Isa 9 | KswSKMB | STEP | ဘၣ်ဆၣ်ဒီး,တၢ်ခံးန့ၣ်တအိၣ်ဘၣ်ဒီးပှၤလၢအဘၣ်တၢ်မၤအၢအီၤဘၣ်.ဒ်အဆၢအကတီၢ်အခီၣ်ထံးမၤတရီတပါကီၢ်စဘူလိၣ်ဒီးကီၢ်နးသၤလံအသိးန့ၣ်,အဆၢအကတီၢ်လၢအလီၢ်ခံန့ၣ်ကမၤလၤကပီၤပီၣ်လဲၣ်အကျဲ,ယၢ်ဒ့ၣ်အနံၤ,ကၤလံၤလါဘၣ်ဃးဒီးပှၤကလုာ်တဖၣ်ဒ်န့ၣ်သိးလီၤ.

‏ Isaiah 9

1 ဘၣ်ဆၣ်ဒီး,တၢ်ခံးန့ၣ်တအိၣ်ဘၣ်ဒီးပှၤလၢအဘၣ်တၢ်မၤအၢအီၤဘၣ်.ဒ်အဆၢအကတီၢ်အခီၣ်ထံးမၤတရီတပါကီၢ်စဘူလိၣ်ဒီးကီၢ်နးသၤလံအသိးန့ၣ်,အဆၢအကတီၢ်လၢအလီၢ်ခံန့ၣ်ကမၤလၤကပီၤပီၣ်လဲၣ်အကျဲ,ယၢ်ဒ့ၣ်အနံၤ,ကၤလံၤလါဘၣ်ဃးဒီးပှၤကလုာ်တဖၣ်ဒ်န့ၣ်သိးလီၤ. 2 ပှၤလၢအဆ့ၣ်နီၤလၢတၢ်ခံးကျါန့ၣ်ထံၣ်ဘၣ်လံတၢ်ကပီၤဖးဒိၣ်လံ.ဒီးပှၤလၢအအိၣ်ဝဲဆိးဝဲလၢတၢ်သံအကဒုအကီၢ်ပူၤန့ၣ်တၢ်ကပီၤထီၣ်ဘၣ်လံအီၤလံ.

3 နမၤအါထီၣ်ပှၤတကလုာ်အံၤ,နမၤဒိၣ်ထီၣ်အတၢ်သးခုလီၤ.သးခုဝဲလၢနမဲာ်ညါဒ်တၢ်ကူးဘုအကတီၢ်အတၢ်သးခုအသိး,ဒီးဒ်ပှၤသးခုလၢအနီၤဖးတၢ်ဂုာ်န့ၢ်အဖၢမုၢ်အသိးန့ၣ်လီၤ.

4 အဂ့ၢ်ဒ်အံၤ,အတၢ်ယိးအနီၣ်ယိးဘိ,အဖံဘၣ်ခိၣ်အနီၣ်ယိးဘိ,အပှၤဟီထီၣ်အီၤတဂၤအနီၣ်တီၢ်န့ၣ်,နမၤကၢ်အီၤဒ်လၢမံးဒယၣ်အမုၢ်တနံၤအသိးန့ၣ်လီၤ.

5 အဂ့ၢ်ဒ်အံၤ,ပှၤအိၣ်ဒီးအစုကဝဲၤလၢဒုးသုးအသီၣ်ပူၤန့ၣ်အစုကဝဲၤခဲလၢာ်,ဒီးဆ့ဧိၤစီၤဧိၤထူထီၣ်အသးလၢတၢ်သွံၣ်န့ၣ်ကကဲထီၣ်ဝဲလၢတၢ်ဆိၣ်ကဲၤမ့ၣ်အူ,လၢမ့ၣ်အူအီၣ်တၢ်အဂီၢ်လီၤ.

