Isa 39 | KswSKMB | STEP | တၢ်လၢအကတီၢ်န့ၣ်ဘၤဘူၤလိၣ်အစီၤပၤဘၤလဒၣ်အဖိခွါစီၤမရိဒးဘၤလဒၣ်တဂၤဟ့ၣ်ယုၢ်လံာ်ဒီးခိၣ်ဖးလၢစီၤဃံးစကံယၤ,အဂ့ၢ်ဒ်အံၤ,နၢ်ဟူလၢအဆါတ့ၢ်ဝဲ,ဒီးဘျါက့ၤဝဲလီၤ.

‏ Isaiah 39

1 တၢ်လၢအကတီၢ်န့ၣ်ဘၤဘူၤလိၣ်အစီၤပၤဘၤလဒၣ်အဖိခွါစီၤမရိဒးဘၤလဒၣ်တဂၤဟ့ၣ်ယုၢ်လံာ်ဒီးခိၣ်ဖးလၢစီၤဃံးစကံယၤ,အဂ့ၢ်ဒ်အံၤ,နၢ်ဟူလၢအဆါတ့ၢ်ဝဲ,ဒီးဘျါက့ၤဝဲလီၤ.

2 ဒီးစီၤဃံးစကံယၤန့ၣ်သးခုလၢအဃိ,ဒီးဒုးနဲၣ်အီၤလၢအတၢ်လုၢ်ဒိၣ်ပှ့ၤဒိၣ်အဟံၣ်,ကျိၣ်ဧိၤစ့ဧိၤ,ဒီးထူဧိၤလွဲဧိၤ,ဒီးတၢ်နၢမူ,ဒီးသိအဂ့ၤ,ဒီးအစုကဝဲၤအဟံၣ်ဒီဖျၢၣ်ညါ,ဒီးကယဲၢ်အတၢ်လၢအအိၣ်လၢအတၢ်လုၢ်ဒိၣ်ပှ့ၤဒိၣ်အကျါန့ၣ်လီၤ.တၢ်လၢစီၤဃံးစကံယၤတဒုးနဲၣ်ဘၣ်အီၤန့ၣ်တအိၣ်ဘၣ်လၢအဟံၣ်ပူၤ,ဒီးတအိၣ်ဘၣ်လၢအဘီမုၢ်ဒီဘ့ၣ်ညါအပူၤနီတမံၤဘၣ်.

3 တုၤနုၤတစုဝံယၡါယၤတဂၤန့ၣ်လဲၤဆူစီၤပၤဃံးစကံယၤအအိၣ်,ဒီးစံးဘၣ်အီၤ,ပှၤတဖၣ်န့ၣ်စံးဝဲဒ်လဲၣ်,ဒီးဟဲဆူနအိၣ်လၢလဲၣ်.ဒီးစီၤဃံးစကံယၤစံးဝဲဒၣ်,ဟဲဝဲဆူယအိၣ်လၢထံယံၤကီၢ်ယံၤတဘ့ၣ်,လၢဘၤဘူၤလိၣ်န့ၣ်လီၤ.

4 ဒီးစံးဝဲဒၣ်,မ့ၢ်အထံၣ်ဘၣ်တၢ်လၢနဟံၣ်ပူၤမနုၤလဲၣ်.ဒီးစီၤဃံးစကံယၤစံးဝဲဒၣ်,ထံၣ်ဘၣ်ကယဲၢ်တၢ်လၢအအိၣ်လၢယဟံၣ်ပူၤခဲလၢာ်လီၤ.တၢ်လၢယတဒုးနဲၣ်ဘၣ်အီၤန့ၣ်တအိၣ်ဘၣ်လၢယတၢ်လုၢ်ဒိၣ်ပှ့ၤဒိၣ်အကျါနီတမံၤဘၣ်.

5 ဒီးစီၤယၡါယၤစံးဘၣ်စီၤဃံးစကံယၤ,ကနၣ်တၢ်သုးမုၢ်ဂီၢ်မုၢ်အယွၤအကလုၢ်တက့ၢ်.

6 ကွၢ်ကွၢ်,မုၢ်နံၤတဖၣ်ကဟဲလၢကယဲၢ်တၢ်အိၣ်လၢနဟံၣ်ပူၤ,ဒီးတၢ်လၢနပၢ်တဖၣ်ပာ်ဖှိၣ်ဝဲတုၤမုၢ်မဆါတနံၤအံၤ,တၢ်ကစိာ်ထီၣ်ကွံာ်အီၤဆူဘၤဘူၤလိၣ်လီၤ.တၢ်တအိၣ်လီၤတဲာ်ဘၣ်နီတမံၤဘၣ်,ယွၤစံးဝဲဒၣ်.

7 ဒီးကစိာ်ကွံာ်နဖိခွါလၢအလီၤစၢၤလၢနၤ,လၢနထီၣ်ဖိအီၤ,ဒီးကကဲထီၣ်ပှၤဒ့ဒံၣ်ဖိလၢဘၤဘူၤလိၣ်အစီၤပၤအနူၢ်ပူၤလီၤ.

8 ဒီးစီၤဃံးစကံယၤစံးဘၣ်စီၤယၡါယၤ,ယွၤအတၢ်ကတိၤလၢနကတိၤတၢ်န့ၣ်ဂ့ၤဝဲလီၤ.ဒီးစံးဝဲဒၣ်,အဂ့ၢ်ဒ်အံၤတၢ်ဃူတၢ်ဖိးဒီးတၢ်မ့ၢ်တၢ်တီကအိၣ်ဝဲလၢယမုၢ်နံၤတဖၣ်အပူၤန့ၣ်လီၤ.