‏ Isaiah 37

1ဒီးတုၤစီၤဃံးစကံယၤနၢ်ဟူတၢ်န့ၣ်ဒီး,တၢ်မၤအသးလၢအဖှီအဆ့,ဒီးကၤဝဲလၢထၢၣ်အတၢ်ကံးညာ်,ဒီးလဲၤနုာ်လၢယွၤအဟံၣ်ပူၤလီၤ.

2ဒီးမၢလီၤစီၤအ့ၤလယါကံၣ်လၢအအိၣ်လၢဟံၣ်အဖီခိၣ်,ဒီးပှၤကွဲးလံာ်စီၤရှ့ၤဘနၤ,ဒီးပှၤလုၢ်တၢ်အဒိၣ်တဖၣ်အပှၤသူၣ်က့သးပှၢ်ကၤဝဲလၢထၢၣ်အတၢ်ကံးညာ်,ဆူစီၤအၤမိာ်အဖိခွါဝံယၡါယၤအအိၣ်န့ၣ်လီၤ.

3ဒီးအဝဲသ့ၣ်တဖၣ်န့ၣ်စံးဘၣ်အီၤ,စီၤဃံးစကံယၤစံးဒ်အံၤ,တၢ်လၢမုၢ်မဆါတနံၤအံၤမ့ၢ်တၢ်ကိၢ်တၢ်ဂီၤ,ဒီးတၢ်သိၣ်ဃီၣ်,ဒီးတၢ်မၤတရီတပါအနံၤလီၤ.အဂ့ၢ်ဒ်အံၤ,ဖိသၣ်တုၤဖဲအကအိၣ်ဖျဲၣ်အဆၢကတီၢ်,ဒီးအဂံၢ်အဘါလၢပှၤကဆံးစၢ်န့ၣ်တအိၣ်ဘၣ်. 4ဘၣ်တဘၣ်ယွၤနကစၢ်ကနၢ်ဟူစီၤရၤဘၡါက့ၤအတၢ်ကတိၤ,လၢအကစၢ်အၤရှူၢ်အစီၤပၤမၢလီၤဒ်သိးအကဒုၣ်ဒွဲၣ်ကစၢ်လၢအမူဝဲန့ၣ်,ဒီးကသိၣ်ဃီၣ်တၢ်ကတိၤန့ၣ်လၢယွၤနကစၢ်နၢ်ဟူတ့ၢ်လီၤ.မၤသးဒ်န့ၣ်ဒီးဘါထုကဖၣ်တၢ်လၢပှၤအိၣ်လီၤတဲာ်ဒံးတဖၣ်အဂီၢ်တက့ၢ်.

5ဒီးစီၤပၤဃံးစကံယၤအခ့အပှၤန့ၣ်လဲၤဆူစီၤယၡါယၤအအိၣ်လီၤ.

6ဒီးစီၤယၡါယၤစံးဘၣ်အီၤ,သုဘၣ်စံးဘၣ်သုကစၢ်ဒ်အံၤ,ယွၤစံးဒ်အံၤ,ပျံၤတၢ်ကတိၤလၢနနၢ်ဟူလၢအၤရှူၢ်အစီၤပၤအခ့အပှၤဒုၣ်ဒွဲၣ်ယၤန့ၣ်တဂ့ၤ, 7ကွၢ်ကွၢ်,ယကပာ်သးတမံၤလၢအပူၤ,ဒီးကနၢ်ဟူတၢ်အကစီၣ်ဒီးက့ၤကဒါက့ၤဆူအကီၢ်ဒၣ်ဝဲ,ဒီးယကဒုးလီၤဃံၤအီၤလၢနးလၢအကီၢ်ဒၣ်ဝဲအပူၤလီၤ.

8ဒီးစီၤရၤဘၡါက့ၤန့ၣ်က့ၤက့ၤဝဲ,ဒီးထံၣ်န့ၢ်အၤရှူၢ်အစီၤပၤဒုးတၢ်ဒီးလံးဘနၤလီၤ.အဂ့ၢ်ဒ်အံၤ,နၢ်ဟူဝဲလၢအဟးထီၣ်လၢလၤကံၣ်န့ၣ်လီၤ.

9ဒီးအဝဲဒၣ်နၢ်ဟူတၢ်စံးလၢကူၤၡးအစီၤပၤစီၤတံရတၤကၤအဂ့ၢ်,ဟဲထီၣ်ဝဲလၢအကဒုးတၢ်ဒီးနၤန့ၣ်လီၤ.ဒီးတုၤအနၢ်ဟူဝဲဒီး,မၢလီၤအကလူးတဖၣ်ဆူစီၤဃံးစကံယၤအအိၣ်,ဒီးစံးဝဲဒၣ်, 10သုဘၣ်စံးလၢယူဒၤအစီၤပၤစီၤဃံးစကံယၤဒ်အံၤ,နကစၢ်လၢနသန့ၤနသးလၢအီၤတဂၤစံးဘၣ်နၤ,တၢ်တဟ့ၣ်လီၤယရူၤၡလ့ၣ်ဆူအၤရှူၢ်အစီၤပၤအစုပူၤဘၣ်န့ၣ်,မ်အသုတလီန့ၢ်နၤတဂ့ၤ.

