Jeremiah 1
1စီၤဃံးလကံယၤအဖိခွါစီၤယံးရမံယၤလၢပှၤလုၢ်တၢ်အဒိၣ်အကျါလၢအအိၣ်ဝဲလၢဧၤနသိးလၢကီၢ်ဘံၣ်ယၤမံၣ်အပူၤတဂၤအတၢ်ကတိၤ. 2အဝဲဒၣ်န့ၣ်ယွၤအကလုၢ်ဘၣ်အီၤလၢယူဒၤအစီၤပၤစီၤအၤမိၣ်အဖိခွါစီၤယိၤၡံယၤအမုၢ်နံၤတဖၣ်လၢအကဲစီၤပၤပှဲၤထီၣ်တဆံသၢနံၣ်တနံၣ်န့ၣ်လီၤ. 3ဒီးဘၣ်စ့ၢ်ကီးဝဲလၢယူဒၤအစီၤပၤစီၤယိၤၡံယၤအဖိခွါစီၤယဟိယါကံၣ်အမုၢ်နံၤတဖၣ်တုၤလီၤလၢယူဒၤအစီၤပၤစီၤယိၤၡံယၤအဖိခွါစီၤစံးဒကံယၤအနံၣ်ပှဲၤထီၣ်တဆံတနံၣ်,တုၤလီၤလၢတၢ်စိာ်မၢကဲကုၢ်ပှၤယရူၤၡလ့ၣ်ဖိလၢလါယဲၢ်လါတလါအပူၤလီၤ. 4ဒီးယွၤအကလုၢ်ဘၣ်ယၤဒီးစံးဝဲဒၣ်, 5လၢယတချုးတ့လီၤဒံးဘၣ်နၤလၢပှၤဟၢဖၢပူၤန့ၣ်ဘၣ်ဒီး,ယသ့ၣ်ညါနၤ,ဒီးနတချုးဟဲထီၣ်ဒံးဘၣ်လၢပှၤဒၢလီၢ်အပူၤန့ၣ်ဘၣ်ဒီး,ယပာ်နၤလီၤဆီဒၣ်တၢ်,ဒီးပာ်နၤလၢဝံတဂၤလၢပှၤကလုာ်တဖၣ်အဂီၢ်လီၤ. 6ဒီးယစံး,အၣ်လါ,ကစၢ်ဧၢ,ကွၢ်ကွၢ်,ယကတိၤတၢ်တသ့ဘၣ်.အဂ့ၢ်ဒ်အံၤ,ယမ့ၢ်ဖိသၣ်တဂၤလီၤ. 7ဒီးယွၤစံးဘၣ်ယၤ,စံးလၢယမ့ၢ်ဖိသၣ်န့ၣ်တဂ့ၤ.အဂ့ၢ်ဒ်အံၤ,နဘၣ်လဲၤဆူကယဲၢ်ပှၤလၢယမၢလီၤနၤဆူအအိၣ်,ဒီးနဘၣ်ကတိၤကယဲၢ်တၢ်လၢယမၤလိာ်နၤလီၤ. 8ပျံၤအမဲာ်တဂ့ၤ.အဂ့ၢ်ဒ်အံၤ,ယအိၣ်ဒီးနၤဒ်သိးယကမၤပူၤဖျဲးနၤလီၤ,ယွၤစံးဝဲဒၣ်. 9ဒီးယွၤယူာ်ထီၣ်အစု,ဒီးထိးဘၣ်ယထးခိၣ်,ဒီးယွၤစံးဘၣ်ယၤ,ကွၢ်ကွၢ်,ယပာ်တၢ်ကတိၤလၢနထးခိၣ်လံ. 10ကွၢ်ကွၢ်,တၢ်လၢမုၢ်မဆါတနံၤအံၤ,ယပာ်လီၤနၤလၢပှၤကလုာ်တဖၣ်အဖီခိၣ်ဒီးလၢဘီမုၢ်တဖၣ်အဖီခိၣ်,ဒ်သိးနကထဲးထီၣ်တၢ်,ဒီးမၤလီၤပှီၢ်တၢ်,ဒီးမၤဟးဂီၤတၢ်,ဒီးရူၢ်လီၤတၢ်,ဒ်သိးနကမၤထီၣ်က့ၤတၢ်,ဒီးသူၣ်တၢ်ဖျးတၢ်လီၤ. 