Isaiah 59
1ကွၢ်ကွၢ်,တမ့ၢ်ဘၣ်ယွၤအစုဖုၣ်လီၤတုၤအအုၣ်က့ၤခီၣ်က့ၤတၢ်တသ့ဘၣ်,ဒီးတမ့ၢ်ဘၣ်အနၢ်ဃၢဝဲတုၤအနၢ်ဟူတၢ်တသ့ဘၣ်. 2မ့မ့ၢ်သုတၢ်အၢတဖၣ်မၤလီၤဖးသုလၢသုကစၢ်,ဒီးသုတၢ်ဒဲးဘးဒုးအိၣ်တဒၢအမဲာ်လၢသုလၢအတနၢ်ဟူဘၣ်တၢ်ဘၣ်လီၤ. 3အဂ့ၢ်ဒ်အံၤ,သုစုဘၣ်အၢဒီးတၢ်သွံၣ်,ဒီးသုစုမုၢ်ဒီးတၢ်အၢတၢ်သီလီၤ.သုပျုၤကတိၤလံတၢ်ကဘျံးကဘျၣ်,ဒီးသုပျ့ၤကတိၤတၢ်အၢလီၤ. 4ပှၤကိးထီၣ်လၢတၢ်တီတၢ်လိၤတအိၣ်ဘၣ်,ဒီးပှၤလိာ်ကွီၢ်လၢတၢ်မ့ၢ်တၢ်တီတအိၣ်ဘၣ်.သန့ၤအသးလၢတၢ်ကလီကလီ,ဒီးကတိၤတၢ်ကဘျံးကဘျၣ်,ဒၢထီၣ်တၢ်မၤအၢ,ဒီးဆံးစၢ်တၢ်အၢလီၤ. 5ဟုဝဲလၢဂုၢ်မိာ်အိးအဒံၣ်,ဒီးထ့ကပီၤအဒၢလီၤ.ပှၤလၢအအီၣ်အဒံၣ်န့ၣ်ကသံဝဲ,ဒီးဒံၣ်သဘှံးတဖျၢၣ်န့ၣ်ဂုၢ်အၢကဟဲထီၣ်လၢအပူၤတဘိလီၤ. 6အထၣ်တဖၣ်န့ၣ်တကဲထီၣ်ဘၣ်လၢအကူအသိးဘၣ်,ဒီးတလုးဘၢအသးလၢအတၢ်မၤဘၣ်.အမၤတၢ်တဖၣ်န့ၣ်မ့ၢ်တၢ်အၢအမၤတၢ်,ဒီးတၢ်မၤဆူၣ်မၤစိးအၢအိၣ်ဝဲလၢအစုပူၤလီၤ. 7အခီၣ်ဃ့ၢ်ဆူတၢ်အၢအအိၣ်,ဒီးမၤချ့ချ့ဒ်သိးအကလူလီၤတၢ်သွံၣ်လၢအတၢ်ဒဲးဘးတအိၣ်ဘၣ်.အဆိကမိၣ်တၢ်န့ၣ်မ့ၢ်တၢ်အၢအတၢ်ဆိကမိၣ်,တၢ်မၤသယုၢ်,ဒီးတၢ်မၤဟးဂီၤအိၣ်ဝဲလၢအကျဲလီၤ. 8တၢ်ဃူတၢ်ဖိးအကျဲတသ့ၣ်ညါဘၣ်ဝဲဘၣ်,ဒီးတၢ်စံၣ်ညီၣ်တီတအိၣ်ဘၣ်လၢအကျဲဘၣ်.မၤက့ၣ်အကျဲ,ပှၤလၢအပိာ်အီၤန့ၣ်တသ့ၣ်ညါဘၣ်တၢ်ဃူတၢ်ဖိးနီတဂၤဘၣ်. 9မၤသးဒ်န့ၣ်ဒီး,တၢ်စံၣ်ညီၣ်အိၣ်ယံၤဒီးပှၤ,ဒီးတၢ်တီတၢ်လိၤတချုးန့ၢ်ဘၣ်ပှၤဘၣ်.ပကွၢ်လၢ်တၢ်ကပီၤအကျဲ,ဒီးကွၢ်ကွၢ်,တၢ်ခံး,ပကွၢ်လၢ်မုၢ်ထူၣ်အဧူၢ်,ဒီးပလဲၤတၢ်လၢတၢ်ခံးကျါလီၤ. 10ပကလၢၢ်တၢ်ဒ်ပှၤမဲာ်ဘျီၣ်လၢတၢ်ဒူၣ်အဂီၢ်,ဒီးဒ်ပှၤလၢအမဲာ်တအိၣ်ဘၣ်အသိးန့ၣ်ပကလၢၢ်တၢ်လီၤ.ပခီၣ်ဘၣ်တိၢ်လၢမုၢ်ထူၣ်ဒ်လၢမုၢ်နၤအသိး,ပအိၣ်လၢတၢ်ခံးသူအကျါဒ်ပှၤသံအသိးန့ၣ်လီၤ. 11ပပသူကညီၤခဲလၢာ်ဒ်တၤသူအသိး,ပပှ့ၤတထံၣ်ဃီဒ်ထိၣ်လွံၢ်အသိးလီၤ.ပကွၢ်လၢ်တၢ်စံၣ်ညီၣ်အကျဲ,ဒီးတအိၣ်ဘၣ်.တၢ်အုၣ်က့ၤခီၣ်က့ၤအကျဲ,ဒီးအိၣ်ယံၤဒီးပှၤလီၤ. 