Isaiah 41
1ကီးသ့ၣ်ဧၢ,အိၣ်ဘှီၣ်ကလာ်လၢယမဲာ်ညါတက့ၢ်,ဒီးမ်ပှၤကလုာ်တဖၣ်န့ၣ်ဒုးဆူၣ်ထီၣ်အဂံၢ်အဘါတက့ၢ်.မ်အသုးဘူးအသး,တုၤနုၤတစုမ်အကတိၤတၢ်တက့ၢ်.မ်ပသုးဘူးသကိးပသးဆူတၢ်စံၣ်ညီၣ်ကွီၢ်န့ၣ်တက့ၢ်. 2မ့ၢ်မတၤထိၣ်ဂဲၤထၢၣ်ပှၤလၢမုၢ်ထီၣ်တခီတဂၤလဲၣ်.တၢ်တီကိးအီၤဆူအခီၣ်ထံး,ဟ့ၣ်လီၤကွံာ်ပှၤကလုာ်တဖၣ်လၢအမဲာ်ညါ,ဒီးဒုးယီၢ်လီၤအီၤလၢစီၤပၤတဖၣ်,ဟ့ၣ်လီၤအီၤဆူအနးအဘီဒ်ဟီၣ်ခိၣ်အကမူၣ်အသိး,ဒီးဆူအချံၣ်ဧိၤပျၢ်ဧိၤ,ဒ်လီၢ်ဧိၤဒံးဧိၤလီၤလဲလၢကလံၤအူဘၣ်အီၤအသိးန့ၣ်လီၤ. 3အဝဲဒၣ်လူၤအီၤ,ဒီးခီဂာ်တၢ်မုာ်မုာ်,လၢကျဲလၢအတပိာ်တ့ၢ်ဘၣ်လၢအခီၣ်ဘၣ်. 4မ့ၢ်မတၤကိးန့ၢ်ပှၤတစိၤလၢအခီၣ်ထံးန့ၣ်သတးဒီး,မၤတၢ်ဒီးဒုးကဲထီၣ်တၢ်န့ၣ်တဂၤလဲၣ်.ယဲဒၣ်,ယွၤ,တၢ်အခီၣ်ထံး,ဒီးအိၣ်ဒီးအခံကတၢၢ်န့ၣ်,ယၤလီၤ. 5ကီးတဖၣ်ထံၣ်ဘၣ်ဝဲဒီးပျံၤတၢ်,ဟီၣ်ခိၣ်အကတၢၢ်တဖၣ်ကနိးကစုာ်လီၤ.သုးဘူးအသးဒီးဟဲဝဲန့ၣ်လီၤ. 6ပှၤမၤစၢၤလိာ်အသးတဂၤဒီးတဂၤစုာ်စုာ်,ဒီးစံးအဒီပုၢ်ဝဲၢ်,ပာ်ဆူၣ်နသးတက့ၢ်. 7ဒီးပှၤမၤတၢ်သ့န့ၣ်ဒုးဆူၣ်ထီၣ်ပှၤပိာ်ထူဖိ,ပှၤလၢအမၤဃူတၢ်လၢခံၣ်ခူၣ်န့ၣ်ပှၤလၢအတီၢ်တၢ်လၢထးလာ်အဖီခိၣ်,ဒီးစံးဝဲ,တၢ်စဲဘူးမ့ၢ်အဂ့ၤလီၤ.ဒီးမၤဃာ်ဝဲလၢထးပနဲာ်ဒ်သိးအသုတဟူးဝးတဂ့ၤလီၤ. 8ဒီးနဲဒၣ်ယခ့ယပှၤအံၣ်စရ့လး,ယၤကိာ်လၢယဃုထၢအီၤ,ယတံၤယသကိးစီၤအၤဘြၤဟၣ်အချံအသၣ်, 9နဲဒၣ်လၢယဟံးဃာ်လၢဟီၣ်ခိၣ်အကတၢၢ်,ဒီးကိးန့ၢ်နၤလၢအကပၤတဖၣ်,ဒီးစံးဘၣ်နၤ,နဲဒၣ်နမ့ၢ်ယခ့ယပှၤလီၤ.ယဃုထၢလံနၤလံ,ဒီးယတညိကွံာ်ဘၣ်နၤဘၣ်. 10ပျံၤတၢ်တဂ့ၤအဂ့ၢ်ဒ်အံၤ,ယအိၣ်ဒီးနၤလီၤ.ကွၢ်တရံးတၢ်တဂ့ၤ,အဂ့ၢ်ဒ်အံၤ,ယမ့ၢ်နကစၢ်လီၤ.ယဒုးဆူၣ်ထီၣ်လံနဂံၢ်နဘါလံ,မ့ၢ်မးယမၤစၢၤလံနၤလံ.မ့ၢ်မးယဒုးအိၣ်ကျၢၤလံနၤလၢယစုထွဲအတီအလိၤန့ၣ်လီၤ. 