Jam 2 | KswSKMB | STEP | ယဒီပုၢ်ဝဲၢ်သ့ၣ်ဧၢ,တၢ်လၤကပီၤအကစၢ်,ပကစၢ်ယ့ၣ်ရှူးခရံာ်,အတၢ်နာ်န့ၣ်,သုတအိၣ်ဒီးတၢ်ကွၢ်မဲာ်တဂ့ၤ.

‏ James 2

1 ယဒီပုၢ်ဝဲၢ်သ့ၣ်ဧၢ,တၢ်လၤကပီၤအကစၢ်,ပကစၢ်ယ့ၣ်ရှူးခရံာ်,အတၢ်နာ်န့ၣ်,သုတအိၣ်ဒီးတၢ်ကွၢ်မဲာ်တဂ့ၤ. 2 အဂ့ၢ်ဒ်အံၤ,ပှၤလၢအသိးပသံးထူအိၣ်ဒီးအကူအသိးကပြုၢ်ကပြီၤတဂၤမ့ၢ်ဟဲနုာ်ဆူသုဘူၣ်ဘျီၣ်ပူၤ,ဒီးပှၤဖှီၣ်ဖိယာ်ဖိတဂၤမ့ၢ်ဟဲနုာ်စ့ၢ်ကီး,အိၣ်ဒီးအကူအသိးတဂ့ၤဘၣ်, 3 ဒီးသုမ့ၢ်ကွၢ်မဲာ်ပှၤကူတၢ်သိးတၢ်ကပြုၢ်ကပြီၤတဂၤ,ဒီးစံး,ဆ့ၣ်နီၤဖဲအံၤလၢအလီၢ်ဂ့ၤ,ဒီးစံးဘၣ်ပှၤဖှီၣ်ဖိယာ်ဖိတဂၤ,ဆၢထၢၣ်ဖဲန့ၣ်မ့ၢ်ဂ့ၤ,ဆ့ၣ်နီၤဖဲအံၤလၢယခီၣ်ယီၢ်လီၢ်အဖီလာ်မ့ၢ်ဂ့ၤဒီး, 4 သုစံၣ်ညီၣ်ဖုၣ်ထီလိာ်သုသး,ဒီးကဲထီၣ်ပှၤစံၣ်ညီၣ်တၢ်လၢအကူၣ်တၢ်အအၢအသီန့ၣ်,တမ့ၢ်ဘၣ်ဧါ.

5 ယဒီပုၢ်ဝဲၢ်လၢတၢ်အဲၣ်အီၤသ့ၣ်ဧၢ,ဒိကနၣ်တက့ၢ်.ယွၤဃုထၢဟီၣ်ခိၣ်အပှၤဖှီၣ်ဖိယာ်ဖိ,ထူးဝဲတီၤဝဲလၢတၢ်နၣ်,ဒ်သိးအကန့ၢ်ဘၣ်သါအဘီအမုၢ်လၢအစံးပာ်ဝဲလၢအကဟ့ၣ်လီၤပှၤလၢအအဲၣ်အီၤန့ၣ်,တမ့ၢ်ဘၣ်ဧါ. 6 မ့မ့ၢ်သုဝဲသ့ၣ်,သုမၤတရီတပါပှၤဖှီၣ်ဖိယာ်ဖိလီၤ.ပှၤထူးပှၤတီၤဆီၣ်ဘံးဆီၣ်ဘၢသု,ဒီးထုးသုဆူတၢ်စံၣ်ညီၣ်ကွီၢ်အအိၣ်န့ၣ်,တမ့ၢ်ဘၣ်ဧါ. 7 အဝဲသ့ၣ်တဖၣ်န့ၣ်ဒုၣ်ဒွဲၣ်တၢ်အမံၤဂ့ၤလၢတၢ်ကိးသုမံၤလၢအီၤန့ၣ်,တမ့ၢ်ဘၣ်ဧါ.

