Jer 12 | KswSKMB | STEP | တုၤယလိာ်ကွီၢ်ဒီးနၤဒီး,နတီနလိၤလီၤ,ယွၤဧၢ.ဘၣ်ဆၣ်ဒီး,ဒုးကတိၤယၤလၢနစံၣ်ညီၣ်တၢ်အဂ့ၢ်အကျိၤတက့ၢ်.ပှၤတတီတလိၤအကျဲဘီၣ်ထီၣ်ညီထီၣ်မ့ၢ်အဘၣ်မနုၤလဲၣ်.ပှၤလၢအမၤအကလုၢ်တတီဘၣ်ခဲလၢာ်န့ၣ်အိၣ်မုာ်မ့ၢ်အဘၣ်မနုၤလဲၣ်.

‏ Jeremiah 12

1 တုၤယလိာ်ကွီၢ်ဒီးနၤဒီး,နတီနလိၤလီၤ,ယွၤဧၢ.ဘၣ်ဆၣ်ဒီး,ဒုးကတိၤယၤလၢနစံၣ်ညီၣ်တၢ်အဂ့ၢ်အကျိၤတက့ၢ်.ပှၤတတီတလိၤအကျဲဘီၣ်ထီၣ်ညီထီၣ်မ့ၢ်အဘၣ်မနုၤလဲၣ်.ပှၤလၢအမၤအကလုၢ်တတီဘၣ်ခဲလၢာ်န့ၣ်အိၣ်မုာ်မ့ၢ်အဘၣ်မနုၤလဲၣ်. 2 နသူၣ်လီၤအီၤ,ဒီးအဂံၢ်စဲၤလီၤ,ဒိၣ်ထီၣ်ဝဲ,ဒီးသၣ်ထီၣ်ဝဲလီၤ.နအိၣ်ဘူးလၢအထးခိၣ်,ဒီးယံၤလၢအသးလီၤ. 3 ဘၣ်ဆၣ်ဒီးယွၤဧၢ,နသ့ၣ်ညါယၤ,နကွၢ်ယၤ,ဒီးမၤကွၢ်ယသးလၢအအိၣ်ဒီးနၤလီၤ.ထုးထီၣ်ကွံာ်အီၤဒ်သိလၢတၢ်မၤသံအီၤအဂီၢ်အသိး,ဒီးပာ်အီၤလၢတၢ်မၤသံအမုၢ်နံၤအဂီၢ်တက့ၢ်. 4 ကီၢ်ကသူၣ်အုးသးအုး,ဒီးနီၣ်ဧိၤမံၤဧိၤလၢကီၢ်ဒီဘ့ၣ်ညါအပူၤကဃ့ထီၣ်ကွံာ်လၢပှၤလၢအအိၣ်ဝဲဆိးဝဲလၢအပူၤအတၢ်အၢအဃိန့ၣ်ဆံးယံာ်လဲၣ်.ဆၣ်ဖိကီၢ်ဖိ,ဒီးထိၣ်ဧိၤလံၣ်ဧိၤလၢာ်ကွံာ်လီၤ.အဂ့ၢ်ဒ်အံၤ,စံးဝဲတကူၢ်သ့ၣ်,အဝဲဒၣ်တထံၣ်ဘၣ်ပကတၢၢ်ဘၣ်.

5 နမ့ၢ်ဃ့ၢ်ဒီးပှၤခီၣ်သုးဖိ,ဒီးအဝဲသ့ၣ်မၤဘှံးနသးဒီး,နကမၤတၢ်ဒီးကသ့ၣ်သုးဖိဒ်လဲၣ်.ဒီးတၢ်မ့ၢ်မၤသးဒ်န့ၣ်လၢကီၢ်မုာ်အပူၤဒီး,တုၤယၢ်ဒ့ၣ်အထံလုၢ်ဘၢတၢ်ဒီး,နကမၤဒ်လဲၣ်. 6 အဂ့ၢ်ဒ်အံၤ,နဒီပုၢ်ဝဲၢ်ဒၣ်လဲာ်,နပၢ်အပှၤဟံၣ်ဖိမၤနၤဒီးလီတၢ်,ဒီးမ့ၢ်မးအကိးပသူထီၣ်ထွဲနခံလီၤ.မ့ၢ်ကတိၤတၢ်မုာ်မုာ်ဒီးနၤဘၣ်ဆၣ်ဒီးနာ်အီၤတဂ့ၤ.

7 ယလဲၤသဒၣ်လံယဟံၣ်,ယဟးဖးလံဒီးယတၢ်န့ၢ်သါ,တၢ်လၢယသးအဲၣ်အီၤန့ၣ်ယဟ့ၣ်လီၤကွံာ်လံအီၤဆူအဒုၣ်အဒါအစုပူၤလံ. 8 ယတၢ်န့ၢ်သါမ့ၢ်လၢယဂီၢ်ဒ်ခ့ယုၢ်လၢပှၢ်လၢ်ကျါအသိးန့ၣ်လီၤ.ထုထီၣ်အကလုၢ်ထီဒါယၤလီၤ.မၤသးဒ်န့ၣ်ဒီးယသးဟ့အီၤလီၤ.