11ကွၢ်ကွၢ်,ကယဲၢ်ပှၤလၢအသးထီၣ်နၤန့ၣ်အမဲာ်ကဆှးဒီးကပာ်ဆှးအမဲာ်လီၤ.ပှၤလၢအဂ့ၢ်လိာ်ဘှီလိာ်ဒီးနၤတဖၣ်န့ၣ်တကဲထီၣ်တၢ်နီတမံၤဘၣ်,ဒီးကတုၤလၢတၢ်ဟးဂူာ်ဟးဂီၤလီၤ. 12ဒီးနကဃုအီၤဒီးနတထံၣ်န့ၢ်ဘၣ်ပှၤလၢအဂ့ၢ်လိာ်ဘှီလိာ်ဒီးနၤဘၣ်.ပှၤလၢအဒုးတၢ်ဒီးနၤတဖၣ်ကကဲထီၣ်ဒ်တၢ်နီတမံၤဘၣ်အသိးန့ၣ်,ဒီးဒ်တၢ်တမ့ၢ်ဘၣ်တၢ်ဘၣ်အသိးလီၤ. 13အဂ့ၢ်ဒ်အံၤ,ယဲဒၣ်ယွၤနကစၢ်အံၤယဟံးဃာ်နစုထွဲ,ဒီးစံးလၢနၤ,ပျံၤတၢ်တဂ့ၤ.ယမၤစၢၤလံနၤလံ. 14ပျံၤတၢ်တဂ့ၤ,လၢၣ်ဧိၤဆှးဧိၤယၤကိာ်,ဒီးအံၣ်စရ့လးအပှၤကညီသ့ၣ်ဧၢ,ယမၤစၢၤလံနၤ,ယွၤဒီးပှၤလၢအပှ့ၤက့ၤနၤ,အံၣ်စရ့လးအတၢ်စီဆှံတဂၤစံးဝဲဒၣ်လီၤ. 15ကွၢ်ကွၢ်,ယပာ်လံနၤလၢနီၣ်တီၢ်ဘုအသီလၢအကနၣ်အ့ၣ်ဝဲ,အိၣ်ဒီးအမဲအခီလီၤ.နကတီၢ်ကစၢၢ်တဖၣ်,ဒီးတီၢ်လီၤကလဲအီၤ,ဒီးနကပာ်တၢ်စိခိၣ်တဖၣ်ဒ်ဖ့ဧိၤဃာ်ဧိၤအသိးန့ၣ်လီၤ. 16နကပညၢအီၤ,ဒီးကလံၤကစိာ်ကွံာ်အီၤ,ဒီးကလံၤမုၢ်ကမၤပြံမၤပြါအီၤလီၤ.ဒီးနကသးခုလၢယွၤအပူၤ,ဒီးလၢအံၣ်စရ့လးအတၢ်စီဆှံတဂၤအပူၤန့ၣ်နကပာ်ကဖိနသးလီၤ. 17ပှၤဘၣ်နးဘၣ်ဖှီၣ်ဒီးပှၤဖှီၣ်ဖိယာ်ဖိန့ၣ်ဃုထံ,ဒီးတအိၣ်ဘၣ်.အပျ့ၤဃ့ဝဲဒီးတၢ်သူအသးလၢထံလီၤ.ယၤ,ယွၤအံၤယကကနၣ်အကလုၢ်,ယဲဒၣ်,အံၣ်စရ့လးအကစၢ်,ယတလဲၤသဒၣ်ဘၣ်အီၤဘၣ်. 18ယကအိးထီၣ်ထံကျိလၢကစၢၢ်ပျီအလိၤ,ဒီးထံထီၣ်ပၢၢ်လၢကစၢၢ်ကဆူးအသးကံၢ်ပူၤ,ဒီးယကပာ်ပှၢ်မုၢ်ကနၢလၢထံနိၣ်အပူၤ,ဒီးဟီၣ်ခိၣ်ဃ့န့ၣ်လၢထံထီၣ်ပၢၢ်တဖၣ်လီၤ. 19ဒီးယကသူၣ်သ့ၣ်ဆှိအ့ရ့း,ဒီးသ့ၣ်ဖှ့ၡံးတၤ,ဒီးသမ့ၤဟဒး,ဒီးသ့ၣ်စၤယံးအမံၤတဖၣ်လၢပှၢ်မုၢ်ကနၢလီၤ.ဒီးလၢမံၤခိၣ်သိၣ်လာ်န့ၣ်ယကပာ်သ့ၣ်ဆှိ,သ့ထိးအီၣ်,ဒီးသ့ၣ်ဆှိတအၤရှူၢ်တပူၤဃီ, 20ဒ်သိးအကထံၣ်တၢ်,ဒီးသ့ၣ်ညါဝဲ,ဒီးဆိကမိၣ်လၢအသး,ဒီးနၢ်ပၢၢ်တပူၤဃီလၢယွၤအစုမၤတၢ်န့ၣ်,ဒီးအံၣ်စရ့လးအတၢ်စီဆှံတဂၤတ့လီၤဝဲလီၤ. 