Isaiah 51
1ကနၣ်ယကလုၢ်,ပှၤလၢအလူၤတၢ်တီတၢ်လိၤသ့ၣ်ဧၢ,ကွၢ်ထီၣ်လၢလၢၢ်ဖဲတၢ်ဘၢၣ်ထီၣ်န့ၢ်သု,ဒီးတၢ်ပူၤအအိပူၤဖဲတၢ်မူၣ်ထီၣ်သုန့ၣ်တက့ၢ်,ပှၤလၢအဃုယွၤသ့ၣ်ဧၢ. 2ကွၢ်ထီၣ်လၢသုပၢ်စီၤအၤဘြၤဟၣ်,ဒီးနီၢ်စၤရါလၢအဆံးစၢ်န့ၢ်သုတက့ၢ်.အဂ့ၢ်ဒ်အံၤ,လၢအမ့ၢ်တဂၤဃီန့ၣ်ယကိးန့ၢ်အီၤ,ဒီးယဆိၣ်ဂ့ၤအီၤ,ဒီးမၤအါထီၣ်အီၤလီၤ. 3အဂ့ၢ်ဒ်အံၤ,ယွၤမၤမုာ်ထီၣ်က့ၤလံစံယိၣ်,ဒီးမၤမုာ်ထီၣ်က့ၤအလီၢ်အိၣ်သယုၢ်တဖၣ်,ဒီးပာ်အပှၢ်မုၢ်ကနၢဒ်ဧ့ၤဒ့ၣ်အသိး,ဒီးအမံၤခိၣ်သိၣ်လာ်ဒ်ယွၤအတၤသၣ်အလီၢ်အသိးန့ၣ်လံ.တၢ်သူၣ်ဖှံသးညီဒီးတၢ်သူၣ်ခုသးခုကအိၣ်လၢအပူၤ,တၢ်စံးထီၣ်ပတြၢၤ,ဒီးတၢ်လီၤမိၢ်လီၤမဲၤအသီၣ်လီၤ. 4ကနၣ်ယကလုၢ်,ယပှၤဂီၢ်မုၢ်သ့ၣ်ဧၢ,ဒီးယပှၤတကလုာ်ဧၢ,ဒိကနၣ်ယကလုၢ်ကထါတက့ၢ်.အဂ့ၢ်ဒ်အံၤ,တၢ်သိၣ်တၢ်သီကလဲၤထီၣ်လၢယၤ,ဒီးယကဒုးလီၤစံာ်ယတၢ်စံၣ်ညီၣ်လၢတၢ်ကပီၤလၢပှၤဂီၢ်မုၢ်အဂီၢ်လီၤ. 5ယတၢ်တီတၢ်လိၤဘူးထီၣ်လံ.ယတၢ်အုၣ်က့ၤခီၣ်က့ၤဟးထီၣ်လံ.ဒီးယစုဒုၣ်ကစံၣ်ညီၣ်ပှၤဂီၢ်မုၢ်လီၤ.ထံယံၤကီၢ်ယံၤကကွၢ်လၢ်ယကျဲ,ဒီးကသန့ၤအသးလၢယစုဒုၣ်လီၤ. 6ကျ့ထီၣ်သုမဲာ်ဆူမူခိၣ်,ဒီးကွၢ်လီၤဆူဟီၣ်ခိၣ်လၢလာ်ခီတက့ၢ်.အဂ့ၢ်ဒ်အံၤ,မူခိၣ်ဒံကွံာ်ဒ်မ့ၣ်အူခုၣ်အသိး,ဒီးဟီၣ်ခိၣ်ကလီၢ်လံၤဝဲဒ်ဆ့တဘ့ၣ်အသိးန့ၣ်,ဒီးပှၤဟီၣ်ခိၣ်ဖိကသံဒ်န့ၣ်သိးလီၤ.မ့မ့ၢ်ယတၢ်အုၣ်က့ၤခီၣ်က့ၤကအိၣ်လီၤထူလီၤယိာ်,ဒီးယတၢ်တီတၢ်လိၤတဟးဂီၤဘၣ်ဝဲဘၣ်. 7ကနၣ်ယကလုၢ်,ပှၤလၢအသ့ၣ်ညါတၢ်တီတၢ်လိၤသ့ၣ်ဧၢ,ပှၤဂီၢ်မုၢ်လၢယတၢ်သိၣ်တၢ်သီအိၣ်လၢအသးကံၢ်ပူၤသ့ၣ်ဧၢ,ပျံၤပှၤကညီအဒုၣ်ဒွဲၣ်တၢ်တဂ့ၤ,ဒီးဘၣ်ယိၣ်တၢ်လၢအစံးအၢတၢ်အဃိန့ၣ်တဂ့ၤ. 