Isa 61 | KswSKMB | STEP | ကစၢ်ယွၤအသးအိၣ်လၢယလိၤလီၤ.အဂ့ၢ်ဒ်အံၤ,ယွၤဖှူလံယၤဒ်သိးယကစံၣ်တဲၤတဲလီၤတၢ်သးခုအကစီၣ်လၢပှၤဖှီၣ်ဖိယာ်ဖိ,မၢလီၤယၤဒ်သိးယကမၤဘျါက့ၤပှၤအသူၣ်ကၢ်အသးလီၤ,ဒ်သိးယကကိးထီၣ်တၢ်ထူၣ်ဖျဲးလၢပှၤဘၣ်တၢ်မၢကဲကုၢ်အီၤအဂီၢ်,ဒီးတၢ်အိးထီၣ်တၢ်လၢပှၤဘၣ်တၢ်စၢဃာ်အဂီၢ်န့ၣ်,

‏ Isaiah 61

1 ကစၢ်ယွၤအသးအိၣ်လၢယလိၤလီၤ.အဂ့ၢ်ဒ်အံၤ,ယွၤဖှူလံယၤဒ်သိးယကစံၣ်တဲၤတဲလီၤတၢ်သးခုအကစီၣ်လၢပှၤဖှီၣ်ဖိယာ်ဖိ,မၢလီၤယၤဒ်သိးယကမၤဘျါက့ၤပှၤအသူၣ်ကၢ်အသးလီၤ,ဒ်သိးယကကိးထီၣ်တၢ်ထူၣ်ဖျဲးလၢပှၤဘၣ်တၢ်မၢကဲကုၢ်အီၤအဂီၢ်,ဒီးတၢ်အိးထီၣ်တၢ်လၢပှၤဘၣ်တၢ်စၢဃာ်အဂီၢ်န့ၣ်, 2 ဒ်သိးယကကိးထီၣ်နံၣ်တၢ်ဘၣ်ယွၤအသး,ဒီးပကစၢ်မၤဆၢတၢ်အၢအမုၢ်တနံၤ,ဒ်သိးယကမၤမုာ်ထီၣ်က့ၤကယဲၢ်ပှၤလၢအသူၣ်အုးအသးအုးခဲလၢာ်, 3 ဒ်သိးယကပာ်လီၤတၢ်လၢပှၤအသူၣ်အုးအသးအုးလၢစံယိၣ်အပူၤအဂီၢ်,ဒ်သိးယကဟ့ၣ်လီၤအခိၣ်သလုးလၢဖၣ်ဆါအလီၢ်,တၢ်သးခုအသိလၢတၢ်သးအုးအလီၢ်,တၢ်စံးထီၣ်ပတြၢၤအဆ့လၢတၢ်သးဃၢအလီၢ်န့ၣ်လီၤ.ဒီးတၢ်ကကိးအီၤလၢတၢ်တီတၢ်လိၤအသ့ထိးဖၣ်တဖၣ်,တၢ်လၢယွၤသူၣ်ဝဲဒ်သိးအကဒိးတၢ်လၤကပီၤလီၤ.

4 ဒီးအဝဲသ့ၣ်ကမၤက့ၤတၢ်အလီၢ်လီၤပှီၢ်လၢသီ,ဒီးကမၤထီၣ်က့ၤတၢ်အိၣ်သယုၢ်လၢပျၢၤ,ဒီးကတ့လီၤက့ၤဝ့ၢ်လီၤပှီၢ်တဖၣ်,တၢ်အိၣ်သယုၢ်လၢကစၢၤကစၢၤန့ၣ်လီၤ.

