Isaiah 36
1ဒီးလၢစီၤပၤဃံးစကံယၤအနံၣ်ပှဲၤထီၣ်တဆံလွံၢ်နံၣ်တနံၣ်န့ၣ်တၢ်မၤအသးလၢအၤရှူၢ်အစီၤပၤစၤနဃ့ရံာ်ဟဲထီဒါယူဒၤအဝ့ၢ်အိၣ်ဒီးအခိၣ်ဒူခဲလၢာ်,ဒီးမၤန့ၢ်အီၤလီၤ. 2ဒီးအၤရှူၢ်အစီၤပၤမၢလီၤစီၤရၤဘၡါက့ၤအိၣ်ဒီးပှၤသုးမုၢ်တဖုဖးဒိၣ်လၢလၤကံၣ်ဆူယရူၤၡလ့ၣ်,ဆူစီၤပၤဃံးစကံယၤအအိၣ်လီၤ.ဒီးအဝဲဒၣ်ဆၢထၢၣ်ဝဲဖဲနိၣ်လၢထးခီတပူၤအထံကျိၤဖဲပှၤစုၣ်တၢ်ကံးညာ်အဟီၣ်ခိၣ်အကဝီၤအကျဲမုၢ်လီၤ. 3ဒီးစီၤဃံးလကံယၤအဖိခွါစီၤအ့လယါကံၣ်လၢအအိၣ်လၢဟံၣ်အဖီခိၣ်,ဒီးပှၤကွဲးလံာ်စီၤရှ့ၤဘနၤ,ဒီးပှၤကွဲးနီၣ်တၢ်စီၤအၤစာ်အဖိခွါစီၤယိၤအၤန့ၣ်ဟဲထီၣ်ဝဲဆူအအိၣ်, 4ဒီးစီၤရၤဘၡါက့ၤစံးဘၣ်အီၤ,စံးလၢ်စီၤဃံးစကံယၤ,တၢ်ဒိၣ်စီၤပၤ,အၤရှူၢ်အစီၤပၤစံးဒ်အံၤ,တၢ်သန့ၤအသးအိၣ်ဒီးနၤလၢနသန့ၤနသးလၢအီၤမ့ၢ်မနုၤတမံၤလဲၣ်. 5ယစံး,မ့ၢ်ထဲတၢ်ကတိၤကလီကလီလၢနစံး,ယအိၣ်ဒီးတၢ်ကူၣ်တၢ်ဖးဒီးတၢ်အဂံၢ်အဘါလၢဒုးသုးအဂီၢ်န့ၣ်လီၤ.ခဲကနံၣ်အံၤနသန့ၤနသးလၢမတၤတဂၤလၢနပူထီၣ်ယၤန့ၣ်လဲၣ်. 6ကွၢ်ကွၢ်,နသန့ၤနသးလၢနီၣ်ထိးဘိအံၤ,တပိၢ်လၢအကၢ်ပိၤအသးတဘိ,လၢအဲၤကူပတူးလၢပှၤမ့ၢ်သန့ၤအသးလၢအီၤဒီး,ကနုာ်လၢအစုပူၤ,ဒီးဆဲးနုာ်အီၤလီၤ.အဲၤကူပတူးအစီၤပၤဖၤရိၤမၤအသးဒ်န့ၣ်လၢကယဲၢ်ပှၤလၢအသန့ၤအသးလၢအီၤလီၤ. 7ဒီးနမ့ၢ်စံးဘၣ်ယၤ,ပသန့ၤပသးလၢယွၤပကစၢ်န့ၣ်ဒီး,အဝဲဒၣ်မ့ၢ်ပှၤလၢစီၤဃံးစကံယၤဟံးထီၣ်ကွံာ်အလီၢ်ထီၣ်ထီတဖၣ်,ဒီးအတၢ်လုၢ်လီၢ်တဖၣ်,ဒီးစံးလၢယူဒၤဒီးယရူၤၡလ့ၣ်,သုဘၣ်ဘူၣ်တၢ်ဘါတၢ်လၢတၢ်လုၢ်လီၢ်အံၤအမဲာ်ညါန့ၣ်တမ့ၢ်ဘၣ်ဧါ. 