Isaiah 49
1ကနၣ်ယကလုၢ်,ကီးသ့ၣ်ဧၢ,ဒီးဒိကနၣ်တၢ်,ပှၤကလုာ်တဖၣ်အိၣ်လၢအယံၤအယိာ်သ့ၣ်ဧၢ,ယွၤကိးန့ၢ်ယၤလၢတၢ်ဒၢလီၢ်အပူၤလံၤလံၤ,လၢယမိၢ်အဟၢဖၢပူၤလံၤန့ၣ်ပှ့ၤဘၣ်ယမံၤလီၤ. 2ဒီးပာ်ယထးခိၣ်ဒ်နးလၢအအ့ၣ်ဝဲအသိးန့ၣ်,ဒီးဒုးအိၣ်တဒၢယၤလၢအစုအကဒုလီၤ.ဒီးပာ်ယၤလၢပျၢ်ဘျ့ကဆှၣ်တဘ့ၣ်,ဒီးပာ်ခူသူၣ်ယၤလၢအလၢပီၤပူၤလီၤ. 3ဒီးစံးဘၣ်ယၤ,နမ့ၢ်ယခ့ယပှၤ,အံၣ်စရ့လးဧၢ,ပှၤလၢယကဒိးတၢ်လၤကပီၤလၢအပူၤလီၤ. 4ဒီးယစံး,ယမၤလံတၢ်ကလီကလီလံ.လၢတၢ်ကလီကလီအဂီၢ်,လၢတၢ်နီတမံၤဘၣ်အဂီၢ်န့ၣ်ယလၢာ်ဂံၢ်လၢာ်ဘါလီၤ.ဘၣ်ဆၣ်ဒီးယတၢ်စံၣ်ညီၣ်အိၣ်ဒီးယွၤ,ဒီးယမၤတၢ်အိၣ်ဒီးယကစၢ်လီၤ. 5ဒီးခဲကနံၣ်အံၤ,ယွၤစံးဝဲဒၣ်,လၢအပာ်ယၤလၢပှၤဒၢလီၢ်အပူၤလံၤလံၤလၢအခ့အပှၤဒၣ်ဝဲဒ်သိးယကဒုးဟဲက့ၤယၤကိာ်ဆူအအိၣ်,ဒီးအံၣ်စရ့လးမ့ၢ်တအိၣ်ဖှိၣ်ရိဖှိၣ်ဘၣ်ဆၣ်ဒီး,ယကအိၣ်ဒီးတၢ်လၤကပီၤလၢယွၤအမဲာ်ညါ,ဒီးယကစၢ်ကဲတ့ၢ်လံယဂံၢ်ယဘါလံ. 6ဒီးစံးဝဲဒၣ်,လၢနကကဲထီၣ်ယခ့ယပှၤဒ်သိးနကဒုးဂဲၤဆၢထၢၣ်ယၤကိာ်အဒူၣ်တဖၣ်,ဒီးဒုးဟဲက့ၤပှၤလၢအအိၣ်ဒံးလၢအံၣ်စရ့လးအကျါန့ၣ်မ့ၢ်တၢ်ဆံးကဲၣ်ဆိးလီၤ.ဒီးယကပာ်နၤလၢတၢ်ကပီၤလၢပှၤကလုာ်တဖၣ်အဂီၢ်,ဒ်သိးနကကဲထီၣ်ယတၢ်အုၣ်က့ၤခီၣ်က့ၤပၢၢ်လၢဟီၣ်ခိၣ်အကတၢၢ်န့ၣ်လီၤ. 