Isaiah 63
1ပှၤလၢအဟဲလၢအဒိၣ်,အိၣ်ဒီးအကူအသိးစုၣ်ဂီၤအသးလၢဘိးစရၤ,ပှၤလၢအကူအသိးအိၣ်ဒီးအဃံအလၤ,ဟဲလၢအဂံၢ်ဆူၣ်အဘါဆူၣ်အိၣ်ဒီးအကဟုအကညီၢ်န့ၣ်မ့ၢ်မတၤတဂၤလဲၣ်.ယၤ,ပှၤလၢအစံၣ်တဲၤတဲလီၤတၢ်တီတၢ်လိၤ,အစိဒိၣ်အကမီၤထီလၢအကအုၣ်က့ၤခီၣ်က့ၤတၢ်အဂီၢ်လီၤ. 2နကူနသိးန့ၣ်ဂီၤဝဲ,ဒီးနဆ့မၤသးဒ်ပှၤလၢအယီၢ်စပံးသၣ်အနီၣ်စံၢ်ပူၤအသိးန့ၣ်မ့ၢ်အဘၣ်မနုၤလဲၣ်. 3ယယီၢ်စပံးသၣ်အနီၣ်စံၢ်ပူၤတဂၤဃီ,ဒီးလၢပှၤဂီၢ်မုၢ်အကျါန့ၣ်ပှၤတအိၣ်ဒီးယၤနီတဂၤဘၣ်.ဒီးယယီၢ်အီၤလၢယသးထီၣ်,ဒီးယယီၢ်တံၢ်အီၤလၢယသးကဲၤထီၣ်လီၤ.ဒီးအသွံၣ်ဖှံအသးလၢယကူယသိးအလိၤ,ဒီးယကမၤဘၣ်အၢယကူယသိးခဲလၢာ်လီၤ. 4အဂ့ၢ်ဒ်အံၤ,တၢ်မၤဆၢတၢ်အၢအမုၢ်တနံၤအိၣ်ဝဲလၢယသးကံၢ်ပူၤ,ဒီးယပှၤဒိးပှ့ၤက့ၤအသးတဖၣ်အနံၣ်န့ၣ်ဘၣ်လံဝဲလံ. 5ဒီးယကွၢ်တၢ်ဒီးတၢ်မၤစၢၤတအိၣ်ဘၣ်,ဒီးယပာ်ယသးကမၢကမၣ်လၢပှၤဒုးအိၣ်ကျၢၤတၢ်တအိၣ်ဘၣ်အဃိလီၤ.မၤသးဒ်န့ၣ်ဒီးယစုဒုၣ်ဒၣ်ယဲအုၣ်က့ၤခီၣ်က့ၤတၢ်လၢယဂီၢ်,ဒီးယသးကဲၤထီၣ်ဒုးအိၣ်ကျၢၤယၤလီၤ. 6ဒီးယယီၢ်လီၤပှၤဂီၢ်မုၢ်လၢယသးထီၣ်,ဒီးယဒုးမူၤအသးလၢယသးကဲၤထီၣ်,ဒီးယဂၢ်လီၤအသွံၣ်လၢဟီၣ်ခိၣ်အဖီခိၣ်လီၤ. 7ယွၤအဘျုးအဖှိၣ်န့ၣ်ယကဒုးသ့ၣ်နီၣ်ထီၣ်က့ၤအီၤ,တၢ်စံးထီၣ်ပတြၢၤယွၤန့ၣ်ဒ်ကယဲၢ်တၢ်လၢယွၤမၤဝဲလၢပဂီၢ်,ဒီးအတၢ်ဂ့ၤဖးဒိၣ်လၢအမၤဝဲလၢအံၣ်စရ့လးအပှၤဟံၣ်ဖိအဂီၢ်ဒ်အသးအိၣ်တၢ်,ဒီးအဘျုးဒိၣ်အဖှိၣ်အါအသိးန့ၣ်လီၤ. 8အဂ့ၢ်ဒ်အံၤ,စံးဝဲဒၣ်,အဝဲသ့ၣ်တဖၣ်မ့ၢ်သပှၢ်တၢၢ်ယပှၤဂီၢ်မုၢ်,ယဖိလၢအတလီဘၣ်တၢ်ဘၣ်.ဒီးအဝဲဒၣ်ကဲထီၣ်ပှၤအုၣ်က့ၤခီၣ်က့ၤအီၤလီၤ. 9လၢအဝဲသ့ၣ်အတၢ်ထီဒုၣ်ထီဒါအီၤခဲလၢာ်အပူၤန့ၣ်အဝဲဒၣ်တမ့ၢ်ဘၣ်အဒုၣ်အဒါဘၣ်.ဒီးအမဲာ်ညါအကလူးတဂၤအုၣ်က့ၤခီၣ်က့ၤအီၤလီၤ.