Isaiah 48
1ကနၣ်တၢ်အံၤတက့ၢ်,စီၤယၤကိာ်အပှၤဟံၣ်ဖိ,ပှၤလၢတၢ်ကိးအီၤလၢအံၣ်စရ့လးအမံၤ,ဒီးဟဲထီၣ်ဝဲလၢယူဒၤအထံထီၣ်ပၢၢ်,ပှၤလၢအဆိၣ်လီၤအသးလၢယွၤအမံၤ,လၢအဒုးသ့ၣ်နီၣ်ထီၣ်က့ၤအံၣ်စရ့လးအကစၢ်,ဘၣ်ဆၣ်ဒီးတမ့ၢ်ဘၣ်ဒီးတၢ်မ့ၢ်တၢ်တီဘၣ်,တမ့ၢ်ဘၣ်ဒီးတၢ်တီတၢ်လိၤဘၣ်သ့ၣ်ဧၢ. 2အဂ့ၢ်ဒ်အံၤ,စံးလီၤအသးလၢအဘၣ်ဃးဒီးဝ့ၢ်စီဆှံ,ဒီးသန့ၤအသးလၢအံၣ်စရ့လးအကစၢ်,တၢ်သုးမုၢ်ဂီၢ်မုၢ်အယွၤမ့ၢ်အမံၤလီၤ. 3တၢ်အခီၣ်ထံးတဖၣ်န့ၣ်ယဒုးနဲၣ်လၢပျၢၤ,ထီၣ်ဖျဲးဝဲလၢယထးခိၣ်,ဒီးယဒုးနၢ်ဟူအီၤ,ယမၤအီၤသတူၢ်ကလာ်,ဒီးမၤအသးလီၤ. 4အဂ့ၢ်ဒ်အံၤ,ယသ့ၣ်ညါလၢနမ့ၢ်ပှၤကီ,ဒီးနကိာ်မ့ၢ်ထးတဘိ,ဒီးနမဲာ်တူၢ်ခိၣ်န့ၣ်မ့ၢ်တိၢ်ဘီလီၤ. 5ဒီးယဒုးနဲၣ်အီၤလၢနၤလၢအခီၣ်ထံးန့ၣ်,လၢအတချုးဟဲဒံးဘၣ်,ဒီးယဘိးဘၣ်သ့ၣ်ညါနၤ,ဒ်သိးနသုတစံး,ယတၢ်ဂီၤမၤတၢ်အံၤ,ဒီးယတၢ်ဂီၤစိးပျၤအသး,ဒီးယတၢ်ဂီၤသိအသးမၤလိာ်အီၤန့ၣ်တဂ့ၤလီၤ. 6နနၢ်ဟူလံ,ကွၢ်တၢ်အံၤခဲလၢာ်တက့ၢ်.ဒီးသုတဒုးနဲၣ်ဘၣ်အီၤဧါ.ဒီးယဒုးနၢ်ဟူနၤလၢတၢ်အသီ,တၢ်လၢအအိၣ်ခူသူၣ်လၢနတသ့ၣ်ညါဘၣ်. 7တ့လီၤအသးခဲကနံၣ်အံၤလီၤ,ဒီးတမ့ၢ်ဘၣ်လၢပျၢၤဘၣ်.ဒီးမုၢ်တနံၤအံၤတချုးဘၣ်ဒံးဘၣ်ဒီး,နတနၢ်ဟူဘၣ်အီၤဘၣ်.ဒ်သိးနသုတစံး,ကွၢ်ကွၢ်,ယသ့ၣ်ညါအီၤလီၤန့ၣ်တဂ့ၤလီၤ. 8မ့ၢ်မးနတနၢ်ဟူဘၣ်,မ့ၢ်မးနတသ့ၣ်ညါဘၣ်,မ့ၢ်မးလၢအခီၣ်ထံးလံၤလံၤန့ၣ်နနၢ်တအိးထီၣ်ဘၣ်အသးဘၣ်.အဂ့ၢ်ဒ်အံၤ,ယသ့ၣ်ညါလၢနမၤဒီးလီတၢ်နးနးကလဲာ်,ဒီးလၢပှၤဒၢလီၢ်ပူၤလံၤလံၤန့ၣ်တၢ်ကိးနၤလၢပှၤမၤကမၣ်တၢ်ဖိလီၤ. 9လၢယမံၤဒၣ်ယဲအဃိန့ၣ်ယကသုးယံၤယသးထီၣ်,ဒီးလၢယတၢ်စံးထီၣ်ပတြၢၤအဃိန့ၣ်ယကတြီအီၤလၢနၤ,ဒ်သိးယသုတဒီၣ်တဲာ်ကွံာ်နၤတဂ့ၤလီၤ. 10ကွၢ်ကွၢ်,ယမၤပှံၢ်လံနၤ,ဘၣ်ဆၣ်ဒီးတမ့ၢ်ဘၣ်လၢစ့အဂီၢ်ဘၣ်.ယဃုထၢလံနၤလၢတၢ်နးတၢ်ဖှီၣ်အဖၣ်ကပူၤလံ. 11လၢယကစၢ်ဒၣ်ယဲအဃိ,လၢယကစၢ်ဒၣ်ယဲအဃိယကမၤအီၤလီၤ.အဂ့ၢ်ဒ်အံၤ,ယမံၤကဘၣ်တၢ်မၤဘၣ်အၢအီၤဒ်လဲၣ်.ဒီးယလၤကပီၤန့ၣ်ယတဟ့ၣ်လီၤပှၤဂၤဘၣ်. 