8 သုမ့ၢ်မၤလၢထီၣ်ပှဲၤထီၣ်တၢ်သိၣ်တၢ်သီစီၤပၤ,ဒ်တၢ်ကွဲးအသးအသိးန့ၣ်,အဲၣ်ပှၤလၢနဃၢၤဒ်နအဲၣ်လီၤနသးအသိးတက့ၢ်န့ၣ်ဒီး,သုမၤတၢ်ဂ့ၤဂ့ၤဘၣ်ဘၣ်လီၤ. 9 မ့မ့ၢ်သုမ့ၢ်ကွၢ်မဲာ်ပှၤကညီဒီး,သုမၤတၢ်ဒဲးဘး,ဒီးဘၣ်တၢ်သိၣ်ဃီၣ်လၢတၢ်သိၣ်တၢ်သီ,ဒ်ပှၤမၤကမၣ်ဖိအသိးလီၤ. 10 အဂ့ၢ်ဒ်အံၤ,ဖဲဒၣ်ပှၤလၢအတိၢ်န့ၢ်တၢ်သိၣ်တၢ်သီခဲလၢာ်,ဒီးမၤကမၣ်တၢ်တထံၣ်ဧိၤတဂၤန့ၣ်,ကဲလၢပှၤဂ့ၤဘၣ်တၢ်လၢတၢ်ခဲလၢာ်အဃိလီၤ. 11 အဂ့ၢ်ဒ်အံၤ,ပှၤလၢအစံးဝဲ,အဲၣ်ဘၢမါအဲၣ်ဘၢဝၤတဂ့ၤန့ၣ်,စံးစ့ၢ်ကီးဝဲ,မၤသံပှၤကညီတဂ့ၤ. ^{▼▼2:11 ၂မိၤ.၂၀း၁၄}သတးဒီး,နမ့ၢ်တအဲၣ်ဘၢမါအဲၣ်ဘၢဝၤဘၣ်ဆၣ်ဒီး,နမ့ၢ်မၤသံပှၤကညီဒီး,နကဲထီၣ်ပှၤလုၣ်သ့ၣ်ခါပတာ်တၢ်သိၣ်တၢ်သီလီၤ. 12 ကတိၤတၢ်ဒ်အံၤ,ဒီးမၤတၢ်ဒ်အံၤ,ဒ်ပှၤလၢအကဘၣ်တၢ်စံၣ်ညီၣ်အီၤလၢတၢ်ထူၣ်ဖျဲးအတၢ်သိၣ်တၢ်သီအသိးန့ၣ်တက့ၢ်. 13 အဂ့ၢ်ဒ်အံၤ,ပှၤလၢအတသးကညီၤဘၣ်တၢ်ဘၣ်န့ၣ်,တၢ်သးကညီၤတအိၣ်ဘၣ်ဒီး,ကဘၣ်တၢ်စံၣ်ညီၣ်လီၤ.ဒီးတၢ်သးကညီၤန့ၣ်,ပာ်ဒိၣ်ပာ်ထီအသးလၢတၢ်စံၣ်ညီၣ်အဖီခိၣ်လီၤ.