5 ဒီးပှၤတခီဘီမုၢ်ဖိကဆၢထၢၣ်,ဒီးကွၢ်သုသိအဖုတဖၣ်,ဒီးပှၤတခီဘီမုၢ်ဖိအဖိခွါတဖၣ်ကကဲထီၣ်သုပှၤထဲၣ်တၢ်ဖိ,ဒီးပှၤကကတဲာ်ကတီၤသုစပံးမုၢ်လီၤ. 6 မ့မ့ၢ်သုဝဲသ့ၣ်အံၤ,တၢ်ကကိးသုလၢယွၤအပှၤလုၢ်တၢ်အဒိၣ်ပှၤကကိးသုလၢပှၤမၤကစၢ်အတၢ်လီၤ.သုကအီၣ်ပှၤကလုာ်တဖၣ်အစုလီၢ်အခီၣ်ခိၣ်,ဒီးသုကပာ်ကဖိသုသးလၢအလၤကပီၤအပူၤလီၤ.

7 လၢသုမဲာ်ဆှးအလီၢ်န့ၣ်သုကန့ၢ်တၢ်ခံစး,ဒီးလၢတၢ်ပာ်မဲာ်ဆှးအလီၢ်န့ၣ်တၢ်ကသူၣ်ဖှံသးညီလၢအဂီၢ်အပူၤလီၤ.မၤသးဒ်န့ၣ်ဒီးကန့ၢ်ဘၣ်ခံစးလၢအကီၢ်ပူၤ,တၢ်သူၣ်ခုသးခုအထူအယိာ်ကအိၣ်ဒီးအီၤလီၤ.

8 အဂ့ၢ်ဒ်အံၤ,ယဲဒၣ်အံၤယမ့ၢ်ယွၤလီၤ.ယအဲၣ်တၢ်စံၣ်ညီၣ်တီ,ယသးဟ့တၢ်မၤန့ၢ်ဆူၣ်လၢတၢ်လုၢ်တၢ်ပာ်အဂီၢ်လီၤ.ဒီးယကဟ့ၣ်လီၤအဘူးအလဲလၢတၢ်မ့ၢ်တၢ်တီအပူၤ,ဒီးယကအၢၣ်လီၤအီလီၤတၢ်အၢၣ်လီၤအီလီၤအထူအယိာ်ဒီးအီၤလီၤ.

9 အချံအသၣ်န့ၣ်ပှၤကသ့ၣ်ညါအီၤလၢပှၤကလုာ်တတဖၣ်အကျါ,ဒီးအစၢၤအသွဲၣ်န့ၣ်လၢပှၤဂီၢ်မုၢ်အသးကံၢ်ပူၤန့ၣ်လီၤ.ကယဲၢ်ပှၤလၢအထံၣ်ဘၣ်အီၤကအၢၣ်လီၤအီလီၤလၢအမ့ၢ်ပှၤအချံအသၣ်လၢယွၤဆိၣ်ဂ့ၤလံအီၤလီၤ.

10 ယကသူၣ်ဖှံသးညီဒိၣ်မးလၢယွၤအပူၤလီၤ.မ်ယသးပိၢ်လၢယကစၢ်အပူၤတက့ၢ်.အဂ့ၢ်ဒ်အံၤ,ဒုးသိးလံယၤလၢတၢ်အုၣ်က့ၤခီၣ်က့ၤအဆ့,ဒီးဒုးသိးလံယၤလၢတၢ်တီတၢ်လိၤအဆ့ဖးထီန့ၣ်ဒ်တလးမူးပိာ်ခွါကယၢအသးဒီးအခိၣ်သလုးဒ်ပှၤလုၢ်တၢ်အဒိၣ်အသိးန့ၣ်,ဒီးဒ်တလးမူးပိာ်မုၣ်ကယၢအသးလၢအကယၢကယဲအသိးန့ၣ်လီၤ.

11 အဂ့ၢ်ဒ်အံၤ,ဒ်ဟီၣ်ခိၣ်ဒုးမဲထီၣ်အတၢ်အသိး,ဒီးဒ်တၤသၣ်အလီၢ်ဒုးမဲထီၣ်တၢ်ဖှံအသးလၢအပူၤအသိးန့ၣ်ကစၢ်ယွၤကဒုးအိၣ်ထီၣ်တၢ်တီတၢ်လိၤ,ဒီးတၢ်စံးထီၣ်ပတြၢၤလၢပှၤကိးကလုာ်ဒဲးအမဲာ်ညါဒ်န့ၣ်သိးလီၤ.