Isa 47 | KswSKMB | STEP | ယုၢ်လီၤ,ဒီးဆ့ၣ်နီၤလၢဟီၣ်ခိၣ်အကမူၣ်,ဘၤဘူၤလိၣ်အဖိမုၣ်လိၣ်ဘိဧၢ,ဆ့ၣ်နီၤလၢဟီၣ်ခိၣ်လိၤ.လီၢ်ပစိာ်တအိၣ်ဘၣ်,က့ၤစ့းအဖိမုၣ်ဧၢ.အဂ့ၢ်ဒ်အံၤ,ပှၤတကိးလၢၤဘၣ်နၤလၢပှၤအစၢ်,ဒီးပှၤအမုာ်လၤတၢ်ဘၣ်.

‏ Isaiah 47

1 ယုၢ်လီၤ,ဒီးဆ့ၣ်နီၤလၢဟီၣ်ခိၣ်အကမူၣ်,ဘၤဘူၤလိၣ်အဖိမုၣ်လိၣ်ဘိဧၢ,ဆ့ၣ်နီၤလၢဟီၣ်ခိၣ်လိၤ.လီၢ်ပစိာ်တအိၣ်ဘၣ်,က့ၤစ့းအဖိမုၣ်ဧၢ.အဂ့ၢ်ဒ်အံၤ,ပှၤတကိးလၢၤဘၣ်နၤလၢပှၤအစၢ်,ဒီးပှၤအမုာ်လၤတၢ်ဘၣ်.

2 ဟံးန့ၢ်ဆၢၣ်ဂူာ်လၢၢ်,ဒီးဂူာ်ဟုအကမူၣ်,ပဲထီၣ်နတၢ်ကျၢၢ်ဘၢမဲာ်,ဆှၢထီၣ်နဆ့အခီၣ်ထံး,လီၣ်ဖျါထီၣ်နခီၣ်ဒုၣ်,ခီဂာ်ထံကျိလၢနခီၣ်တက့ၢ်.

3 နတၢ်အိၣ်ဘ့ၣ်ဆ့ကအိၣ်ဖျါ,မ့ၢ်မးပှၤကထံၣ်နတၢ်မဲာ်ဆှးလီၤ.ယကမၤဆၢတၢ်အအၢ,ဒီးယတသဂၢၢ်ဘၣ်ပှၤကညီဘၣ်.

4 တၢ်ပှ့ၤက့ၤပှၤ,တၢ်သုးမုၢ်ဂီၢ်မုၢ်အယွၤန့ၣ်မ့ၢ်အမံၤ,အံၣ်စရ့လးအတၢ်စီဆှံတဂၤလီၤ.

5 ဆ့ၣ်နီၤအိၣ်ဘှီၣ်ကလာ်,ဒီးလဲၤနုာ်လၢတၢ်ခံးကျါ,က့ၤစ့းအဖိမုၣ်ဧၢ.အဂ့ၢ်ဒ်အံၤ,ပှၤတကိးလၢၤဘၣ်နၤလၢပှၤကလုာ်တဖၣ်အကစၢ်မုၣ်ဘၣ်.

6 ယသးထီၣ်ဘၣ်ယပှၤဂီၢ်မုၢ်,ယမၤဘၣ်အၢယတၢ်န့ၢ်သါ,ဒီးယဟ့ၣ်လီၤအီၤလၢနစုပူၤလီၤ.ဒီးနတသးကညီၤဘၣ်အီၤဘၣ်.လၢပှၤသးပှၢ်ဒၣ်လဲာ်နပာ်နနီၣ်ယိးဘိဃၢဃၢကလဲာ်လီၤ. 7 ဒီးနစံး,ယကကဲကစၢ်မုၣ်လီၤထူလီၤယိာ်လီၤ.တၢ်တဖၣ်န့ၣ်နတတိၢ်န့ၢ်ဘၣ်လၢနသးဘၣ်,ဒီးနတသ့ၣ်နီၣ်ထီၣ်က့ၤဘၣ်တၢ်အခံကတၢၢ်န့ၣ်ဘၣ်.

8 ဒီးခဲကနံၣ်အံၤကနၣ်တၢ်အံၤတက့ၢ်,ပှၤကလုာ်ကလိၤမုၣ်ဧၢ,ပှၤလၢအဆ့ၣ်နီၤသူၣ်မံသးမံ,လၢအစံးလၢအသးကံၢ်ပူၤ,ယအိၣ်ယဲ,ဒီးအဂၤတအိၣ်ဘၣ်.ယတအိၣ်ကမဲဘၣ်နီတစုဘၣ်,ယဖိဟါမၢ်န့ၣ်ယတသ့ၣ်ညါဘၣ်.

