Isa 54 | KswSKMB | STEP | သးဝံၣ်ထီၣ်,ပှၤတူာ်ဖိလၢအတဆံးစၢ်ဘၣ်တၢ်ဧၢ,ကိးပသူ,ဒီးထုထီၣ်နကလုၢ်,ပှၤလၢအတဘၣ်တၢ်ဟုးဆါဘၣ်တဂၤဧၢ.အဂ့ၢ်ဒ်အံၤ,ပှၤလၢအအိၣ်သယုၢ်တဂၤန့ၣ်အဖိအါန့ၢ်ပိာ်မုၣ်အိၣ်ဒီးအဝၤအဖိတက့ၢ်လီၤ,ယွၤစံးဝဲဒၣ်.

‏ Isaiah 54

1 သးဝံၣ်ထီၣ်,ပှၤတူာ်ဖိလၢအတဆံးစၢ်ဘၣ်တၢ်ဧၢ,ကိးပသူ,ဒီးထုထီၣ်နကလုၢ်,ပှၤလၢအတဘၣ်တၢ်ဟုးဆါဘၣ်တဂၤဧၢ.အဂ့ၢ်ဒ်အံၤ,ပှၤလၢအအိၣ်သယုၢ်တဂၤန့ၣ်အဖိအါန့ၢ်ပိာ်မုၣ်အိၣ်ဒီးအဝၤအဖိတက့ၢ်လီၤ,ယွၤစံးဝဲဒၣ်.

2 မၤလဲၢ်ထီၣ်နဒဲအလီၢ်,ဒီးနအိၣ်နဆိးအလီၢ်အယၣ်သဒၢတၢ်န့ၣ်မၤထီထီၣ်အီၤတက့ၢ်.သးလီတၢ်တဂ့ၤ,မၤထီနပျံၤ,ဒီးမၤခၢၣ်သနၢၢ်နတၢၣ်ဖိတက့ၢ်.

3 အဂ့ၢ်ဒ်အံၤ,နကဖျိးထီၣ်လၢနစုထွဲဒီးလၢနစုစ့ၣ်,ဒီးနချံနသၣ်ကန့ၢ်သါပှၤကလုာ်တဖၣ်,ဒီးကအိၣ်ဝဲဆိးဝဲလၢဝ့ၢ်အိၣ်သယုၢ်တ့ၢ်အပူၤလီၤ.

4 ပျံၤတၢ်တဂ့ၤ.အဂ့ၢ်ဒ်အံၤ,နမဲာ်တဆှးဘၣ်.ဒီးပာ်ဆှးနမဲာ်တဂ့ၤ.အဂ့ၢ်ဒ်အံၤ,တၢ်တဒုးမဲာ်ဆှးနၤဘၣ်.အဂ့ၢ်ဒ်အံၤ,နသးစၢ်အမဲာ်ဆှးန့ၣ်နကသးပ့ၤနီၣ်,ဒီးတၢ်ဒုၣ်ဒွဲၣ်နအိၣ်မုၣ်ကမဲန့ၣ်နကသးပ့ၤနီၣ်ဒီးနတသ့ၣ်နီၣ်ထီၣ်လၢၤဘၣ်လီၤ.

5 အဂ့ၢ်ဒ်အံၤ,ပှၤလၢအတ့လီၤနၤတဂၤန့ၣ်မ့ၢ်နဝၤလီၤ.အမံၤမ့ၢ်တၢ်သးမုၢ်ဂီၢ်မုၢ်အယွၤလီၤ.ဒီးပှၤလၢအပှ့ၤက့ၤနၤတဂၤန့ၣ်မ့ၢ်အံၣ်စရ့လးအတၢ်စီဆှံတဂၤလီၤ.ဒီးတၢ်ကကိးအီၤလၢဟီၣ်ခိၣ်ဒီဘ့ၣ်ညါအကစၢ်လီၤ.

6 အဂ့ၢ်ဒ်အံၤ,ဒ်ပိာ်မုၣ်လၢတၢ်လဲၤသဒၣ်အီၤဒီးဘၣ်တၢ်နးတၢ်ဖှီၣ်လၢအသးကံၢ်ပူၤအသိးန့ၣ်ယွၤကိးက့ၤလံနၤ,ဒီးဒ်မါတဂၤလၢအန့ၢ်ဝၤလၢအသးစၢ်အသိးန့ၣ်လီၤ.အဂ့ၢ်ဒ်အံၤ,ယွၤစံးတ့ၢ်ဝဲ,ကဘၣ်တၢ်ပာ်မၢ်အီၤလီၤ.

7 ယလဲၤသဒၣ်နၤတစိၢ်ဖိဘၣ်ဆၣ်ဒီး,ယကထၢဖှိၣ်နၤဒီးတၢ်သးကညီၤဖးဒိၣ်တဖၣ်န့ၣ်လီၤ.

8 မ့ၢ်ယသးထီၣ်ဖျိးထီၣ်တဘျီသတးဒီး,ယပာ်ခူသူၣ်ယသးလၢနမဲာ်ညါတစိၢ်ဖိလီၤ.ဘၣ်ဆၣ်ဒီးယကသးကညီၤနၤအိၣ်ဒီးတၢ်ဘျုးတၢ်ဖှိၣ်အထူအယိာ်လီၤ,တၢ်ပှ့ၤက့ၤနၤအယွၤစံးဝဲဒၣ်.