21လိာ်ကွီၢ်တက့ၢ်,ယွၤစံးဝဲဒၣ်,ဒီးပာ်လီၤသုဂ့ၢ်သုကျိၤလၢအဆူၣ်တက့ၢ်,ယၤကိာ်အစီၤပၤစံးဝဲဒၣ်. 22မ်အသုးဘူးအသး,ဒီးဒုးနဲၣ်ပှၤလၢတၢ်လၢအကအိၣ်ထီၣ်တက့ၢ်.တၢ်လၢအခီၣ်ထံးတဖၣ်န့ၣ်မ့ၢ်မနုၤမနုၤလဲၣ်န့ၣ်မ်အဒုးနဲၣ်တက့ၢ်.ဒီးပကတိၢ်န့ၢ်အီၤလၢပသး,ဒီးသ့ၣ်ညါအကတၢၢ်လီၤ.မ့တမ့ၢ်ဘၣ်ဒ်န့ၣ်ဒီးမ်အဒုးနၢ်ဟူပှၤလၢတၢ်လၢအကဟဲထီၣ်တဖၣ်န့ၣ်တက့ၢ်. 23ဒုးနဲၣ်ပှၤလၢတၢ်လၢအကဟဲထီၣ်ဆူခံဆူညါတက့ၢ်.ဒီးပကသ့ၣ်ညါလၢသုမ့ၢ်ကစၢ်တဖၣ်န့ၣ်လီၤ.မ့ၢ်မးတၢ်ဂ့ၤမ့ၢ်ဂ့ၤ,တၢ်အၢမ့ၢ်ဂ့ၤ,မၤတက့ၢ်.ဒီးပကကွၢ်တရံးတၢ်,ဒီးထံၣ်ဘၣ်တပူၤဃီန့ၣ်လီၤ. 24ကွၢ်ကွၢ်,သုမ့ၢ်တၢ်ဆံးန့ၢ်တၢ်နီတမံၤ,ဒီးသုမၤတၢ်န့ၣ်တမ့ၢ်ဘၣ်တၢ်ဘၣ်.ပှၤလၢအဃုထၢသုန့ၣ်မ့ၢ်တၢ်သးဘၣ်အၢလီၤ. 25ယဒုးအိၣ်ထီၣ်လံပှၤတဂၤလၢကလံၤစိးတခီ,ဒီးဟဲလံဝဲလံ.လၢမုၢ်ထီၣ်တခီန့ၣ်ကကိးထီၣ်ယမံၤလီၤ.ဒီးကဟဲလီၤဘၣ်ပဒိၣ်ဖးဒိၣ်တဖၣ်ဒ်လၢအီကတ့ၣ်အဖီခိၣ်အသိးန့ၣ်,ဒီးဒ်ပှၤတ့သပၢၤဖိယီၢ်ဟီၣ်ခိၣ်ကပံာ်အသိးန့ၣ်လီၤ. 26မ့ၢ်မတၤဒုးနဲၣ်ဝဲလၢအခီၣ်ထံးဒ်သိးပကသ့ၣ်ညါန့ၣ်တဂၤလဲၣ်.ဒီးလၢပျၢၤလၢသီန့ၣ်ဒ်သိးပကစံးအဝဲတီဝဲလီၤတဂၤလဲၣ်.မ့ၢ်မးပှၤဒုးနဲၣ်ဝဲတအိၣ်ဘၣ်,မ့ၢ်မးပှၤဒုးနၢ်ဟူသုတၢ်ကတိၤန့ၣ်တအိၣ်ဘၣ်. 27ယကစံးဆိလၢစံယိၣ်,ကွၢ်ကွၢ်,ကွၢ်အီၤတက့ၢ်.ဒီးယကဟ့ၣ်လီၤပှၤစံၣ်တဲၤတၢ်သးခုအကစီၣ်လၢယရူၤၡလ့ၣ်လီၤ. 28ဒီးယကွၢ်တၢ်,ဒီးပှၤကညီတအိၣ်ဘၣ်,ဒီးလၢအကျါန့ၣ်,ဒီးပှၤကူၣ်လိာ်အသးတအိၣ်ဘၣ်,ဒီးယသံကွၢ်အီၤ,ဒီးတစံးဆၢဘၣ်တၢ်နီတမံၤဘၣ်. 29ကွၢ်ကွၢ်,မ့ၢ်တၢ်ကလီကလီခဲလၢာ်လီၤ.ဒီးအတၢ်မၤန့ၣ်တမ့ၢ်ဘၣ်တၢ်ဘၣ်,အတၢ်ဂီၤသိအသးန့ၣ်မ့ၢ်ကလံၤ,ဒီးတၢ်ကလီကလီန့ၣ်လီၤ.
Copyright information for
KswSKMB