8အဂ့ၢ်ဒ်အံၤ,ဒ်ဆ့တဘ့ၣ်အသိးန့ၣ်တၢ်ဖိဃၢ်ကအီၣ်ကွံာ်အီၤ,ဒီးဒ်သိအဆူၣ်အသိးန့ၣ်အဃိၤအဃၢ်ကအီၣ်ကွံာ်အီၤလီၤ.မ့မ့ၢ်ယတၢ်တီတၢ်လိၤကအိၣ်လီၤထူလီၤယိာ်,ဒီးယတၢ်အုၣ်က့ၤခီၣ်က့ၤအစိၤစိၤအဃၣ်ဃၣ်လီၤ. 9ဖုသံနီၣ်ထီၣ်,ဖုသံနီၣ်ထီၣ်,သိးနသးဒီးတၢ်ဂံၢ်တၢ်ဘါ,ယွၤအစုဒုၣ်ဧၢ,ဖုသံနီၣ်ထီၣ်ဒ်လၢအမုၢ်နံၤလၢပျၢၤ,အစိၤအဃၣ်လၢကစၢၤကစၢၤအသိးန့ၣ်တက့ၢ်.နမ့ၢ်ပှၤလၢအကျီကွံာ်ရၤဃး,ဒီးဆဲးပယိၤန့ၣ်တမ့ၢ်ဘၣ်ဧါ. 10နမ့ၢ်ပှၤလၢအမၤလီၤသံးပီၣ်လဲၣ်,တၢ်ယိာ်ဖးဒိၣ်အထံ,လၢအပာ်ပီၣ်လဲၣ်အတၢ်ယိာ်ပူၤလၢကျဲတဘိဒ်သိးပှၤလၢအဘၣ်တၢ်ပှ့ၤက့ၤအီၤန့ၣ်ကခီဂာ်တၢ်,တမ့ၢ်ဘၣ်ဧါ. 11ဒီးပှၤလၢယွၤပှ့ၤက့ၤအီၤတဖၣ်န့ၣ်ကဟဲက့ၤကဒါက့ၤ,ဒီးကဟဲက့ၤသးဝံၣ်တၢ်ဆူစံယိၣ်အအိၣ်ဒီးတၢ်သူၣ်ခုသးခုအထူအယိာ်အိၣ်လၢအခိၣ်,ဒီးကန့ၢ်ဘၣ်တၢ်သူၣ်ဖှံသးညီ,ဒီးတၢ်သူၣ်ခုသးခုကချုးန့ၢ်အီၤ,ဒီးတၢ်သူၣ်အုးသးအုး,ဒီးတၢ်ကအုကစွါကဃ့ၢ်ထီၣ်ကွံာ်လီၤ. 12ယဲဒၣ်,ယၤအံၤယမ့ၢ်ပှၤလၢအမၤမုာ်ထီၣ်က့ၤသုလီၤ.နမ့ၢ်မတၤလၢနကပျံၤပှၤကညီလၢအကသံ,ဒီးပှၤကညီအဖိလၢအကကဲထီၣ်ဒ်နီၣ်ဧိၤမံၤဧိၤအသိးန့ၣ်တဂၤလဲၣ်. 13ဒီးနသးပ့ၤနီၣ်ယွၤလၢအတ့လီၤနၤ,လၢအသလၣ်ထီၣ်မူခိၣ်,ဒီးပာ်လီၤဟီၣ်ခိၣ်အခီၣ်ထံးတဖၣ်,ဒီးနဘၣ်ယိၣ်တၢ်တထံၣ်ဃီကိးမုၢ်နံၤဒဲး,လၢပှၤမၤအၢတၢ်အသးထီၣ်အဃိ,ဒ်အကတဲာ်ကတီၤတၢ်လၢအကမၤဟးဂီၤတၢ်အသိးန့ၣ်စ့ၢ်ကီးဧါ.ဒီးပှၤမၤအၢတၢ်အသးထီၣ်န့ၣ်မ့ၢ်အအိၣ်ဖဲလဲၣ်. 14ပှၤတၢ်မၢကဲကုၢ်အီၤကထူၣ်ဖျဲးချ့ချ့,ဒီးတသံဘၣ်လၢတၢ်ပူၤဘၣ်,ဒီးအကိၣ်တလီၤစှၤဘၣ်. 15ဒီးယဲဒၣ်အံၤယမ့ၢ်ယွၤနကစၢ်လၢအထိၣ်ဂဲၤပီၣ်လဲၣ်,ဒီးအလပီသီၣ်ထီၣ်လီၤ.