7ယွၤ,တၢ်ပှ့ၤက့ၤအံၣ်စရ့လး,အတၢ်စီဆှံတဂၤ,စံးဘၣ်ပှၤလၢတၢ်တပာ်မးအလီၢ်,ပှၤတကလုာ်လၢတၢ်သးဘၣ်အၢအီၤ,ပဒိၣ်တဖၣ်အခ့အပှၤ,ဒ်အံၤ,စီၤပၤတဖၣ်ကထံၣ်ဘၣ်,ဒီးဂဲၤဆၢထၢၣ်,ဒီးပဒိၣ်ဖးဒိၣ်တဖၣ်ကတီၤလီၤကဒွံကျိာ်လၢယွၤအကလုၢ်တီတဂၤအဃိ,အံၣ်စရ့လးအတၢ်စီဆှံတဂၤလၢအဃုထၢနၤလီၤ. 8ယွၤစံးဒ်အံၤ,လၢအကတီၢ်လၢတၢ်ဘၣ်အသးန့ၣ်ယကနၣ်လံနကလုၢ်လံ.ဒီးလၢတၢ်အုၣ်က့ၤခီၣ်က့ၤအမုၢ်တနံၤန့ၣ်ယမၤစၢၤလံနၤလံ.ဒီးယကအံးက့ၤကွၢ်က့ၤနၤ,ဒီးပာ်နၤလၢတၢ်အၢၣ်လီၤအီလီၤလၢပှၤဂီၢ်မုၢ်အဂီၢ်,ဒ်သိးနကဒုးဂဲၤဆၢထၢၣ်ဟီၣ်ခိၣ်,ဒီးဒ်သိးနကဒုးန့ၢ်သါအီၤလၢတၢ်န့ၢ်သါအိၣ်သယုၢ်န့ၣ်,ဒ်သိးနကစံးပှၤဃိာ်ဖိ,ဟဲထီၣ်တက့ၢ်. 9ပှၤအိၣ်လၢတၢ်ခံးကျါန့ၣ်မၤအိၣ်ဖျါထီၣ်သုသးတက့ၢ်.ကအီၣ်တၢ်လၢကျဲဧိၤကပူၤဧိၤ,ဒီးတၢ်စိခိၣ်ပျီခဲလၢာ်ကကဲထီၣ်အအီၣ်ဆၣ်အလီၢ်လီၤ. 10တၢ်တသၣ်ဝံၤလၢၤဘၣ်အသးဘၣ်,ဒီးတၢ်တသူလၢၤဘၣ်အသးလၢထံ,ဒီးပံၢ်ကဒဲးမ့ၢ်ဂ့ၤ,မုၢ်ဧိၤလါဧိၤမ့ၢ်ဂ့ၤ,တတီၢ်ဘၣ်အီၤဘၣ်.အဂ့ၢ်ဒ်အံၤ,ပှၤလၢအသးအိၣ်အီၤန့ၣ်ကဆှၢအီၤ,ဒီးကဆှၢအီၤဆူထံထီၣ်ပၢၢ်အလီၢ်တဖၣ်န့ၣ်လီၤ. 11ဒီးယကပာ်ယကစၢၢ်ခဲလၢာ်လၢအကျဲန့ၣ်,ဒီးတၢ်ကမၤထီၣ်ထီယကျဲမုၢ်လီၤ. 12ကွၢ်ကွၢ်,အဝဲသ့ၣ်တဖၣ်အံၤကဟဲလၢအယံၤ,ဒီးကွၢ်ကွၢ်,အဝဲသ့ၣ်တဖၣ်အံၤလၢကလံၤစိး,ဒီးလၢမုၢ်နုာ်,ဒီးအဝဲသ့ၣ်တဖၣ်အံၤ,လၢကီၢ်စံၣ်န့ၣ်လီၤ. 13ကိးပသူထီၣ်,မူခိၣ်ဧၢ,ဒီးသူၣ်ဖှံသးညီ,ဟီၣ်ခိၣ်ဧၢ,မ်ကစၢၢ်ကလိထီၣ်ဖျဲးလၢတၢ်သးဝံၣ်တက့ၢ်.