8ဒီးခဲကနံၣ်အံၤအၢၣ်လီၤအီလီၤလၢ်တၢ်ဒီးယကစၢ်အၤရှူၢ်အစီၤပၤန့ၣ်တက့ၢ်,ဒီးနဲဒၣ်တခီနပာ်ပှၤဒိးကသ့ၣ်လၢအလိၤမ့ၢ်သ့ဒီး,ယကဟ့ၣ်နၤလၢကသ့ၣ်ခံကထိလီၤ. 9မၤသးဒ်န့ၣ်ဒီးနကဘိးဃၣ်ကဒါယကစၢ်အပဒိၣ်လၢအဆံးကတၢၢ်အကျါတဂၤ,ဒီးသန့ၤနသးလၢအဲၤကူပတူးလၢလ့ၣ်ကဟၣ်အဂ့ၢ်,ဒီးလၢကသ့ၣ်အဂ့ၢ်န့ၣ်ဒ်လဲၣ်. 10ဒီးခဲကနံၣ်အံၤယွၤတအိၣ်ဘၣ်ဒီး,ယဟဲထီဒါကီၢ်တဘ့ၣ်အံၤဒ်သိးယကမၤဟးဂီၤအီၤဧါ.ယွၤစံးဘၣ်ယၤ,လဲၤထီၣ်ဆူကီၢ်တဘ့ၣ်အံၤဒီးမၤဟးဂီၤအီၤတက့ၢ်လီၤ. 11ဒီးစီၤအ့ၤလယါကံၣ်,ဒီးစီၤရှ့ၤဘနၤ,ဒီးစီၤယိၤအၤတဖၣ်စံးဘၣ်စီၤရၤဘၡါက့ၤ,ကတိၤလၢ်လၢအၤရၣ်အကျိာ်ဒီးနခ့နပှၤတက့ၢ်.အဂ့ၢ်ဒ်အံၤ,ပနၢ်ပၢၢ်လီၤ.ဒီးကတိၤတၢ်လၢယူဒၤအကျိာ်ဒီးပှၤလၢပှၤဂီၢ်မုၢ်လၢအအိၣ်လၢခိၣ်ဒူအဖီခိၣ်န့ၣ်အနၢ်ပူၤတဂ့ၤ. 12ဒီးစီၤရၤဘၡါက့ၤစံးဝဲဒၣ်,ယကစၢ်မၢလီၤယကတိၤတၢ်ကတိၤအံၤဒီးနကစၢ်ဒီးနၤစ့ၢ်ကီးဧါ.မ့ၢ်လၢပှၤဆ့ၣ်နီၤလၢခိၣ်ဒူအဖီခိၣ်လၢအကအီၣ်အအ့ၣ်ဒၣ်ဝဲ,ဒီးအီအဆံၣ်ထံဒၣ်ဝဲအိၣ်ဒီးသုတမ့ၢ်ဘၣ်ဧါ. 13ဒီးစီၤရၤဘၡါက့ၤဆၢထၢၣ်ဒီးကိးထီၣ်လၢအကလုၢ်ဖးဒိၣ်လၢယူဒၤအကျိာ်န့ၣ်,ဒီးစံးဝဲဒၣ်,ကနၣ်စီၤပၤဖးဒိၣ်,အၤရှူၢ်အစီၤပၤအကလုၢ်တက့ၢ်. 14စီၤပၤစံးဒ်အံၤ,မ်သုသုတဟ့ၣ်စီၤဃံးစကံယၤလီန့ၢ်သုတဂ့ၤ,အဂ့ၢ်ဒ်အံၤမၤပူၤမၤဖျဲးသုတသ့ဘၣ်. 15ဒီးစီၤဃံးစကံယၤစံးဘၣ်သု,ယွၤကအုၣ်က့ၤခီၣ်က့ၤပှၤသပှၢ်တၢၢ်,ဝ့ၢ်တဖျၢၣ်အံၤတၢ်တဟ့ၣ်လီၤကွံာ်ဘၣ်အီၤလၢအၤရှူၢ်အစီၤပၤအစုဘၣ်န့ၣ်သတးဒီး,မ်အသုတဒုးသန့ၤသုသးလၢယွၤတဂ့ၤ. 