12ကနၣ်ယကလုၢ်တက့ၢ်,ယၤကိာ်ဧၢ,ဒီးအံၣ်စရ့လးလၢယကိးန့ၢ်အီၤ,ယဲဒၣ်အံၤယမ့ၢ်အဝဲဒၣ်လီၤ.ယဲဒၣ်အံၤယမ့ၢ်တၢ်အခီၣ်ထံး,ဒီးယဲဒၣ်အံၤယမ့ၢ်စ့ၢ်ကီးတၢ်အကတၢၢ်လီၤ. 13ယစုပာ်လီၤစ့ၢ်ကီးဟီၣ်ခိၣ်အခီၣ်ထံး,ဒီးယစုထွဲန့ၣ်သလၣ်ထီၣ်မူခိၣ်လီၤ.ယကိးန့ၢ်အီၤ,ဒီးဆၢထၢၣ်ဝဲတပူၤဃီလီၤ. 14အိၣ်ဖှိၣ်ရိဖှိၣ်သုဝဲခဲလၢာ်သ့ၣ်ဧၢ,ဒီးကနၣ်တၢ်တက့ၢ်.မ့ၢ်မတၤဒုးနဲၣ်တၢ်တဖၣ်န့ၣ်လၢအကျါတဂၤလဲၣ်.ယွၤအဲၣ်အီၤ,ကမၤတၢ်ဘၣ်အသးလၢဘၤဘူၤလိၣ်အပူၤ,ဒီးအစုဒုၣ်ကအိၣ်လၢပှၤက့ၤစ့းဖိအလိၤလီၤ. 15ယဲဒၣ်ယကတိၤလံတၢ်လံ.ယကိးန့ၢ်စ့ၢ်ကီးအီၤ,ယဟဲစိာ်အီၤ,ဒီးကမၤဘီၣ်ထီၣ်ညီထီၣ်အကျဲလီၤ. 16သုးဘူးသုသးဆူယအိၣ်,ကနၣ်တၢ်အံၤတက့ၢ်.လၢအခီၣ်ထံးလံၤလံၤယတကတိၤခူသူၣ်တၢ်ဘၣ်,လၢအအိၣ်ထီၣ်သီလံၤလံၤန့ၣ်ယအိၣ်ဖဲန့ၣ်လီၤ.ဒီးခဲကနံၣ်အံၤကစၢ်ယွၤမၢလီၤယၤဒီးအသးလီၤ. 17ပှၤပှ့ၤက့ၤနၤ,အံၣ်စရ့လးအတၢ်စီဆှံယွၤစံးဒ်အံၤ,ယဲဒၣ်အံၤ,ယမ့ၢ်ယွၤ,နကစၢ်လၢအသိၣ်လိနၤဒ်သိးနကဘၣ်ဘျုးဘၣ်ဖှိၣ်,ဒီးယဒုးလဲၤနၤလၢကျဲလၢနဂ့ၤလဲၤန့ၣ်လီၤ. 18အိ,မ်နကနၣ်တ့ၢ်ယတၢ်မၤလိာ်တက့ၢ်.မ့မ့ၢ်ဒ်န့ၣ်ဒီးနတၢ်ဃူတၢ်ဖိးကမၤသးဒ်ထံမိၢ်ပှၢ်အသိး,ဒီးနတၢ်တီတၢ်လိၤဒ်ပီၣ်လဲၣ်အလပီအသိးန့ၣ်လီၤ. 19ဒီးနချံနသၣ်ကမၤသးဒ်မဲးဧိၤဟီၣ်ဧိၤအသိး,ဒီးနစၢၤနသွဲၣ်,ဒ်အဖျၢၣ်တဖၣ်အသိးန့ၣ်လီၤ.တၢ်တဒီၣ်တဲာ်ဘၣ်,ဒီးတမၤဟးဂီၤဘၣ်အမံၤလၢယမဲာ်ညါဘၣ်. 20ဟးထီၣ်ကွံာ်လၢဘၤဘူၤလိၣ်အပူၤ,ဃ့ၢ်ထီၣ်ကွံာ်လၢပှၤက့ၤစ့းဖိအအိၣ်,အိၣ်ဒီးတၢ်သးခုအသီၣ်တက့ၢ်.ဒုးနဲၣ်,ဒီးဒုးနၢ်ဟူတၢ်အံၤတက့ၢ်.စံးဘၣ်တဲဘၣ်တၢ်ပၢၢ်လၢဟီၣ်ခိၣ်အကတၢၢ်တက့ၢ်.စံး,ယွၤပှ့ၤက့ၤလံအခ့အပှၤယၤကိာ်လံန့ၣ်တက့ၢ်. 21တၢ်တသူဘၣ်အသးလၢထံဖဲအဒုးလဲၤအီၤလၢပှၢ်မုၢ်ကနၢဘၣ်,ဒုးယွၤထီၣ်ထံလၢလၢၢ်ပူၤလၢအဂီၢ်,တီၢ်လၢၢ်,ဒီးထံဖျိးထီၣ်ဝဲလီၤ. 22တၢ်ဃူတၢ်ဖိးတအိၣ်ဘၣ်ဒီးပှၤတတီတလိၤဘၣ်န့ၣ်,ယွၤစံးဝဲဒၣ်.
Copyright information for
KswSKMB