Isaiah 52
1ဖုသံနီၣ်ထီၣ်,ဖုသံနီၣ်ထီၣ်,သိးထီၣ်နဂံၢ်နဘါ,စံယိၣ်ဧၢ,သိးထီၣ်နကူနသိးအဃံအလၤ,ယရူၤၡလ့ၣ်ဝ့ၢ်စီဆှံဧၢ.အဂ့ၢ်ဒ်အံၤ,ပှၤတဒိးဘၣ်တၢ်ကူးတရံး,ဒီးပှၤတကဆှီဘၣ်တလဲၤနုာ်လၢၤဘၣ်လၢနပူၤဘၣ်. 2တြူာ်နသးလၢဟီၣ်ခိၣ်အကမူၣ်,ဂဲၤဆၢထၢၣ်,ဆ့ၣ်နီၤ,ယရူၤၡလ့ၣ်ဧၢ.ဃ့ၣ်လီၤပျံၤစၢဃာ်လၢနကိာ်,စံယိၣ်အဖိမုၣ်လၢတၢ်မၢကဲကုၢ်အီၤတဂၤဧၢ. 3အဂ့ၢ်ဒ်အံၤ,ယွၤစံးဒ်အံၤ,တၢ်ဆါကွံာ်သုလၢတၢ်နီတမံၤ,ဒီးစ့တအိၣ်ဘၣ်ဒီး,တၢ်ကပှ့ၤက့ၤသုလၢတၢ်တမ့ၢ်ဘၣ်စ့ဘၣ်လီၤ. 4အဂ့ၢ်ဒ်အံၤ,ကစၢ်ယွၤစံးဒ်အံၤ,ယပှၤဂီၢ်မုၢ်လဲၤလီၤလၢပျၢၤဆူအဲၤကူပတူးအပူၤဒ်သိးအကအိၣ်ကဆိးဖဲန့ၣ်လီၤ.ဒီးအဂ့ၢ်တအိၣ်ဘၣ်ဒီး,ပှၤအၤရှူၢ်ဖိမၤအၢအီၤလီၤ. 5ဒီးခဲကနံၣ်အံၤတၢ်အိၣ်ဖဲအံၤလၢယဂီၢ်မနုၤတမံၤလဲၣ်,ယွၤစံးဝဲဒၣ်,တၢ်စိာ်ထီၣ်ကွံာ်ယပှၤဂီၢ်မုၢ်ကလီကလီ,အပဒိၣ်ဖးဒိၣ်ဟီၣ်ပသူထီၣ်,ယွၤစံးဝဲဒၣ်.ဒီးပှၤဒုၣ်ဒွဲၣ်ယမံၤတထံၣ်ဃီသ့တနံၤကျၢၤလီၤ. 6မၤသးဒ်န့ၣ်ဒီး,ယပှၤဂီၢ်မုၢ်ကသ့ၣ်ညါထီၣ်ယမံၤ,မၤသးဒ်န့ၣ်ဒီး,လၢမုၢ်တနံၤန့ၣ်ကသ့ၣ်ညါလၢယမ့ၢ်ပှၤလၢအကတိၤတၢ်လီၤ.ကွၢ်ကွၢ်.ယၤလီၤ. 7ပှၤလၢအစံၣ်တဲၤတဲလီၤတၢ်သးခုအကစီၣ်လၢအစံၣ်တဲၤတဲလီၤတၢ်ဃူတၢ်ဖိး,လၢအစံၣ်တဲၤတဲလီၤတၢ်အဂ့ၤ,လၢအဘိးဘၣ်သ့ၣ်ညါပှၤလၢတၢ်အုၣ်က့ၤခီၣ်က့ၤလၢအစံးဘၣ်စံယိၣ်,နကစၢ်ကဲစီၤပၤန့ၣ်အခီၣ်အိၣ်လၢကစၢၢ်လိၤန့ၣ်မ့ၢ်အဃံအလၤဆံးဒိၣ်လဲၣ်. 