12အဂ့ၢ်ဒ်အံၤ,ပတၢ်ကမၣ်အါထီၣ်လၢနမဲာ်ညါ,ဒီးပတၢ်ဒဲးဘးအုၣ်အသးထီဒါပှၤလီၤ.အဂ့ၢ်ဒ်အံၤ,ပတၢ်ကမၣ်အိၣ်ဒီးပှၤ,ဒီးပတၢ်အၢတၢ်သီန့ၣ်ပသ့ၣ်ညါအီၤလီၤ. 13ပမၤကမၣ်တၢ်ဒီးကတိၤကဘျံးကဘျၣ်ထီဒါယွၤ,ဒီးဃၣ်ဒူၣ်ချၢပသးလၢပကစၢ်,ဒီးပကတိၤတၢ်မၤအၢ,ဒီးတၢ်လဲၤသဒၣ်တၢ်,ပဒၢထီၣ်ဒီးကတိၤတၢ်ကတိၤကဘျံးကဘျၣ်လၢပသးလီၤ. 14ဒီးတၢ်စံၣ်ညီၣ်ဃၣ်ကဒါက့ၤအသး,ဒီးတၢ်တီတၢ်လိၤဆၢထၢၣ်လၢအယံၤလီၤ.အဂ့ၢ်ဒ်အံၤ,တၢ်မ့ၢ်တၢ်တီလီၤဃံၤလၢကျဲမုၢ်,ဒီးတၢ်တီတၢ်လိၤလဲၤနုာ်တသ့ဘၣ်. 15မ့ၢ်မးတၢ်မ့ၢ်တၢ်တီတအိၣ်ဘၣ်,ဒီးပှၤလၢအဟးဆှဲးတၢ်အၢန့ၣ်တၢ်ဂုာ်န့ၢ်အတၢ်လီၤ.ဒီးယွၤထံၣ်ဘၣ်ဝဲ,ဒီးမ့ၢ်တၢ်စံၣ်ညီၣ်တအိၣ်ဘၣ်ဒီး,မ့ၢ်တၢ်အၢလၢအမဲာ်ညါလီၤ. 16ဒီးထံၣ်ဝဲလၢပှၤကညီတအိၣ်ဘၣ်,ဒီးကမၢကမၣ်ဝဲလၢပှၤဃ့တၢ်တအိၣ်ဘၣ်.မၤသးဒ်န့ၣ်ဒီးအစုဒုၣ်ဒၣ်ဝဲမၤတၢ်အုၣ်က့ၤခီၣ်က့ၤတၢ်လၢအဂီၢ်,ဒီးအတၢ်တီတၢ်လိၤဒၣ်ဝဲန့ၣ်ဒုးအိၣ်ကျၢၤအီၤလီၤ. 17ဒီးသိးတၢ်တီတၢ်လိၤဒ်သဃိးအသိးန့ၣ်,ဒီးတၢ်အုၣ်က့ၤခီၣ်က့ၤအခိၣ်ကုာ်သုးကုာ်ဝဲလၢအခိၣ်,ဒီးကူသိးဝဲလၢတၢ်ဟ့ၣ်ကၣ်တၢ်အၢအကူအသိးလၢအကူအသိးအဂီၢ်,ဒီးကၤတၢ်သးဆူၣ်ဒ်အယၣ်တဘ့ၣ်အသိးန့ၣ်လီၤ. 18ဒ်အဝဲသ့ၣ်မၤတၢ်အသိးန့ၣ်အဝဲဒၣ်ကဟ့ၣ်ကၣ်တၢ်,တၢ်သးကဲၤထီၣ်လၢအဒုၣ်အဒါအလိၤ,တၢ်လၢအကြၢးန့ၢ်ဘၣ်လၢပှၤထီဒါအီၤအလိၤလီၤ.ကဟ့ၣ်ကၣ်ပှၤထံယံၤကီၢ်ယံၤလၢအကြၢးန့ၢ်ဘၣ်လီၤ. 19ဒီးကပျံၤယွၤအမံၤလၢမုၢ်နုာ်တခီ,ဒီးအလၤကပီၤလၢမုၢ်ထီၣ်တခီလီၤ.အဂ့ၢ်ဒ်အံၤ,ကဟဲဝဲဒ်ထံကျိဆူၣ်အသိးန့ၣ်,ဒီးယွၤအသးကယူာ်ထီၣ်ထီသုးဖိအလၣ်တဘ့ၣ်လီၤ. 20ဒီးပှၤပှ့ၤက့ၤတၢ်ကဟဲလၢစံယိၣ်အဂီၢ်,ဒီးလၢပှၤလၢအဃၣ်လိၤအသးလၢတၢ်မၤကမၣ်လၢယၤကိာ်အပူၤတဖၣ်အဂီၢ်လီၤ,ယွၤစံးဝဲဒၣ်. 21ဒီးယဲဒၣ်အံၤယတၢ်အၢၣ်လီၤအီလီၤဒီးအီၤမ့ၢ်အအံၤ,ယွၤစံးဝဲဒၣ်,ယသးလၢအအိၣ်လၢနလိၤ,ဒီးယတၢ်ကတိၤလၢယပာ်လၢနထးခိၣ်,တဟးထီၣ်ကွံာ်ဘၣ်လၢနထးခိၣ်,လၢနချံနသၣ်အထးခိၣ်,လၢနချံနသၣ်အချံအသၣ်အထးခိၣ်,တုၤအံၤဆူညါအစိၤစိၤအဃၣ်ဃၣ်လီၤ,ယွၤစံးဝဲဒၣ်လီၤ.
Copyright information for
KswSKMB