9 ဒီးတၢ်ခံမံၤအံၤကဘၣ်နၤသတူၢ်ကလာ်လၢမုၢ်တနံၤဃီ,နဖိဟါမၢ်ဒီးတၢ်မုၣ်ကမဲန့ၣ်လီၤ.ကဟဲဘၣ်နလိၤလၢပှဲၤဝဲလၢနမၤကဒါပမဲာ်ဒီးမၤတၢ်အူတၢ်သမူအအါအဆူၣ်အဃိလီၤ.

10 အဂ့ၢ်ဒ်အံၤ,ဒီးနသန့ၤနသးလၢတၢ်အၢ,နစံး,တၢ်အမဲာ်တထံၣ်ဘၣ်ယၤဘၣ်လီၤ.နတၢ်ကူၣ်သ့ဒီးနတၢ်သ့ၣ်ညါန့ၣ်လွဲနၤ,ဒီးနစံးလၢနသးကံၢ်ပူၤ,ယဲဒၣ်အံၤယအိၣ်,ဒီးလၢယၤအမဲာ်ညါတၢ်တအိၣ်ဘၣ်.

11 မၤသးဒ်န့ၣ်ဒီးတၢ်အၢကဟဲဘၣ်နၤလၢနတသ့ၣ်ညါဘၣ်တၢ်အူတၢ်သမူလၢအဂီၢ်ဘၣ်,ဒီးတၢ်မၤအၢကဘၣ်နၤ,လၢနပူၤဖျဲးတသ့ဘၣ်.ဒီးတၢ်မၤဟးဂီၤကဘၣ်နၤသတူၢ်ကလာ်လၢနတသ့ၣ်ညါဘၣ်န့ၣ်လီၤ.

12 ဆၢထၢၣ်လၢ်,အိၣ်ဒီးနတၢ်အူတၢ်သမူ,ဒီးနမၤကဒါပမဲာ်အအါလၢနမၤလၢနမုၣ်ကနီၤထီၣ်လံၤလံၤန့ၣ်တက့ၢ်.နကဘၣ်ဘျုးလၢအဃိ,နကမၤပျံၤတၢ်သ့ၣ်သ့ၣ်ဧါလီၤ.

13 တၢ်ဘှံးနသးလၢနပှၤကူၣ်လိာ်အသးအါဂၤအဃိလီၤ.မ်အဆၢထၢၣ်လၢ်,ဒီးပှၤနီၤဖးမူခိၣ်အဆၢပှၤကွၢ်ထံဆၣ်ဧိၤဖီဧိၤ,ပှၤလၢအဒုးသ့ၣ်ညါလါအကတီၢ်မ်အအုၣ်က့ၤခီၣ်က့ၤနၤလၢတၢ်လၢအကဟဲဘၣ်နၤတဖၣ်န့ၣ်တက့ၢ်.

14 ကွၢ်ကွၢ်,အဝဲသ့ၣ်တဖၣ်န့ၣ်ကမၤသးဒ်လီၢ်ဧိၤဒံးဧိၤလီၤကလဲအသိးန့ၣ်,မ့ၣ်အူကအီၣ်ကွံာ်အီၤလီၤ.မၤပူၤမၤဖျဲးအကစၢ်ဒၣ်ဝဲဒီးမ့ၣ်လၣ်အစိအကမီၤတသ့ဘၣ်.တမ့ၢ်ဘၣ်မ့ၣ်အူကဖးလၢပှၤကဆူးမ့ၣ်အူဘၣ်.တမ့ၢ်ဘၣ်မ့ၣ်အူလၢပှၤကဆ့ၣ်နီၤလၢအမဲာ်ညါဘၣ်.

15 ပှၤလၢနမၤတၢ်ဒီးအီၤ,နပှၤကၤတၢ်ဖိလၢနမုၣ်ကနီၤထီၣ်လံၤလံၤန့ၣ်ကမၤသးဒ်န့ၣ်ဒီးနၤလီၤ.ကဟးကွံာ်တၢ်တဂၤလၢအကျဲဒၣ်ဝဲ,တဂၤလၢအကျဲဒၣ်ဝဲ,ဒီးတၢ်အုၣ်က့ၤခီၣ်က့ၤနၤတအိၣ်ဘၣ်လီၤ.