီၤ.တုၤနတဂုာ်န့ၢ်လၢၤဘၣ်တၢ်ဘၣ်ဒီး,တၢ်ကဂုာ်န့ၢ်နတၢ်,ဒီးတုၤနလီန့ၢ်တၢ်ဝံၤလံဒီး,ပှၤကလီန့ၢ်နၤလီၤ. 2ယွၤဧၢ,သးကညီၤပှၤတက့ၢ်.ပကွၢ်လၢ်နကျဲလီၤ.ကဲထီၣ်အစုဒုၣ်လၢမုၢ်ဂီၤ,တၢ်အုၣ်က့ၤခီၣ်က့ၤပှၤလၢတၢ်ကိၢ်တၢ်ဂီၤအကတီၢ်န့ၣ်တက့ၢ်. 3လၢတၢ်တၢထီၣ်တၢလီၤအသီၣ်န့ၣ်ပှၤဂီၢ်မုၢ်ဃ့ၢ်ဝဲ,တုၤနဂဲၤဆၢထၢၣ်န့ၣ်ပှၤကလုာ်တဖၣ်လီၤပြံလီၤပြါလီၤ. 4ဒီးသုဂုာ်န့ၢ်တၢ်န့ၣ်တၢ်ကပာ်ဖှိၣ်ဒ်ဒွဲၣ်ဃစံပာ်ဖှိၣ်တၢ်အသိး,ဒ်ဒွဲၣ်ကိာ်စံၣ်အသိးန့ၣ်အဝဲသ့ၣ်စံၣ်ဘၣ်အလိၤလီၤ. 5ယွၤမ့ၢ်တၢ်ထီၣ်ထီလီၤ.အဂ့ၢ်ဒ်အံၤ,အိၣ်ဝဲဆိးဝဲလၢတၢ်အလီၢ်ထီၣ်ထီလီၤ.မၤပှဲၤလံစံယိၣ်လၢတၢ်စံၣ်ညီၣ်ဒီးတၢ်တီတၢ်လိၤလံ. 6ဒီးကကဲထီၣ်နကတီၢ်တဖၣ်အတၢ်ဂၢၢ်တၢ်ကျၢၤအလီၢ်လီၤ.တၢ်အုၣ်က့ၤခီၣ်က့ၤအဂံၢ်အဘါ,တၢ်ကူၣ်သ့,ဒီးတၢ်သ့ၣ်ညါ,တၢ်ပျံၤယွၤန့ၣ်မ့ၢ်အတၢ်လုၢ်ဒိၣ်ပှ့ၤဒိၣ်လီၤ. 7ကွၢ်ကွၢ်,အပှၤအဆူၣ်တဖၣ်ကိးထီၣ်လၢခိ,တၢ်ဃူတၢ်ဖိးအကလူးတဖၣ်အမဲာ်ထံလီၤနးနးကလဲာ်လီၤ. 8ကျဲမုၢ်အိၣ်သယုၢ်,ပှၤပိာ်ကျဲတအိၣ်လၢၤဘၣ်.အဝဲဒၣ်မၤဟးဂီၤတၢ်အၢၣ်လီၤအီလီၤ,မၤတရီတပါဝ့ၢ်တဖၣ်,တပးကဲဘၣ်ပှၤနီတဂၤဘၣ်. 9ထံဧိၤကီၢ်ဧိၤန့ၣ်အသူၣ်အုးအသးအုး,အသးလီၤဘှါ,လဘၤနိၣ်အမဲာ်ဆှး,ဃဲၤလီၤကွံာ်,ၡၤရိၣ်မၤသးဒ်ပှၢ်မုၢ်ကနၢအသိးန့ၣ်,ဒီးဘၤၡၣ်ဒီးကၢ်မ့ၤလးအလၣ်လီၤဆှုလီၤ. 10ခဲကနံၣ်အံၤယကဂဲၤဆၢထၢၣ်,ယွၤစံးဝဲဒၣ်,ခဲကနံၣ်အံၤယကဒိးတၢ်ပာ်ထီၣ်ထီ,ခဲကနံၣ်အံၤယကပာ်ထီၣ်ထီယသးလီၤ. 11သုကဒၢထီၣ်ဖ့,သုကဆံးစၢ်လီၢ်,သုသါ,ဒ်မ့ၣ်အူအသိးန့ၣ်ကအီၣ်ကွံာ်သုလီၤ. 12ပှၤကလုာ်တဖၣ်ကကဲထီၣ်လၢၢ်ထူၣ်လၢမ့ၣ်အူအီၣ်ဝဲ,တၤဆှုၣ်ဒီၣ်တဲာ်အသး,မ့ၣ်အူကအီၣ်ကွံာ်အီၤလီၤ. 13ပှၤလၢအအိၣ်လၢအယံၤသ့ၣ်ဧၢ,တၢ်လၢယမၤန့ၣ်ကနၣ်တက့ၢ်.ဒီးပှၤလၢအအိၣ်ဘူးသ့ၣ်ဧၢ,သ့ၣ်ညါယစိယကမီၤတက့ၢ်. 14ပှၤတၢ်ဒဲးဘးဖိပျံၤတၢ်လၢစံယိၣ်အပူၤ,တၢ်ကနိးကစုာ်ဟံးန့ၢ်ပှၤတယူးတယီၣ်ဘၣ်ယွၤန့ၣ်လီၤ.