6 အဂ့ၢ်ဒ်အံၤ,ဖိသၣ်တဂၤအိၣ်ဖျဲၣ်လၢပဂီၢ်,တၢ်ဟ့ၣ်လီၤပှၤလၢဖိခွါတဂၤလီၤ.ဒီးတၢ်စံၣ်ညီၣ်ကအိၣ်လၢအဖံဘၣ်ခိၣ်,ဒီးတၢ်ကကိးအမံၤလၢတၢ်လီၤလး,ပှၤကူၣ်လိာ်တဂၤ,တၢ်ဆူၣ်ကစၢ်,အစိၤစိၤအဃၣ်ဃၣ်အပၢ်,တၢ်ဃူတၢ်ဖိးအပဒိၣ်ဖးဒိၣ်တဂၤလီၤ. 7 ဒီးအဘီအမုၢ်ဒိၣ်ထီၣ်လဲၢ်ထီၣ်န့ၣ်,ဒီးအတၢ်ဃူတၢ်ဖိးန့ၣ်အကတၢၢ်တအိၣ်ဘၣ်.လၢစီၤဒၤဝံးအလီၢ်ပစိာ်အဖီခိၣ်,ဒီးလၢအဘီအမုၢ်အဖီခိၣ်ဒ်သိးအကမၤအီၤလၢအဂၢၢ်အကျၢၤ,ဒီးမၤအီၤခၢၣ်သနၢၢ်လၢတၢ်စံၣ်ညီၣ်,ဒီးတၢ်တီတၢ်လိၤ,တုၤအံၤဆူညါလီၤစိၤလီၤထီလီၤ.တၢ်သုးမုၢ်ဂီၢ်မုၢ်အယွၤအသးဆူၣ်ကမၤတၢ်န့ၣ်လီၤ.

8 ယွၤမၢလီၤတၢ်ကတိၤတထံၣ်ဆူယၤကိာ်,ဒီးလီၤဘၣ်ဝဲလၢအံၣ်စရ့လး, 9 ဒီးကယဲၢ်ပှၤဂီၢ်မုၢ်ကသ့ၣ်ညါအ့ဖရဲၣ်,ဒီးပှၤၡၤမရံဖိလၢအသးထီၣ်ထီ,ဒီးပာ်ကဖိအသးန့ၣ်စံးဝဲ, 10 အူးခဲတဖၣ်လီၤပှီၢ်လံ,ဒီးပကမၤက့ၤလၢလၢၢ်စိးပျၤအသးလီၤ.သ့ၣ်သိဝံာ်ဒၢန့ၣ်ဘၣ်တၢ်ကူာ်ကွံာ်အီၤလံ,ဒီးပကပာ်သ့ၣ်ဆှိအ့ရ့းလၢအလီၢ်န့ၣ်လီၤ.

11 မၤသးဒ်န့ၣ်ဒီးယွၤကပာ်ထီၣ်ထီစီၤရစံၣ်အဒုၣ်အဒါထီဒါအီၤ,ဒီးကထိၣ်ဂဲၤအဒုၣ်အဒါတဖၣ်လီၤ. 12 ပှၤစူၤရံဖိလၢမုၢ်ထီၣ်,ဒီးပှၤဖလ့ၡသးဖိလၢမုၢ်နုာ်,ဒီးကအီၣ်ကွံာ်အံၣ်စရ့လးဒီးအထးခိၣ်အိးထီၣ်အသးလီၤ.လၢတၢ်အံၤခဲလၢာ်အဃိန့ၣ်အသးထီၣ်တစၢ်လီၤဘၣ်,ဒီးအစုယၤထီၣ်ဒံးအသးလီၤ.

13 ဘၣ်ဆၣ်ဒီးပှၤဂီၢ်မုၢ်တဃၣ်ဘၣ်အသးဆူပှၤလၢအတီၢ်အီၤအအိၣ်ဘၣ်,ဒီးတဃုဘၣ်တၢ်သုးမုၢ်ဂီၢ်မုၢ်အယွၤဘၣ်.

14 မၤသးဒ်န့ၣ်ဒီးယွၤကဒီၣ်တဲာ်ကွံာ်လၢအံၣ်စရ့လး,အခိၣ်ဒီးအမဲၢ်,အဒ့ဒီးအဆှဲလၢမုၢ်တနံၤဃီလီၤ.

