Isa 50 | KswSKMB | STEP | ယွၤစံးဒ်အံၤ,သုမိၢ်လၢယပာ်မၢ်အီၤတဂၤအလံာ်လီၤဖှၣ်တဘ့ၣ်န့ၣ်အိၣ်ဖဲလဲၣ်.ဒီးယဆါကွံာ်သုလၢယကမၢ်အကစၢ်ဖဲလဲၣ်တဂၤလဲၣ်.ကွၢ်ကွၢ်,သုဘၣ်တၢ်ဆါကွံာ်သုလၢသုတၢ်အၢအဃိ,ဒီးသုမိၢ်ဘၣ်တၢ်ပာ်မၢ်အီၤလၢသုတၢ်ကမၣ်အဃိလီၤ.

‏ Isaiah 50

1 ယွၤစံးဒ်အံၤ,သုမိၢ်လၢယပာ်မၢ်အီၤတဂၤအလံာ်လီၤဖှၣ်တဘ့ၣ်န့ၣ်အိၣ်ဖဲလဲၣ်.ဒီးယဆါကွံာ်သုလၢယကမၢ်အကစၢ်ဖဲလဲၣ်တဂၤလဲၣ်.ကွၢ်ကွၢ်,သုဘၣ်တၢ်ဆါကွံာ်သုလၢသုတၢ်အၢအဃိ,ဒီးသုမိၢ်ဘၣ်တၢ်ပာ်မၢ်အီၤလၢသုတၢ်ကမၣ်အဃိလီၤ.

2 တုၤယဟဲဒီး,ပှၤကညီတအိၣ်ဘၣ်န့ၣ်မ့ၢ်အဘၣ်မနုၤလဲၣ်.တုၤယကိးထီၣ်ဒီးပှၤစံးဆၢတၢ်တအိၣ်ဘၣ်မ့ၢ်အဘၣ်မနုၤလဲၣ်.ယစုဖုၣ်လီၤတုၤယပှ့ၤက့ၤတၢ်တသ့ဘၣ်ဧါ.ဒီးဒ်သိးအကမၤပူၤဖျဲးတၢ်ဒီး,ယစိယကမီၤတအိၣ်ဘၣ်ဧါ.ကွၢ်ကွၢ်,လၢယတၢ်သိၣ်ဃီၣ်န့ၣ်,ယကမၤလီၤသံးပီၣ်လဲၣ်,ဒီးပာ်ထံမိၢ်ပှၢ်လၢပှၢ်မုၢ်ကနၢလီၤ.အဒ့ၣ်အညၣ်နၢအုၣ်လၢထံတအိၣ်ဘၣ်အဃိ,ဒီးသံဝဲလၢတၢ်သူအသးလၢထံအဃိလီၤ. 3 ယဒုးသိးမူခိၣ်ဒီးတၢ်သူ,ဒီးယပာ်ထၢၣ်တၢ်ကံးညာ်လၢတၢ်လုးဘၢအီၤလီၤ.

4 ကစၢ်ယွၤဟ့ၣ်လီၤယၤလၢပှၤဘၣ်တၢ်သိၣ်လိအီၤအပျ့ၤဒ်သိးယဒုးဆူၣ်ထီၣ်ပှၤလၢတၢ်ဘှံးအသးလၢတၢ်ကတိၤဒ်လဲၣ်ဒ်လဲၣ်န့ၣ်ယကသ့ၣ်ညါလီၤ.ထိၣ်ဂဲၤဝဲလၢတဂီၤဘၣ်တဂီၤ,ထိၣ်ဂဲၤယနၢ်ဒ်သိးယကနၢ်ဟူတၢ်ဒ်ပှၤမၤလိတၢ်အသိးန့ၣ်လီၤ.

5 ကစၢ်ယွၤအိးထီၣ်ယနၢ်,ဒီးယတပူထီၣ်ဘၣ်တၢ်ဘၣ်.ဒီးယတဂုၤက့ၤယလီၢ်ခံဘၣ်. 6 ယဟ့ၣ်ယချၢလၢပှၤတီၢ်တၢ်,ဒီးယဘိးလၢပှၤလၢအထဲးထီၣ်ကွံာ်ခၣ်ဆူၣ်လီၤ.ယတပာ်တဒၢဘၣ်ယမဲာ်လၢတၢ်မၤမဲာ်ဆှး,ဒီးတၢ်ထူးပှဲာ်ဘၣ်.

7 အဂ့ၢ်ဒ်အံၤ,ကစၢ်ယွၤမ့ၢ်ပှၤမၤစၢၤယၤလီၤ.မၤသးဒ်န့ၣ်ဒီးယမဲာ်တဆှးဘၣ်.မၤသးဒ်န့ၣ်ဒီးယပာ်ယမဲာ်ဒ်လၢၢ်မ့ၣ်အသိးန့ၣ်,ဒီးယသ့ၣ်ညါလၢယမဲာ်တဆှးဘၣ်န့ၣ်လီၤ.

8 ပှၤလၢအပာ်တီယၤတဂၤန့ၣ်အိၣ်ဘူးဝဲလီၤ.မ့ၢ်မတၤကလိာ်ကွီၢ်ဒီးယၤတဂၤလဲၣ်.ဆၢထၢၣ်သကိးတက့ၢ်.မ့ၢ်မတၤကလိာ်ကွီၢ်ဒီးယၤတဂၤလဲၣ်.မ်အသုးဘူးအသးတက့ၢ်.

9 ကွၢ်ကွၢ်,ကစၢ်ယွၤကမၤစၢၤယၤလီၤ.မ့ၢ်မတၤကစံၣ်ညီၣ်ဃၣ်ယၤတဂၤလဲၣ်.ကွၢ်ကွၢ်,အဝဲသ့ၣ်ခဲလၢာ်န့ၣ်ကလီၢ်လံၤဝဲဒ်ဆ့တဘ့ၣ်အသိးန့ၣ်,တၢ်အဃၢ်ကအီၣ်ကွံာ်အီၤလီၤ.

10 ပှၤလၢသုကျါလၢအပျံၤယွၤ,ဒီးဒိကနၣ်အခ့အပှၤအကလုၢ်,လၢအလဲၤတၢ်လၢတၢ်ခံးကျါ,ဒီးအတၢ်ကပီၤတအိၣ်ဘၣ်န့ၣ်မ့ၢ်မတၤတဂၤလဲၣ်.မ်အသန့ၤအသးလၢယွၤအမံၤ,ဒီးပတဲၢ်အသးလၢအကစၢ်န့ၣ်တက့ၢ်.

11 ကွၢ်ကွၢ်,ကယဲၢ်ပှၤလၢအဆိၣ်ကဲၤမ့ၣ်အူ,လၢအဒုးအိၣ်ဝးတရံးသုသးလၢမ့ၣ်ဖီခဲလၢာ်သ့ၣ်ဧၢ.လဲၤတၢ်လၢသုမ့ၣ်အူအတၢ်ကပီၤအကျါ,ဒီးလၢမ့ၣ်ဖီလၢသုဆိၣ်ကဲၤအီၤအကျါန့ၣ်တက့ၢ်.သုကဘၣ်တၢ်အံၤလၢယစု,သုကမံလီၤလၢတၢ်ဆိးကဲးအပူၤလီၤ.