မ့ၢ်အအဲၣ်ဝဲ,ဒီးသးအိၣ်ဝဲဒီး,ပှ့ၤက့ၤအီၤ,ဒီးဟံးန့ၢ်အီၤ,ဒီးစိာ်အီၤမုၢ်နံၤလၢပျၢၤခဲလၢာ်လီၤ. 10မ့မ့ၢ်အဝဲသ့ၣ်တဖၣ်န့ၣ်ပူထီၣ်တၢ်,ဒီးမၤကိၢ်အသးစီဆှံအသး,ဒီးအဝဲဒၣ်ကဲထီၣ်က့ၤအဒုၣ်အဒါ,ဒီးဒုးသုးလၢအကစၢ်ဒၣ်ဝဲထီဒါအီၤလီၤ. 11တုၤနုၤတစုသ့ၣ်နီၣ်ထီၣ်က့ၤမုၢ်နံၤလၢပျၢၤတဖၣ်,စီၤမိၤရှ့ဒီးအပှၤဂီၢ်မုၢ်လီၤ.ပှၤလၢအဒုးဟဲထီၣ်အီၤလၢပီၣ်လဲၣ်ပူၤ,ပှၤကွၢ်အသိတဖုန့ၣ်မ့ၢ်အအိၣ်ဝဲဖဲလဲၣ်.ပှၤလၢအပာ်အသးစီဆှံလၢအပူၤန့ၣ်,မ့ၢ်အအိၣ်ဝဲဖဲလဲၣ်. 12ပှၤလၢအဆှၢအီၤလၢစီၤမိၤရှ့အစုထွဲ,ဒီးအစုကညီၢ်လၢအမၤသ့ၣ်ဖးထံလၢအဝဲသ့ၣ်အမဲာ်ညါဒ်သိးအကမၤအမံၤအထူအယိာ်လၢအဂီၢ်ဒၣ်ဝဲ, 13ပှၤလၢအဒုးလဲၤထီၣ်အီၤလၢတၢ်ယိာ်ပူၤဒ်ကသ့ၣ်တဒုလၢပှၢ်မုၢ်ကနၢလၢအခီၣ်တဘၣ်တိၢ်ဘၣ်အသိးန့ၣ်မ့ၢ်အအိၣ်ဖဲလဲၣ်. 14ဒ်ဂီၤဖံးတဖုလဲၤလီၤဆူကစၢၢ်ကဆူးပူၤအသိးန့ၣ်ယွၤအသးကဒုးအိၣ်ဘှံးအီၤလီၤ.နဆှၢနပှၤဂီၢ်မုၢ်ဒ်သိးနကမၤနမံၤကဟုနသၣ်ကညီၢ်ဒ်န့ၣ်သိးလီၤ. 15ကွၢ်လီၤလၢမူခိၣ်,ဒီးထံၣ်တၢ်လၢနတၢ်စီဆှံ,ဒီးနတၢ်လၤကပီၤအအိၣ်အလီၢ်န့ၣ်တက့ၢ်.နသးဆူၣ်ဒီးနစိဒိၣ်နကမီၤဒိၣ်မ့ၢ်အအိၣ်ဖဲလဲၣ်.နသးကညီၤယၤဒီးနသးအိၣ်ယၤန့ၣ်ဘၣ်တၢ်တြီအီၤလီၤ. 16အဂ့ၢ်ဒ်အံၤ,စီၤအၤဘြၤဟၣ်တသ့ၣ်ညါဘၣ်ပှၤ.ဒီးအံၣ်စရ့လးတအၢၣ်လီၤအီလီၤဘၣ်ပှၤဘၣ်ဆၣ်ဒီး,နမ့ၢ်ပပၢ်လီၤ.နဲဒၣ်ယွၤဧၢ,နမ့ၢ်ပပၢ်,တၢ်ပှ့ၤက့ၤပှၤလၢကစၢၤကစၢၤန့ၣ်မ့ၢ်နမံၤလီၤ. 17ယွၤဧၢ,နကဒုးဟးဖျိးပှၤလၢနကျဲဧိၤကပူၤဧိၤ,နကမၤကိၤပသးလၢပတပျံၤဘၣ်နၤန့ၣ်မ့ၢ်အဘၣ်မနုၤလဲၣ်.ဟဲက့ၤကဒါက့ၤလၢနခ့နပှၤအဂီၢ်,နတၢ်န့ၢ်သါအဒူၣ်တဖၣ်န့ၣ်တက့ၢ်. 18နပှၤစီဆှံန့ၢ်သါတၢ်တစိၢ်ဖိလီၤ.ပဒုၣ်ပဒါယီၢ်လီၤကွံာ်နတၢ်အလီၢ်စီဆှံလီၤ. 19ပဝဲဒၣ်အံၤပအိၣ်လၢကစၢၤကစၢၤလံၤလံၤလီၤ.နတပၢဘၣ်အီၤဘၣ်.နမံၤတဘၣ်တၢ်ကိးအီၤလၢအလိၤဘၣ်.
Copyright information for
KswSKMB