11ကွၢ်ကွၢ်,တၢ်လၢအၤရှူၢ်အစီၤပၤတဖၣ်မၤထံဧိၤကီၢ်ဧိၤခဲလၢာ်,လၢအမၤဟးဂီၤအီၤစီဖ့ကလ့ၤန့ၣ်နနၢ်ဟူလံဒီးနကပူၤဖျဲးနဲစ့ၢ်ကီးဧါ.

12ပှၤအကလုာ်လၢယပၢ်တဖၣ်မၤဟးဂီၤအီၤ,ကိစၣ်,ဒီးဃရၣ်,ဒီးရ့စ့း,ဒီးပှၤဧ့ဒ့ၣ်ဖိလၢအအိၣ်လၢသလးစၢ်အပူၤန့ၣ်အကစၢ်တဖၣ်မၤပူၤဖျဲးအီၤစ့ၢ်ကီးဧါ.

13ဃမါသးအစီၤပၤ,ဒီးအၢ်ပးအစီၤပၤ,ဒီးဝ့ၢ်စဖၤရဝံၣ်,ဟ့နၤဒီးဧးဝါအစီၤပၤန့ၣ်မ့ၢ်အအိၣ်ဖဲလဲၣ်.

14ဒီးစီၤဃံးစကံယၤန့ၣ်ဟံးန့ၢ်လံာ်လၢကလူးတဖၣ်အစုပူၤ,ဒီးဖးဝဲ,ဒီးလဲၤထီၣ်ဝဲဆူယွၤအဟံၣ်ပူၤ,ဒီးစီၤဃံးစကံယၤသလၣ်ထီၣ်ဝဲလၢယွၤအမဲာ်ညါလီၤ.

15ဒီးစီၤဃံးစကံယၤဘါထုကဖၣ်ယွၤ,ဒီးစံးဝဲဒၣ်, 16တၢ်သုးမုၢ်ဂီၢ်မုၢ်အယွၤ,အံၣ်စရ့လးအကစၢ်လၢအအိၣ်ဝဲလၢခ့ရူာ်အဘၢၣ်စၢၤတဂၤဧၢ,နဲဒၣ်နမ့ၢ်ကစၢ်တဂၤဃီလၢဟီၣ်ခိၣ်အဘီမုၢ်ခဲလၢာ်အဖီခိၣ်လီၤ.နတ့လီၤမူခိၣ်ဒီးဟီၣ်ခိၣ်လီၤ. 17ပာ်ဒိးနနၢ်,ယွၤဧၢ,ဒီးကနၣ်တက့ၢ်.အိးထီၣ်နမဲာ်,ယွၤဧၢ,ဒီးထံၣ်တၢ်,ဒီးကနၣ်စီၤစၤနဃ့ရံာ်အတၢ်ကတိၤခဲလၢာ်လၢအဟ့ၣ်ယုၢ်ဝဲဒ်သိးအကဒုၣ်ဒွဲၣ်ကစၢ်လၢအမူဝဲန့ၣ်တက့ၢ်. 18မ့ၢ်မး,ယွၤဧၢ,အၤရှူၢ်အစီၤပၤတဖၣ်မၤဟးဂီၤဘီမုၢ်ခဲလၢာ်,ဒီးအထံအကီၢ်, 19ဒီးကွံာ်တ့ၢ်အကစၢ်တဖၣ်လၢမ့ၣ်အူပူၤ,(အဂ့ၢ်ဒ်အံၤ,တမ့ၢ်ဘၣ်ကစၢ်ဘၣ်,မ့ၢ်သ့ၣ်ဧိၤဝၣ်ဧိၤ,ဒီးလၢၢ်ဧိၤလ့ဧိၤ,ပှၤကညီအမၤတၢ်လၢအစုလီၤ),ဒီးမၤဟးဂီၤကွံာ်အီၤလီၤ.

20ဒီးခဲကနံၣ်အံၤ,ယွၤပကစၢ်ဧၢ,အုၣ်က့ၤခီၣ်က့ၤပှၤလၢအစုပူၤတက့ၢ်.ဒီးဟီၣ်ခိၣ်အဘီအမုၢ်ခဲလၢာ်ကသ့ၣ်ညါလၢနမ့ၢ်ယွၤ,ထဲနၤတဂၤဧိၤလီၤ.