တၢ်သုးမုၢ်ဂီၢ်မုၢ်အယွၤမ့ၢ်အမံၤလီၤ. 16ဒီးယပာ်ယတၢ်ကတိၤလၢနထးခိၣ်အပူၤ,ဒီးယကျၢၢ်ဘၢနၤလၢယစုအကဒု,ဒ်သိးယကသူၣ်မူခိၣ်,ဒီးပာ်ဟီၣ်ခိၣ်အခီၣ်ထံးတဖၣ်,ဒီးစံးလၢစံယိၣ်,နဲဒၣ်အံၤနမ့ၢ်ယပှၤဂီၢ်မုၢ်လီၤ. 17ထိၣ်ဂဲၤနသး,ထိၣ်ဂဲၤနသး,ဂဲၤဆၢထၢၣ်,ယရူၤၡလ့ၣ်လၢအအီလံယွၤအသးထီၣ်အလီခီလၢအစု,နၤဧၢ.နအီလံတၢ်ကနူၤကပၤအလီခီလံ,ဒီးစူၢ်ထီၣ်ကွံာ်အီၤလံလီၤ. 18လၢကယဲၢ်အဖိခွါလၢအဆံးစၢ်ဝဲအကျါန့ၣ်ပှၤဆှၢအီၤတအိၣ်ဘၣ်နီတဂၤဘၣ်.ပှၤဟံးထီၣ်အစုတအိၣ်ဘၣ်လၢကယဲၢ်အဖိခွါလၢအလုၢ်ဒိၣ်ထီၣ်ဝဲအကျါနီတဂၤဘၣ်. 19တၢ်ခံမံၤအံၤဟဲဘၣ်နၤ,မ့ၢ်မတၤကဟီၣ်ကယၢၤလၢနဂီၢ်တဂၤလဲၣ်.တၢ်အိၣ်သယုၢ်,ဒီးတၢ်လီၤပှီၢ်,ဒီးတၢ်သၣ်ဝံၤလီၤဒိ,ဒီးနးဧိၤဘီဧိၤလီၤ.မ့တမ့ၢ်ဘၣ်ယၤဘၣ်ဒီးမ့ၢ်မတၤကမၤမုာ်ထီၣ်က့ၤနၤလဲၣ်. 20နဖိခွါလီၤဘှါဝဲ,မံလီၤဝဲလၢကျဲခီၣ်ထံးဒ်တၤဖးသအိလၢပှာ်ပူၤအသိးန့ၣ်လီၤ.ပှဲၤဝဲဒီးယွၤအသးထီၣ်,နကစၢ်အသိၣ်ဃီၣ်တၢ်လီၤ. 21မၤသးဒ်န့ၣ်ဒီး,ဒိကနၣ်လၢ်တၢ်အံၤ,ပှၤလၢအဘၣ်နးဘၣ်ဖှီၣ်ဒီးအီမူၤအသးဘၣ်ဆၣ်ဒီးတမ့ၢ်ဘၣ်လၢစပံးထံဘၣ်န့ၣ်ဧၢ. 22နကစၢ်,ကစၢ်ယွၤဒီးနကစၢ်လၢအကတိၤလိာ်ကွီၢ်လၢအပှၤဂီၢ်မုၢ်အဂီၢ်န့ၣ်,စံးဝဲဒ်အံၤ,ကွၢ်ကွၢ်,ယဟံးန့ၢ်ကွံာ်တၢ်လဲၤကနူၤကပၤအလီခီလၢနစုပူၤ,ယသးထီၣ်အလီခီလီၤ.နတအီလၢၤဘၣ်အီၤဘၣ်. 23ဒီးယကပာ်အီၤလၢပှၤလၢအမၤနးမၤဖှီၣ်နၤအစုပူၤ,လၢအစံးဘၣ်နသးတီၤလီၤကဒွံကျိာ်တက့ၢ်,ဒီးပကခီဂာ်နၤလီၤ.ဒီးနပာ်နနီၢ်ခိဒ်ဟီၣ်ခိၣ်အသိး,ဒီးဒ်ကျဲအသိး,လၢပှၤလၢအလဲၤခီဂာ်ဝဲအဂီၢ်န့ၣ်လီၤ.
Copyright information for
KswSKMB