မ့ၢ်မတၤလၢပကျါအိၣ်ဝဲဆိးဝဲဒီးမ့ၣ်အီၣ်တၢ်ကသ့တဂၤလဲၣ်.မ့ၢ်မတၤလၢပကျါအိၣ်ဝဲဆိးဝဲဒီးမ့ၣ်အီၣ်တၢ်တထံၣ်ဃီကသ့တဂၤလဲၣ်. 15ပှၤလၢအလဲၤတၢ်လၢတၢ်တီတၢ်လိၤအပူၤ,ဒီးကတိၤတၢ်စၢၢ်ဆၢလၢအညိကွံာ်တၢ်အီၣ်ကဘျံးအီၣ်ကဘျၣ်,လၢအတြုၤအစုဒ်သိးအသုတဟံးန့ၢ်ခိၣ်ဖးတဂ့ၤ,လၢအဆွံတံာ်အနၢ်ပူၤဒ်သိးအသုတနၢ်ဟူတၢ်သွံၣ်အဂ့ၢ်,ဒီးလၢအဘံၣ်အမဲာ်ဒ်သိးအသုတကွၢ်တၢ်အၢတဂ့ၤန့ၣ်, 16အဝဲဒၣ်ကအိၣ်ကဆိးလၢတၢ်အလီၢ်ထီၣ်ထီ,လၢၢ်ဧိၤလ့ဧိၤအတိာ်အတာ်ကကဲထီၣ်အသန့ၤအသးအလီၢ်လီၤ.တၢ်ကဟ့ၣ်အကိၣ်,ဒီးအထံကအိၣ်ခၢၣ်သနၢၢ်လီၤ. 17နမဲာ်ကထံၣ်ဘၣ်စီၤပၤအိၣ်ဒီးအဃံအလၤ,ကထံၣ်ဘၣ်ဝဲလၢထံယံၤကီၢ်ယံၤလီၤ. 18နသးကဆိကမိၣ်လၢတၢ်မၤပျံၤမၤဖုးအဂ့ၢ်လီၤ.ပှၤကွဲးလံာ်န့ၣ်အိၣ်ဖဲလဲၣ်,ပှၤစီၤစီၤပီၢ်အိၣ်ဖဲလဲၣ်,ပှၤလၢအဂံၢ်တၢးထီန့ၣ်အိၣ်ဖဲလဲၣ်. 19ပှၤအဒူတကလုာ်န့ၣ်နတထံၣ်ဘၣ်,ပှၤတကလုာ်လၢအပျုၤယိာ်န့ၢ်လၢနနၢ်ဟူတၢ်သ့တက့ၢ်,ပှၤလၢအပျ့ၤကတိၤတၢ်လီၤဆီတုၤနနၢ်တပၢၢ်ဘၣ်လီၤ. 20ကွၢ်စံယိၣ်,ပမၤဘူၣ်အဝ့ၢ်တဖျၢၣ်တက့ၢ်.နမဲာ်ကထံၣ်ဘၣ်ယရူၤၡလ့ၣ်လၢတၢ်အိၣ်အလီၢ်လီၤစံာ်မုာ်,ဒဲလၢပှၤတသုးဘၣ်အလီၢ်ဘၣ်.စိၤရီၤပှၤတထုးထီၣ်ဘၣ်အတၢၣ်ဖိဘၣ်,ဒီးအပျံၤတတဲာ်ကွံာ်ဘၣ်နီတဘိဘၣ်. 21မ့မ့ၢ်ဖဲန့ၣ်ယွၤကကဲထီၣ်တၢ်ကဟုကညီၢ်လၢပဂီၢ်,ထံမိၢ်ပှၢ်ဒီးထံဖးလဲၢ်အလီၢ်,ဖဲကဘီအိၣ်ဒီးတဝၢတလဲၤဘၣ်,ဒီးကဘီသုးတခီဂာ်ဘၣ်. 22အဂ့ၢ်ဒ်အံၤ,ယွၤမ့ၢ်ပပှၤစံၣ်ညီၣ်ကွီၢ်,ယွၤမ့ၢ်ပပှၤဟ့ၣ်လီၤတၢ်သိၣ်တၢ်သီ,ယွၤမ့ၢ်ပစီၤပၤ,အဝဲဒၣ်ကအုၣ်က့ၤခီၣ်က့ၤပှၤလီၤ. 23နပျံၤလီၤဆှၣ်,ဟံးဃာ်ယၢ်ထူၣ်အိၣ်ထူၣ်ကလာ်တသ့ဘၣ်,သလၣ်ထီၣ်ယၢ်လၣ်တသ့ဘၣ်.တုၤနုၤတစုပှၤနီၤဖးတၢ်ဂုာ်န့ၢ်အါအါကလဲာ်ပှၤအစုဟးဂီၤအခီၣ်ဟးဂီၤတဖၣ်ဂုာ်န့ၢ်တၢ်ဂုာ်န့ၢ်လီၤ. 24ဒီးပှၤအိၣ်ဝဲဆိးဝဲတဖၣ်န့ၣ်တစံး,ယမၤတကဲဘၣ်န့ၣ်ဘၣ်.ပှၤအိၣ်ဝဲဆိးဝဲလၢအပူၤန့ၣ်အတၢ်ဒဲးဘးပျၢ်လံလီၤ.
Copyright information for
KswSKMB