9 အဂ့ၢ်ဒ်အံၤ,အဝဲအံၤမ့ၢ်စီၤနိအၤအထံလၢယဂီၢ်လီၤ.ဒ်ယဆိၣ်တၢ်လၢထံဘၣ်ဃးဒီးစီၤနိအၤတလုၣ်ဘၢလၢၤဘၣ်ဟီၣ်ခိၣ်အသိးန့ၣ်,ယဆိၣ်လၢယတသးထီၣ်လၢၤဘၣ်နၤ,ဒီးယတသိၣ်ဃီၣ်လၢၤဘၣ်နၤဘၣ်လီၤ.

10 အဂ့ၢ်ဒ်အံၤ,ကစၢၢ်ကလိကသုးအလီၢ်,ဒီးတၢ်စိခိၣ်ကဟူးဝးလီၤ.မ့မ့ၢ်ယဘျုးယဖှိၣ်တဟးဘၣ်လၢနအိၣ်ဘၣ်.ဒီးယတၢ်အၢၣ်လီၤအီလီၤဘၣ်ဃးဒီးတၢ်ဃူတၢ်ဖိးတဟူးတဝးဘၣ်န့ၣ်,ယွၤလၢအသးကညီၤနၤတဂၤစံးဝဲဒၣ်.

11 ပှၤလၢအဘၣ်တၢ်နးတၢ်ဖှီၣ်,ဘၣ်ကလံၤမုၢ်,ဒီးတဘၣ်တၢ်မၤမုာ်ထီၣ်က့ၤနၤတဂၤဧၢ,ကွၢ်ကွၢ်,ယပာ်နလၢၢ်တဖၣ်လၢလၢၢ်တ့ၣ်လ့ၣ်အကမူၣ်အပူၤ,ဒီးနခီၣ်ထံးတဖၣ်လၢတၢ်မျၢ်နံၤလါလီၤ. 12 ယကတ့တၢးထီလၢနခိၣ်ဒူအဖီခိၣ်လၢတၢ်မျၢ်ဂီၤဆှုၣ်ကလာ်,ဒီးနတြဲၤလၢတၢ်မျၢ်ကပြုၢ်ကပြီၤ,ဒီးတၢ်လၢနဃၢၤခဲလၢာ်န့ၣ်ကမ့ၢ်လၢၢ်ဘၣ်အပှၤအမဲာ်လီၤ.

13 ဒီးနဖိနလံၤကကဲထီၣ်ယွၤအပျဲၢ်အဘီၣ်ခဲလၢာ်,ဒီးနဖိအတၢ်ဃူအတၢ်ဖိးန့ၣ်ကဒိၣ်ဝဲအါဝဲလီၤ.

14 နကအိၣ်ဂၢၢ်ဆိးကျၢၤလၢတၢ်တီတၢ်လိၤလီၤ.နကအိၣ်ယံၤဒီးတၢ်မၤအၢမၤသီလီၤ.အဂ့ၢ်ဒ်အံၤ,နတပျံၤဘၣ်တၢ်ဘၣ်.ဒီးအိၣ်ယံၤဒီးတၢ်ဟးဂီၤလီၤ.အဂ့ၢ်ဒ်အံၤ,တဟဲဘူးဒီးနၤဘၣ်လီၤ.

15 ကွၢ်ကွၢ်,ပှၤကအိၣ်ဖှိၣ်ရိဖှိၣ်လီၤ.တမ့ၢ်ဘၣ်လၢယၤအဃိဘၣ်.ကယဲၢ်ပှၤလၢအအိၣ်ဖှိၣ်ထီဒါနၤန့ၣ်ကဟးဂီၤလၢနဃိလီၤ.

16 ကွၢ်ကွၢ်,ယတ့လီၤလံပှၤပိာ်တၢ်ဖိလၢအအူသဖှိမ့ၣ်အူကဖးလၢမ့ၣ်အူကျါ,လၢအဒုးဟဲထီၣ်အစုကဝဲၤလၢအမၤတၢ်အဃိလံ.ဒီးယတ့လီၤလံတၢ်မၤသယုၢ်ဒ်သိးအကမၤဟးဂီၤတၢ်လီၤ.

17 တၢ်အစုကဝဲၤလၢအတ့လီၤအသးထီဒါနၤန့ၣ်တဘီၣ်ထီၣ်ညီထီၣ်နီတမံၤဘၣ်.ဒီးကယဲၢ်ပှၤအပျ့ၤလၢအဂဲၤဆၢထၢၣ်ထီဒါနၤလၢတၢ်စံၣ်ညီၣ်အပူၤန့ၣ်နကဒုးစံၣ်ညီၣ်ဃၣ်အီၤလီၤ.အဝဲန့ၣ်မ့ၢ်ယွၤအခ့အပှၤအတၢ်န့ၢ်သါ,ဒီးအတၢ်တီတၢ်လိၤန့ၣ်ဟဲလၢယၤလီၤ,ယွၤစံးဝဲဒၣ်.