9 ယတၢ်န့ၢ်သါန့ၣ်မ့ၢ်လၢယဂီၢ်,မၤသးဒ်ထိၣ်အဒူတဘ့ၣ်အသိး,ထိၣ်အဒူအိၣ်ဝးတရံးဝဲထီဒါအီၤလီၤ.ဟဲ,ဒုးအိၣ်ဖှိၣ်ရိဖှိၣ်ဆၣ်ဖိကီၢ်ဖိအမံၤလၢပှၢ်လၢ်ကျါန့ၣ်တက့ၢ်.ဒုးဟဲအီၣ်တၢ်တက့ၢ်. 10 ပှၤကွၢ်သိအါဂၤမၤဟးဂီၤလံယစပံးအလီၢ်,ယီၢ်လီၤတံၢ်ယဂီၢ်လၢအခီၣ်ဖီလာ်,မၤယဂီၢ်လၢအမုာ်ဝဲန့ၣ်လၢပှၢ်မုၢ်ကနၢအိၣ်သယုၢ်လီၤ. 11 မၤသယုၢ်အီၤလီၤ.အိၣ်ဝဲသယုၢ်ဒီးသူၣ်အုးသးအုးလၢယဂီၢ်လီၤ.ကီၢ်ဒီဘ့ၣ်ညါအိၣ်သယုၢ်လီၤ.အဂ့ၢ်ဒ်အံၤ,ပှၤတပးကဲဘၣ်လၢအသးနီတဂၤဘၣ်. 12 ပှၤဂုာ်ဆူၣ်ပျီဆူၣ်ဟဲထီၣ်ဘးတၢ်အလီၢ်ထီၣ်ထီခဲလၢာ်လၢပှၢ်မုၢ်ကနၢလီၤ.အဂ့ၢ်ဒ်အံၤ,ယွၤအနးအီၣ်တၢ်လၢကီၢ်အကတၢၢ်ပၢၢ်လၢကီၢ်အကတၢၢ်လီၤ.တၢ်ဖံးတၢ်ညၣ်တအိၣ်မုာ်ဘၣ်နီတဂၤဘၣ်. 13 ဖှံလံဘုကၠူၣ်,ဒီးကကူးတၤဆှုၣ်လီၤ.မၤဘှံးလီၤအသးလံ,ဒီးတဘၣ်ဘျုးဘၣ်.ကမဲာ်ဆှးလၢအတၤသၣ်အဃိ,လၢယွၤအသးကဲၤထီၣ်အဃိလီၤ.

14 ယွၤစံးထီဒါပှၤအအၢအိၣ်လၢယဃၢၤလၢအထိးဘၣ်တၢ်န့ၢ်သါလၢယဒုးန့ၢ်သါယပှၤဂီၢ်မုၢ်အံၣ်စရ့လးဒ်အံၤ,ကွၢ်ကွၢ်,ယကထဲးကွံာ်အီၤလၢအကီၢ်ပူၤဒီးယကကထဲးကွံာ်ယူဒၤအပှၤဟံၣ်ဖိလၢအကျါလီၤ.

15 ဒီးတၢ်ကမၤအသးလၢယထဲးထီၣ်ကွံာ်အီၤအလီၢ်ခံန့ၣ်ယကဟဲက့ၤဒီးယကသးအိၣ်က့ၤအီၤ,ဒီးယကဒုးဟဲက့ၤကဒါက့ၤအီၤဆူအတၢ်န့ၢ်သါစုာ်စုာ်,ဒီးဆူအကီၢ်ပူၤစုာ်စုာ်လီၤ. 16 ဒီးတၢ်ကမၤအသးလၢအမ့ၢ်မၤလိယပှၤဂီၢ်မုၢ်အကျဲသပှၢ်တၢၢ်,ဒ်သိးအကဆိၣ်တၢ်လၢယမံၤအမဲာ်ညါ,ယွၤမူဝဲ,ဒ်အသိၣ်လိတ့ၢ်ယပှၤဂီၢ်မုၢ်လၢအကဆိၣ်တၢ်လၢဘဧၤလးအမဲာ်ညါအသိးန့ၣ်ဒီး,တၢ်ကသူၣ်ထီၣ်ဝဲလၢယပှၤဂီၢ်မုၢ်အကျါလီၤ. 17 ဘၣ်ဆၣ်ဒီးမ့ၢ်တဒိကနၣ်ဘၣ်တၢ်ဘၣ်ဒီး,ယကထဲးထီၣ်ကွံာ်ပှၤတကလုာ်အဝဲန့ၣ်,ယွၤစံးဝဲဒၣ်,ဒီးမၤဟးဂီၤအီၤလီၤ.