အဂ့ၢ်ဒ်အံၤယွၤမၤမုာ်ထီၣ်က့ၤလံအခ့အပှၤလံ,ဒီးကသးအိၣ်အပှၤလၢအဘၣ်တၢ်နးတၢ်ဖှီၣ်လီၤ. 14ဘၣ်ဆၣ်ဒီးစံယိၣ်စံးဝဲဒၣ်,ယွၤလဲၤသဒၣ်လံယၤလံ,ဒီးကစၢ်န့ၣ်သးပ့ၤနီၣ်လံယၤလံ. 15ပိာ်မုၣ်ကသးပ့ၤနီၣ်အဖိလၢအအီၣ်နုၢ်တုၤအတသးကညီၤဘၣ်အဒၢလီၢ်အဖိန့ၣ်ဧါ.အဝဲန့ၣ်ဒၣ်လဲၣ်ကသးပ့ၤနီၣ်လီၤ.မ့မ့ၢ်ယဲဒၣ်အံၤယတသးပ့ၤနီၣ်ဘၣ်နၤဘၣ်. 16ကွၢ်ကွၢ်,ယကွဲးလံနၤလၢယစုညါသးအလိၤ,ဒီးနခိၣ်ဒူအိၣ်ဝဲလၢယမဲာ်ညါတထံၣ်ဃီလီၤ. 17နဖိဟဲချ့ချ့,ပှၤလၢအမၤဟးဂီၤနၤ,ဒီးမၤသယုၢ်နၤတဖၣ်န့ၣ်ကဟးထီၣ်လၢနပူၤလီၤ. 18ကျ့ထီၣ်နမဲာ်,ကွၢ်ဝးတရံး,ဒီးထံၣ်တၢ်တက့ၢ်.အဝဲသ့ၣ်တဖၣ်အိၣ်ဖှိၣ်ရိဖှိၣ်ခဲလၢာ်,ဒီးဟဲဆူနအိၣ်လီၤ.ယမူယဲ,ယွၤစံးဝဲဒၣ်,မ့ၢ်မးနကသိးနသးလၢအီၤဒ်လၢတၢ်ကယၢကယဲအဃံအလၤအသိး,ဒီးနကစၢဃာ်အီၤလၢနလိၤ,ဒ်တလးမူးပိာ်မုၣ်အသိးန့ၣ်လီၤ. 19အဂ့ၢ်ဒ်အံၤ,နတၢ်လီၤပှီၢ်,ဒီးနလီၢ်လၢတၢ်မၤဟးဂီၤ,ဒီးနကီၢ်အိၣ်သယုၢ်န့ၣ်ခဲကနံၣ်အံၤဒၣ်လဲာ်,တတြီၢ်ဘၣ်လၢပှၤအိၣ်ဝဲဆိးဝဲအဂီၢ်ဘၣ်.ဒီးပှၤလၢအအီၣ်နၤတဖၣ်န့ၣ်ကအိၣ်ယံၤဝဲလီၤ. 20ပှၤတူာ်ဖိဧၢ,နဖိခွါတဖၣ်ကစံးကဒီးလၢနနၢ်ပူၤ,တၢ်အလီၢ်အံၤ,တတြီၢ်ဘၣ်လၢယဂီၢ်ဘၣ်,ပျဲယၤဒ်သိးယကအိၣ်ကဆိးတက့ၢ်. 21ဒီးနကစံးလၢနသးကံၢ်ပူၤ,မ့ၢ်မတၤမၤလိၣ်ထီၣ်န့ၢ်ယၤလၢအဝဲသ့ၣ်တဖၣ်န့ၣ်တဂၤလဲၣ်.ယဖိဟါမၢ်,ဒီးယအိၣ်သယုၢ်,ယမ့ၢ်ပှၤတၢ်မၢကဲကုၢ်အီၤ,ဒီးပှၤဘၣ်တၢ်ဟီထီၣ်ကွံာ်အီၤလီၤ.