14 ယဒီပုၢ်ဝဲၢ်သ့ၣ်ဧၢ,ပှၤတဂၤဂၤမ့ၢ်စံးလၢသါအိၣ်ဒီးတၢ်နာ်,ဒီးမ့ၢ်တအိၣ်ဘၣ်ဒီးတၢ်မၤဘၣ်ဒီး,မ့ၢ်အဘျုးမနုၤလဲၣ်.တၢ်နာ်န့ၣ်အုၣ်က့ၤခီၣ်က့ၤအီၤဘၣ်ကသ့ဧါ. 15 ဒီးဒီပုၢ်ဝဲၢ်မုၣ်မ့ၢ်ဂ့ၤဒီပုၢ်ဝဲၢ်ခွါမ့ၢ်ဂ့ၤ,မ့ၢ်အိၣ်ဘ့ၣ်ဆ့,ဒီးအတၢ်အီၣ်တနံၤအဂီၢ်တနံၤအဂီၢ်မ့ၢ်တအိၣ်ဘၣ်ဒီး, 16 ပှၤလၢသုကျါတဂၤမ့ၢ်စံးဘၣ်အီၤ,က့ၤက့ၤမုာ်မုာ်တက့ၢ်,အိၣ်လၢၤပုးတြူး,ဒီးအီၣ်ဘျဲးအီၣ်တၢ်တက့ၢ်န့ၣ်ဘၣ်ဆၣ်ဒီး,သုမ့ၢ်တဟ့ၣ်ဘၣ်တၢ်လၢအကြၢးဒီးအနီၢ်ခိဘၣ်ဒီး,မ့ၢ်အဘျုးမနုၤတမံၤလဲၣ်. 17 ဒ်န့ၣ်အသိးတၢ်နာ်မ့ၢ်တအိၣ်ဘၣ်ဒီးတၢ်မၤဒီး,မ့ၢ်တၢ်သံလၢအကစၢ်ဒၣ်ဝဲလီၤ. 18 ဘၣ်ဆၣ်ဒီးပှၤတဂၤဂၤကစံး,နဲဒၣ်အံၤ,နအိၣ်ဒီးတၢ်နာ်,ယဲဒၣ်ယအိၣ်ဒီးတၢ်မၤလီၤ.တၢ်မၤတၢ်တအိၣ်ဘၣ်ဒီး,ဒုးနဲၣ်ယၤလၢနတၢ်နာ်တက့ၢ်.ဒီးယကဒုးနဲၣ်နၤယတၢ်နာ်လၢယမၤတၢ်အဃိလီၤ. 19 နနာ်လၢယွၤအိၣ်တဂၤဃီလီၤ.နမၤတၢ်ဂ့ၤလီၤ.တၢ်နါတဖၣ်နာ်စ့ၢ်ကီးတၢ်,ဒီးကနိးကစုာ်လီၤ. 20 ဘၣ်ဆၣ်ဒီးပှၤတဂိာ်တသီၣ်ဘၣ်တၢ်တဂၤဧၢ,တၢ်မၤတဖၣ်တအိၣ်ဘၣ်ဒီး,တၢ်နာ်မ့ၢ်တၢ်သံန့ၣ်,တၢ်မိၣ်သ့ၣ်ညါနသးစ့ၢ်ကီးဧါ.

21 ပပၢ်စီၤအၤဘြၤဟၣ်ပာ်ထီၣ်အဖိခွါစီၤအံၤစဲးလၢတၢ်လုၢ်လီၢ်အဖီခိၣ်ဒီး,တၢ်ပာ်တီပာ်လိၤအီၤလၢတၢ်မၤတဖၣ်အဃိ,တမ့ၢ်ဘၣ်ဧါ. 22 နထံၣ်လၢတၢ်နာ်မၤဃုာ်ဒီးအတၢ်မၤတဖၣ်,ဒီးတၢ်နာ်လၢထီၣ်ပှဲၤထီၣ်လၢတၢ်မၤ,တမ့ၢ်ဘၣ်ဧါ. 23 ဒီးလံာ်န့ၣ်လၢထီၣ်ပှဲၤထီၣ်လၢအစံးဝဲဒၣ်,ဒီးစီၤအၤဘြၤဟၣ်နာ်ယွၤ,ဒီးတၢ်ပးကဲလၢတၢ်တီတၢ်လိၤလၢအဂီၢ်, ^{▼▼2:2 3 ၁မိၤ.၁၅း၆}ဒီးတၢ်ကိးအီၤလၢယွၤ,အတံၤအသကိးလီၤ. ^{▼▼2:2 3 ၡါ.၄၁း၈}

24 မၤသးဒ်န့ၣ်ဒီး,သုထံၣ်လၢပှၤကညီဘၣ်တၢ်ပာ်တီပာ်လိၤအီၤလၢတၢ်မၤတဖၣ်အဃိ,ဒီးတမ့ၢ်ဘၣ်ထဲတၢ်နာ်အဃိဘၣ်. 25 ဒီးဒ်န့ၣ်အသိးဃဲသဲမုၣ်နီၢ်ရၤဃးတဂၤတူၢ်လိာ်ကလူးတဖၣ်,ဒီးမၢအက့ၤက့ၤကျဲတဘိဒၣ်ဒီး,ဘၣ်စ့ၢ်ကီးတၢ်ပာ်တီပာ်လိၤအီၤလၢတၢ်မၤတဖၣ်အဃိ,တမ့ၢ်ဘၣ်ဧါ. 26 အဂ့ၢ်ဒ်အံၤ,ဒ်နီၢ်ခိတအိၣ်ဘၣ်ဒီးသးန့ၣ်မ့ၢ်တၢ်သံအသိးန့ၣ်တၢ်နာ်တအိၣ်ဘၣ်ဒီးတၢ်မၤတဖၣ်မ့ၢ်တၢ်သံစ့ၢ်ကီးဒ်န့ၣ်အသိးလီၤ.