8နပှၤခိးတၢ်ဖိတဖၣ်ကထုထီၣ်အကလုၢ်,ကကိးပသူထီၣ်တပူၤဃီလီၤ.အဂ့ၢ်ဒ်အံၤ,တုၤယွၤဟဲက့ၤဆူစံယိၣ်ဒီး,ကထံၣ်ဝဲလၢမဲာ်သကိးမဲာ်လီၤ. 9ကိးထီၣ်,ကိးပသူထီၣ်တပူၤဃီ,ယရူၤၡလ့ၣ်အတၢ်လီၤပှီၢ်သ့ၣ်ဧၢ,အဂ့ၢ်ဒ်အံၤ,ယွၤမၤမုာ်ထီၣ်က့ၤလံအပှၤဂီၢ်မုၢ်.ပှ့ၤက့ၤလံယရူၤၡလ့ၣ်န့ၣ်လံ. 10ယွၤမၤဘ့ၣ်ဆ့အစုဒုၣ်စီဆှံလၢပှၤကလုာ်ခဲလၢာ်အမဲာ်ညါ,ဒ်သိးဟီၣ်ခိၣ်အကတၢၢ်ခဲလၢာ်န့ၣ်ကထံၣ်ဘၣ်ပကစၢ်အတၢ်အုၣ်က့ၤခီၣ်က့ၤတၢ်လီၤ. 11ဟးထီၣ်,ဟးထီၣ်,လဲၤထီၣ်ဖဲန့ၣ်တက့ၢ်.တၢ်တကဆှီဘၣ်န့ၣ်ထိးဘၣ်အီၤနီတမံၤတဂ့ၤ.ဟးထီၣ်လၢအသးကံၢ်ပူၤန့ၣ်တက့ၢ်.ကဆှီထီၣ်တက့ၢ်,ပှၤလၢအစိာ်ယွၤအဃၢၤအဃိၢ်သ့ၣ်ဧၢ. 12အဂ့ၢ်ဒ်အံၤ,သုတဟးထီၣ်ပစုၢ်ပတ့ၤဘၣ်,ဒီးသုတလဲၤထီၣ်ဃ့ၢ်ဘၣ်.အဂ့ၢ်ဒ်အံၤ,ယွၤကလဲၤတၢ်လၢသုမဲာ်ညါ,ဒီးအံၣ်စရ့လးအကစၢ်ကအိၣ်လၢသုလီၢ်ခံလီၤ. 13ကွၢ်ကွၢ်,ယခ့ယပှၤကမၤတၢ်ဒီးတၢ်ကူၣ်သ့,ကဘီၣ်ထီၣ်ညီထီၣ်,ဒီးကထီၣ်ကထီ,ဒီးကဒိၣ်ထီၣ်ထီထီၣ်ဒိၣ်မးလီၤ. 14ဒ်ပှၤအါဂၤကမၢကမၣ်တၢ်လၢနဃိအသိး,(အမဲာ်အက့ၢ်အဂီၤဟးဂီၤတုၤအတမ့ၢ်လၢၤဘၣ်ပှၤကညီအသိး,ဒီးအက့ၢ်အဂီၤတုၤအတမ့ၢ်လၢၤဘၣ်ပှၤကညီဖိအသိး,) 15ကဖှံတၢ်လၢပှၤအါကလုာ်အလိၤဒ်န့ၣ်သိးလီၤ.စီၤပၤတဖၣ်ကကျၢၢ်တံၢ်အထးခိၣ်လၢအမဲာ်ညါလီၤ.အဂ့ၢ်ဒ်အံၤ,ကထံၣ်ဘၣ်တၢ်လၢပှၤတစံးဘၣ်အီၤ,ဒီးတၢ်လၢအတနၢ်ဟူတ့ၢ်ဘၣ်န့ၣ်ကသ့ၣ်ညါဝဲလီၤ.
Copyright information for
KswSKMB