ဒီးအဝဲသ့ၣ်တဖၣ်အံၤ,မ့ၢ်မတၤလုၢ်ဒိၣ်ထီၣ်အီၤတဂၤလဲၣ်.ကွၢ်ကွၢ်,ယအိၣ်လီၤတဲာ်တဂၤဃီလီၤ.အဝဲသ့ၣ်တဖၣ်အံၤမ့ၢ်အအိၣ်တ့ၢ်ဖဲလဲၣ်. 22ကစၢ်ယွၤစံးဒ်အံၤ,ယကယူာ်ထီၣ်ယစုဆူပှၤကလုာ်တဖၣ်,ဒီးယကသူၣ်ထီၣ်ယသုးဖိအလၣ်လၢပှၤဂီၢ်မုၢ်အဂီၢ်လီၤ.ဒီးပှၤကဟဲစိာ်နဖိခွါလၢအစုဒုၣ်လိၤ,ဒီးကစိာ်နဖိမုၣ်တဖၣ်လၢအဖံဘၣ်ခိၣ်လီၤ. 23ဒီးစီၤပၤတဖၣ်ကကဲထီၣ်နပၢ်လၢအလုၢ်ဒိၣ်ထီၣ်တၢ်,ဒီးနီၢ်ပၤမုၣ်တဖၣ်ကကဲထီၣ်နမိၢ်လၢအလုၢ်ဒိၣ်ထီၣ်တၢ်လီၤ.ကတီၤလီၤကဒွံကျိာ်ဒီးကျးလီၤအမဲာ်လၢဟီၣ်ခိၣ်လိၤ,ဒီးကလ့ၣ်နခီၣ်အဟီၣ်ခိၣ်အကမူၣ်လီၤ.ဒီးနကသ့ၣ်ညါလၢယမ့ၢ်ယွၤ,ဒီးပှၤလၢအသန့ၤအသးလၢယၤတဖၣ်အမဲာ်တဆှးဘၣ်လီၤ. 24တၢ်ကမၤန့ၢ်တၢ်ဂုာ်န့ၢ်လၢပှၤအဆူၣ်,ဒီးပှၤတၢ်မၢကဲကုၢ်အီၤတီတီန့ၣ်ကပူၤဖျဲးစ့ၢ်ကီးဧါ. 25မ့မ့ၢ်,ယွၤစံးဒ်အံၤ,ပှၤအဆူၣ်အတၢ်မၢကဲကုၢ်န့ၣ်တၢ်ကမၤန့ၢ်အီၤ,ဒီးတၢ်မၤပျံၤမၤဖုးတၢ်အတၢ်ဂုာ်န့ၢ်န့ၣ်ကပူၤဖျဲး,အဂ့ၢ်ဒ်အံၤယကဒုးတၢ်ဒီးပှၤလၢအဒုးတၢ်ဒီးနၤ,ဒီးယကအုၣ်က့ၤခီၣ်က့ၤနဖိခွါတဖၣ်လီၤ. 26ဒီးယကဒုးအီၣ်ပှၤလၢအမၤအၢနၤလၢအဖံးအညၣ်ဒၣ်ဝဲ,ဒီးကအီမူၤအသးလၢအသွံၣ်ဒၣ်ဝဲဒ်လၢစပံးထံအသီအသိး,ဒီးကယဲၢ်တၢ်ဖံးတၢ်ညၣ်ခဲလၢာ်ကသ့ၣ်ညါလၢယဲဒၣ်အံၤ,ယမ့ၢ်ယွၤ,ပှၤအုၣ်က့ၤခီၣ်က့ၤနၤ,ဒီးလၢပှၤပှ့ၤက့ၤနၤန့ၣ်မ့ၢ်စီၤယၤကိာ်အတၢ်ဒိၣ်တၢ်ဆူၣ်တဂၤလီၤ.
Copyright information for
KswSKMB