21ဒီးစီၤအၤမိာ်အဖိခွါစီၤယၡါယၤမၢလီၤတၢ်ဆူစီၤဃံးစကံယၤ,ဒီးစံးဝဲဒၣ်ယွၤအံၣ်စရ့လးအကစၢ်စံးဝဲဒ်အံၤ,တၢ်လၢနဘါထုကဖၣ်ယၤလၢအၤရှူၢ်အစီၤပၤစီၤစၤနဃ့ရံာ်အဂ့ၢ်န့ၣ်, 22အအံၤမ့ၢ်တၢ်ကတိၤလၢယွၤကတိၤလံလၢအဂ့ၢ်,ပှၤမုၣ်လိၣ်ဘိ,စံယိၣ်အဖိမုၣ်န့ၣ်တပးကဲဘၣ်နၤဘၣ်,နံၤဘၣ်ဖၣ်လဲဘၣ်နၤ,ယရူၤၡလ့ၣ်အဖိမုၣ်ကျၢၢ်ကျာ်အခိၣ်လၢနၤလံ. 23နဒုၣ်ဒွဲၣ်ဒီးပယွဲမတၤတဂၤလဲၣ်.ဒီးနထုထီၣ်နကလုၢ်လၢမတၤတဂၤအဖီခိၣ်လဲၣ်.ဒီးနကျ့ထီၣ်နမဲာ်ထီၣ်ထီလၢမတၤတဂၤအဖီခိၣ်လဲၣ်.နထီဒါအံၣ်စရ့လးအတၢ်စီဆှံတဂၤန့ၣ်လီၤ.

24နဒုၣ်ဒွဲၣ်ယွၤလၢနခ့နပှၤအစုပူၤ,ဒီးနစံး,ယထီၣ်ဘးကစၢၢ်အတၢ်ထီတဖၣ်,လဘၤနိၣ်အကပၤ,လၢယလ့ၣ်ကဟၣ်ဂီၢ်မုၢ်,ဒီးယကကူာ်လီၤကွံာ်အသ့ၣ်ဆှိအ့ရ့းအထီ,ဒီးအသ့ၣ်ဆှိအဂ့ၤကတၢၢ်,ဒီးယကထီၣ်ဘးအလီၢ်ထီကတၢၢ်,တၤသၣ်အလီၢ်အပှၢ်ဒိၣ်လာ်လီၤ. 25ယခူၣ်လီၤတၢ်,ဒီးအီထံ,ဒီးယကမၤလီၤသံးအဲၤကူပတူးအထံကျိခဲလၢာ်လၢယခီၣ်ညါသးလီၤ.

26လၢထံးလၢမကိာ်ယမၤယဲ,ဒီးလၢမုၢ်နံၤတဖၣ်လၢပျၢၤယမၤအီၤန့ၣ်,နတနၢ်ဟူဘၣ်ဧါ.ခဲကနံၣ်အံၤ,ယဒုးဟဲတၢ်မၤအသးဒ်သိးအကမၤလူၤဝ့ၢ်အိၣ်ဒီးအခိၣ်ဒူတတဖၣ်ဒီးပာ်အီၤဒ်တၢ်ပူအိၣ်သယုၢ်အသိးန့ၣ်လီၤ. 27မၤသးဒ်န့ၣ်ဒီးပှၤအိၣ်ဝဲဆိးဝဲတဖၣ်န့ၣ်အစုလီၤဖုၣ်အသးလီၤ,ပျံၤတၢ်ဖုးတၢ်,ဒီးပာ်ဆှးအမဲာ်,မ့ၢ်တီၢ်မုၢ်လၢပှၢ်လၢ်ကျါ,ဒီးနိၣ်ဧိၤမံၤဧိၤသံကစဲာ်,ဒီးနီၣ်အိၣ်လၢဟံၣ်ခိၣ်,ဒီးစံာ်ဧိၤပှဲၤဧိၤလၢဘုအဘိတချုးအိၣ်ထီၣ်ဒံးဘၣ်လီၤ. 28ဒီးနဆ့ၣ်နီၤ,ဒီးနလဲၤထီၣ်,ဒီးနဟဲနုာ်န့ၣ်ယသ့ၣ်ညါ,ဒီးနသးထီၣ်ဘၣ်ယၤလီၤ.

29မ့ၢ်နသးထီၣ်ဘၣ်ယၤ,ဒီးနပာ်နသးထီၣ်ထီန့ၣ်ဟဲထီၣ်လၢယနၢ်ပူၤဒီး,ယကပာ်ယနီၣ်ကွးလၢနနါဒ့ပူၤ,ဒီးယထးအ့ၣ်ပျံၤလၢနခၣ်ပူၤ,ဒီးယကဘိးဃၣ်ကဒါက့ၤနၤလၢကျဲလၢနဟဲလီၤ.