16ဒိကနၣ်စီၤဃံးစကံယၤအကလုၢ်တဂ့ၤ,အဂ့ၢ်ဒ်အံၤ,အၤရှူၢ်အစီၤပၤစံးဒ်အံၤ,မၤဒီးယၤလၢတၢ်ဆိၣ်ဂ့ၤ,ဒီးဟဲထီၣ်ဆူယအိၣ်,ဒီးအီၣ်တဂၤလၢအစပံးမုၢ်ဒၣ်ဝဲ,တဂၤလၢအချၢၣ်ဒၢဒၣ်ဝဲ,ဒီးအီတဂၤလၢအထံပူၤဒၣ်ဝဲကိးဂၤဒဲး, 17တုၤယဟဲဒီးစိာ်ထီၣ်သုဆူကီၢ်တဘ့ၣ်မၤသးဒ်သုကီၢ်ဒၣ်သုဝဲအသိး,ကီၢ်တဘ့ၣ်အိၣ်ဒီးဘုကၠူၣ်ဒီးစပံးထံ,ကီၢ်တဘ့ၣ်အိၣ်ဒီးကိၣ်,ဒီးစပံးအလီၢ်တဖၣ်န့ၣ်လီၤ. 18စီၤဃံးစကံယၤစံး,ယွၤကမၤပူၤမၤဖျဲးပှၤသတးဒီး,မ်အသုတလွဲန့ၢ်သုတဂ့ၤ,ပှၤကလုာ်တဖၣ်အကစၢ်တဂၤဂၤမၤပူၤမၤဖျဲးအထံအကီၢ်လၢအၤရှူၢ်အစီၤပၤအစုပူၤန့ၣ်စ့ၢ်ကီးဧါ. 19ဃမါသး,ဒီးအၢ်ပးအကစၢ်တဖၣ်အိၣ်ဖဲလဲၣ်.စဖၤရဝံၣ်အကစၢ်တဖၣ်အိၣ်ဖဲလဲၣ်.ဒီးတၢ်မၤပူၤမၤဖျဲးၡၤမရံလၢယစုပူၤစ့ၢ်ကီးဧါ. 20ဒ်သိးယွၤကမၤပူၤမၤဖျဲးယရူၤၡလ့ၣ်လၢယစုပူၤန့ၣ်ဒီးလၢကီၢ်တဖၣ်န့ၣ်အကစၢ်ခဲလၢာ်အကျါန့ၣ်မ့ၢ်မတၤမၤပူၤအထံအကီၢ်လၢယစုပူၤတဂၤလဲၣ်. 21ဒီးအဝဲသ့ၣ်အိၣ်ဘှီၣ်ကလာ်ဒီးတစံးဆၢတၢ်နီတမံၤဘၣ်.အဂ့ၢ်ဒ်အံၤ,စီၤပၤမၤလိာ်တၢ်,ဒီးစံးဝဲဒၣ်,စံးဆၢအီၤနီတမံၤတဂ့ၤန့ၣ်လီၤ. 22ဒီးစီၤဃံးလကံယၤအဖိခွါစီၤအ့ၤလယါကံၣ်လၢအအအိၣ်လၢဟံၣ်အဖီခိၣ်,ဒီးပှၤကွဲးလံာ်စီၤရှ့ၤဘနၤ,ဒီးပှၤကွဲးနီၣ်တၢ်စီၤအၤစာ်အဖိခွါစီၤယိၤအၤတဖၣ်န့ၣ်က့ၤက့ၤဆူစီၤဃံးစကံယၤအအိၣ်,အိၣ်ဒီးအဆ့ယာ်,ဒီးစံးဘၣ်အီၤလၢစီၤရၤဘၡါက့ၤအတၢ်ကတိၤတဖၣ်န့ၣ်လီၤ.
Copyright information for
KswSKMB