15 ပှၤသးပှၢ်ဒီးပှၤအိၣ်ဒီးအလၤကပီၤ,အဝဲဒၣ်မ့ၢ်အခိၣ်,ဒီးဝံလၢအသိၣ်က့ၤတၢ်ကဘျံးကဘျၣ်,အဝဲဒၣ်မ့ၢ်အမဲၢ်လီၤ. 16 အဂ့ၢ်ဒ်အံၤ,ပှၤလၢအဆှၢပှၤဂီၢ်မုၢ်အံၤဒုးဟးဖျိးအီၤလၢကျဲ,ဒီးပှၤလၢအဘၣ်တၢ်ဆှၢဝဲလၢအီၤန့ၣ်ဘၣ်တၢ်ယူၢ်လီၤကွံာ်အီၤလီၤ.

17 မၤသးဒ်န့ၣ်ဒီးယွၤတသးခုဘၣ်လၢအပှၤဖိၣ်သၣ်ခွါအဖီခိၣ်ဘၣ်.ဒီးအသးတအိၣ်ဘၣ်အပှၤဖိၣ်ဃဲဒီးအပှၤမုၣ်ကမဲဘၣ်.အဂ့ၢ်ဒ်အံၤ,မ့ၢ်ပှၤအၢ,ဒီးပှၤမၤတၢ်အၢကိးဂၤဒဲး,ဒီးကယဲၢ်ပှၤအထးခိၣ်ကတိၤတၢ်ကလီကလီလီၤ.လၢတၢ်ခဲလၢာ်အဃိန့ၣ်အသးထီၣ်တစၢ်လီၤဘၣ်ဒီးအစုယၤထီၣ်ဒံးအသးလီၤ.

18 အဂ့ၢ်ဒ်အံၤ,တၢ်အၢအီၣ်ကွံာ်တၢ်ဒ်မ့ၣ်အူအသိး,ဒီးအီၣ်ကွံာ်တၤဆှုၣ်တၤမဲန့ၣ်,ဒီးဆိၣ်ကဲၤတၢ်လၢသ့ၣ်တီၣ်အကျါ,ဒီးထီၣ်ထီဒ်မ့ၣ်အူခုၣ်အထီၣ်ထီအသိးန့ၣ်လီၤ.

19 လၢတၢ်သုးမုၢ်ဂီၢ်မုၢ်အယွၤအသးကဲၤထီၣ်အဃိန့ၣ်တၢ်ခံးန့ၢ်ထံဧိၤကီၢ်ဧိၤ,ဒီးပှၤဂီၢ်မုၢ်န့ၣ်မၤသးဒ်သ့ၣ်မုၣ်လၢမ့ၣ်အူအဂီၢ်လီၤ.ပှၤတသးလီဘၣ်အဒီပုၢ်ဝဲၢ်ဘၣ်. 20 ဒီးကအ့ၣ်တဲာ်တၢ်လၢအစုထွဲ,ဒီးတၢ်ကသၣ်ဝံၤအသး,ဒီးအီၣ်ကွံာ်တၢ်လၢအစုစ့ၣ်,ဒီးတဘျဲးအီၣ်ဘၣ်,ဒီးအီၣ်အစုဒုၣ်ဒၣ်ဝဲအညၣ်ကိးဂၤဒဲးလီၤ. 21 မနၤရှ့ၤန့ၣ်အ့ဖရဲၣ်,ဒီးအ့ဖရဲၣ်န့ၣ်မနၤရှ့ၤ,ဒီးအဝဲသ့ၣ်တဖၣ်တပူၤဃီန့ၣ်ထီဒါယူဒၤလီၤ.လၢတၢ်ခဲလၢာ်အဃိန့ၣ်အသးထီၣ်တစၢ်လီၤဘၣ်,ဒီးအစုယၤထီၣ်ဒံးအသးလီၤ.