30ဒီးအအံၤကကဲထီၣ်တၢ်အပနီၣ်လၢနဂီၢ်,အအံၤတနံၣ်အံၤအီၣ်တၢ်လၢအမဲထီၣ်ဒၣ်တၢ်,ဒီးပှဲၤထီၣ်ခံနံၣ်တနံၣ်န့ၣ်တၢ်လၢအမဲထီၣ်ဒၣ်တၢ်လၢအဝဲန့ၣ်,ဒီးပှဲၤထီၣ်သၢနံၣ်တနံၣ်ဖှံတၢ်,ဒီးကူးတၢ်,ဒီးသူၣ်စပံးမုၢ်တဖၣ်,ဒီးအီၣ်အတၤသၣ်န့ၣ်တက့ၢ်.

31ဒီးတၢ်ပူၤဖျဲးလၢယူဒၤအပှၤဟံၣ်ဖိအကျါလၢအအိၣ်လီၤတဲာ်န့ၣ်ကစဲၤလီၤအဂံၢ်ဆူတၢ်အဖီလာ်,ဒီးသၣ်ထီၣ်တၢ်ဆူတၢ်အဖီခိၣ်လီၤ.

32အဂ့ၢ်ဒ်အံၤ,လၢယရူၤၡလ့ၣ်အပူၤန့ၣ်တၢ်အိၣ်လီၤတဲာ်ကလဲၤထီၣ်,ဒီးတၢ်ပူၤဖျဲးလၢကစၢၢ်စံယိၣ်န့ၣ်လီၤ.တၢ်သုးမုၢ်ဂီၢ်မုၢ်အယွၤအသးဆူၣ်ကမၤတၢ်န့ၣ်လီၤ.

33မၤသးဒ်န့ၣ်ဒီးယွၤစံးလၢအၤရှူၢ်အစီၤပၤအဂ့ၢ်ဒ်အံၤ,တဘၣ်ဟဲနုာ်ဘၣ်လၢဝ့ၢ်တဖျၢၣ်အံၤအပူၤဘၣ်,တဘၣ်ခးဘၣ်ပျၢ်တဘိဖဲန့ၣ်ဘၣ်,ဒီးတဘၣ်ဟဲထီၣ်လၢအမဲာ်ညါဒီးကတီၤဘၣ်,ဒီးတဘၣ်မၤထီၣ်တၢ်ခိၣ်ဒူလၢအမဲာ်ညါဘၣ်. 34ဒီးကျဲလၢအဟဲန့ၣ်ကက့ၤက့ၤလၢကျဲတဘိန့ၣ်,ဒီးတဘၣ်ဟဲနုာ်ဘၣ်ဆူဝ့ၢ်ပူၤအံၤဘၣ်,ယွၤစံးဝဲ, 35ဒီးယကအိၣ်ပှိၤဝ့ၢ်တဖျၢၣ်အံၤဒ်သိးယကအုၣ်က့ၤခီၣ်က့ၤအီၤ,လၢယဂီၢ်ဒၣ်ယဲ,ဒီးလၢယခ့ယပှၤစီၤဒၤဝံးအဃိလီၤ.

36ဒီးယွၤအကလူးန့ၣ်ဟးထီၣ်,ဒီးကျီကွံာ်ပှၤကညီတကလီၤဃိးကလးယဲၢ်ကထိလၢအၤရှူၢ်သူၣ်ဒဲအပူၤန့ၣ်,ဒီးမုၢ်ဆ့ၣ်ထီၣ်န့ၣ်ပှၤဂဲၤဆၢထၢၣ်ဂီၤဂီၤ,ဒီးကွၢ်ကွၢ်,ပှၤတဖၣ်န့ၣ်ခဲလၢာ်မ့ၢ်ပှၤအစိၣ်လီၤ.

37တုၤနုၤတစုအၤရှူၢ်အစီၤပၤစၤနဃ့ရံာ်ဟးထီၣ်,ဒီးလဲၤဝဲ,ဒီးက့ၤဝဲ,ဒီးအိၣ်ဝဲလၢနံၤနဝ့လီၤ. 38ဒီးအဝဲဒၣ်ဘူၣ်တၢ်ဘါတၢ်လၢအကစၢ်နံးစရိးအဟံၣ်ပူၤအဖၢမုၢ်ဒီး,အဖိခွါစီၤအဒြၤမ့ၤလ့း,ဒီးစီၤၡၢ်အ့စ့ၢ်န့ၣ်ကျီကွံာ်အီၤလၢနး,ဒီးအဝဲသ့ၣ်ထူၣ်ဖျဲးဆူကီၢ်အရၤရးအပူၤ,ဒီးအဖိခွါစီၤအ့ၤစၢ်ဃးဒိၣ်ကဲထီၣ်စီၤပၤလၢအလီၢ်န့ၣ်လီၤ.