11ဒီးယွၤအကလုၢ်ဘၣ်ယၤဒီးစံးဝဲဒၣ်,စီၤယံးရမံယၤဧၢ,နထံၣ်တၢ်မနုၤလဲၣ်.ဒီးယစံး,ယထံၣ်သ့ၣ်ၡၤကးအဘိလီၤ. 12ဒီးယွၤစံးဘၣ်ယၤ,နထံၣ်တၢ်ဘၣ်လံ.အဂ့ၢ်ဒ်အံၤ,ယကမၤလၢထီၣ်ပှဲၤထီၣ်ယကလုၢ်ချ့သဒံးလီၤ. 13ဒီးယွၤအကလုၢ်ဘၣ်ယၤခံဘျီတဘျီ,ဒီးစံးဝဲဒၣ်,နထံၣ်တၢ်မနုၤတမံၤလဲၣ်.ဒီးယစံး,ယထံၣ်ဘၣ်သပၢၤကလာ်ထီၣ်,ဒီးအမဲာ်ဃၣ်အသးလၢကလံၤစိးတခီလီၤ. 14ဒီးယွၤစံးဘၣ်ယၤ,တၢ်အၢလၢကလံၤစိးတခီကဟဲဘၣ်ပှၤထံဖိကီၢ်ဖိခဲလၢာ်လီၤ. 15အဂ့ၢ်ဒ်အံၤ,ကွၢ်ကွၢ်,ယကကိးန့ၢ်ဘီဧိၤမုၢ်ဧိၤလၢကလံၤစိးအပှၤကလုာ်ခဲလၢာ်န့ၣ်,ယွၤစံးဝဲဒၣ်,ဒီးကဟဲဝဲ,ဒီးကပာ်တဂၤအလီၢ်ပစိာ်ဒၣ်ဝဲ,တဂၤအလီၢ်ပစိာ်ဒၣ်ဝဲ,ဖဲတၢ်လဲၤနုာ်လၢယရူၤၡလ့ၣ်အပဲတရီအပူၤ,ဒီးလၢအခိၣ်ဒူအဃၢၤဝးတရံးအီၤ,ဒီးလၢယူဒၤအဝ့ၢ်ခဲလၢာ်အဃၢၤလီၤ. 16ယကစံၣ်ညီၣ်အကွီၢ်,ဒီးစံၣ်ညီၣ်ဃၣ်အီၤလၢတၢ်အၢခဲလၢာ်အဃိ,လၢအလဲၤသဒၣ်ယၤ,ဒီးဆိၣ်ကဲၤတၢ်နၢမူလၢကစၢ်အဂၤတဖၣ်အဂီၢ်,ဒီးဘါတၢ်လၢအစုတ့န့ၢ်ဝဲအဃိလီၤ. 17ဒီးနဲဒၣ်အံၤကံာ်တူာ်နယီၢ်ဒ့,ဒီးဂဲၤဆၢထၢၣ်,ဒီးစံးဘၣ်အီၤလၢကယဲၢ်တၢ်လၢယမၤလိာ်နၤတက့ၢ်.ပျံၤအမဲာ်တဂ့ၤ.ယကပာ်မဲာ်ဆှးဘၣ်ဖုးနၤလၢအမဲာ်ညါလီၤ. 18ဒီးကွၢ်ကွၢ်,လၢမုၢ်မဆါတနံၤအံၤယပာ်နၤလၢဝ့ၢ်အိၣ်ဒီးအခိၣ်ဒူတဖျၢၣ်,ဒီးထူၣ်ထးတကျီၣ်,ဒီးအဒူၣ်တိၢ်တဒူၣ်ထီဒါကီၢ်ဒီဘ့ၣ်ညါ,ဒီးထီဒါယူဒၤအစီၤပၤ,ဒီးထီဒါအပဒိၣ်ဖးဒိၣ်တဖၣ်,ထီဒါအပှၤလုၢ်တၢ်အဒိၣ်,ဒီးထီဒါထံဧိၤကီၢ်ဧိၤအပှၤဂီၢ်မုၢ်လီၤ. 19ဒီးကဒုးတၢ်ဒီးနၤ,ဒီးတမၤဃၣ်ဘၣ်နၤဘၣ်.အဂ့ၢ်ဒ်အံၤ,ယအိၣ်ဒီးနၤဒ်သိးယကမၤပူၤဖျဲးနၤလီၤ.ယွၤစံးဝဲဒၣ်.
Copyright information for
KswSKMB